ಬ್ಯಾಂಕ್ ಲಾಕರ್ ಕೀ ಕಳೆದುಹೋದರೆ ಮುಂದೇನು? ಲಾಕರ್ ಒಡೆಯಲಾಗುತ್ತಾ? ಇಲ್ಲಿದೆ ಪ್ರಕ್ರಿಯೆ

ಬೆಲೆಬಾಳುವ ಆಭರಣಗಳು, ಪ್ರಮುಖ ದಾಖಲೆಗಳನ್ನು ಮನೆಯಲ್ಲಿ ಇಟ್ಟರೆ ಕಳ್ಳತನದ ಅಪಾಯ ಇರುತ್ತದಾದ್ದರಿಂದ ಬಹಳ ಜನರು ಬ್ಯಾಂಕ್ ಲಾಕರ್​ಗಳಲ್ಲಿ (Bank Locker) ಇವುಗಳನ್ನು ಇರಿಸುವುದುಂಟು. ಗ್ರಾಹಕರು ತಮ್ಮ ಲಾಕರ್ ಕೀಲಿಯನ್ನು ಕಳೆದುಕೊಂಡರೆ ಏನಾಗುತ್ತದೆ? ಬ್ಯಾಂಕ್ ಬಳಿ ಡೂಪ್ಲಿಕೇಟ್ ಕೀಲಿ ಇರುತ್ತದಾ? ಲಾಕರ್ ತೆರೆಯುವ ಪ್ರಕ್ರಿಯೆ ಹೇಗಿರುತ್ತೆ, ಇತ್ಯಾದಿ ಮಾಹಿತಿ ಇಲ್ಲಿದೆ.

ಬ್ಯಾಂಕ್ ಲಾಕರ್​ಗಳಿಗೆ ಎರಡು ಕೀಲಿಗಳಿರುತ್ತವೆ. ಒಂದು ಕೀಲಿ ಗ್ರಾಹಕರಿಗೆ ಕೊಡಲಾಗುತ್ತದೆ. ಮತ್ತೊಂದು ಕೀಲಿ ಬ್ಯಾಂಕ್​ನಲ್ಲಿ ಇರುತ್ತದೆ. ಈ ಎರಡು ಕೀಲಿಗಳೂ ಬೇರೆ ಬೇರೆಯವೇ. ಲಾಕರ್ ಓಪನ್ ಮಾಡಲು ಈ ಎರಡೂ ಕೀಲಿಗಳ ಬಳಕೆ ಬೇಕು. ಒಂದು ಕೀಲಿಯಿಂದ ಲಾಕರ್ ತೆರೆಯಲು ಆಗುವುದಿಲ್ಲ. ಹೀಗಾಗಿ, ಗ್ರಾಹಕರು ಕೀಲಿ ಕಳೆದುಕೊಂಡಾಗ ಅದನ್ನು ತೆರೆಯುವ ಏಕೈಕ ಮಾರ್ಗವೆಂದರೆ ಲಾಕರ್ ಮುರಿಯುವುದು. ಲಾಕರ್ ಓಪನ್ ಮಾಡುವ ಪ್ರಕ್ರಿಯೆ ಇಲ್ಲಿದೆ:

ಇದನ್ನೂ ಓದಿ: ಅಮೆರಿಕದೊಂದಿಗೆ ಟ್ರೇಡ್ ಡೀಲ್; ಭಾರತದ ಕೃಷಿ ಮಾರುಕಟ್ಟೆ ರಕ್ಷಣೆಯಲ್ಲಿ ರಾಜಿ ಇರೋದಿಲ್ಲವಾ?

• ಮೊದಲಿಗೆ, ನೀವು ಲಾಕರ್ ಕೀಲಿ ಕಳೆದುಕೊಂಡಾಗ ಕೂಡಲೇ ಆ ಬ್ಯಾಂಕ್ ಬ್ರ್ಯಾಂಚ್​ಗೆ ಹೋಗಿ ಅಧಿಕೃತವಾಗಿ ಪತ್ರದ ಮೂಲಕ ಮಾಹಿತಿ ನೀಡಬೇಕು.
• ಪೊಲೀಸ್ ಠಾಣೆಗೆ ಹೋಗಿ ಲಾಕರ್ ಕೀಲಿ ಕಳುವಾಗಿರುವುದನ್ನು ತಿಳಿಸಿ ಕಂಪ್ಲೇಂಟ್ ಕೊಟ್ಟು ಅದರ ಕಾಪಿಯನ್ನು ಪಡೆದುಕೊಳ್ಳಬೇಕು.
• ನಂತರ ಬ್ಯಾಂಕಿಗೆ ತೆರಳಿ ಪೊಲೀಸ್ ಕಂಪ್ಲೇಂಟ್ ಪ್ರತಿ ಜೊತೆಗೆ ಲಾಕರ್ ಕೀಲಿ ಕಳುವಾಗಿದೆ ಎಂದು ಬ್ಯಾಂಕಿನಲ್ಲಿ ದೂರು ಸಲ್ಲಿಸಬೇಕು.
• ಬ್ಯಾಂಕು ನಿಮ್ಮಿಂದ ಅಂಡರ್​ಟೇಕಿಂಗ್ ಅನ್ನು ಪಡೆಯಬಹುದು. ಪೊಲೀಸ್ ಕಂಪ್ಲೇಂಟ್ ಜೊತೆಗೆ ಆಧಾರ್, ಪ್ಯಾನ್ ಕಾರ್ಡ್ ಇತ್ಯಾದಿ ದಾಖಲೆಗಳನ್ನೂ ಬ್ಯಾಂಕು ಕೇಳಬಹುದು.
• ಜಂಟಿ ಖಾತೆಯಾದರೆ ಎಲ್ಲಾ ಖಾತೆದಾರರೂ ಬ್ಯಾಂಕಿಗೆ ಹೋಗಿ ದೂರಿನಲ್ಲಿ ಸಹಿ ಹಾಕಬೇಕಾಗುತ್ತದೆ.
• ಇದಾದ ಬಳಿಕ ಲಾಕರ್ ಮುರಿಯುವ ಪ್ರಕ್ರಿಯೆಗೆ ಚಾಲನೆ ಸಿಗುತ್ತದೆ. ಈ ಕಾರ್ಯಕ್ಕಾಗಿ ಬ್ಯಾಂಕು ಒಂದು ಸಮಯ ನಿಗದಿ ಮಾಡುತ್ತದೆ.
• ಆ ಸಮಯಕ್ಕೆ ಖಾತೆದಾರ ಅಥವಾ ಖಾತೆದಾರರು ಹೋಗಬೇಕು. ಖಾತೆದಾರ ಮತ್ತು ಬ್ಯಾಂಕ್ ಅಧಿಕಾರಿಯೊಬ್ಬರ ಉಪಸ್ಥಿತಿಯಲ್ಲಿ ತಜ್ಞರೊಬ್ಬರು ಲಾಕರ್ ಮುರಿಯುತ್ತಾರೆ.
• ನಂತರ, ಹೊಸ ಲಾಕರ್ ಅನ್ನು ಸ್ಥಾಪಿಸಿ ಗ್ರಾಹಕರಿಗೆ ಹೊಸ ಕೀಲಿ ಕೊಡಲಾಗುತ್ತದೆ.

ಇದನ್ನೂ ಓದಿ: ಕೆಲ ದಿನಗಳಿಂದ ಚಿನ್ನ, ಬೆಳ್ಳಿ ಬೆಲೆಗಳ ಭರ್ಜರಿ ಕುಸಿತ; ಇಗೋ ಇಲ್ಲಿವೆ ಕಾರಣಗಳು

ಗಮನಿಸಬೇಕಾದ ಸಂಗತಿ ಎಂದರೆ, ಬ್ಯಾಂಕ್ ಲಾಕರ್ ಮುರಿಯುವುದರಿಂದ ಹಿಡಿದು ಹೊಸ ಲಾಕರ್ ಹಾಕುವವರೆಗೆ ಎಲ್ಲಾ ವೆಚ್ಚವನ್ನೂ ಗ್ರಾಹಕರೇ ಭರಿಸಬೇಕಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ