ಖ್ಯಾತ ನಟಿ ಪ್ರಿಯಾ ಭವಾನಿ ಶಂಕರ್ ಹಾಗೂ ರಾಜ್‌ವೇಲ್ ರಾಜ್ ಮದುವೆ: ವಿಡಿಯೋ ವೈರಲ್
ಜನಪ್ರಿಯ ನಟಿ ಪ್ರಿಯಾ ಭವಾನಿ ಶಂಕರ್ ಅವರ ಮದುವೆ ನೆರವೇರಿದೆ. ಪ್ರಿಯಕರ ರಾಜ್‌ವೇಲ್ ರಾಜ್ ಜೊತೆ ಅವರು ಹಸೆಮಣೆ ಏರಿದ್ದಾರೆ. ಹೊಸ ಜೀವನಕ್ಕೆ ಕಾಲಿಟ್ಟಿರುವ ನವಜೋಡಿಗೆ ಚಿತ್ರರಂಗದ ಗಣ್ಯರು ಹಾಗೂ ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಶುಭಾಶಯಗಳ ಮಹಾಪೂರವನ್ನೇ ಹರಿಸುತ್ತಿದ್ದಾರೆ. ಮದುವೆಯ ವಿಡಿಯೋ ವೈರಲ್ ಆಗಿದೆ.
Updated on: Nov 11, 2026 | 3:04 PM
ತಮಿಳು ಮತ್ತು ತೆಲುಗು ಚಿತ್ರರಂಗದ ಖ್ಯಾತ ನಟಿ ಪ್ರಿಯಾ ಭವಾನಿ ಶಂಕರ್ ಅವರು ತಮ್ಮ ದೀರ್ಘಕಾಲದ ಪ್ರಿಯಕರ ರಾಜ್‌ವೇಲ್ ರಾಜ್ ಅವರೊಂದಿಗೆ ಬುಧವಾರ (ನವೆಂಬರ್ 11) ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಆಪ್ತರ ಸಮ್ಮುಖದಲ್ಲಿ ಅತ್ಯಂತ ಸರಳ ಹಾಗೂ ಸುಂದರ ಸಮಾರಂಭದಲ್ಲಿ ಈ ಜೋಡಿ ಶುಭ ಮುಹೂರ್ತದಲ್ಲಿ ಸಪ್ತಪದಿ ತುಳಿದಿದೆ. ವೈರಲ್ ಆಗಿರುವ ವಿಶೇಷ ವಿಡಿಯೋದಲ್ಲಿ, ನವಜೋಡಿಯ ಸಂಭ್ರಮ ಹಾಗೂ ಖುಷಿಯ ಕ್ಷಣಗಳು ಸೆರೆಯಾಗಿವೆ.
ಬಿಳಿ ಬಣ್ಣದ ಕುರ್ತಾ ಧರಿಸಿದ್ದ ರಾಜ್‌ವೇಲ್ ರಾಜ್ ಅವರನ್ನು ಕುಟುಂಬದ ಮಹಿಳೆಯರು ಹೂಗುಚ್ಛಗಳೊಂದಿಗೆ ಮಂಟಪಕ್ಕೆ ಕರೆತಂದರು. ಮತ್ತೊಂದೆಡೆ, ಸಾಂಪ್ರದಾಯಿಕ ಕೆಂಪು ಮತ್ತು ಹಸಿರು-ಚಿನ್ನದ ಬಣ್ಣದ ರೇಷ್ಮೆ ಸೀರೆಯಲ್ಲಿ ಕಂಗೊಳಿಸುತ್ತಿದ್ದ ಪ್ರಿಯಾ ಭವಾನಿ ಶಂಕರ್ ಅವರನ್ನು ಹೂವಿನ ಛತ್ರಿಯ ಅಡಿಯಲ್ಲಿ ಮಂಟಪಕ್ಕೆ ಕರೆತರಲಾಯಿತು.
ಮಂಟಪ ತಲುಪಿದ ಬಳಿಕ ಇಬ್ಬರೂ ಪರಸ್ಪರ ಆಲಂಗಿಸಿಕೊಂಡು ಶುಭಾಶಯ ವಿನಿಮಯ ಮಾಡಿಕೊಂಡರು. ಮದುವೆಯ ಶಾಸ್ತ್ರಗಳ ಸಮಯದಲ್ಲಿ ಪುರೋಹಿತರ ಸೂಚನೆಗಳನ್ನು ಪಾಲಿಸುತ್ತಾ, ಈ ಜೋಡಿ ಸಲ್ಲಾಪದಲ್ಲಿ ತೊಡಗಿದ್ದ ದೃಶ್ಯಗಳು ಎಲ್ಲರ ಗಮನ ಸೆಳೆದವು. ರಾಜ್‌ವೇಲ್ ಅವರು ಪ್ರಿಯಾ ಕೊರಳಿಗೆ ತಾಳಿ ಕಟ್ಟುವ ಮೂಲಕ ಅಧಿಕೃತವಾಗಿ ಗೃಹಸ್ಥಾಶ್ರಮಕ್ಕೆ ಕಾಲಿಟ್ಟರು.
November 11th
Actress #PriyaBhavaniShankar and her long time boyfriend #RajvelRaj begin a beautiful new chapter together, celebrating their marriage in an intimate ceremony surrounded by loved ones.
#WeddingCelebration #NewBeginnings #KollywoodWedding https://t.co/Nd1Y2NKd9j
— Actor Kayal Devaraj (@kayaldevaraj) November 11, 2026
ಮದುವೆಯ ಹಿಂದಿನ ದಿನವೇ ಪ್ರಿಯಾ ಭವಾನಿ ಶಂಕರ್ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹಸಿರು ಬಣ್ಣದ ಸೀರೆ ಉಟ್ಟು, ತಲೆಯಲ್ಲಿ ಮಲ್ಲಿಗೆ ಹೂ ಮುಡಿದುಕೊಂಡಿದ್ದ ಫೋಟೋ ಹಂಚಿಕೊಂಡಿದ್ದರು. ಹಿನ್ನೆಲೆಯಲ್ಲಿ ಮದುವೆಯ ಸಾಂಪ್ರದಾಯಿಕ ಮಂಗಳವಾದ್ಯದ ಸಂಗೀತವನ್ನು ಬಳಸಿ, ತಾವು ಶೀಘ್ರದಲ್ಲೇ ಮದುವೆಯಾಗುತ್ತಿರುವುದಾಗಿ ಅಭಿಮಾನಿಗಳಿಗೆ ಸುಳಿವು ನೀಡಿದ್ದರು.
ಇದನ್ನೂ ಓದಿ: ನಾಗ ಚೈತನ್ಯ ಗರ್ಲ್ಫ್ರೆಂಡ್ ಸ್ಥಾನ ತುಂಬಲು ಬಂದ ನಟಿ ಪ್ರಿಯಾ ಭವಾನಿ ಶಂಕರ್; ಏನ್ ಸಮಾಚಾರ?
ಕಾಲೇಜು ದಿನಗಳಿಂದಲೂ ಪರಸ್ಪರ ಪರಿಚಿತರಾಗಿದ್ದ ಪ್ರಿಯಾ ಮತ್ತು ರಾಜ್‌ವೇಲ್, ಕಳೆದ 10ಕ್ಕೂ ಹೆಚ್ಚು ವರ್ಷಗಳಿಂದ ಪ್ರೀತಿಸುತ್ತಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿ ಆಗಾಗ್ಗೆ ತಮ್ಮ ಫೋಟೋಗಳನ್ನು ಹಂಚಿಕೊಳ್ಳುವ ಮೂಲಕ ಅಭಿಮಾನಿಗಳ ಪ್ರೀತಿಗೆ ಪಾತ್ರರಾಗಿದ್ದರು.
ಪ್ರಿಯಾ ಭವಾನಿ ಶಂಕರ್ ಅವರು ತಮ್ಮ ವೃತ್ತಿಜೀವನವನ್ನು ತಮಿಳಿನ ಸುದ್ದಿ ವಾಹಿನಿಯಲ್ಲಿ ಸುದ್ದಿ ನಿರೂಪಕಿಯಾಗಿ ಪ್ರಾರಂಭಿಸಿದರು. 2014ರಲ್ಲಿ ‘ಕಲ್ಯಾಣಂ ಮುದಲ್ ಕಾದಲ್ ವರೈ’ ಧಾರಾವಾಹಿ ಮೂಲಕ ನಟನಾ ಕ್ಷೇತ್ರಕ್ಕೆ ಪದಾರ್ಪಣೆ ಮಾಡಿದ ಅವರು, ‘ಜೋಡಿ ನಂ. 1’ ಮತ್ತು ‘ಸೂಪರ್ ಸಿಂಗರ್’ ನಂತಹ ಜನಪ್ರಿಯ ರಿಯಾಲಿಟಿ ಶೋಗಳನ್ನು ನಿರೂಪಣೆ ಮಾಡಿದ್ದರು.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
