ಪಿಎಲ್ಐಗೆ ಮುಂದುವರಿದ ಭರ್ಜರಿ ಸ್ಪಂದನೆ; ಮಾರ್ಚ್ ವೇಳೆಗೆ 2.40 ಲಕ್ಷ ಕೋಟಿ ರೂ ಹೂಡಿಕೆ: ಸಚಿವ ಜಿತಿನ್ ಪ್ರಸಾದ
PLI scheme: ಉತ್ಪಾದನೆ ಆಧಾರಿತ ಪ್ರೋತ್ಸಾಹಕ ಯೋಜನೆ ಅಡಿಯಲ್ಲಿ ಮಾರ್ಚ್ ವೇಳೆಗೆ 2.40 ಲಕ್ಷ ಕೋಟಿ ರೂ ಹೂಡಿಕೆಯಾಗಿದೆ. 14.15 ಲಕ್ಷಕ್ಕೂ ಹೆಚ್ಚು ಉದ್ಯೋಗಗಳು ಈ ಪಿಎಲ್ಐನಿಂದಾಗಿ ಸೃಷ್ಟಿಯಾಗಿವೆ. ಸೋಲಾರ್ ಪಿವಿ ಮಾಡ್ಯೂಲ್, ಫಾರ್ಮಾ ಮತ್ತು ಆಟೊಮೊಬೈಲ್ ಸೆಕ್ಟರ್ಗಳಿಗೆ ಅತಿಹೆಚ್ಚು ಹೂಡಿಕೆ ಆಗಿದೆ.
Updated on: Jul 22, 2026 | 3:45 PM
ನವದೆಹಲಿ, ಜುಲೈ 22: ಪಿಎಲ್ಐ (PLI) ಯೋಜನೆಗಳ ಅಡಿಯಲ್ಲಿ ಈ ವರ್ಷದ ಮಾರ್ಚ್ ವೇಳೆಗೆ ₹2.40 ಲಕ್ಷ ಕೋಟಿಗೂ ಅಧಿಕ ನೈಜ ಹೂಡಿಕೆ ಬಂದಿದ್ದು, 14.15 ಲಕ್ಷಕ್ಕೂ ಹೆಚ್ಚು ಉದ್ಯೋಗಗಳು (ನೇರ ಮತ್ತು ಪರೋಕ್ಷ) ಸೃಷ್ಟಿಯಾಗಿವೆ ಎಂದು ಕೇಂದ್ರ ಸರ್ಕಾರ ಲೋಕಸಭೆಗೆ ತಿಳಿಸಿದೆ. ವಾಣಿಜ್ಯ ಮತ್ತು ಕೈಗಾರಿಕಾ ರಾಜ್ಯ ಸಚಿವ ಜಿತಿನ್ ಪ್ರಸಾದ ಅವರು ಲೋಕಸಭೆಯಲ್ಲಿ ನೀಡಿದ ಲಿಖಿತ ಉತ್ತರದಲ್ಲಿ ಈ ಮಾಹಿತಿ ಇದೆ. ಯೋಜನೆಯು ಆರಂಭವಾದಂದಿನಿಂದ ಜಾಗತಿಕ ಮೌಲ್ಯವರ್ಧನೆ ಸರಪಳಿಯಲ್ಲಿ ಭಾರತದ ಪಾತ್ರವನ್ನು ಬಲಪಡಿಸಿದ್ದು, ₹15.2 ಲಕ್ಷ ಕೋಟಿಗೂ ಅಧಿಕ ರಫ್ತಿಗೆ ನೆರವಾಗಿದೆ ಎಂದು ಸಚಿವರು ಹೇಳಿದ್ದಾರೆ.
ಪ್ರಮುಖ ವಲಯವಾರು ಪಿಎಲ್ಐ ಹೂಡಿಕೆ ವಿವರಗಳು
- ಸೋಲಾರ್ ಪಿವಿ ಮಾಡ್ಯೂಲ್: ₹64,873 ಕೋಟಿ ಹೂಡಿಕೆ (ಅತಿ ಹೆಚ್ಚು ಹೂಡಿಕೆ ಕಂಡ ವಲಯವಾಗಿದೆ)
- ಫಾರ್ಮಾಸ್ಯುಟಿಕಲ್ಸ್ (ಔಷಧ ವಲಯ): ₹45,158 ಕೋಟಿ
- ಆಟೋಮೊಬೈಲ್: ₹44,326 ಕೋಟಿ
- ಸ್ಪೆಷಾಲಿಟಿ ಸ್ಟೀಲ್: ₹23,896 ಕೋಟಿ
- ಎಲೆಕ್ಟ್ರಾನಿಕ್ಸ್: ₹20,580 ಕೋಟಿ
ಇದನ್ನೂ ಓದಿ: ಭಾರತಕ್ಕೆ ಸರಾಗವಾಗಿ ಬರುತ್ತಿರುವ ವಿದೇಶೀ ನೇರ ಹೂಡಿಕೆ; ಕರ್ನಾಟಕಕ್ಕೆ ಭರ್ಜರಿ ಹೂಡಿಕೆ ಹೆಚ್ಚಳ; ಎರಡನೇ ಸ್ಥಾನಕ್ಕೆ ಜಿಗಿತ
ಸಚಿವರು ಪ್ರಸ್ತುತಪಡಿಸಿದ ವರದಿಯಲ್ಲಿನ ಇತರ ಪ್ರಮುಖ ವಿವರಗಳು
- ಸ್ಟಾರ್ಟ್‌ಅಪ್ ಸೀಡ್ ಫಂಡ್: ಜೂನ್ 30ರ ವೇಳೆಗೆ ‘ಸ್ಟಾರ್ಟ್‌ಅಪ್ ಇಂಡಿಯಾ ಸೀಡ್ ಫಂಡ್’ ಯೋಜನೆಯಡಿ 219 ಇನ್‌ಕ್ಯುಬೇಟರ್‌ಗಳನ್ನು ಆಯ್ಕೆ ಮಾಡಲಾಗಿದ್ದು, ಒಟ್ಟು ₹945 ಕೋಟಿ ಅನುಮೋದಿತ ನಿಧಿಯಲ್ಲಿ ₹650 ಕೋಟಿ ಹಣವನ್ನು ಬಿಡುಗಡೆ ಮಾಡಲಾಗಿದೆ.
- ಅಮೆರಿಕದಲ್ಲಿ ಭಾರತೀಯ ಹೂಡಿಕೆ: ಕಳೆದ 5 ವರ್ಷಗಳಲ್ಲಿ (2021–2026) ಭಾರತೀಯ ಕಂಪನಿಗಳು ಅಮೆರಿಕದಲ್ಲಿ $15.9 ಶತಕೋಟಿ ಡಾಲರ್ (ಅಂದಾಜು ₹1.3 ಲಕ್ಷ ಕೋಟಿ) ವಿದೇಶಿ ಹೂಡಿಕೆ ಮಾಡಿವೆ.
ರಿಟೇಲ್ ವಲಯದಲ್ಲಿ ಎಫ್‌ಡಿಐ: ಸಿಂಗಲ್-ಬ್ರ್ಯಾಂಡ್ (Single-brand) ರಿಟೇಲ್‌ನಲ್ಲಿ 100% ಎಫ್‌ಡಿಐಗೆ ಅವಕಾಶವಿದ್ದು, ಏಪ್ರಿಲ್ 2021 ರಿಂದ ಮಾರ್ಚ್ 2026 ರ ನಡುವೆ $1,528.66 ಮಿಲಿಯನ್ ವಿದೇಶಿ ನೇರ ಹೂಡಿಕೆ ಹರಿದುಬಂದಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
