‘ಮಹಾವೀರ ಹನುಮ’ ಹಾಡಿನಲ್ಲಿ ಹೆಜ್ಜೆ ಹಾಕಿದ ಬಾಲ ನಟಿ ಋತು ಸ್ಪರ್ಶ

ಸಿನಿಮಾಗಳಲ್ಲಿ ಆಂಜನೇಯನ ಕುರಿತು ಒಂದಷ್ಟು ಹಾಡುಗಳು ಬಂದಿವೆ. ಈಗ ಹನುಮನ ಬಗ್ಗೆ ಒಂದು ಮ್ಯೂಸಿಕ್ ವಿಡಿಯೋ ಬಿಡುಗಡೆ ಮಾಡಲಾಗಿದೆ. ‘ಮಹಾವೀರ ಹನುಮ’ ಎಂಬುದು ಈ ಗೀತೆಯ ಹೆಸರು. ಈ ಹಾಡಿನಲ್ಲಿ ಬಾಲನಟಿ ಋತು ಸ್ಪರ್ಶ ಅವರು ಹೆಜ್ಜೆ ಹಾಕಿದ್ದಾರೆ. ಇತ್ತೀಚೆಗೆ ಈ ಹಾಡಿನ ಬಿಡುಗಡೆ ಕಾರ್ಯಕ್ರಮ ನಡೆಯಿತು. 4 ನಿಮಿಷ 30 ಸಕೆಂಡ್ ಅವಧಿಯ ಈ ಗೀತೆಯನ್ನು ಹಿರಿಯ ನಿರ್ಮಾಪಕ ಸೂರಪ್ಪ ಬಾಬು ಅವರು ಬಿಡುಗಡೆ ಮಾಡಿದರು. ಋತು ಸ್ಪರ್ಶ ಅವರ ಪ್ರತಿಭೆಗೆ ವೀಕ್ಷಕರು ಮೆಚ್ಚುಗೆ ಸೂಚಿಸಿದ್ದಾರೆ. ರಾಘವೇಂದ್ರ ರೆಡ್ಡಿ ಅವರು ಈ ಹಾಡನ್ನು ನಿರ್ಮಿಸಿದ್ದಾರೆ.

‘ಮಹಾವೀರ ಹನುಮ’ ಹಾಡಿಗೆ ರಾಘವ ಸೂರ್ಯ ನಿರ್ದೇಶನ ಮಾಡಿದ್ದಾರೆ. ಅಂಜನಾದ್ರಿ ಬೆಟ್ಟ, ಆನೆಗುಂದಿಯ ಲಕ್ಷೀ ರಂಗನಾಥಸ್ವಾಮಿ ದೇವಸ್ಥಾನ ಹಾಗೂ ಚಿಂತಾಮಣಿ ಮಠದಲ್ಲಿ ಈ ಹಾಡನ್ನು ಚಿತ್ರೀಕರಿಸಲಾಗಿದೆ. ‘ಹಂಪಿ ಪ್ರಾಧಿಕಾರದವರಿಂದ ವಿಶೇಷ ಅನುಮತಿ ಪಡೆದು, 105 ತಂತ್ರಜ್ಞರ ಜೊತೆಗೆ 575 ಮೆಟ್ಟಿಲುಗಳನ್ನು ಹತ್ತಿ ಇಳಿಯುವುದು ಸವಾಲಾಗಿತ್ತು. ಪ್ರಕೃತಿ ಕೂಡ ನಮಗೆ ಸಹಕಾರ ನೀಡಿತು. ನಿರ್ಮಾಪಕ ರಾಘವೇಂದ್ರ ರೆಡ್ಡಿ ಎಲ್ಲಿಯೂ ರಾಜಿಯಾಗದೆ ಇದನ್ನು ನಿರ್ಮಿಸಿದ್ದಾರೆ’ ಎಂದು ರಾಘವ ಸೂರ್ಯ ಹೇಳಿದರು.

‘ಮಹಾವೀರ ಹನುಮ’ ಹಾಡು:

‘ಎ2 ಮ್ಯೂಸಿಕ್’ ಮೂಲಕ ‘ಮಹಾವೀರ ಹನುಮ’ ಸಾಂಗ್ ಸಿದ್ಧವಾಗಿದೆ. ಯೂಟ್ಯೂಬ್​ನಲ್ಲಿ ಪ್ರೇಕ್ಷಕರು ಮೆಚ್ಚುಗೆ ಸೂಚಿಸಿ ಕಮೆಂಟ್ ಮಾಡುತ್ತಿದ್ದಾರೆ. ಮಕ್ಕಳಿಗೆ ಈ ಹಾಡು ಇಷ್ಟ ಆಗುತ್ತಿದೆ. ಹಾಡಿನ ಬಿಡುಗಡೆ ಕಾರ್ಯಕ್ರಮದಲ್ಲಿ ಹರಿಕೃಷ್ಣ ಕೆಂತೂರ್, ಮರಿಸ್ವಾಮಿ, ರಾಜರಾಜೇಶ್ವರಿ ಎಸ್, ರಾಜೇಶ್ ಎಲ್.ವೈ, ರಮೇಶ್‌ ಬಾಬು, ವಿಕ್ಟರಿ ವಾಸು, ಅರ್ಜುನ್‌ ದೇವ್ ಮುಂತಾದವರು ಹಾಜರಿದ್ದರು.

ಇದನ್ನೂ ಓದು: ಆಂಜನೇಯನ ಪಾತ್ರದಲ್ಲಿ ರಿಷಬ್ ಶೆಟ್ಟಿ; ‘ಜೈ ಹನುಮಾನ್’ ಸಿನಿಮಾದಲ್ಲಿ ನಟನೆ

ರಾಮಾಯಣದ ಥೀಮ್​ ಎಂದಿಗೂ ಎವರ್​ಗ್ರೀನ್ ಆಗಿರುತ್ತದೆ. ‘ಮಹಾವೀರ ಹನುಮ’ ಹಾಡಿನಲ್ಲಿ ರಾಮಾಯಣದ ಪಾತ್ರಗಳು ಇವೆ. ರಾಮನ ಪಾತ್ರದಲ್ಲಿ ರೋಹಿತ್‌ ರೆಡ್ಡಿ ನಟಿಸಿದ್ದಾರೆ. ಲಕ್ಷ್ಮಣನಾಗಿ ರಾಜ್ ಕಾಣಿಸಿಕೊಂಡಿದ್ದಾರೆ. ಅಂಗದನಾಗಿ ಜೀವನ್, ಸೀತೆಯಾಗಿ ಪ್ರಿಯಾ ಅವರು ಅಭಿನಯಿಸಿದ್ದಾರೆ. ಸಾಯಿ ಸರ್ವೇಶ್ ಅವರು ಸಾಹಿತ್ಯ ಬರೆದು ಸಂಗೀತ ನೀಡಿದ್ದಾರೆ. ಅವರ ಜೊತೆ ಶಶಿಕಲಾ ಧ್ವನಿ ನೀಡಿದ್ದಾರೆ. ರಂಗಸ್ವಾಮಿ ಅವರ ಛಾಯಾಗ್ರಹಣ, ಕಂಬಿರಾಜು ಅವರ ನೃತ್ಯ ನಿರ್ದೇಶನ ಈ ಹಾಡಿಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.