‘ರಾಕಾ’ ಚಿತ್ರದಲ್ಲಿ ನಟಿಸಲು ಪ್ರೀತಿ ಮುಕುಂದನ್​ಗೆ ಆಫರ್ ನೀಡಿದ್ದ ಅಟ್ಲಿ; ಆಮೇಲೇನಾಯ್ತು?

ಸ್ಟಾರ್ ನಿರ್ದೇಶಕ ಅಟ್ಲಿ ಮತ್ತು ಅಲ್ಲು ಅರ್ಜುನ್ (Allu Arjun) ಕಾಂಬಿನೇಷನ್‌ನ ‘ರಾಕಾ’ ಸಿನಿಮಾ ಭಾರಿ ನಿರೀಕ್ಷೆ ಹುಟ್ಟುಹಾಕಿದೆ. ಈ ಚಿತ್ರದಲ್ಲಿ ದೀಪಿಕಾ ಪಡುಕೋಣೆ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿದ್ದಾರೆ. ಪ್ರೆಗ್ನೆಂಟ್ ಆಗಿದ್ದರೂ ಅವರು ಶೂಟ್​​ನಲ್ಲಿ ಭಾಗಿ ಆಗಿದ್ದರು. ಸದ್ಯ ಈ ಸಿನಿಮಾದ ಶೂಟಿಂಗ್ ನಡೆಯುತ್ತಿದೆ. ಈ ನಡುವೆ ನಿರ್ದೇಶಕ ಅಟ್ಲಿ ಅವರು ತಮಗೆ ಇಷ್ಟವಾದ ಒಬ್ಬ ನಟಿಗೆ ತಮ್ಮ ಸಿನಿಮಾದಲ್ಲಿ ಅವಕಾಶ ನೀಡಲು ಬಯಸಿದ್ದ ವಿಷಯವನ್ನು ಹಂಚಿಕೊಂಡಿದ್ದಾರೆ.

ತಮಿಳಿನ ‘ಇದಯಂ ಮುರಳಿ’ ಚಿತ್ರದ ಪ್ರಚಾರದ ಕಾರ್ಯಕ್ರಮದಲ್ಲಿ ಅಟ್ಲಿ ಭಾಗವಹಿಸಿದ್ದರು. ಈ ಚಿತ್ರದಲ್ಲಿ ಪ್ರೀತಿ ನಟಿಸಿದ್ದಾರೆ. ಅವರ ನಟನೆ ಮತ್ತು ನೃತ್ಯವನ್ನು ಅಟ್ಲಿ ಮುಕ್ತಕಂಠದಿಂದ ಶ್ಲಾಘಿಸಿದರು. ವೇದಿಕೆಯಲ್ಲಿ ನಟಿ ಪ್ರೀತಿ ಅವರನ್ನು ಉದ್ದೇಶಿಸಿ ಮಾತನಾಡಿದ ಅಟ್ಲಿ, ‘ಪ್ರೀತಿ, ನನಗೆ ನಿಮ್ಮ ನಟನೆ ಮತ್ತು ಡ್ಯಾನ್ಸ್ ತುಂಬಾ ಇಷ್ಟ. ನಾನು ನಿಮ್ಮನ್ನು ನನ್ನ ಹೊಸ ಸಿನಿಮಾಗೆ (ರಾಕಾ) ಆಯ್ಕೆ ಮಾಡಲು ಬಯಸಿದ್ದೆ. ಆದರೆ ನಿಮ್ಮ ಮ್ಯಾನೇಜರ್ ಬಳಿ ಕೇಳಿದಾಗ ನೀವು ಬೇರೆ ಸಿನಿಮಾಗಳಲ್ಲಿ ಬ್ಯುಸಿ ಇದ್ದೀರಿ ಎಂದು ತಿಳಿಸಿದರು. ನಿಮಗೆ ಡೇಟ್ಸ್ ಇಲ್ಲದ ಕಾರಣ ಈ ಆಫರ್ ಮಿಸ್ ಆಯಿತು’ ಎಂದು ಹೇಳಿದರು.

‘ರಾಕಾ’ ಚಿತ್ರದಲ್ಲಿ ದೀಪಿಕಾ ಪಡುಕೋಣೆ ಮುಖ್ಯ ನಟಿಯಾಗಿದ್ದಾರೆ. ಅಟ್ಲಿ ಅವರು ಪ್ರೀತಿ ಮುಕುಂದನ್ ಅವರಿಗೆ ಚಿತ್ರದ ಮತ್ತೊಂದು ಪ್ರಮುಖ ಪಾತ್ರವನ್ನು ನೀಡಲು ನಿರ್ಧರಿಸಿದ್ದರು ಎನ್ನಲಾಗಿದೆ. ಪ್ರೀತಿ ಅವರಿಗೆ ಸಿಗದ ಆ ಪಾತ್ರ ಈಗ ಮಲಯಾಳಂ ನಟಿ ಫೆಮಿನಾ ಜಾರ್ಜ್ ಪಾಲಾಗಿದೆ.

ಇದನ್ನೂ ಓದಿ: ಅಲ್ಲು ಅರ್ಜುನ್ ಜೊತೆ ಸಿನಿಮಾ, ಶೂಟಿಂಗ್​ಗೆ ಹಾಜರಾದ ರಶ್ಮಿಕಾ ಮಂದಣ್ಣ

ಯಾರು ಈ ಪ್ರೀತಿ ಮುಕುಂದನ್?

ಪ್ರೀತಿ ಮುಕುಂದನ್ ಅವರು ತಮಿಳು, ತೆಲುಗು, ಮಲಯಾಳಂ ಭಾಷೆಯಲ್ಲಿ ನಟಿಸಿದ್ದಾರೆ. ‘ಓಂ ಭೀಮ್ ಬುಶ್’ ಅವರ ಮೊದಲ ಸಿನಿಮಾ. 2024ರಲ್ಲಿ ಸಿನಿಮಾ ರಿಲೀಸ್ ಆಯಿತು. ಇತ್ತೀಚೆಗೆ ರಿಲೀಸ್ ಆದ ಅವರ ನಟನೆಯ ‘ಬ್ಲಾಸ್ಟ್’ ಭಾರೀ ಮೆಚ್ಚುಗೆ ಪಡೆಯಿತು. ಬಸದ್ಯ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯುಸಿ ಇರುವುದರಿಂದ ಇವರಿಗೆ ಅಟ್ಲಿ ಮತ್ತು ಅಲ್ಲು ಅರ್ಜುನ್ ಸಿನಿಮಾದಲ್ಲಿ ನಟಿಸುವ ದೊಡ್ಡ ಅವಕಾಶ ಕೈತಪ್ಪಿ ಹೋಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.