ಹೃತಿಕ್ ರೋಷನ್ ಮೆಚ್ಚಿನ ಸಹನಟ ದಕ್ಷಿಣದ ಈ ಸ್ಟಾರ್ ನಟ

ಹೃತಿಕ್ ರೋಷನ್ (Hritik Roshan), ಬಾಲಿವುಡ್​ನ ಸ್ಟಾರ್ ನಟ. ಲುಕ್ಸ್, ಫಿಟ್​ನೆಸ್, ಡ್ಯಾನ್ಸ್, ಫೈಟ್, ನಟನೆ ಎಲ್ಲವೂ ಹೊಂದಿರುವ ಅಪರೂಪದ ನಟ ಹೃತಿಕ್ ರೋಷನ್. ಯಾವುದೇ ಪಾತ್ರವಾದರೂ ಅದಕ್ಕೆ ತಮ್ಮನ್ನು ಒಪ್ಪಿಸಿಕೊಳ್ಳುವ ಹೃತಿಕ್ ರೋಷನ್, ಈ ವರೆಗೆ ಹಲವು ಸ್ಟಾರ್ ನಟ, ನಟಿಯರು, ನಿರ್ದೇಶಕರುಗಳೊಟ್ಟಿಗೆ ಕೆಲಸ ಮಾಡಿದ್ದಾರೆ. ವಿದೇಶಿ ನಟಿಯೊಟ್ಟಿಗೂ ಹೃತಿಕ್ ರೋಷನ್ ಕೆಲಸ ಮಾಡಿದ್ದಾರೆ. ಶಾರುಖ್ (Shah Rukh Khan), ಅಮಿತಾಬ್ ಸೇರಿದಂತೆ ಹಲವು ದಿಗ್ಗಜರೊಂದಿಗೆ ನಟಿಸಿದ್ದರೂ ಸಹ ಹೃತಿಕ್ ರೋಷನ್​ಗೆ ದಕ್ಷಿಣದ ಸಹ ನಟ ಬಹಳ ಅಚ್ಚು-ಮೆಚ್ಚಂತೆ.

ಹೃತಿಕ್ ರೋಷನ್ ಇತ್ತೀಚೆಗಷ್ಟೆ ಸಾರ್ವಜನಿಕ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡಿದ್ದರು. ಕಾರ್ಯಕ್ರಮದಲ್ಲಿ ನಿರೂಪಕಿ ಹೃತಿಕ್ ಅವರಿಗೆ ಹಲವು ಪ್ರಶ್ನೆಗಳನ್ನು ಕೇಳಿ ಉತ್ತರ ಪಡೆದರು. ಈ ವೇಳೆ, ‘ನಿಮ್ಮ ಮೆಚ್ಚಿನ ಸಹ ನಟ ಯಾರು? ನಿಮ್ಮೊಂದಿಗೆ ನಟಿಸಿರುವ ಇಷ್ಟೋಂದು ನಟ-ನಟಿಯರಲ್ಲಿ ನಿಮಗೆ ಇಷ್ಟವಾದವರು ಯಾರು?’ ಎಂದು ಪ್ರಶ್ನೆ ಮಾಡಿದರು. ಅದಕ್ಕೆ ತುಸು ಯೋಚನೆ ಮಾಡಿದ ಹೃತಿಕ್ ರೋಷನ್, ‘ನನಗೆ ಜೂ ಎನ್​ಟಿಆರ್ ಬಹಳ ಇಷ್ಟ, ಅವರೊಬ್ಬ ಅದ್ಭುತವಾದ ವ್ಯಕ್ತಿ’ ಎಂದರು.

‘ಜೂ ಎನ್​ಟಿಆರ್ ಬಹಳ ಎನರ್ಜಿ ಇರುವ ಅತ್ಯದ್ಭುತವಾದ ನಟ. ಅವರೊಟ್ಟಿಗೆ ಕೆಲಸ ಮಾಡಿದ್ದು ನನಗೆ ಬಹಳ ಖುಷಿ ನೀಡಿತು. ನಾನೂ ಹಾಗೂ ಅವರು ಸೇರಿ ಅದ್ಭುತವಾದ ಕೆಲಸ ಮಾಡಿದ್ದೀವಿ ಎಂಬುದು ನನ್ನ ನಂಬಿಕೆ. ‘ವಾರ್ 2’ ಸಿನಿಮಾ ಅದ್ಭುತವಾಗಿ ಮೂಡಿ ಬಂದಿದೆ. ಆ ಸಿನಿಮಾವನ್ನು ನಿಮಗೆ ತೋರಿಸಲು ಬಹಳ ಕಾತರವಾಗಿದ್ದೇವೆ. ಸಿನಿಮಾ ಆಗಸ್ಟ್ 14 ಕ್ಕೆ ತೆರೆಗೆ ಬರಲಿದೆ. ಈ ಹಿಂದೆ ಬಂದಿದ್ದ ‘ವಾರ್’ ಸಿನಿಮಾಕ್ಕಿಂತಲೂ ದೊಡ್ಡದಾಗಿ ಮೂಡಿ ಬಂದಿದೆ ಮತ್ತು ಅದ್ಭುತವಾಗಿ ಮೂಡಿ ಬಂದಿದೆ’ ಎಂದಿದ್ದಾರೆ ಹೃತಿಕ್ ರೋಷನ್.

ಇದನ್ನೂ ಓದಿ:ಶಾರುಖ್ ಖಾನ್-ಸುಕುಮಾರ್ ಸಿನಿಮಾ ಮಾಡೋ ಸುದ್ದಿ ಶುದ್ಧ ಸುಳ್ಳು; ಇಲ್ಲಿದೆ ಸಾಕ್ಷಿ

ಹೃತಿಕ್ ರೋಷನ್ ಹಾಗೂ ಜೂ ಎನ್​ಟಿಆರ್ ಇದೇ ಮೊದಲ ಬಾರಿಗೆ ‘ವಾರ್ 2’ ಸಿನಿಮಾನಲ್ಲಿ ಒಟ್ಟಿಗೆ ನಟಿಸಿದ್ದಾರೆ. ಸಿನಿಮಾ ಅನ್ನು ಅಯಾನ್ ಮುಖರ್ಜಿ ನಿರ್ದೇಶನ ಮಾಡಿದ್ದಾರೆ. ಸಿನಿಮಾ ನಿರ್ದೇಶನ ಮಾಡಿರುವುದು ಯಶ್ ಚೋಪ್ರಾ. ಹೃತಿಕ್ ರೋಷನ್-ಜೂ ಎನ್​ಟಿಆರ್ ಅವರ ಈ ಸಿನಿಮಾ ಹಿಂದಿ ಮಾತ್ರವಲ್ಲದೆ ತೆಲುಗು, ತಮಿಳು, ಮಲಯಾಳಂ ಇನ್ನಿತರೆ ಕೆಲ ಭಾಷೆಗಳಲ್ಲಿಯೂ ಬಿಡುಗಡೆ ಆಗಲಿದೆ. ಸಿನಿಮಾದಲ್ಲಿ ಕಿಯಾರಾ ಅಡ್ವಾಣಿ ನಾಯಕಿಯಾಗಿ ನಟಿಸಿದ್ದಾರೆ. ಸಿನಿಮಾ ಆಗಸ್ಟ್ 14 ರಂದು ಬಿಡುಗಡೆ ಆಗಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ