‘ನಿಮ್ಮನ್ನು ಮುಟ್ಟಬಹುದಾ?’: ಸಲ್ಮಾನ್ ಖಾನ್ ಭೇಟಿ ಮಾಡಿದ ಮೊದಲ ದಿನವೇ ನಟಿಯ ವಿಚಿತ್ರ ಬೇಡಿಕೆ
‘ಮೊದಲ ದಿನ ಸಲ್ಮಾನ್ ಖಾನ್ ಅವರನ್ನು ಭೇಟಿ ಆದಾಗ ನಾನು ಏನು ಮಾಡಬಹುದು, ಏನು ಮಾಡಬಾರದು ಎಂಬ ಬಗ್ಗೆ ನನಗೆ ಅರಿವು ಇರಲಿಲ್ಲ’ ಎಂದು ನಟಿ ಪ್ರಗ್ಯಾ ಜೈಸ್ವಾಲ್ ಹೇಳಿದ್ದಾರೆ.
Updated on:Jan 24, 2022 | 10:08 AM
ಬಾಲಿವುಡ್ನ ಬಹುಬೇಡಿಕೆಯ ನಟನಾಗಿ ಸಲ್ಮಾನ್ ಖಾನ್ (Salman Khan) ಮಿಂಚುತ್ತಿದ್ದಾರೆ. ಅವರಿಗೆ ವಿಶ್ವಾದ್ಯಂತ ಅಭಿಮಾನಿಗಳು (Salman Khan Fans) ಇದ್ದಾರೆ. ಜನಸಾಮಾನ್ಯರು ಮಾತ್ರವಲ್ಲದೇ ಸೆಲೆಬ್ರಿಟಿಗಳಿಗೂ ಸಲ್ಮಾನ್ ಖಾನ್ ಎಂದು ಅಚ್ಚುಮೆಚ್ಚು. ಅವರನ್ನು ಒಮ್ಮೆಯಾದರೂ ಭೇಟಿ ಮಾಡಬೇಕು ಅಂತ ಎಷ್ಟೋ ಮಂದಿ ಆಸೆ ಇಟ್ಟುಕೊಂಡಿರುತ್ತಾರೆ. ಆದರೆ ಅಂಥ ಅವಕಾಶ ಎಲ್ಲರಿಗೂ ಸಿಗೋದಿಲ್ಲ. ಒಂದು ವೇಳೆ ಭೇಟಿಯಾಗುವ ಅವಕಾಶ ಸಿಕ್ಕರೂ ಆ ಸಂದರ್ಭದಲ್ಲಿ ಏನು ಮಾಡಬೇಕು ಎಂಬುದೇ ತಿಳಿಯುವುದಿಲ್ಲ. ಇತ್ತೀಚೆಗೆ ನಟಿ ಪ್ರಗ್ಯಾ ಜೈಸ್ವಾಲ್ ಅವರಿಗೆ ಹಾಗೆಯೇ ಆಯಿತು. ಸಲ್ಮಾನ್ ಖಾನ್ ಎಂದರೆ ಪ್ರಗ್ಯಾ ಜೈಸ್ವಾಲ್ (Pragya Jaiswal) ಅವರಿಗೆ ಸಖತ್ ಇಷ್ಟ. ಜೀವನದಲ್ಲಿ ಮೊದಲ ಬಾರಿಗೆ ಸಲ್ಲು ಅವರನ್ನು ಭೇಟಿ ಮಾಡಿದಾಗ ವಿಚಿತ್ರ ಆಸೆಯನ್ನು ಅವರು ವ್ಯಕ್ತಪಡಿಸಿದರು. ‘ನಿಮ್ಮನ್ನು ಮುಟ್ಟಬಹುದೇ’ ಎಂದು ಪ್ರಗ್ಯಾ ಜೈಸ್ವಾಲ್ ನೇರವಾಗಿ ಕೇಳಿಬಿಟ್ಟರು. ಅಷ್ಟಕ್ಕೂ ಆ ದಿನ ಯಾಕೆ ಹೀಗಾಯಿತು ಎಂಬುದು ಅವರೇ ಈಗ ವಿವರಿಸಿದ್ದಾರೆ. ‘ಮೇ ಚಲಾ’ ಮ್ಯೂಸಿಕ್ ವಿಡಿಯೋದಲ್ಲಿ ಪ್ರಗ್ಯಾ ಜೈಸ್ವಾಲ್ ಮತ್ತು ಸಲ್ಮಾನ್ ಖಾನ್ ಅವರು ಜೊತೆಯಾಗಿ ನಟಿಸಿದ್ದಾರೆ. ಮೊದಲ ದಿನದ ಶೂಟಿಂಗ್ ಅನುಭವದ ಬಗ್ಗೆ ಈಗ ಅವರು ಮಾತನಾಡಿದ್ದಾರೆ.
ಗಾಯಕ/ಸಂಗೀತ ನಿರ್ದೇಶಕ ಗುರು ರಂಧವಾ ಮತ್ತು ಸಲ್ಮಾನ್ ಖಾನ್ ಪ್ರೇಯಸಿ ಎನ್ನಲಾದ ಯುಲಿಯಾ ವಂಟೂರ್ ಅವರು ಜೊತೆಯಾಗಿ ‘ಮೇ ಚಾಲಾ’ ಹಾಡು ತಯಾರಿಸಿದ್ದಾರೆ. ಇತ್ತೀಚೆಗೆ ಬಿಡುಗಡೆ ಆಗಿರುವ ಈ ಮ್ಯೂಸಿಕ್ ವಿಡಿಯೋಗೆ ಅಭಿಮಾನಿಗಳಿಗೆ ಮೆಚ್ಚುಗೆ ಸಿಕ್ಕಿದೆ. ಅದರ ಶೂಟಿಂಗ್ ಸಲುವಾಗಿ ಮೊದಲ ದಿನ ಸೆಟ್ಗೆ ಹೋಗಿದ್ದಾಗ ಸಲ್ಮಾನ್ ಖಾನ್ ಅವರನ್ನು ಕಂಡು ನಟಿ ಪ್ರಗ್ಯಾ ಜೈಸ್ವಾಲ್ ಅವರಿಗೆ ಎಲ್ಲಿಲ್ಲದ ಖುಷಿ ಆಗಿತ್ತು. ಅಂದಿನ ಅನುಭವನ್ನು ಅವರೀಗ ಹಂಚಿಕೊಂಡಿದ್ದಾರೆ.
‘ಮೊದಲ ದಿನ ನಾನು ಸಲ್ಮಾನ್ ಖಾನ್ ಅವರನ್ನು ಭೇಟಿ ಆದಾಗ ನಾನು ಏನು ಮಾಡಬಹುದು, ಏನು ಮಾಡಬಾರದು ಎಂಬ ಬಗ್ಗೆ ಅರಿವು ನನಗೆ ಇರಲಿಲ್ಲ. ಸಲ್ಮಾನ್ ಖಾನ್ ಅವರಂಥ ದೊಡ್ಡ ಸ್ಟಾರ್ ನಟನನ್ನು ಭೇಟಿಯಾದಾಗ ಅವರಿಗೆ ಕಿರಿಕಿರಿ ಆಗುವಂತೆ ನಾವು ನಡೆದುಕೊಳ್ಳಬಾರದು. ಅಪ್ಪಿತಪ್ಪಿಯೂ ಕೂಡ ಅವರಿಗೆ ಕೋಪ ಬರುವಂತೆ ನಾವು ವರ್ತಿಸಬಾರದು. ಹಾಗಾಗಿ ನಾನು ಹೆಚ್ಚಿನ ಎಚ್ಚರಿಕೆಯಿಂದ ನಡೆದುಕೊಂಡೆ. ನಿಮ್ಮನ್ನು ನಾನು ಮುಟ್ಟಬಹುದೇ ಅಂತ ಮೊದಲ ಬಾರಿಗೆ ಅನುಮತಿ ಕೇಳಿದೆ’ ಎಂದು ಪ್ರಗ್ಯಾ ಜೈಸ್ವಾಲ್ ಹೇಳಿದ್ದಾರೆ.
‘ಅದೊಂದು ರೊಮ್ಯಾಂಟಿಕ್ ಸಾಂಗ್. ಅದರಲ್ಲಿ ನಟಿಸುವಾಗ ಇಬ್ಬರ ನಡುವೆ ಕೆಮಿಸ್ಟ್ರೀ ಚೆನ್ನಾಗಿ ಇರಬೇಕಾಗದ್ದು ಅತ್ಯಗತ್ಯ. ಅದಕ್ಕಾಗಿ ಸಲ್ಮಾನ್ ಖಾನ್ ಅವರು ಒಳ್ಳೆಯ ಮೂಡ್ನಲ್ಲಿ ಇರುವಂತೆ ನೋಡಿಕೊಳ್ಳಬೇಕಿತ್ತು. ಈಕೆ ಅತಿಯಾಗಿ ಆಡ್ತಾ ಇದ್ದಾಳೆ ಎಂಬ ಮಾತು ಅವರಿಂದ ಬಾರದಂತೆ ಎಚ್ಚರಿಕೆ ವಹಿಸಬೇಕಿತ್ತು. ಹಾಗಾಗಿ ನಿಮ್ಮನ್ನು ಮುಟ್ಟಬಹುದೇ ಅಂತ ಅನುಮತಿ ಕೇಳಿದೆ. ಖಂಡಿತವಾಗಿಯೂ ಮುಟ್ಟಬಹುದು ಅಂತ ಸಲ್ಮಾನ್ ಖಾನ್ ಅವರು ಒಪ್ಪಿಗೆ ನೀಡಿದರು’ ಎಂದು ಆ ದಿನವನ್ನು ಪ್ರಗ್ಯಾ ಜೈಸ್ವಾಲ್ ಮೆಲುಕು ಹಾಕಿದ್ದಾರೆ.
ಕಳೆದ ವರ್ಷ ಡಿ.17ರಂದು ಸಲ್ಮಾನ್ ಖಾನ್ ಅವರ ಬರ್ತ್ಡೇ ಆಚರಿಸಲಾಯಿತು. ಪನ್ವೇಲ್ ಫಾರ್ಮ್ಹೌಸ್ನಲ್ಲಿ ಅದ್ದೂರಿಯಾಗಿ ನಡೆದ ಬರ್ತ್ಡೇ ಪಾರ್ಟಿಗೆ ಪ್ರಗ್ಯಾ ಜೈಸ್ವಾಲ್ ಅವರನ್ನೂ ಆಹ್ವಾನಿಸಲಾಗಿತ್ತು. ಅಂದಿನ ಫೋಟೋವನ್ನು ಪ್ರಗ್ಯಾ ಅವರು ಸೋಶಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿಕೊಂಡು ಸಲ್ಲುಗೆ ವಿಶ್ ಮಾಡಿದ್ದರು.
ಇದನ್ನೂ ಓದಿ:
ಸಲ್ಮಾನ್ ಖಾನ್ ಪರ ಲಾಯರ್ ಶ್ರೀಕಾಂತ್ ಶಿವಡೆ ಕ್ಯಾನ್ಸರ್ನಿಂದ ನಿಧನ; ‘ತಕ್ಕ ಶಿಕ್ಷೆ ಸಿಕ್ತು’ ಎಂದ ನೆಟ್ಟಿಗರು
‘ನನ್ನ ಧರ್ಮದ ಬಗ್ಗೆ ಮಾತಾಡ್ಬೇಡಿ’; ಪಕ್ಕದ ಮನೆಯವರಿಗೆ ಎಚ್ಚರಿಕೆ ನೀಡಿ ಕೇಸ್ ಜಡಿದ ಸಲ್ಮಾನ್ ಖಾನ್
Published On - 9:58 am, Mon, 24 January 22
