Ponzi Scheme: ಬೈಕ್ಬೋಟ್ ಆಸೆ ಹುಟ್ಟಿಸಿ ಲಕ್ಷಾಂತರ ಮಂದಿಗೆ ಉಂಡೆನಾಮ ಹಾಕಿದ ಯುಪಿ ಮಹಿಳೆ; ಕೊಳ್ಳೆ ಹೊಡೆದ 15,000 ಕೋಟಿ ದುಡ್ಡು ಏನಾಯ್ತು?
Bikebot Ponzi Scam From UP Lady: ಬೈಕ್ ಟ್ಯಾಕ್ಸಿ ಸ್ಕೀಮ್ ಹೆಸರಿನಲ್ಲಿ ಲಕ್ಷಾಂತರ ಜನರನ್ನು ನಂಬಿಸಿ ಸಾವಿರಾರು ಕೋಟಿ ರೂ ಕೊಳ್ಳೆ ಹೊಡೆದಿರುವ ಘಟನೆ ಉತ್ತರಪ್ರದೇಶದಲ್ಲಿ ನಡೆದಿದೆ. ದೀಪ್ತಿ ಬಾಹಲ್ ಎಂಬಾಕೆ ಈ ಸ್ಕ್ಯಾಮ್ನ ಕಿಂಗ್ಪಿನ್. ಸದ್ಯ ಈಕೆ ಪರಾರಿಯಾಗಿದ್ದು, ಪೊಲೀಸರು ಹುಡುಕುತ್ತಿದ್ದಾರೆ.
Updated on: Apr 30, 2023 | 7:03 PM
ನವದೆಹಲಿ: ಭಾರತದಲ್ಲಿ ಹಣಕಾಸು ಹಗರಣಗಳು ಅದೆಷ್ಟು ನಡೆದಿಲ್ಲ? ಸೀಮಿತವಾಗಿರುವ ಸಂಪಾದನೆಯಿಂದ ಬರುವ ಹಣ ಯಾತಕ್ಕೆ ಸಾಲುತ್ತದೆಂದು ಹತಾಶೆಗೊಂಡಿರುವ ಮಧ್ಯಮವರ್ಗದ ಜನರ ಆಸೆಯನ್ನು ವಂಚಕರು ದುರುಪಯೋಗಪಡಿಸಿಕೊಳ್ಳುವ ಹಗರಣಗಳು ಪ್ರತಿಯೊಂದು ಕಾಲಘಟ್ಟದಲ್ಲೂ ನಡೆಯುತ್ತಾ ಬಂದಿವೆ. ನಮ್ಮ ಬೆಂಗಳೂರಿನ ವಿನಿವಿಂಕ್ ಹಗರಣ (Vinivink Scam), ಐಎಂಎ ಹಗರಣ (IMA Scam, ಗುರುಟೀಕ್ ಹಗರಣ (Guru Teak Scam), ಹೀಗೆ ನಮ್ಮ ರಾಜ್ಯದಲ್ಲೇ ಪಟ್ಟಿ ದೊಡ್ಡದಿದೆ. ಬೇರೆ ರಾಜ್ಯಗಳಲ್ಲಿಯದ್ದು ಗಣಿಸಿದರೆ ಲೆಕ್ಕಕ್ಕೆ ಸಿಗೋದಿಲ್ಲ ಬಿಡಿ. ಕೆಲ ವಂಚಕರು ಅದದೇ ಮಾರ್ಗದ ಮೂಲಕ ಜನರನ್ನು ಯಾಮಾರಿಸಿದರೆ ಇನ್ನೂ ಕೆಲವರು ಹೊಸ ವಿಧಾನಗಳನ್ನು ಕಂಡುಕೊಳ್ಳುತ್ತಾರೆ. ಈಗ ಇ ಟ್ಯಾಕ್ಸಿಗಳ ಹವಾ ಹೆಚ್ಚುತ್ತಿರುವುದರಿಂದ ಉತ್ತರಪ್ರದೇಶದ ವಂಚಕರ ಗ್ಯಾಂಗೊಂದು ಬೈಕ್ಬೋಟ್ (Bikebot) ಎಂಬ ಹಗರಣ ನಡೆಸಿದ್ದಾರೆ. ಉತ್ತರಪ್ರದೇಶದ ಹಲವು ನಗರ ಮತ್ತು ಪಟ್ಟಣಗಳ ಮೂಲೆ ಮೂಲೆ ಸ್ಥಳಕ್ಕೂ ಬೈಕ್ ಟ್ಯಾಕ್ಸಿ ಸರ್ವಿಸ್ (Bike Taxi Service) ನೀಡುವ ಕಂಪನಿ ತಮ್ಮದೆಂದು ನಂಬಿಸಿ ಜನರಿಂದ ಹಣ ಸಂಗ್ರಹಿಸಿ ವಂಚನೆ ಎಸಗಲಾಗಿದೆ. ಈ ಹಗರಣದ ರೂವಾರಿ ದೀಪ್ತಿ ಬಾಹಲ್. ಸದ್ಯ ಪರಾರಿಯಾಗಿರುವ ಉತ್ತರಪ್ರದೇಶದ ಈ ಮಹಿಳೆಯ ತಲೆಗೆ ಅಲ್ಲಿನ ಪೊಲೀಸರು 5 ಲಕ್ಷ ರೂ ಬಹುಮಾನ ಇಟ್ಟಿದ್ದಾರೆ.
ಏನಿದು ಬೈಕ್ ಬೋಟ್ ಸ್ಕೀಮ್?
ಆಗಲೇ ತಿಳಿಸಿದಂತೆ ಇದು ಬೈಕ್ ಟ್ಯಾಕ್ಸಿ ಯೋಜನೆ. 2017ರಲ್ಲಿ ಈ ಕಂಪನಿ ಆರಂಭವಾಗಿದ್ದು. ಆಕರ್ಷಕವೆನಿಸುವ ಈ ಯೋಜನೆಯನ್ನು ಮುಂದಿಟ್ಟುಕೊಂಡು ದೀಪ್ತಿ ಬಾಹಲ್ ಅವರು ವಂಚನೆಯ ಬಲೆಯನ್ನೇ ಹೆಣೆದಿದ್ದರು. ಜನರು ಬೈಕ್ ಮೇಲೆ ಹಣ ಹೂಡಿಕೆ ಮಾಡಿದರೆ ಪ್ರತೀ ತಿಂಗಳು ನಿರ್ದಿಷ್ಟ ಮೊತ್ತದ ರೆಂಟಲ್ ಪಾವತಿಸಲಾಗುವುದು. ಜೊತೆಗೆ ಒಂದು ಬೈಕ್ಗೆ ಶೇ. 5ರಷ್ಟು ಬೋನಸ್ ಬಾಡಿಗೆಯೂ ಸಿಗುತ್ತದೆ ಎಂದು ಕಂಪನಿಯು ಆಫರ್ ಕೊಟ್ಟಿತು.
ಅದರಂತೆ ಒಂದು ಬೈಕ್ಗೆ ಜನರು 62,100 ರೂ ಹೂಡಿಕೆ ಮಾಡಬೇಕು. ಇದಕ್ಕೆ ತಿಂಗಳಿಗೆ 5,175 ರೂನಂತೆ ಇಎಂಐ ಕಟ್ಟಬೇಕು ಎಂದು ತಿಳಿಸಲಾಯಿತು. ಇನ್ನು ಕಂಪನಿ ವತಿಯಿಂದ ಬೈಕ್ನ ಬಾಡಿಗೆಯಾಗಿ ಜನರಿಗೆ ತಿಂಗಳಿಗೆ 4,590 ರೂ ನೀಡುವ ಆಫರ್ ಇದು.
ಜನವರಿಗೆ ಈ ಆಫರ್ ಸಹಜವಾಗಿ ತೃಪ್ತಿ ತಂದಿದೆ. ಎರಡು ವರ್ಷದಲ್ಲಿ ತಾವು ಹಾಕಿದ ಬಂಡವಾಳ ವಾಪಸ್ ಬಂದು, ತಿಂಗಳಿಗೆ ನಾಲ್ಕೈದು ಸಾವಿರ ರೂ ಕೊಡುವ ಆದಾಯಮೂಲ ಸೃಷ್ಟಿಸುವ ಈ ಯೋಜನೆ ಯಾರಿಗೆ ತಾನೆ ಇಷ್ಟವಾಗದು? ಅಂತೆಯೇ ಜನರು ಮುಗಿಬಿದ್ದು ಈ ಯೋಜನೆಗೆ ದುಡ್ಡು ಹಾಕಿದರು.
ಎಲ್ಲಾ ಹಗರಣಗಳಂತೆ ಬೈಕ್ಬೋಡ್ ಸ್ಕೀಮ್ ಕೂಡ ಆರಂಭದಲ್ಲಿ ಚೆನ್ನಾಗಿ ನಡೆಯಿತು. ಯೋಜನೆ ಆರಂಭವಾಗಿ ಒಂದು ಅಥವಾ ಒಂದೂವರೆ ವರ್ಷದವರೆಗೂ ಕಂಪನಿ ವತಿಯಿಂದ ಹೂಡಿಕೆದಾರರಿಗೆ ತಿಂಗಳ ಕಂತು ಹೋಗುತ್ತಿತ್ತು. ಆಗ ಶುರುವಾಯಿತು ಎಲೆಕ್ಟ್ರಿಕ್ ಬೈಕ್ನ ಇನ್ವೆಸ್ಟ್ಮೆಂಟ್ ಸ್ಕೀಮ್.
2018ರ ನವೆಂಬರ್ನಲ್ಲಿ ಇ–ಬೈಕ್ ಸ್ಕೀಮ್ನಲ್ಲಿ ಹೂಡಿಕೆ ದುಡ್ಡು ಲಕ್ಷಕ್ಕೂ ಮೇಲೆ ನಿಗದಿ ಮಾಡಲಾಯಿತು. ಹಿಂದಿನ ಬೈಕ್ ಸ್ಕೀಮ್ನಲ್ಲಿ ಭರವಸೆ ನೀಡಿದಂತೆ ರಿಟರ್ನ್ ಬರುವುದನ್ನು ನೋಡಿದ್ದ ಜನರು ಇ–ಬೈಕ್ ಸ್ಕೀಮ್ ಮೇಲೂ ಮುಗಿಬಿದ್ದು ದುಡ್ಡು ಸುರಿದರು.
ಮರುವರ್ಷ, ಅಂದರೆ 2019ರಲ್ಲಿ ಅನೇಕ ಜನರು ತಮಗೆ ಭರವಸೆ ನೀಡಿದಂತೆ ರಿಟರ್ನ್ ಬರುತ್ತಿಲ್ಲ ಎಂದು ಪೊಲೀಸ್ ಠಾಣೆಗಳಲ್ಲಿ ದೂರು ಕೊಡಲು ಆರಂಭಿಸಿದರು. ಅಲ್ಲಿಗೆ ಹಗರಣ ಬಯಲಿಗೆ ಬಂದಿತ್ತು.
ಕೊಳ್ಳೆ ಹೊಡೆದ ದುಡ್ಡು ಎಷ್ಟು?
ದೀಪ್ತಿ ಬಾಹಲ್ ಬಾಘಪತ್ನ ಕಾಲೇಜೊಂದರಲ್ಲಿ ಪ್ರಾಂಶುಪಾಲೆಯಾಗಿದ್ದವರು. ಈಕೆಯ ಪತಿಯ ಕುಟುಂಬದವರದ್ದು ರಿಯಲ್ ಎಸ್ಟೇಟ್ ಕಂಪನಿ ಇತ್ತು. ದೀಪ್ತಿ ಅದರ ನಿರ್ದೇಶಕಿಯಾಗಿದ್ದರು. 2017ರಲ್ಲಿ ಇದೇ ಕಂಪನಿ ವತಿಯಿಂದ ಬೈಕ್ ಟ್ಯಾಕ್ಸಿ ವ್ಯವಹಾರ ಶುರುವಾಗಿದ್ದು. ದೀಪ್ತಿಯೇ ಈ ಯೋಜನೆಯ ರೂವಾರಿ ಎಂದೆನ್ನಲಾಗಿದೆ. ಹಗರಣ ಬೆಳಕಿಗೆ ಬರುತ್ತಲೇ ಈಕೆ ಪರಾರಿಯಾಗಿದ್ದಾರೆ. ವಿದೇಶಕ್ಕೆ ಹೋಗಿರುವ ಶಂಕೆ ಇದೆ. ಈಕೆಯ ಪತಿ 2019ರಲ್ಲಿ ಕೋರ್ಟ್ಗೆ ಶರಣಾಗಿದ್ದಾರೆ.
ಇದನ್ನೂ ಓದಿ: SEBI: ಅದಾನಿ ಗ್ರೂಪ್ನಂಥ ಸಂಸ್ಥೆಯ ತನಿಖೆಗೆ ಹೆಚ್ಚು ಸಮಯ ಬೇಕು: ಸುಪ್ರೀಂಕೋರ್ಟ್ಗೆ ಸೆಬಿ ಮನವಿ
ಜಾರಿ ನಿರ್ದೇಶನಾಲಯದಿಂದ ತನಿಖೆ ಆಗಿದೆ. ಆರ್ಥಿಕ ಅಪರಾಧಗಳ ವಿಭಾಗದ ಪ್ರಕಾರ ಲಕ್ಷಾಂತರ ಜನರಿಗೆ 4,500 ಕೋಟಿ ರೂ ವಂಚನೆ ಆಗಿದೆ. ದೇಶಾದ್ಯಂತ 250 ಪ್ರಕರಣಗಳು ದಾಖಲಾಗಿವೆ. ಕೆಲ ವರದಿಗಳ ಪ್ರಕಾರ ವಂಚನೆಯ ಪ್ರಮಾಣ 15,000 ಕೋಟಿ ರೂ ಎನ್ನಲಾಗಿದೆ. ದೀಪ್ತಿ ಹಾಗು ಆಕೆಯ ಕುಟುಂಬದವರಿಗೆ ಸೇರಿದ ಚಿರ ಮತ್ತು ಚರಾಸ್ತಿಗಳನ್ನು ಇಡಿ ಮುಟ್ಟುಗೋಲು ಹಾಕಿಕೊಂಡಿದೆ. ಇವೆಲ್ಲದರ ಮೌಲ್ಯ 103 ಕೋಟಿ ರೂ ಇರಬಹುದು.
ಜನರಿಂದ ಪಡೆದಿರುವ ಸಾವಿರಾರು ಕೋಟಿ ರೂ ಎಲ್ಲಿ ಹೋಯಿತು ಎಂಬುದನ್ನು ತನಿಖಾಧಿಕಾರಿಗಳು ಪತ್ತೆ ಹೆಚ್ಚುತ್ತಿದ್ದಾರೆ. ಕುಲ್ಲು ಮನಾನಿಯಲ್ಲಿ ರೆಸಾರ್ಟ್ ಖರೀದಿ, ಬೇರೆ ಬೇರೆ ಕಂಪನಿ ಮತ್ತು ವ್ಯಕ್ತಿಗಳ ಹೆಸರಿನಲ್ಲಿ ಹಲವು ಆಸ್ತಿಗಳ ಖರೀದಿ ಮಾಡಲಾಗಿದೆ. ವಿವಿಧ ಕಂಪನಿಗಳು ಮತ್ತು ವ್ಯಕ್ತಿಗಳಿಗೆ ಹೂಡಿಕೆ ಮತ್ತು ಸಾಲವಾಗಿ ಹಣ ವರ್ಗಾವಣೆ ಮಾಡಲಾಗಿದೆ. ಇವು ತನಿಖಾಧಿಕಾರಿಗಳಿಗೆ ಸದ್ಯ ಗೊತ್ತಾಗಿರುವ ಅಂಶಗಳು.
