ಆರ್ಯನ್ ಖಾನ್ ಕೇಸ್ ಮರೆತು ಸಾರ್ವಜನಿಕವಾಗಿ ಕಾಣಿಸಿಕೊಂಡ ಶಾರುಖ್ ಪತ್ನಿ ಗೌರಿ ಖಾನ್, ಪುತ್ರಿ ಸುಹಾನಾ
ಡ್ರಗ್ಸ್ ಪಾರ್ಟಿ ವಿಚಾರದಲ್ಲಿ ಆರ್ಯನ್ ಖಾನ್ ವಿವಾದ ಮಾಡಿಕೊಂಡು ಜೈಲು ಸೇರಿ ಹೊರಬಂದ ಬಳಿಕ ಗೌರಿ ಖಾನ್ ಅವರು ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದು ಇದೇ ಮೊದಲು. ಮಾಧ್ಯಮಗಳ ಕ್ಯಾಮೆರಾ ಕಂಡ ಅವರು ನಗುತ್ತಾ ಪೋಸ್ ಕೊಟ್ಟಿದ್ದಾರೆ.
Updated on: Feb 25, 2022 | 12:00 PM
ಸ್ಟಾರ್ ಕಿಡ್ ಆರ್ಯನ್ ಖಾನ್ (Gauri Khan) ಅವರು ಡ್ರಗ್ಸ್ ಕೇಸ್ ವಿವಾದದಿಂದ ಜೈಲಿಗೆ ಹೋಗಿಬಂದ ಬಳಿಕ ಅವರ ಕುಟುಂಬಕ್ಕೆ ಮುಜುಗರ ಎದುರಾಗಿತ್ತು. ಶಾರುಖ್ ಖಾನ್ ಪುತ್ರನ ಡ್ರಗ್ಸ್ ಪಾರ್ಟಿ ಸುದ್ದಿ ದೇಶಾದ್ಯಂತ ಸದ್ದು ಮಾಡಿತ್ತು. ಅದನ್ನೆಲ್ಲ ಬದಿಗಿಟ್ಟು ಶಾರುಖ್ ಖಾನ್ ಈಗಾಗಲೇ ಸಿನಿಮಾ ಕೆಲಸಗಳಲ್ಲಿ ತೊಡಗಿಕೊಂಡಿದ್ದಾರೆ. ಸ್ವತಃ ಆರ್ಯನ್ ಖಾನ್ ಕೂಡ ಐಪಿಎಲ್ ಹರಾಜು ಮುಂತಾದ ಪ್ರಮುಖ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡಿದ್ದಾಗಿದೆ. ಆದರೂ ಸಹ ಶಾರುಖ್ ಖಾನ್ ಪತ್ನಿ ಗೌರಿ ಖಾನ್ (Aryan Khan) ಅವರು ಸಾರ್ವಜನಿಕವಾಗಿ ಕಾಣಿಸಿಕೊಂಡಿರಲಿಲ್ಲ. ಈಗ ಅವರು ಕೂಡ ಅಜ್ಞಾತವಾಸಕ್ಕೆ ಬ್ರೇಕ್ ಹಾಕಿದ್ದಾರೆ. ಪುತ್ರಿ ಸುಹಾನಾ ಖಾನ್ ಜೊತೆಗೂಡಿ ಗೌರಿ ಖಾನ್ ಅವರು ಮನೆಯಿಂದ ಹೊರಬಂದಿದ್ದಾರೆ. ಫರ್ಹಾನ್ ಅಖ್ತರ್ ಮತ್ತು ಶಿಬಾನಿ ದಂಡೇಕರ್ ಅವರು ಇತ್ತೀಚೆಗೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ಅವರ ಮದುವೆ ಸಮಾರಂಭ ತುಂಬ ಸರಳವಾಗಿ, ಕೆಲವೇ ಕೆಲವು ಆಹ್ವಾನಿತರ ಎದುರು ನಡೆದಿತ್ತು. ಆದರೆ ಈಗ ಅವರು ಬಾಲಿವುಡ್ ಸೆಲೆಬ್ರಿಟಿಗಳನ್ನು ಕರೆದು ಅದ್ದೂರಿ ಔತಣ ನೀಡಿದ್ದಾರೆ. ಈ ಪಾರ್ಟಿಗೆ ಶಾರುಖ್ ಖಾನ್ (Shah Rukh Khan) ಕುಟುಂಬದವರು ಹಾಜರಿ ಹಾಕಿದ್ದಾರೆ.
ಆರ್ಯನ್ ಖಾನ್ ಡ್ರಗ್ಸ್ ಪಾರ್ಟಿ ವಿವಾದ ಮಾಡಿಕೊಂಡು ಜೈಲು ಸೇರಿದ ಬಳಿಕ ಗೌರಿ ಖಾನ್ ಅವರು ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದು ಇದೇ ಮೊದಲು. ಮಾಧ್ಯಮಗಳ ಕ್ಯಾಮೆರಾ ಕಂಡ ಅವರು ನಗುತ್ತಾ ಪೋಸ್ ಕೊಟ್ಟಿದ್ದಾರೆ. ಕಪ್ಪು ಬಣ್ಣದ ಜಂಪ್ ಸೂಟ್ ಧರಿಸಿ ಅವರು ಮದುವೆ ಪಾರ್ಟಿಗೆ ಬಂದಿದ್ದರು. ಗೌರಿ ಖಾನ್ ಪುತ್ರಿ ಸುಹಾನಾ ಅವರು ಕಪ್ಪು ಬಣ್ಣದ ಸ್ಲೀವ್ ಲೆಸ್ ಡ್ರೆಸ್ ಧರಿಸಿ ಮಿಂಚುತ್ತಿದ್ದರು. ಕ್ಯಾಶುವಲ್ ಬಟ್ಟೆಯಲ್ಲಿ ಆರ್ಯನ್ ಖಾನ್ ಕಾಣಿಸಿಕೊಂಡರು.
ಆರ್ಯನ್ ಖಾನ್ ಅವರು ಸದ್ಯ ಜಾಮೀನು ಪಡೆದು ಹೊರಗಿದ್ದಾರೆ. ಸಿನಿಮಾ ಕೆಲಸಗಳ ಕಡೆಗೆ ಅವರು ಗಮನ ನೀಡುತ್ತಿದ್ದಾರೆ ಎಂಬ ಮಾಹಿತಿ ಕೇಳಿಬಂದಿದೆ. ಆರ್ಯನ್ ಖಾನ್ ಬಾಲಿವುಡ್ಗೆ ಎಂಟ್ರಿ ನೀಡುವುದು ಯಾವಾಗ ಎಂಬ ಕೌತುಕದ ಪ್ರಶ್ನೆ ಅಭಿಮಾನಿಗಳಲ್ಲಿ ಮೂಡಿದೆ. ಅಚ್ಚರಿ ಎಂದರೆ ಅವರು ನಟನಾಗಿ ಚಿತ್ರರಂಗಕ್ಕೆ ಕಾಲಿಡುವುದಕ್ಕೂ ಮುನ್ನ ನಿರ್ದೇಶಕನಾಗಿ ತಮ್ಮ ಅದೃಷ್ಟ ಪರೀಕ್ಷೆ ಮಾಡಿಕೊಳ್ಳಲಿದ್ದಾರೆ ಎನ್ನಲಾಗಿದೆ. ಹಾಗಾಗಿ ಅವರು ನಿರ್ದೇಶನದ ಕಡೆಗೆ ಆಸಕ್ತಿ ತೋರಿಸಿದ್ದಾರೆ. ಅದಕ್ಕೆ ಬೇಕಾದ ಸೂಕ್ತ ತಯಾರಿಯನ್ನೂ ನಡೆಸುತ್ತಿದ್ದಾರೆ ಎಂಬ ಸುದ್ದಿ ಕೇಳಿಬಂದಿದೆ.
ಶಾರುಖ್ ಖಾನ್ ಪುತ್ರಿ ಸುಹಾನಾ ಖಾನ್ ಅವರಿಗೆ ನಟನೆಯಲ್ಲಿ ಆಸಕ್ತಿ ಇದೆ. ಈಗಾಗಲೇ ಕೆಲವು ಕಿರುಚಿತ್ರಗಳಲ್ಲಿ ನಟಿಸುವ ಮೂಲಕ ಅವರು ಅಭಿನಯದ ಪಾಠಗಳನ್ನು ಕಲಿತಿದ್ದಾರೆ. ಪ್ರತಿಷ್ಠಿತ ಮ್ಯಾಗಜಿನ್ ಮುಖಪುಟಗಳಿಗೆ ಪೋಸ್ ನೀಡುವ ಮೂಲಕವೂ ಅವರು ಗಮನ ಸೆಳೆದಿದ್ದಾರೆ. ಪುತ್ರಿಯ ನಟನಾ ಭವಿಷ್ಯಕ್ಕೆ ತಾಯಿ ಗೌರಿ ಖಾನ್ ಅವರು ಸೂಕ್ತ ಯೋಜನೆ ರೂಪಿಸುತ್ತಿದ್ದಾರೆ ಎಂಬ ಮಾಹಿತಿ ಹರಿದಾಡುತ್ತಿದೆ. ಜೋಯಾ ಅಖ್ತರ್ ನಿರ್ದೇಶನ ಮಾಡಲಿರುವ ಹೊಸ ಸಿನಿಮಾದಲ್ಲಿ ಸುಹಾನಾ ನಟಿಸುವ ಸಾಧ್ಯತೆ ಇದೆ. ಅಮೆರಿಕಾ ಮತ್ತು ಇಂಗ್ಲೆಂಡ್ನಲ್ಲಿ ಅವರು ವಿದ್ಯಾಭ್ಯಾಸ ಮುಗಿಸಿ ಭಾರತಕ್ಕೆ ಬಂದಿದ್ದಾರೆ.
ಇದನ್ನೂ ಓದಿ:
ಹಿಂದೂ-ಮುಸ್ಲಿಂ ಭಾವೈಕ್ಯತೆಗೆ ಶಾರುಖ್ ಫೋಟೋ ಸಾಕ್ಷಿ; ಆದರೆ ಅವರ ಪಕ್ಕ ಇರೋದು ಗೌರಿ ಖಾನ್ ಅಲ್ಲ
ಕಂಠಪೂರ್ತಿ ಕುಡಿದು ಮಧ್ಯರಾತ್ರಿ ಶಾರುಖ್ ಖಾನ್ ಮನೆಗೆ ನುಗ್ಗಿದ್ದ ಕಪಿಲ್ ಶರ್ಮಾ; ಮುಂದೇನಾಯ್ತು?
