Company FD: ಕಾರ್ಪೊರೇಟ್ ಫಿಕ್ಸೆಡ್ ಡೆಪಾಸಿಟ್: ಏನು ಲಾಭ? ಎಚ್ಚರ ವಹಿಸಬೇಕಾದ ಸಂಗತಿಗಳು; ಇಲ್ಲಿದೆ ಡೀಟೇಲ್ಸ್

Corporate Company Fixed Deposits: ಕಾರ್ಪೊರೇಟ್ ಸಂಸ್ಥೆಯಲ್ಲಿ ಹಣ ಇರಿಸುವುದು ಕೆಲ ಮಂದಿಗೆ ಹಿಂಜರಿಕೆ ಆಗಬಹುದು. ಕಂಪನಿ ಎಫ್ಡಿ ಬಗ್ಗೆ ಅಷ್ಟು ಭಯದ ಅಗತ್ಯ ಇಲ್ಲ. ಆದರೆ, ಹೂಡಿಕೆ ಮಾಡುವ ಮುನ್ನ ಕೆಲವೊಂದಿಷ್ಟು ಸಂಗತಿಗಳನ್ನು ಗಮನದಲ್ಲಿರಿಸಿಕೊಂಡಿರುವುದು ಒಳ್ಳೆಯದು.

ನಿಶ್ಚಿತ ಠೇವಣಿ

ಸುಗ್ಗನಹಳ್ಳಿ ವಿಜಯಸಾರಥಿ |
Updated on: Jun 12, 2023 | 2:42 PM

ನಮ್ಮ ಉಳಿತಾಯ ಹಣವನ್ನು ಹೂಡಿಕೆ ಮಾಡಲು ಇರುವ ಹಲವು ಆಯ್ಕೆಗಳಲ್ಲಿ ಫಿಕ್ಸೆಡ್ ಡೆಪಾಸಿಟ್ ಪ್ಲಾನ್ಗಳೂ (Fixed Deposits) ಇವೆ. ಅತಿಹೆಚ್ಚಿನ ಜನರ ಹೂಡಿಕೆ ಆಯ್ಕೆ ಎಫ್ಡಿಯೇ ಆಗಿದೆ. ಬ್ಯಾಂಕುಗಳ ಅತಿಹೆಚ್ಚು ಆದಾಯ ಮೂಲ ಇವೆ ನಿಶ್ಚಿತ ಠೇವಣಿಗಳೇ ಆಗಿವೆ. ಸ್ಕೆಡ್ಯೂಲ್ಡ್ ಕಮರ್ಷಿಯಲ್ ಬ್ಯಾಂಕು ಮತ್ತು ಸಹಕಾರಿ ಬ್ಯಾಂಕುಗಳಲ್ಲಿ ನಿಶ್ಚಿತ ಠೇವಣಿಗಳನ್ನು ಇಡಬಹುದು. ಹಾಗೆಯೇ, ಕೆಲ ಆಯ್ದ ಕಾರ್ಪೊರೇಟ್ ಸಂಸ್ಥೆಗಳು ಹಾಗೂ ಬ್ಯಾಂಕೇತರ ಹಣಕಾಸು ಸಂಸ್ಥೆಗಳಿಗೂ ಎಫ್ಡಿ ಯೋಜನೆಗಳಿಗೆ ಆರ್ಬಿಐ ಅವಕಾಶ ಕೊಟ್ಟಿದೆ. ಇಂಥ ಎಫ್ಡಿಯನ್ನು ಕಾರ್ಪೊರೇಟ್ ಎಫ್ಡಿ ಅಥವಾ ಕಂಪನಿ ಎಫ್ಡಿ (Corporate or Company FD) ಎನ್ನುವುದುಂಟು. ಆದರೆ, ಬ್ಯಾಂಕೆಂದರೆ ಜನರಿಗೆ ವಿಶೇಷ ನಂಬಿಕೆ ಉಂಟು. ಅದೇ ಕಾರ್ಪೊರೇಟ್ ಸಂಸ್ಥೆಯಲ್ಲಿ ಹಣ ಇರಿಸುವುದು ಕೆಲ ಮಂದಿಗೆ ಹಿಂಜರಿಕೆ ಆಗಬಹುದು. ಕಂಪನಿ ಎಫ್ಡಿ ಬಗ್ಗೆ ಅಷ್ಟು ಭಯದ ಅಗತ್ಯ ಇಲ್ಲ. ಆದರೆ, ಹೂಡಿಕೆ ಮಾಡುವ ಮುನ್ನ ಕೆಲವೊಂದಿಷ್ಟು ಸಂಗತಿಗಳನ್ನು ಗಮನದಲ್ಲಿರಿಸಿಕೊಂಡಿರುವುದು ಒಳ್ಳೆಯದು.

ಕಂಪನಿಯ ರೇಟಿಂಗ್ ಹೇಗಿದೆ ತಿಳಿಯಿರಿ…

ನೀವು ಕಾರ್ಪೊರೇಟ್ ಎಫ್ಡಿ ಅಥವಾ ಕಂಪನಿ ಎಫ್ಡಿಯಲ್ಲಿ ಹೂಡಿಕೆ ಮಾಡುವ ಮುನ್ನ ಆ ಕಂಪನಿಯ ಹಣಕಾಸು ಸ್ಥಿತಿಗತಿ ಹೇಗಿದೆ, ಗ್ರಾಹಕರೊಂದಿಗಿನ ಅದರ ವ್ಯವಹಾರ ಹೇಗಿದೆ ಎಂಬಿತ್ಯಾದಿ ಸಾಧ್ಯವಾದರೆ ತಿಳಿದಿರಿ. ಅದು ಸಾಧ್ಯವಾಗದೇ ಹೋದರೆ ಕ್ರೆಡಿಟ್ ರೇಟಿಂಗ್ ಏಜೆನ್ಸಿಗಳು ಆ ಕಂಪನಿಗೆ ಎಷ್ಟು ಮೌಲ್ಯ ಅಥವಾ ರೇಟಿಂಗ್ ಕೊಟ್ಟಿದ್ದಾರೆ ಎಂಬುದನ್ನಾದರೂ ತಿಳಿದಿರಿ. ಹೆಚ್ಚು ರೇಟಿಂಗ್ ಇದ್ದರೆ ಆ ಕಂಪನಿ ಹೆಚ್ಚು ವಿಶ್ವಾಸಾರ್ಹ ಆಗಿರುತ್ತದೆ.

ಇದನ್ನೂ ಓದಿ: Poor and Inflation: ಬಡವರು ಇನ್ನಷ್ಟು ಬಡವರಾಗಲು, ಸಿರಿವಂತರು ಇನ್ನಷ್ಟು ಸಿರಿವಂತರಾಗಲು ಏನು ಕಾರಣ? ವಿಷ ವರ್ತುಲವಾ ಹಣದುಬ್ಬರ? ಕುತೂಹಲದ ಉದಾಹರಣೆ

ಕಾರ್ಪೊರೇಟ್ ಎಫ್ಡಿಯ ಬಡ್ಡಿದರ ತುಲನೆ ಮಾಡಿ

ವಿವಿಧ ಕಂಪನಿಗಳು ನಿಶ್ಚಿತ ಠೇವಣಿಗೆ ಎಷ್ಟು ಬಡ್ಡಿ ಆಫರ್ ಮಾಡುತ್ತವೆ ಎಂದು ತುಲನೆ ಮಾಡಿರಿ. ಉತ್ತಮ ರೇಟಿಂಗ್ ಹೊಂದಿರುವ ಕಂಪನಿಗಳ ಪೈಕಿ ಯಾವುದು ಹೆಚ್ಚು ಬಡ್ಡಿ ಆಫರ್ ಮಾಡುತ್ತದೋ ಆ ಕಂಪನಿಯ ನಿಶ್ಚಿತ ಠೇವಣಿಯನ್ನು ಆರಿಸಿಕೊಳ್ಳಿ.

ಹಾಗೆಯೇ, ತುರ್ತು ಅಗತ್ಯಬಿದ್ದು ಅವಧಿಗೆ ಮುನ್ನ ಠೇವಣಿಯನ್ನು ಹಿಂಪಡೆದುಕೊಂಡರೆ ಎಷ್ಟು ದಂಡ ವಿಧಿಸಲಾಗುತ್ತದೆ, ಠೇವಣಿ ಇದ್ದ ಅಷ್ಟೂ ಅವಧಿಗೆ ಎಷ್ಟು ಬಡ್ಡಿ ಕೊಡಲಾಗುತ್ತದೆ ಎಂಬಿತ್ಯಾದಿ ಅಂಶಗಳನ್ನೂ ತುಲನೆ ಮಾಡಿ ನೋಡಿ.

ಒಳ್ಳೆಯ ಕ್ರೆಡಿಟ್ ರೇಟಿಂಗ್ ಇರುವ ಕಂಪನಿಗಳು ಹಾಗೂ ಎಫ್ಡಿ ಬಡ್ಡಿ ದರ

ಬಜಾಜ್ ಫೈನಾನ್ಸ್: ಶೇ. 7.40ರಿಂದ ಶೇ. 8.35
ಮಹೀಂದ್ರ ಫೈನಾನ್ಸ್: ಶೇ. 7.40ರಿಂದ ಶೇ. 7.75
ಶ್ರೀರಾಮ್ ಫೈನಾನ್ಸ್: ಶೇ. 7.60ರಿಂದ ಶೇ. 8.50
ಐಸಿಐಸಿಐ ಹೌಸಿಂಗ್ ಫೈನಾನ್ಸ್: ಶೇ. 7.00ರಿಂದ ಶೇ. 7.60
ಹೆಚ್ಡಿಎಫ್ಸಿ ಲಿ: ಶೇ. 7.10ರಿಂದ ಶೇ. 7.70
ಎಲ್ಐಸಿ ಹೌಸಿಂಗ್ ಲಿ: ಶೇ. 7.25ರಿಂದ ಶೇ. 7.75
ಪಿಎನ್ಬಿ ಹೌಸಿಂಗ್ ಫೈನಾನ್ಸ್: ಶೇ. 7ರಿಂದ ಶೇ. 7.70
ಹುಡ್ಕೋ: ಶೇ. 7.50ರವರೆಗೂ
ಮಹೀಂದ್ರ ಫೈನಾನ್ಸ್: ಶೇ. 7.40ರಿಂದ ಶೇ. 7.75
ಶ್ರೀರಾಮ್ ಟ್ರಾನ್ಸ್ಪೋರ್ಟ್ ಫೈನಾನ್ಸ್ ಲಿ: ಶೇ. 7.34ರಿಂದ ಶೇ. 8.18
ಸುಂದರಮ್ ಫೈನಾನ್ಸ್ ಕಂಪನಿ: ಶೇ. 7.25ರಿಂದ ಶೇ. 7.53
ಮುತೂಟ್ ಕ್ಯಾಪಿಟಲ್: ಶೇ. 7.50ರಿಂದ ಶೇ. 7.75

ಇದನ್ನೂ ಓದಿ: LIC Saral Pension: ಲಕ್ಷ ರೂ ಆದಾಯ ಬರುವಂತಾಗಬೇಕಾ? ಇಲ್ಲಿದೆ ಎಲ್ಐಸಿ ಸರಳ್ ಪೆನ್ಷನ್ ಪ್ಲಾನ್

ಬಡ್ಡಿಗೆ ತೆರಿಗೆ ಇರುತ್ತದೆ, ಗಮನದಲ್ಲಿರಲಿ…

ನಿಶ್ಚಿತ ಠೇವಣಿಗಳಿಂದ ನಿಮಗೆ ಸಿಗುವ ಬಡ್ಡಿ ಹಣಕ್ಕೆ ತೆರಿಗೆ ವಿಧಿಸಲಾಗುತ್ತದೆ. ಇದರಿಂದ ಎಫ್ಡಿಯಿಂದ ಬರುವ ಲಾಭ ನೀವು ಲೆಕ್ಕ ಹಾಕಿದಷ್ಟಿರುವುದಿಲ್ಲ. ನಿಮ್ಮ ಆದಾಯ ತೆರಿಗೆ ಯಾವ ಸ್ಲ್ಯಾಬ್ನಲ್ಲಿ ಇದೆ ಎನ್ನುವುದರ ಮೇಲೆ ಎಫ್ಡಿ ಬಡ್ಡಿ ಹಣಕ್ಕೆ ತೆರಿಗೆ ಇರುತ್ತದೆ. ಉದಾಹರಣೆಗೆ, ನಿಮ್ಮ ಆದಾಯವು 10,00,000 ರೂ ಆಗಿದ್ದರೆ ನೀವು ಶೇ. 30ರಷ್ಟು ತೆರಿಗೆ ಪಾವತಿಸಬೇಕಾಗುತ್ತದೆ. ಈ ಸಂದರ್ಭದಲ್ಲಿ ಎಫ್ಡಿಯಿಂದ ನಿಮಗೆ ಒಂದು ವರ್ಷದಲ್ಲಿ ಸಿಗುವ ಬಡ್ಡಿ ಹಣ 1 ಲಕ್ಷ ರೂ ಆಗಿದ್ದರೆ 30,000 ರೂ ಮತ್ತು ಶೇ. 0.4 ಸೆಸ್ ವಿಧಿಸಲಾಗುತ್ತದೆ. ಅಂದರೆ ಸುಮಾರು 31,000 ರೂ ಹಣವನ್ನು ಕಡಿತ ಮಾಡಲಾಗುತ್ತದೆ.