‘ನೀವೇ ಚಾಂಪಿಯನ್​’: ವಿನೇಶ್​ ಫೋಗಟ್​ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದ ಬಾಲಿವುಡ್​

ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ ವಿನೇಶ್​ ಫೋಗಟ್​ ಬಂಗಾರದ ಪದಕ ಗೆಲ್ಲುತ್ತಾರೆ ಎಂದು ಕಾದಿದ್ದ ಎಲ್ಲರಿಗೂ ತೀವ್ರ ನಿರಾಸೆ ಆಗಿದೆ. ದೇಹದ ತೂಕ 50 ಕೆಜಿಗಿಂತಲೂ ಹೆಚ್ಚಿರುವ ಕಾರಣದಿಂದ ಕೊನೇ ಹಂತದಲ್ಲಿ ವಿನೇಶ್​ ಫೋಗಟ್​ ಅವರು ಅನರ್ಹಗೊಂಡರು. ಈ ಸುದ್ದಿ ಕೇಳಿ ಇಡೀ ಭಾರತಕ್ಕೆ ಆಘಾತ ಆಗಿದೆ. ಈ ಸಂದರ್ಭದಲ್ಲಿ ಅನೇಕ ಸೆಲೆಬ್ರಿಟಿಗಳು ವಿನೇಶ್​ ಫೋಗಟ್​ ಪರವಾಗಿ ಪೋಸ್ಟ್ ಮಾಡಿದ್ದಾರೆ. ಆಲಿಯಾ ಭಟ್​, ಫರ್ಹಾನ್​ ಅಖ್ತರ್​, ತಾಪ್ಸಿ ಪನ್ನು, ಕರೀನಾ ಕಪೂರ್​ ಖಾನ್​ ಸೇರಿದಂತೆ ಹಲವರು ವಿನೇಶ್​ ಫೋಗಟ್​​ ಅವರಿಗೆ ಧೈರ್ಯ ತುಂಬಿದ್ದಾರೆ. ‘ನಮ್ಮ ಪಾಲಿಗೆ ನೀವೇ ಚಾಂಪಿಯನ್​’ ಎಂದು ಎಲ್ಲರೂ ಹೇಳುತ್ತಿದ್ದಾರೆ.

‘ವಿನೇಶ್ ಫೋಗಟ್​ ಅವರೇ, ನೀವು ಇಡೀ ದೇಶಕ್ಕೆ ಸ್ಫೂರ್ತಿ. ಇತಿಹಾಸ ಸೃಷ್ಟಿಸಲು ನೀವು ತೋರಿದ ಧೈರ್ಯ ಹಾಗೂ ನಿಮ್ಮ ಪರಿಶ್ರಮವನ್ನು ಯಾರೂ ಸಹ ಕಿತ್ತುಕೊಳ್ಳಲು ಸಾಧ್ಯವಿಲ್ಲ. ಇಂದು ನಿಮ್ಮಂತೆಯೇ ನಮಗೂ ಸಹ ಆಘಾತ ಆಗಿದೆ. ಆದರೆ, ಮಹಿಳೆಯಾಗಿ ನೀವು ಬಂಗಾರದಂತೆ, ಕಬ್ಬಿಣದಂತೆ, ಉಕ್ಕಿನಂತೆ. ಅದನ್ನು ನಿಮ್ಮಿಂದ ಯಾರೂ ಕಸಿದುಕೊಳ್ಳಲು ಆಗುವುದಿಲ್ಲ. ನೀವೇ ಚಾಂಪಿಯನ್​. ನಿಮ್ಮಂತೆ ಬೇರೆ ಯಾರೂ ಇಲ್ಲ’ ಎಂದು ಆಲಿಯಾ ಭಟ್​ ಅವರು ಇನ್​ಸ್ಟಾಗ್ರಾಮ್​ನಲ್ಲಿ ಪೋಸ್ಟ್ ಮಾಡಿದ್ದಾರೆ.

View this post on Instagram

A post shared by Farhan Akhtar (@faroutakhtar)

‘ನಿಮಗೆ ಎಷ್ಟು ನೋವಾಗಿದೆ ಎಂಬುದನ್ನು ನಾವು ಕಲ್ಪನೆ ಮಾಡಿಕೊಳ್ಳಬಹುದು. ಆದರೆ ಆ ನೋವನ್ನು ಸಂಪೂರ್ಣ ಅರ್ಥಮಾಡಿಕೊಳ್ಳಲು ಆಗಲ್ಲ. ಆಟ ಈ ರೀತಿ ಕೊನೆಯಾಯ್ತು ಅಂತ ತಿಳಿದು ತುಂಬಾ ನೋವಾಗಿದೆ. ಆದರೆ, ನಮಗೆಲ್ಲ ನಿಮ್ಮ ಬಗ್ಗೆ ಹೆಮ್ಮೆ ಇದೆ ಎಂಬುದನ್ನು ತಿಳಿಯಿರಿ. ಕೋಟ್ಯಂತರ ಜನರಿಗೆ ನೀವೇ ಚಾಂಪಿಯನ್​, ನೀವೇ ಸ್ಫೂರ್ತಿ. ತಲೆ ಎತ್ತಿ ನಡೆಯಿರಿ’ ಎಂದು ಫರ್ಹಾನ್​ ಅಖ್ತರ್​ ಅವರು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ: ವಿನೇಶ್ ಫೋಗಟ್ ಅನರ್ಹ: ಇದು ದೇಶಕ್ಕೆ ನಷ್ಟ ಎಂದ ಬ್ರಿಜ್ ಭೂಷಣ್ ಶರಣ್ ಸಿಂಗ್ ಪುತ್ರ ಕರಣ್ ಭೂಷಣ್

‘ಇದು ತುಂಬಾ ನೋವಿನ ಸಂಗತಿ. ಆದರೆ ವಿನೇಶ್ ಘೋಗಟ್​ ಅವರು ಬಂಗಾರದ ಪದಕಕ್ಕಿಂತಲೂ ಹೆಚ್ಚಿನದ್ದು ಸಾಧಿಸಿದ್ದಾರೆ’ ಎಂದು ನಟಿ ತಾಪ್ಸಿ ಪನ್ನು ಅವರು ಇನ್​ಸ್ಟಾಗ್ರಾಮ್​ ಸ್ಟೋರಿಯಲ್ಲಿ ಪೋಸ್ಟ್ ಮಾಡಿದ್ದಾರೆ. ಫಾತಿಮಾ ಸಹಾ ಶೇಖ್​, ರಕುಲ್​ ಪ್ರೀತ್​ ಸಿಂಗ್​, ಅನನ್ಯಾ ಪಾಂಡೆ ಸೇರಿದಂತೆ ಅನೇಕ ನಟಿಯರು ವಿನೇಶ್​ ಫೋಗಟ್​ ಪರವಾಗಿ ತಮ್ಮ ಮಾತುಗಳನ್ನು ಹಂಚಿಕೊಂಡಿದ್ದಾರೆ. ಇಡೀ ದೇಶವೇ ವಿನೇಶ್​ ಫೋಗಟ್​ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸುತ್ತಿದೆ. ಆದರೆ ಫೈನಲ್​ನಲ್ಲಿ ಹಣಾಹಣಿ ನಡೆಸಲು ಸಾಧ್ಯವಾಗಿಲ್ಲ ಎಂಬುದು ಎಲ್ಲರಿಗೂ ನೋವುಂಟು ಮಾಡಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.