ಮೇ ತಿಂಗಳಲ್ಲಿ ರಫ್ತು ಶೇ. 18 ಹೆಚ್ಚಳ; ಆಮದು ಹೊರೆಯೂ ಏರಿಕೆ; ಟ್ರೇಡ್ ಡೆಫಿಸಿಟ್ ಇಳಿಕೆ
India Exports Surge 18% in May to $45.2B: ಮೇ ತಿಂಗಳಲ್ಲಿ ಭಾರತದ ಸರಕು ರಫ್ತು ಶೇ.18ರಷ್ಟು ಏರಿಕೆ ಕಂಡಿದ್ದು, ಎಂಜಿನಿಯರಿಂಗ್ ಮತ್ತು ಎಲೆಕ್ಟ್ರಾನಿಕ್ಸ್ ಸರಕುಗಳು ಪ್ರಮುಖ ಕೊಡುಗೆ ನೀಡಿವೆ. ಆದರೆ, ಆಮದು ಏರಿಕೆಯಿಂದ ವ್ಯಾಪಾರ ಕೊರತೆ ವಿಸ್ತರಿಸಿದೆ. ಸೇವಾ ವಲಯದ ರಫ್ತು ಮತ್ತು ವಿದೇಶಿ ಹಣ ರವಾನೆ ದೇಶದ ಆರ್ಥಿಕತೆಗೆ ಬಲ ನೀಡಿದೆ. ಇರಾನ್-ಯುಎಸ್ ಒಪ್ಪಂದ ಮತ್ತು ಆರ್ಬಿಐ ವಿಶ್ಲೇಷಣೆಯು ಮುಂಬರುವ ದಿನಗಳಲ್ಲಿ ರಫ್ತು ಬೆಳವಣಿಗೆಗೆ ಸಕಾರಾತ್ಮಕ ಭರವಸೆ ಮೂಡಿಸಿದೆ.
Updated on:Jun 15, 2026 | 7:13 PM
ನವದೆಹಲಿ, ಜೂನ್ 15: ಎಂಜಿನಿಯರಿಂಗ್ ಸರಕುಗಳು, ಪೆಟ್ರೋಲಿಯಂ ಉತ್ಪನ್ನಗಳು ಮತ್ತು ಎಲೆಕ್ಟ್ರಾನಿಕ್ಸ್ ಸರಕುಗಳ ಭರ್ಜರಿ ಮಾರಾಟದ ಹಿನ್ನೆಲೆಯಲ್ಲಿ ಮೇ ತಿಂಗಳಲ್ಲಿ ಭಾರತದ ಸರಕು ರಫ್ತು (Merchandise Exports) ಶೇ. 18 ರಷ್ಟು ಹೆಚ್ಚಾಗಿದೆ. ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯವು ಬಿಡುಗಡೆ ಮಾಡಿರುವ ತಾತ್ಕಾಲಿಕ ಅಂಕಿ-ಅಂಶಗಳ ಪ್ರಕಾರ, ಕಳೆದ ವರ್ಷದ ಮೇ ತಿಂಗಳಿನಲ್ಲಿದ್ದ $38.30 ಬಿಲಿಯನ್ಗೆ ಹೋಲಿಸಿದರೆ ಈ ಬಾರಿ ರಫ್ತು $45.20 ಬಿಲಿಯನ್ಗೆ ತಲುಪಿದೆ.
ಆದರೆ, ಇದೇ ಅವಧಿಯಲ್ಲಿ ಆಮದು (Imports) ಕೂಡ ಶೇ. 20.6 ರಷ್ಟು ಏರಿಕೆಯಾಗಿದ್ದು, $60.86 ಬಿಲಿಯನ್ನಿಂದ $73.41 ಬಿಲಿಯನ್ಗೆ ತಲುಪಿದೆ. ಇದರ ಪರಿಣಾಮವಾಗಿ, ದೇಶದ ವ್ಯಾಪಾರ ಕೊರತೆ (Trade Deficit – ಆಮದು ಮತ್ತು ರಫ್ತಿನ ನಡುವಿನ ವ್ಯತ್ಯಾಸ) ಕಳೆದ ವರ್ಷದ ಮೇ ತಿಂಗಳಿನಲ್ಲಿದ್ದ $22.56 ಬಿಲಿಯನ್ನಿಂದ ಈ ಬಾರಿ $28.21 ಬಿಲಿಯನ್ಗೆ ಏರಿಕೆಯಾಗಿದೆ. ಆದರೆ, ಏಪ್ರಿಲ್ ತಿಂಗಳಿಗೆ ಹೋಲಿಸಿದರೆ ಟ್ರೇಡ್ ಡೆಫಿಸಿಟ್ನಲ್ಲಿ ಇಳಿಕೆಯಾಗಿದೆ.
ಸೇವಾ ವಲಯದ ರಫ್ತು ಮತ್ತು ಒಟ್ಟಾರೆ ವ್ಯಾಪಾರ
ಮೇ ತಿಂಗಳಲ್ಲಿ ಸೇವಾ ವಲಯದ ರಫ್ತು $32.46 ಬಿಲಿಯನ್ನಿಂದ $36.76 ಬಿಲಿಯನ್ಗೆ ಏರಿದೆ. ಸೇವೆಗಳ ಆಮದು ಕೂಡ $16.70 ಬಿಲಿಯನ್ನಿಂದ $19.06 ಬಿಲಿಯನ್ಗೆ ಹೆಚ್ಚಾಗಿದೆ.
ಇದನ್ನೂ ಓದಿ: ಸಂಬಳ ₹15,000 ಇದ್ದರೂ ಸಾಲವಿಲ್ಲದೆ ಬದುಕಬಹುದೇ? ಹೌದು ಎನ್ನುತ್ತದೆ ಈ ಸರಳ ಬಜೆಟ್ ಸೂತ್ರ
ಸರಕು ಮತ್ತು ಸೇವೆಗಳೆರಡನ್ನೂ ಒಳಗೊಂಡಂತೆ ಭಾರತದ ಒಟ್ಟು ರಫ್ತು $81.96 ಬಿಲಿಯನ್ ತಲುಪಿದೆ (ಕಳೆದ ವರ್ಷ $70.76 ಬಿಲಿಯನ್ ಇತ್ತು). ಒಟ್ಟು ಆಮದು $92.47 ಬಿಲಿಯನ್ಗೆ ಏರಿದೆ (ಕಳೆದ ವರ್ಷ $77.55 ಬಿಲಿಯನ್ ಇತ್ತು). ಸೇವೆಗಳನ್ನೂ ಒಳಗೊಂಡ ಒಟ್ಟಾರೆ ವ್ಯಾಪಾರ ಕೊರತೆಯು $10.51 ಬಿಲಿಯನ್ಗೆ ವಿಸ್ತರಿಸಿದೆ.
ಇರಾನ್-ಯುಎಸ್ ಒಪ್ಪಂದದ ಸಕಾರಾತ್ಮಕ ನಿರೀಕ್ಷೆ
ಅಮೆರಿಕ ಮತ್ತು ಇರಾನ್ ನಡುವೆ ಇತ್ತೀಚೆಗೆ ಏರ್ಪಟ್ಟಿರುವ ಶಾಂತಿ ಒಪ್ಪಂದದ ಬೆನ್ನಲ್ಲೇ ಈ ಅಂಕಿ-ಅಂಶಗಳು ಹೊರಬಿದ್ದಿವೆ. ಜಾಗತಿಕ ವ್ಯಾಪಾರ ಮತ್ತು ಇಂಧನ ಸಾಗಣೆಯ ಪ್ರಮುಖ ಮಾರ್ಗವಾದ ಹಾರ್ಮುಜ್ ಜಲಸಂಧಿಯಲ್ಲಿದ್ದ (Strait of Hormuz) ಸಂಘರ್ಷ ತಿಳಿಯಾಗುತ್ತಿರುವುದರಿಂದ, ಮುಂಬರುವ ದಿನಗಳಲ್ಲಿ ಭಾರತದ ರಫ್ತುದಾರರಿಗೆ ಸರಕು ಸಾಗಣೆ ವೆಚ್ಚ (Freight Costs) ಕಡಿಮೆಯಾಗಲಿದೆ ಹಾಗೂ ಪೂರೈಕೆ ಸರಪಳಿ ಸುಗಮವಾಗಲಿದೆ ಎಂದು ನಿರೀಕ್ಷಿಸಲಾಗಿದೆ. ಈ ಹಿಂದೆ ಗಲ್ಫ್ ಪ್ರಾಂತ್ಯದ ಉದ್ವಿಗ್ನತೆಯಿಂದಾಗಿ ಭಾರತದ ಸಣ್ಣ ರಫ್ತುದಾರರು (ದೇಶದ ಒಟ್ಟು ರಫ್ತಿನಲ್ಲಿ ಶೇ 48 ರಷ್ಟು ಪಾಲು ಹೊಂದಿರುವವರು) ಭಾರಿ ತೊಂದರೆ ಅನುಭವಿಸಿದ್ದರು.
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ವಿಶ್ಲೇಷಣೆ
ಜೂನ್ 5 ರಂದು ಆರ್ಬಿಐ ನೀಡಿದ ಹೇಳಿಕೆಯ ಪ್ರಕಾರ, ಜಾಗತಿಕ ಆರ್ಥಿಕತೆಯಲ್ಲಿನ ಅನಿಶ್ಚಿತತೆ ಮತ್ತು ಇಂಧನ ಬೆಲೆಗಳ ಏರಿಕೆಯು ಭಾರತದ ಚಾಲ್ತಿ ಖಾತೆ ಕೊರತೆಯ (Current Account Deficit) ಮೇಲೆ ಸಣ್ಣ ಮಟ್ಟದ ಅಪಾಯವನ್ನು ಉಂಟುಮಾಡುತ್ತಲೇ ಇರುತ್ತದೆ. ಆದಾಗ್ಯೂ, ಭಾರತದ ಸೇವಾ ವಲಯದ ರಫ್ತು ಹೆಚ್ಚಿರುವುದು ಮತ್ತು ವಿದೇಶಗಳಿಂದ ಭಾರತೀಯರು ದೇಶಕ್ಕೆ ಕಳುಹಿಸುವ ಹಣ (Remittances) ದೇಶದ ಆರ್ಥಿಕತೆಗೆ ದೊಡ್ಡ ಬಲ ತರಲಿದೆ ಎಂದು ಆರ್ಬಿಐ ಹೇಳಿದೆ. ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಭೀತಿಯ ನಡುವೆಯೂ ಭಾರತದ ಐಟಿ ಮತ್ತು ಸೇವಾ ವಲಯಕ್ಕೆ ಜಾಗತಿಕವಾಗಿ ಉತ್ತಮ ಬೇಡಿಕೆ ಮುಂದುವರಿದಿದೆ.
ಇದನ್ನೂ ಓದಿ: ಹಳೆಯ ಕಾರಿಗೆ ಇ20 ಪೆಟ್ರೋಲ್ ಹಾಕಿಸಿದ್ರೆ ಇನ್ಷೂರೆನ್ಸ್ ಸಿಗಲ್ಲವಾ? ವಿಮಾ ಕಂಪನಿ ಹೇಳಿದ್ದಿದು
2031ರ ಹಣಕಾಸು ವರ್ಷದ ವೇಳೆಗೆ ಭಾರತದ ಒಟ್ಟು ರಫ್ತನ್ನು $2 ಟ್ರಿಲಿಯನ್ಗೆ (ಸರಕುಗಳಲ್ಲಿ $1 ಟ್ರಿಲಿಯನ್ ಮತ್ತು ಸೇವೆಗಳಲ್ಲಿ $1 ಟ್ರಿಲಿಯನ್) ದ್ವಿಗುಣಗೊಳಿಸುವ ಗುರಿಯನ್ನು ಸರ್ಕಾರ ಹೊಂದಿದೆ. ಇದಕ್ಕಾಗಿ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳು (MSME), ಕೃಷಿ ಉತ್ಪನ್ನಗಳು ಮತ್ತು ‘ಬ್ರಾಂಡ್ ಇಂಡಿಯಾ’ ಪ್ರಚಾರದ ಮೇಲೆ ಹೆಚ್ಚಿನ ಗಮನ ಹರಿಸುವಂತೆ ಅಧಿಕಾರಿಗಳಿಗೆ ಸೂಚಿಸಲಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 5:23 pm, Mon, 15 June 26
