Breast Cancer: ನಟಿ ಮಹಿಮಾ ಚೌಧರಿಗೆ ಸ್ತನ ಕ್ಯಾನ್ಸರ್; ಎಮೋಷನಲ್ ವಿಡಿಯೋ ಹಂಚಿಕೊಂಡ ಅನುಪಮ್ ಖೇರ್
Mahima Chaudhary | Anupam Kher: ಕ್ಯಾನ್ಸರ್ನಿಂದಾಗಿ ಮಹಿಮಾ ಚೌಧರಿ ಅವರ ಜೀವನದಲ್ಲಿ ಹಲವು ಘಟನೆಗಳು ಎದುರಾದವು. ಇತರೆ ಕ್ಯಾನ್ಸರ್ ರೋಗಿಗಳನ್ನು ನೋಡಿ ಅವರು ಧೈರ್ಯ ತಂದುಕೊಂಡರು.
Updated on: Jun 09, 2022 | 4:07 PM
ಬಾಲಿವುಡ್ನ ಅನೇಕ ಸಿನಿಮಾಗಳಲ್ಲಿ ನಟಿಸಿರುವ ಮಹಿಮಾ ಚೌಧರಿ (Mahima Chaudhary) ಅವರ ಅಭಿಮಾನಿಗಳಿಗೆ ಎರಡು ಸುದ್ದಿ ಇದೆ. ಒಂದು ಬೇಸರದ ಸುದ್ದಿ, ಇನ್ನೊಂದು ಖುಷಿಯ ಸುದ್ದಿ. ಬೇಸರದ ಸುದ್ದಿ ಏನೆಂದರೆ ಮಹಿಮಾ ಚೌಧರಿ ಅವರಿಗೆ ಸ್ತನ ಕ್ಯಾನ್ಸರ್ (Breast Cancer) ಆಗಿದೆ. ಖುಷಿಯ ಸುದ್ದಿ ಏನೆಂದರೆ ಅವರು ಈಗಾಗಲೇ ಆ ಕ್ಯಾನ್ಸರ್ನಿಂದ ಗುಣಮುಖರಾಗಿದ್ದಾರೆ. ತಮಗೆ ಕ್ಯಾನ್ಸರ್ ಆಗಿತ್ತು ಎಂಬ ವಿಷಯವನ್ನು ಇಷ್ಟು ದಿನಗಳವರೆಗೆ ಮಹಿಮಾ ಅವರು ಹೇಳಿಕೊಂಡಿರಲಿಲ್ಲ. ಆದರೆ ಈಗ ನಟ ಅನುಪಮ್ ಖೇರ್ (Anupam Kher) ಅವರು ಎಲ್ಲವನ್ನೂ ಬಹಿರಂಗಪಡಿಸುವಂತೆ ಮಾಡಿದ್ದಾರೆ. ಮಹಿಮಾ ಮತ್ತು ಅನುಪಮ್ ಅವರು ಒಂದು ವಿಡಿಯೋ ಹಂಚಿಕೊಂಡಿದ್ದಾರೆ. ಅನುಪಮ್ ಕೇಳಿದ ಹಲವು ಪ್ರಶ್ನೆಗಳಿಗೆ ಮಹಿಮಾ ಉತ್ತರ ನೀಡಿರುವ ಈ ವಿಡಿಯೋ ತುಂಬ ಎಮೋಷನಲ್ ಆಗಿದೆ. ಮಹಿಮಾ ಈಗ ಸಂಫೂರ್ಣ ಗುಣಮುಖರಾಗಿದ್ದಾರೆ. ಹಾಗಿದ್ದರೂ ಕೂಡ ಅವರ ಆರೋಗ್ಯಕ್ಕಾಗಿ ಪ್ರಾರ್ಥಿಸಿ ಎಂದು ಅಭಿಮಾನಿಗಳಲ್ಲಿ ಅನುಪಮ್ ಖೇರ್ ಮನವಿ ಮಾಡಿಕೊಂಡಿದ್ದಾರೆ.
ತಮಗೆ ಮೊದಲ ಬಾರಿಗೆ ಕ್ಯಾನ್ಸರ್ ಇದೆ ಎಂಬುದು ಗೊತ್ತಾದಾಗ ತಮ್ಮ ಪರಿಸ್ಥಿತಿ ಯಾವ ರೀತಿ ಇತ್ತು ಎಂಬುದನ್ನು ಮಹಿಮಾ ಚೌಧರಿ ವಿವರಿಸಿದ್ದಾರೆ. ಕ್ಯಾನ್ಸರ್ಗೆ ಚಿಕಿತ್ಸೆ ಪಡೆದುಕೊಂಡಿದ್ದರಿಂದ ಅವರ ತಲೆ ಕೂದಲು ಉದುರಿ ಹೋಗಿದೆ. ಹಾಗಾಗಿ ಅವರು ವಿಗ್ ಧರಿಸಿ ಶೂಟಿಂಗ್ನಲ್ಲಿ ಪಾಲ್ಗೊಳ್ಳುವುದಾಗಿ ಹೇಳಿದ್ದಾರೆ. ಕ್ಯಾನ್ಸರ್ನಿಂದಾಗಿ ಮಹಿಮಾ ಅವರ ಜೀವನದಲ್ಲಿ ಹಲವು ಘಟನೆಗಳು ಎದುರಾದವು. ಅನೇಕ ಬಗೆಯ ಜನರನ್ನು ಅವರು ಭೇಟಿ ಮಾಡಬೇಕಾಯಿತು. ಇತರೆ ಕ್ಯಾನ್ಸರ್ ರೋಗಿಗಳನ್ನು ನೋಡಿ ಧೈರ್ಯ ತಂದುಕೊಂಡ ಮಹಿಮಾ ಅವರು ಈಗ ತಮ್ಮ ಸ್ವಂತ ಅನುಭವವನ್ನು ಈ ವಿಡಿಯೋದಲ್ಲಿ ವಿವರಿಸಿದ್ದಾರೆ.
ಇದನ್ನೂ ಓದಿ: ‘ದಿ ಕಾಶ್ಮೀರ್ ಫೈಲ್ಸ್’ ನಟನ ಅಚ್ಚರಿಯ ಬದಲಾವಣೆ; ಹೇಗಿದ್ದ ಅನುಪಮ್ ಖೇರ್ ಹೇಗಾದ್ರು ನೋಡಿ
ಇಂಥ ಕಷ್ಟದ ಪರಿಸ್ಥಿತಿಯನ್ನು ಎದುರಿಸಿದ ಮಹಿಮಾ ಚೌಧರಿಗೆ ಅನುಪಮ್ ಖೇರ್ ಅವರು ಶಹಬ್ಬಾಸ್ ಎಂದಿದ್ದಾರೆ. ಕ್ಯಾನ್ಸರ್ ಅನ್ನು ಮಣಿಸಿದ ಅವರೇ ನಿಜವಾದ ಹೀರೋ ಎಂದು ಬಣ್ಣಿಸಿದ್ದಾರೆ. ಅದೇ ರೀತಿ ಅನುಪಮ್ ಖೇರ್ ಅವರ ಒಳ್ಳೆಯತನ ಮತ್ತು ಬೆಂಬಲವನ್ನು ಮಹಿಮಾ ಅವರು ಕೊಂಡಾಡಿದ್ದಾರೆ. ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಈ ವಿಡಿಯೋ ಸಖತ್ ವೈರಲ್ ಆಗಿದೆ. ಲಕ್ಷಾಂತರ ಜನರು ಇದನ್ನು ವೀಕ್ಷಿಸಿದ್ದಾರೆ. ಕಮೆಂಟ್ಗಳ ಮೂಲಕ ಮಹಿಮಾಗೆ ಧೈರ್ಯ ತುಂಬಿದ್ದಾರೆ.
View this post on Instagram
ಈ ವರ್ಷ ತೆರೆಕಂಡ ‘ದಿ ಕಾಶ್ಮೀರ್ ಫೈಲ್ಸ್’ ಸಿನಿಮಾದಿಂದ ಅನುಪಮ್ ಖೇರ್ ಅವರಿಗೆ ದೊಡ್ಡ ಯಶಸ್ಸು ಸಿಕ್ಕಿದೆ. ಹಲವು ಸಿನಿಮಾಗಳಲ್ಲಿ ಅವರು ಬ್ಯುಸಿ ಆಗಿದ್ದಾರೆ. ಜತೆಗೆ ಫಿಟ್ನೆಸ್ ಕಡೆಗೂ ಹೆಚ್ಚು ಕಾಳಜಿ ವಹಿಸುತ್ತಿದ್ದಾರೆ. ಆ ಕುರಿತು ಕೂಡ ಅವರು ಕೆಲವು ದಿನಗಳ ಹಿಂದೆ ಮಾಹಿತಿ ಹಂಚಿಕೊಂಡಿದ್ದರು.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
