ಎಐ ಏಜೆಂಟ್‌ಗಳ ಮೂಲಕ ಯುಪಿಐ ಪಾವತಿ: ಕ್ರಾಂತಿಕಾರಿ ತಂತ್ರಜ್ಞಾನಕ್ಕೆ ಎನ್‌ಪಿಸಿಐ ಆಲೋಚನೆ

ನವದೆಹಲಿ, ಸೆಪ್ಟೆಂಬರ್ 10: ಭಾರತದ ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ನಿಯಂತ್ರಿಸುವ ‘ಎನ್‌ಪಿಸಿಐ’ (National Payments Corporation of India), ಯುಪಿಐ (UPI) ಪಾವತಿಯನ್ನು ಮತ್ತಷ್ಟು ಸರಳಗೊಳಿಸಲು ಕ್ರಾಂತಿಕಾರಿ ಹಂತಕ್ಕೆ ಕಾಲಿಡಲು ಆಲೋಚಿಸುತ್ತಿದೆ. ಯುಪಿಐ ಪಾವತಿಯಲ್ಲಿ ಎಐ ಏಜೆಂಟ್​ಗಳನ್ನು ಬಳಸಲು ಎನ್​ಪಿಸಿಐ ಯೋಜಿಸುತ್ತಿದೆ ಎನ್ನುವಂತಹ ಸುದ್ದಿಯನ್ನು ರಾಯ್ಟರ್ಸ್ ಸುದ್ದಿಸಂಸ್ಥೆ ನೀಡಿದೆ. ಇದು ನಿಜಗೊಂಡು, ಯೋಜನೆ ಜಾರಿಗೆ ಬಂದರೆ, ಮೊಬೈಲ್ ಬಳಕೆದಾರರು ಎಐ ಏಜೆಂಟ್​ಗಳಿಗೆ ಟೆಕ್ಸ್ಟ್ ಪ್ರಾಂಪ್ಟ್ ಅಥವಾ ವಾಯ್ಸ್ ಪ್ರಾಂಪ್ಟ್ ಮೂಲಕ ಕಮಾಂಡ್ ಮಾಡಿದರೆ ಸಾಕು, ಹಣ ಪಾವತಿಯನ್ನು ಆ ಏಜೆಂಟ್​ಗಳೇ ನೋಡಿಕೊಳ್ಳುತ್ತವೆ. ಇಂಥದ್ದೊಂದು ತಂತ್ರಜ್ಞಾನವನ್ನು ಯುಪಿಐಗೆ ಅಳವಡಿಸಲು ಎನ್​ಪಿಸಿಐ ಮುಂದಾಗಿದೆ ಎಂದು ವರದಿಗಳು ಹೇಳುತ್ತಿವೆ.

ಈ ‘ವಾಯ್ಸ್ ಮತ್ತು ಟೆಕ್ಸ್ಟ್ ಆಧಾರಿತ ಎಐ ಪಾವತಿ’ (Conversational AI Payments) ವ್ಯವಸ್ಥೆಯು ಭಾರತದ ಫಿನ್‌ಟೆಕ್ ಕ್ಷೇತ್ರದಲ್ಲಿ ಹೊಸ ಅಧ್ಯಾಯ ಬರೆಯಲಿದೆ. ಇದಕ್ಕಾಗಿ ಎನ್​ಪಿಸಿಐ ಒಂದು ಫ್ರೇಮ್​ವರ್ಕ್ ರೂಪಿಸಲಿದೆ. ಇದರಲ್ಲಿ ಏಕೀಕೃತ ಏಜೆಂಟ್ ಪ್ರೋಟೋಕಾಲ್ ಅಥವಾ ಯೂನಿಫೈಡ್ ಏಜೆಂಟ್ ಪ್ರೋಟೋಕಾಲ್​ನ ವ್ಯವಸ್ಥೆ ಇರಲಿದ್ದು, ಏಐ ಏಜೆಂಟ್​ಗಳು ನಿರತಗೊಂಡು ಯುಪಿಐ ಪೇಮೆಂಟ್​ಗಳನ್ನು ನಿಭಾಯಿಸಬಹುದು. ಆಟೊಮೇಟೆಡ್ ಪೇಮೆಂಟ್​ಗಳನ್ನು ಮಾಡಲು ಎಐ ಏಜೆಂಟ್​ಗಳಿಗೆ ಅನುಮತಿಸುವ ಕಾರ್ಯವನ್ನೂ ಈ ಪ್ರೋಟೋಕಾಲ್ ಸಿಸ್ಟಂ ಮೂಲಕ ನಿಯಂತ್ರಿಸಬಹುದು ಎಂದು ರಾಯ್ಟರ್ಸ್ ವರದಿಯಲ್ಲಿ ಹೇಳಲಾಗಿದೆ. ಆರಂಭದಲ್ಲಿ ಸಣ್ಣ ಮೊತ್ತದ ಯುಪಿಐ ಪಾವತಿಗಳಿಗಷ್ಟೇ ಎಐ ಏಜೆಂಟ್​ಗಳಿಗೆ ಅನುಮತಿ ನೀಡಲಾಗಬಹುದು.

ಇದನ್ನೂ ಓದಿ: ಭಾರತದಲ್ಲಿ ಹೊಸ ಕೈಗಾರಿಕಾ ಕ್ರಾಂತಿ; ಆರು ವಲಯಗಳ ಉತ್ಕೃಷ್ಟ ಬೆಳವಣಿಗೆ: ಜೆಫರೀಸ್ ವರದಿ

ಸಂಭಾಷಣೆ ಮೂಲಕವೇ ಪಾವತಿ (Conversational Payments): ಬಳಕೆದಾರರು ತಮ್ಮ ಮೊಬೈಲ್‌ನಲ್ಲಿ “ನನ್ನ ಸ್ನೇಹಿತನಿಗೆ ₹500 ಕಳುಹಿಸು” ಅಥವಾ “ಕರೆಂಟ್ ಬಿಲ್ ಪಾವತಿಸು” ಎಂದು ಟೈಪ್ ಮಾಡಿದರೆ ಅಥವಾ ಧ್ವನಿ ಸಂದೇಶ ನೀಡಿದರೆ, ಎಐ ಏಜೆಂಟ್ ಆಜ್ಞೆಯನ್ನು ಅರ್ಥೈಸಿಕೊಂಡು ತಕ್ಷಣವೇ ಯುಪಿಐ ವಹಿವಾಟನ್ನು ಸಿದ್ಧಪಡಿಸುತ್ತದೆ.

ಸರಳ ಮತ್ತು ಭದ್ರತೆಯ ಸಮ್ಮಿಲನ: ಎಐ ಏಜೆಂಟ್ ವಹಿವಾಟಿನ ವಿವರಗಳನ್ನು (ಸ್ವೀಕರಿಸುವವರ ಹೆಸರು ಮತ್ತು ಮೊತ್ತ) ಪರದೆಯ ಮೇಲೆ ತೋರಿಸಿದ ನಂತರ, ಬಳಕೆದಾರರು ತಮ್ಮ ಅಧಿಕೃತ ಯುಪಿಐ ಪಿನ್ (UPI PIN) ನಮೂದಿಸುವ ಮೂಲಕ ಹಣ ವರ್ಗಾವಣೆಯನ್ನು ಸುರಕ್ಷಿತವಾಗಿ ಪೂರ್ಣಗೊಳಿಸಬಹುದು.

ಭಾಷಾ ಅಡೆತಡೆಗಳಿಗೆ ಮುಕ್ತಿ: ಕನ್ನಡ ಸೇರಿದಂತೆ ವಿವಿಧ ಭಾರತೀಯ ಪ್ರಾದೇಶಿಕ ಭಾಷೆಗಳಲ್ಲಿ ಈ ಎಐ ಏಜೆಂಟ್‌ಗಳು ಕಾರ್ಯನಿರ್ವಹಿಸಲಿದ್ದು, ತಂತ್ರಜ್ಞಾನದ ಅರಿವಿಲ್ಲದ ಸಾಮಾನ್ಯ ಜನರು ಮತ್ತು ಗ್ರಾಮೀಣ ಭಾಗದ ಬಳಕೆದಾರರಿಗೂ ಡಿಜಿಟಲ್ ಪಾವತಿ ಸುಲಭವಾಗಲಿದೆ.

ಆಪ್‌ಗಳ ನಡುವೆ ಓಡಾಟದ ಅಗತ್ಯವಿಲ್ಲ: ಪ್ರತ್ಯೇಕವಾಗಿ ಬ್ಯಾಂಕಿಂಗ್ ಅಥವಾ ಯುಪಿಐ ಆಪ್‌ಗಳನ್ನು ತೆರೆದು ಕ್ಯೂಆರ್ (QR) ಕೋಡ್ ಸ್ಕ್ಯಾನ್ ಮಾಡುವ ಅಗತ್ಯವಿಲ್ಲದೇ, ವಾಟ್ಸಾಪ್ ಅಥವಾ ವಾಯ್ಸ್ ಅಸಿಸ್ಟೆಂಟ್ (Voice Assistants) ಮೂಲಕವೇ ನೇರವಾಗಿ ಪಾವತಿ ಮಾಡಲು ಇದು ನೆರವಾಗಲಿದೆ.

ಇದನ್ನೂ ಓದಿ: ಜಾಗತಿಕ ಉದ್ಯಮಶೀಲತೆ ರ‍್ಯಾಂಕಿಂಗ್ 2026: ಪಿಚ್​ಬುಕ್ ಪಟ್ಟಿಯಲ್ಲಿವೆ ಭಾರತದ 8 ಯೂನಿವರ್ಸಿಟಿಗಳು

ಎಐ ಮತ್ತು ಡಿಜಿಟಲ್ ಸಾರ್ವಜನಿಕ ಮೂಲಸೌಕರ್ಯವನ್ನು (DPI) ಸಂಯೋಜಿಸುವ ಮೂಲಕ ಭಾರತೀಯ ಫಿನ್‌ಟೆಕ್ ಕ್ಷೇತ್ರವನ್ನು ಜಾಗತಿಕ ಮಟ್ಟದಲ್ಲಿ ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ಯುವುದು ಎನ್‌ಪಿಸಿಐನ ಪ್ರಮುಖ ಉದ್ದೇಶವಾಗಿದೆ. ಆದರೆ, ಇದೆಲ್ಲವೂ ಸಾಕಾರಗೊಳ್ಳುವ ಮುನ್ನ, ಬ್ಯಾಕೆಂಡ್​ನಲ್ಲಿ ಬಹಳಷ್ಟು ಕೆಲಸಗಳಾಗಬೇಕಾಗುತ್ತದೆ. ಎಐ ಏಜೆಂಟ್​ಗಳಿಂದ ತಪ್ಪಾಗದಂತೆ ಎಚ್ಚರವಹಿಸಲು ಪಕ್ವವಾದ ಫ್ರೇಮ್​ವರ್ಕ್ ರೂಪಿಸುವುದು ಸವಾಲಿನ ಕೆಲಸ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ