ಹೀಗೂ ದುಡ್ಡು ಮಾಡಬಹುದು ಅಂತ ತೋರಿಸಿದ್ದೇ ಸಲ್ಮಾನ್​ ಖಾನ್​; ಅನಿಲ್​ ಕಪೂರ್​ ಹೇಳಿದ ಅಚ್ಚರಿ ವಿಷಯ

ನಟ ಸಲ್ಮಾನ್​ ಖಾನ್ (Salman Khan)​ ಅವರಿಗೆ ಯಾವ ಪರಿ ಬೇಡಿಕೆ ಇದೆ ಎಂಬುದನ್ನು ಬಿಡಿಸಿ ಕೇಳಬೇಕಿಲ್ಲ. ಸಿನಿಮಾಗಳಲ್ಲಿ ನಟಿಸುವ ಅವರಿಗೆ ಕೋಟ್ಯಂತರ ರೂಪಾಯಿ ಸಂಭಾವನೆ ಸಿಗುತ್ತದೆ. ಅನೇಕ ಜಾಹೀರಾತುಗಳಲ್ಲಿ ಕಾಣಿಸಿಕೊಳ್ಳುವ ಮೂಲಕವೂ ಅವರು ಬಹುಕೋಟಿ ರೂಪಾಯಿ ದುಡಿಯುತ್ತಾರೆ. ಬಿಗ್​ ಬಾಸ್​ ಕಾರ್ಯಕ್ರಮವನ್ನು ನಿರೂಪಣೆ ಮಾಡಿದ್ದಕ್ಕಾಗಿ ಅವರಿಗೆ ಕೈ ತುಂಬಾ ಸಂಭಾವನೆ (Salman Khan Remuneration) ಸಿಗುತ್ತದೆ. ಕೆಲವು ಕಾರ್ಯಕ್ರಮಗಳಿಗೆ ಅತಿಥಿಯಾಗಿ ಹೋಗಿದ್ದಕ್ಕೂ ಅವರು ಹಣ ಪಡೆಯುತ್ತಾರೆ. ಸಲ್ಮಾನ್​ ಖಾನ್​ ಕೇವಲ ನಟ ಮಾತ್ರವಲ್ಲ, ಅವರೊಬ್ಬ ಪಕ್ಕಾ ಬ್ಯುಸಿನೆಸ್​ ಮ್ಯಾನ್​. ಹಾಗಾಗಿ ಅವರು ಹಣದ ಬಗ್ಗೆ ಸರಿಯಾದ ಲೆಕ್ಕಾಚಾರ ಹಾಕುತ್ತಾರೆ. ಅದ್ದೂರಿಯಾಗಿ ನಡೆಯುವ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಡ್ಯಾನ್ಸ್​ ಮಾಡಿ ಹಣ ಗಳಿಸಿದ ಮೊದಲ ಬಾಲಿವುಡ್​ ಸ್ಟಾರ್​ ಎಂದರೆ ಅದು ಸಲ್ಮಾನ್​ ಖಾನ್​! ಈ ವಿಚಾರವನ್ನು ಅನಿಲ್​ ಕಪೂರ್ (Anil Kapoor)​ ಅವರು ಈ ಹಿಂದೆ ಬಾಯಿ ಬಿಟ್ಟಿದ್ದರು. ಆ ವಿಡಿಯೋ ಈಗ ಮತ್ತೆ ವೈರಲ್​ ಆಗುತ್ತಿದೆ.

ಸಿನಿಮಾ ಜಗತ್ತಿನಲ್ಲಿ ಪ್ರಶಸ್ತಿ ಪ್ರದಾನ ಸಮಾರಂಭಗಳಿಗೆ ಸಾಕಷ್ಟು ಹಣ ಖರ್ಚು ಮಾಡಲಾಗುತ್ತದೆ. ಆಯೋಜಕರಿಗೆ ಅದರಿಂದ ಆದಾಯವೂ ಹರಿದುಬರುತ್ತದೆ. ಅಂಥ ಕಾರ್ಯಕ್ರಮಗಳಲ್ಲಿ ಅನೇಕ ಸೆಲೆಬ್ರಿಟಿಗಳು ಡ್ಯಾನ್ಸ್​ ಮಾಡುತ್ತಾರೆ. ಅದಕ್ಕಾಗಿ ಅವರಿಗೆ ಸಂಭಾವನೆ ಸಿಗುತ್ತದೆ. ಈ ರೀತಿ ಮೊಟ್ಟ ಮೊದಲ ಬಾರಿಗೆ ಸಂಭಾವನೆ ಪಡೆದವರು ಸಲ್ಮಾನ್​ ಖಾನ್​. ‘ನಾನು ಸ್ಟಾರ್​ ನಟ. ನಿಮ್ಮ ಕಾರ್ಯಕ್ರಮದಲ್ಲಿ ನಾನು ಡ್ಯಾನ್ಸ್​ ಮಾಡಬೇಕು ಎಂದರೆ ನೀವು ನನಗೆ ಹಣ ನೀಡಬೇಕು’ ಅಂತ ಡಿಮ್ಯಾಂಡ್​ ಮಾಡಿದ್ದು ಅವರೇ ಮೊದಲು.

ಸಲ್ಮಾನ್​ ಖಾನ್​ ಅವರು ಹೀಗೂ ಹಣ ಮಾಡಬಹುದು ಅಂತ ತೋರಿಸಿಕೊಟ್ಟ ಬಳಿಕ ಚಿತ್ರರಂಗದಲ್ಲಿ ಹೊಸ ಬದಲಾವಣೆ ಆಯಿತು. ಬೇರೆ ನಟ-ನಟಿಯರು ಕೂಡ ಇದೇ ಸೂತ್ರವನ್ನು ಅನುಸರಿಸಲು ಆರಂಭಿಸಿದರು. ಅವಾರ್ಡ್​ ಫಂಕ್ಷನ್​ಗಳಲ್ಲಿ ಪರ್ಫಾರ್ಮ್​ ಮಾಡುವ ಎಲ್ಲರಿಗೂ ಈಗ ಒಳ್ಳೆಯ ಸಂಭಾವನೆ ಸಿಗುತ್ತಿದೆ. ‘ಸಲ್ಮಾನ್​ ಖಾನ್​ ಈ ರೀತಿ ಮಾಡಿದ್ದು ಒಂದು ಕ್ರಾಂತಿ’ ಎಂದು ಅನಿಲ್​ ಕಪೂರ್​ ಅವರು ಈ ಹಿಂದೆ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದರು.

ಅವಾರ್ಡ್​ ಫಂಕ್ಷನ್​ಗಳಲ್ಲಿ ಡ್ಯಾನ್ಸ್​ ಮಾಡಿದರೆ ಹಣ ಕೊಡುತ್ತಾರೆ ಎಂಬ ವಿಷಯ ಅನಿಲ್​ ಕಪೂರ್​ ಅವರಿಗೆ ತಿಳಿದಿರಲಿಲ್ಲವಂತೆ. ಹಾಗಾಗಿ ಮೊದಲೆಲ್ಲ ತಾವು ಉಚಿತವಾಗಿ ಭಾಗವಹಿಸುತ್ತಿದ್ದ ವಿಚಾರದ ಬಗ್ಗೆಯೂ ಅವರು ಹೇಳಿಕೊಂಡಿದ್ದರು. ಹಲವು ವಿಚಾರಗಳಲ್ಲಿ ಸಲ್ಮಾನ್​ ಖಾನ್​ ಅವರು ಟ್ರೆಂಡ್​ ಸೆಟ್ಟರ್​ ಆಗಿದ್ದಾರೆ. ಅವರ ಸಿನಿಮಾಗಳು ಗಲ್ಲಾಪೆಟ್ಟಿಗೆಯಲ್ಲಿ ಸೋತರೂ ಅವರಿಗೆ ಇರುವ ಡಿಮ್ಯಾಂಡ್​​ ಕಮ್ಮಿ ಆಗುವುದಿಲ್ಲ. ಸದ್ಯ ಅವರು ‘ಟೈಗರ್​ 3’ ಚಿತ್ರದ ಕೆಲಸಗಳಲ್ಲಿ ತೊಡಗಿಕೊಂಡಿದ್ದಾರೆ.

ಇದನ್ನೂ ಓದಿ:

ಸಲ್ಮಾನ್​ ಖಾನ್​ ಯಾಕಿನ್ನೂ ಮದುವೆ ಆಗಿಲ್ಲ? ಅಸಲಿ ಕಾರಣ ತಿಳಿಸಿದ ಬಾಮೈದ ಆಯುಶ್​ ಶರ್ಮಾ

ಬಿಗ್​ ಬಾಸ್​ ವೇದಿಕೆ ಮೇಲೆ ಸಿದ್ದಾರ್ಥ್​ ಶುಕ್ಲಾಗೆ ಬರ್ತ್​ಡೇ ವಿಶ್​ ತಿಳಿಸಿದ ಸಲ್ಮಾನ್​ ಖಾನ್​