‘ಡಂಕಿ’ ಶೀರ್ಷಿಕೆಯ ಅರ್ಥ ಏನು? ಬಿಡುಗಡೆಗೂ ಮುನ್ನವೇ ರಿವೀಲ್​ ಮಾಡಿದ ಶಾರುಖ್​

ನಿರ್ದೇಶಕ ರಾಜ್​ಕುಮಾರ್ ಹಿರಾನಿ (Rajkumar Hirani) ಮತ್ತು ನಟ ಶಾರುಖ್​ ಖಾನ್​ ಅವರ ಕಾಂಬಿನೇಷನ್​ನಿಂದಾಗಿ ‘ಡಂಕಿ’ ಸಿನಿಮಾದ ಮೇಲೆ ನಿರೀಕ್ಷೆ ಮೂಡುವಂತಾಗಿದೆ. ಈ ಸಿನಿಮಾದ ಶೀರ್ಷಿಕೆಯೇ ಕ್ಯಾಚಿ ಆಗಿದೆ. ಈ ಟೈಟಲ್​ನ ಅರ್ಥ ಏನು ಎಂಬ ಕುತೂಹಲ ಅಭಿಮಾನಿಗಳಿಗೆ ಇತ್ತು. ಸಿನಿಮಾ ನೋಡಿದಾಗ ಅದಕ್ಕೆ ಉತ್ತರ ಸಿಗುತ್ತದೆ. ಆದರೆ ಅದನ್ನೂ ಮುನ್ನವೇ ಶಾರುಖ್​ ಖಾನ್​ ಅವರು ‘ಡಂಕಿ’ (Dunki) ಎಂದರೆ ಏನು ಎಂಬುದನ್ನು ತಿಳಿಸಿದ್ದಾರೆ. ಟ್ವಿಟರ್​ನಲ್ಲಿ ಪ್ರಶ್ನೋತ್ತರ ನಡೆಸಿದ ಶಾರುಖ್​ ಖಾನ್ (Shah Rukh Khan) ಅವರು ಅಭಿಮಾನಿಯೊಬ್ಬರು ಕೇಳಿದ ಪ್ರಶ್ನೆಗೆ ಉತ್ತರಿಸುವಾಗ ಈ ವಿಚಾರ ಬಹಿರಂಗಪಡಿಸಿದ್ದಾರೆ.

‘ಅನುಮತಿ ಇಲ್ಲದೇ ದೇಶದ ಗಡಿ ದಾಟುವುದಕ್ಕೆ ಡಾಂಕಿ ಜರ್ನಿ ಎನ್ನುತ್ತಾರೆ. ಪಂಬಾಬಿ ಉಚ್ಛಾರದಲ್ಲಿ ಇದನ್ನು ಡಂಕಿ ಎನ್ನುತ್ತಾರೆ’ ಎಂದು ಶಾರುಖ್​ ಖಾನ್​ ಅವರು ತಿಳಿಸಿದ್ದಾರೆ. ಪಂಜಾಬಿನ ಕೆಲವು ಯುವಕರು ಇಂಗ್ಲೆಂಡ್​ಗೆ ಹೋಗಬೇಕು ಎಂದು ಕನಸು ಕಾಣುವ ಮತ್ತು ಭಾರತದ ಗಡಿ ದಾಟಲು ಪ್ರಯತ್ನಿಸುವ ಕಥೆ ‘ಡಂಕಿ’ ಸಿನಿಮಾದಲ್ಲಿ ಇದೆ. ಆ ಬಗ್ಗೆ ಟ್ರೇಲರ್​ನಲ್ಲೇ ಸುಳಿವು ಬಿಟ್ಟುಕೊಡಲಾಗಿದೆ. ಸದ್ಯ ಯೂಟ್ಯೂಬ್​ನಲ್ಲಿ ಈ ಟ್ರೇಲರ್​ ಧೂಳೆಬ್ಬಿಸಿದೆ.

ಇದನ್ನೂ ಓದಿ: ‘ಸಲಾರ್​’ ವರ್ಸಸ್​ ‘ಡಂಕಿ’ ಟ್ರೇಲರ್ ಪೈಪೋಟಿ; ಹಿಂದಿಯಲ್ಲಿ ಶಾರುಖ್​ ಖಾನ್​ ಮೇಲುಗೈ

ಡಿಸೆಂಬರ್​ 21ರಂದು ‘ಡಂಕಿ’ ಸಿನಿಮಾ ಬಿಡುಗಡೆ ಆಗಲಿದೆ. ಈ ಸಿನಿಮಾದಲ್ಲಿ ಶಾರುಖ್​ ಖಾನ್​ ಅವರು ಎರಡು ಶೇಡ್​ನ ಪಾತ್ರ ಮಾಡಿದ್ದಾರೆ. ಅವರಿಗೆ ಜೋಡಿಯಾಗಿ ತಾಪ್ಸಿ ಪನ್ನು ನಟಿಸಿದ್ದಾರೆ. ಇನ್ನೊಂದು ಪ್ರಮುಖ ಪಾತ್ರದಲ್ಲಿ ವಿಕ್ಕಿ ಕೌಶಲ್​ ಅಭಿನಯಿಸಿದ್ದಾರೆ. ಈ ಎಲ್ಲ ಕಲಾವಿದರ ಕಾರಣದಿಂದ ಸಿನಿಮಾದ ಚಾರ್ಮ್​ ಹೆಚ್ಚಾಗಿದೆ. ಟ್ರೇಲರ್​ ನೋಡಿದ ಅಭಿಮಾನಿಗಳು ಪಾಸಿಟಿವ್​ ಆಗಿ ಪ್ರತಿಕ್ರಿಯಿಸುತ್ತಿದ್ದಾರೆ. ತುಂಬ ಕ್ಲಾಸ್​ ಆಗಿ ಈ ಸಿನಿಮಾ ಮೂಡಿಬಂದಿದೆ ಎಂಬುದಕ್ಕೆ ಟ್ರೇಲರ್​ನಲ್ಲಿ ಸುಳಿವು ಸಿಕ್ಕಿದೆ.

Dunki is actually the Donkey Journey across borders without permits. In punjabi dialect they pronounce it Dunki #DunkiTrailer https://t.co/dN8cNrUQ7c

— Shah Rukh Khan (@iamsrk) December 6, 2023

ರಾಜ್​ಕುಮಾರ್​ ಹಿರಾನಿ ಅವರ ಕೆಲಸದ ಮೇಲೆ ಅಭಿಮಾನಿಗಳಿಗೆ ಭರವಸೆ ಇದೆ. ಈಗಾಗಲೇ ಅವರು ‘ಪಿಕೆ’, ‘ಸಂಜು’, ‘3 ಈಡಿಯಟ್ಸ್​’, ‘ಮುನ್ನಾಭಾಯ್​ ಎಂಬಿಬಿಎಸ್​’ ಸಿನಿಮಾಗಳ ಮೂಲಕ ತಮ್ಮ ಪ್ರತಿಭೆ ಏನು ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಈಗ ಅವರು ‘ಡಂಕಿ’ ಸಿನಿಮಾದ ಮೂಲಕ ಪ್ರೇಕ್ಷಕರಿಗೆ ಹೊಸ ಕಹಾನಿ ತೋರಿಸಲು ಸಜ್ಜಾಗಿದ್ದಾರೆ. ‘ಡಂಕಿ’ ತೆರೆಕಂಡ ಮರುದಿನವೇ, ಅಂದರೆ ಡಿ.22ರಂದು ‘ಸಲಾರ್​’ ಬಿಡುಗಡೆ ಆಗಲಿದೆ. ಹಾಗಾಗಿ ಬಾಕ್ಸ್​ ಆಫೀಸ್​ನಲ್ಲಿ ಪೈಪೋಟಿ ಏರ್ಪಡಲಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.