Ray Liotta Passes Away: ನಿದ್ರೆ ಮಾಡುತ್ತಲೇ ಚಿರನಿದ್ರೆಗೆ ಜಾರಿದ ಖ್ಯಾತ ನಟ ರೇ ಲಿಯೊಟ್ಟಾ
Ray Liotta death: ‘ಗುಡ್ಫೆಲಾಸ್’ ಖ್ಯಾತಿಯ ಅಮೇರಿಕನ್ ಮೂಲದ ಖ್ಯಾತ ನಟ ಮತ್ತು ನಿರ್ಮಾಪಕ ರೇ ಲಿಯೊಟ್ಟಾ ನಿಧನರಾಗಿದ್ದಾರೆ. ಅವರಿಗೆ 67 ವರ್ಷ ವಯಸ್ಸಾಗಿತ್ತು.
Updated on:May 27, 2022 | 10:31 AM
ಅಮೇರಿಕನ್ ಮೂಲದ ಖ್ಯಾತ ನಟ ಮತ್ತು ನಿರ್ಮಾಪಕ ರೇ ಲಿಯೊಟ್ಟಾ (Ray Liotta) ನಿಧನರಾಗಿದ್ದಾರೆ. ಅವರಿಗೆ 67 ವರ್ಷ ವಯಸ್ಸಾಗಿತ್ತು. ಗ್ಯಾಂಗ್ಸ್ಟರ್ ಬಯೋಪಿಕ್ ಆಗಿದ್ದ ‘ಗುಡ್ಫೆಲಾಸ್’ (Goodfellas)ನಲ್ಲಿ ‘ಹೆನ್ರಿ ಹಿಲ್’ ಪಾತ್ರದ ಮೂಲಕ ಲಿಯೊಟ್ಟಾ ಅಪಾರ ಜನಪ್ರಿಯತೆ ಸಂಪಾದಿಸಿದ್ದರು. ಅವರ ಪ್ರತಿನಿಧಿ ಹಾಲಿವುಡ್ ರಿಪೋರ್ಟರ್ಗೆ ಸುದ್ದಿಯನ್ನು ಖಚಿತಪಡಿಸಿದ್ದಾರೆ. ಅದರಲ್ಲಿ ತಿಳಿಸಿರುವ ಪ್ರಕಾರ, ‘ಲಿಯೋಟ್ಟಾ ಅವರು ಡೊಮಿನಿಕನ್ ರಿಪಬ್ಲಿಕ್ನಲ್ಲಿ ನಡೆಯುತ್ತಿರುವ ಡೇಂಜರಸ್ ವಾಟರ್’ ಚಿತ್ರದ ಚಿತ್ರೀಕರಣದಲ್ಲಿ ಭಾಗಿಯಾಗಿದ್ದರು. ನಿದ್ರೆ ಮಾಡುತ್ತಿರುವಾಗ ಅವರು ನಿಧನರಾಗಿದ್ದಾರೆ’ ಎಂದು ತಿಳಿಸಲಾಗಿದೆ. ಲಿಯೊಟ್ಟಾ ಪುತ್ರಿ ಹಾಗೂ ಕುಟುಂಬವನ್ನು ಅಗಲಿದ್ದಾರೆ.
1954ರ ಡಿಸೆಂಬರ್ 18ರಂದು ನ್ಯೂಯಾರ್ಕ್ನಲ್ಲಿ ಜನಿಸಿದ್ದ ಲಿಯೊಟ್ಟಾ ಅವರನ್ನು ಅನಾಥಾಶ್ರಮಕ್ಕೆ ಸೇರಿಸಲಾಗಿತ್ತು. ನಂತರ 6 ತಿಂಗಳಿದ್ದಾಗ ದಂಪತಿಯೋರ್ವರು ಲಿಯೊಟ್ಟಾರನ್ನು ದತ್ತು ಪಡೆದಿದ್ದರು. ದೊಡ್ಡವರಾದ ನಂತರ ತಮ್ಮ ಮೂಲ ಪೋಷಕರನ್ನು ಪತ್ತೆಹಚ್ಚಲು ಮುಂದಾಗಿದ್ದ ನಟ, ಕೊನೆಗೂ ತಮ್ಮ ಮೂಲ ಪೋಷಕರು ಸ್ಕಾಟ್ಲಾಂಡ್ನವರು ಎಂಬುದನ್ನು ಕಂಡುಕೊಂಡಿದ್ದರು. 1983ರಲ್ಲಿ ಚಿತ್ರರಂಗ ಪ್ರವೇಶಿಸಿದ್ದ ನಟ ಇಲ್ಲಿಯವರೆಗೂ ಸಕ್ರಿಯರಾಗಿ ನಟಿಸುತ್ತಿದ್ದರು.
‘ದಿ ರ್ಯಾಟ್ ಪ್ಯಾಕ್’, ‘ಅನ್ಫರ್ಗೆಟ್ಟೇಬಲ್ ಕಾಪ್ ಲ್ಯಾಂಡ್’, ‘ಫೀನಿಕ್ಸ್’ ಮೊದಲಾದ ಚಿತ್ರಗಳಲ್ಲಿನ ನಟನೆಯಿಂದ ರೇ ಲಿಯೊಟ್ಟಾ ಗಮನ ಸೆಳೆದಿದ್ದರು. ಕಿರುತೆರೆಯಲ್ಲೂ ಅವರು ಕಾಣಿಸಿಕೊಂಡಿದ್ದರು. ಲಿಯೊಟ್ಟಾ ಅವರು ಪ್ರತಿಷ್ಠಿತ ಎಮ್ಮಿ ಪ್ರಶಸ್ತಿ ಸೇರಿದಂತೆ ಹಲವಾರ ಪ್ರಶಸ್ತಿಗಳಿಗೆ ಭಾಜನರಾಗಿದ್ದಾರೆ.
ರೇ ಲಿಯೊಟ್ಟಾ ನಟಿಸಿರುವ ಹಲವು ಚಿತ್ರಗಳ ಕೆಲಸಗಳು ನಡೆಯುತ್ತಿವೆ. ‘ಕೊಕೇನ್ ಬಿಯರ್’ ಚಿತ್ರ 2023ರಲ್ಲಿ ತೆರೆಕಾಣುವುದಾಗಿ ಘೋಷಿಸಿದೆ. ಇದಲ್ಲದೇ ಇನ್ನೂ ನಾಲ್ಕು ಚಿತ್ರಗಳಲ್ಲಿ ಲಿಯೊಟ್ಟಾ ನಟಿಸಿದ್ದು, ಅವುಗಳ ಕೆಲಸಗಳು ನಡೆಯುತ್ತಿವೆ. ರೇ ಲಿಯೊಟ್ಟಾ ನಿಧನಕ್ಕೆ ಹಾಲಿವುಡ್ ಕಂಬನಿ ಮಿಡಿದಿದೆ.
ಮತ್ತಷ್ಟು ಸಿನಿಮಾ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 10:20 am, Fri, 27 May 22
