ಹಲವು ಸಿನಿಮಾಗಳನ್ನು ಉಳಿಸಿತು ಈ ಐಡಿಯಾ; ತಪ್ಪಿತು ಫ್ಯಾನ್ಸ್ ವಾರ್
ಪೈರಸಿ, ಫ್ಯಾನ್ ವಾರ್ ಮತ್ತು ನೆಗೆಟಿವ್ ರೇಟಿಂಗ್ಗಳಿಂದ ಸಿನಿಮಾಗಳು ಸಾಕಷ್ಟು ಸವಾಲುಗಳನ್ನು ಎದುರಿಸುತ್ತಿವೆ. ಈ ಸಮಸ್ಯೆಗಳಿಗೆ ಪರಿಹಾರವಾಗಿ, ಆನ್ಲೈನ್ ರೇಟಿಂಗ್ಗಳನ್ನು ನಿಷ್ಕ್ರಿಯಗೊಳಿಸುವ ಹೊಸ ಟ್ರೆಂಡ್ ಕನ್ನಡ ಚಿತ್ರರಂಗದಲ್ಲಿ ಶುರುವಾಗಿದೆ. ಬುಕ್ ಮೈ ಶೋನಂತಹ ವೇದಿಕೆಗಳಲ್ಲಿ ರೇಟಿಂಗ್ ಬಂದ್ ಮಾಡಿಸುವುದರಿಂದ, ಅನಗತ್ಯ ವಿಮರ್ಶೆ ಮತ್ತು ಫ್ಯಾನ್ ವಾರ್ಗಳಿಂದ ಚಿತ್ರಗಳು ರಕ್ಷಿಸಲ್ಪಟ್ಟಿವೆ.
Updated on: Apr 01, 2026 | 3:05 PM
ಸಿನಿಮಾಗಳನ್ನು ನಿರ್ಮಾಣ ಮಾಡುವುದು, ಅದನ್ನು ತೆರೆಗೆ ತರುವುದು ದೊಡ್ಡ ಚಾಲೆಂಜ್. ಅದೇ ರೀತಿ ಆ ಸಿನಿಮಾನ ಥಿಯೇಟರ್ನಲ್ಲಿ ಉಳಿಸಿಕೊಂಡು ಹೋಗೋದು ಇನ್ನೂ ದೊಡ್ಡ ಸವಾಲು. ಸ್ಟಾರ್ ಸಿನಿಮಾ ಆದರಂತೂ ಪೈರಸಿಗಳ ಕಾಟಕ್ಕೆ ಚಿತ್ರ ನಲುಗಿ ಹೋಗುತ್ತದೆ. ಇದರ ಜೊತೆಗೆ, ಫ್ಯಾನ್ಸ್ ವಾರ ಕೂಡ ಸಿನಿಮಾನ ಬಲಿ ಪಡೆಯುತ್ತದೆ. ಈಗ ಚಿತ್ರರಂಗದಲ್ಲಿ ಆಗುತ್ತಿರುವ ಒಂದು ಬದಲಾವಣೆಯಿಂದ ಸಾಕಷ್ಟು ಸಿನಿಮಾಗಳು ಉಳಿದುಕೊಂಡಿವೆ.
ಮೊದಲೆಲ್ಲ ಸುದ್ದಿ ಪತ್ರಿಕೆಯಲ್ಲಿ ಬರುವ ವಿಮರ್ಶೆ ನೋಡಿ ಚಿತ್ರವನ್ನು ನೋಡಬೇಕೋ ಅಥವಾ ಬೇಡವೋ ಎಂದು ಜನರು ನಿರ್ಧಾರ ಮಾಡುತ್ತಿದ್ದರು. ಆದರೆ, ಈಗ ರೇಟಿಂಗ್ ಕಾಲ. ಕೈಬೆರಳ ತುದಿಯಲ್ಲಿ ರೇಟಿಂಗ್ ಸಿಗುತ್ತದೆ. ಸಿನಿಮಾಗೆ ಎಷ್ಟು ರೇಟಿಂಗ್ ಸಿಕ್ಕಿದೆ ಎಂಬುದನ್ನು ಆಧರಿಸಿ ಸಿನಿಮಾ ನೋಡಬೇಕೋ ಅಥವಾ ಇಲ್ಲವೋ ಎಂಬುದನ್ನು ಪ್ರೇಕ್ಷಕ ನಿರ್ಧಾರ ಮಾಡುತ್ತಾನೆ. ಆದರೆ, ಫ್ಯಾನ್ಸ್ ವಾರ್ಗಳ ಕಾರಣಕ್ಕೆ ಈ ರೇಟಿಂಗ್ ಅನ್ನು ಕೂಡ ನಂಬುವ ಹಾಗಿಲ್ಲ. ಈಗ ರೇಟಿಂಗ್ನೇ ಆಫ್ ಮಾಡಿಸುವ ಟ್ರೆಂಡ್ ಜೋರಾಗಿದ್ದು, ಇದು ಅನೇಕ ಸಿನಿಮಾಗಳನ್ನು ಉಳಿಸಿದೆ.
ದರ್ಶನ್ ನಟನೆಯ ‘ದಿ: ಡೆವಿಲ್’ ಸಿನಿಮಾಗೆ ಕೆಲವರು ಉದ್ದೇಶಪೂರ್ವಕವಾಗಿ ನೆಗೆಟಿವ್ ವಿಮರ್ಶೆ ನೀಡಬಹುದು ಎಂಬ ಭಯ ಇತ್ತು. ಈ ಕಾರಣದಿಂದ ಕೋರ್ಟ್ನಿಂದ ಆದೇಶ ತರುವ ಮೂಲಕ ರೇಟಿಂಗ್ ಕೊಡೋದನ್ನು ತಡೆಯಲಾಯಿತು. ನಂತರ ಸುದೀಪ್ ನಟನೆಯ ‘ಮಾರ್ಕ್’, ಮಲ್ಟಿ ಸ್ಟಾರರ್ ಸಿನಿಮಾ ‘45’ ಸಿನಿಮಾ ಕೂಡ ಇದೇ ತಂತ್ರ ಉಪಯೋಗಿಸಿದವು. ಕನ್ನಡದಲ್ಲಿ ಈ ಪ್ರಯೋಗ ಯಶಸ್ಸು ಕಂಡ ಬಳಿಕ ತೆಲುಗಿನವರು ಕೂಡ ಇದೇ ಮಾದರಿಯ ಮೊರೆ ಹೋದರು. ‘ಮನ ಶಂಕರ ವರಪ್ರಸಾದ ಗಾರು’, ‘ನಾರಿ ನಾರಿ ನಡುಮ ಮುರಾರಿ’, ‘ಅನಗನಗ ಒಕರಾಜು’ ತಂಡಗಳು ಕೂಡ ಇದೇ ಮಾದರಿಯನ್ನು ಅನುಸರಿಸಿದವು. ಈ ತಂತ್ರವನ್ನು ಮೊದಲು ಕಂಡು ಹಿಡಿದಿದ್ದು ಬೆಂಗಳೂರಿನ ಆ್ಯಂಟಿ ಪರೈಸಿ ಸಂಸ್ಥೆ ಐಪ್ಲೆಕ್ಸ್ ಅನ್ನೋದು ವಿಶೇಷ.
‘ಮೊದಲ ಮೂರು ದಿನ ಆನ್ಲೈನ್ ಅಲ್ಲಿ ವಿಮರ್ಶೆ ಹಂಚಿಕೊಳ್ಳಬಾರದು’, ‘ಥಿಯೇಟರ್ ಹೊರ ಭಾಗದಲ್ಲಿ ಯೂಟ್ಯೂಬರ್ಗಳು ವಿಮರ್ಶೆ ಪಡೆಯದಂತೆ ಮಾಡಬೇಕು’ ಎಂಬಿತ್ಯಾದಿ ನಿಯಮ ತರಲು ಕೆಲ ಚಿತ್ರರಂಗದವರು ಪ್ರಯತ್ನಿಸಿದರು. ಆದರೆ, ಅದು ಸಾಧ್ಯವಾಗಿಲ್ಲ. ಟಿಕೆಟ್ ಬುಕ್ ಮಾಡಲು ಎಲ್ಲರೂ ಬಹುವಾಗಿ ಅವಲಂಬಿತವಾಗಿರುವ ‘ಬುಕ್ ಮೈ ಶೋ’ ರೇಟಿಂಗ್ ಅನ್ನೇ ಬಂದ್ ಮಾಡಿಸೋ ಮೂಲಕ ಕೆಲವು ಸಿನಿಮಾಗಳು ಬಚಾವ್ ಆಗಿವೆ ಎಂಬುದು ಬಾಕ್ಸ್ ಆಫೀಸ್ ಪಂಡಿತರ ಅಭಿಪ್ರಾಯ.
ಇದನ್ನೂ ಓದಿ: ‘ಡೆವಿಲ್’ಗೆ ರೇಟಿಂಗ್ ಕೊಡಂಗಿಲ್ಲ; ಕೋರ್ಟ್ನಿಂದ ಆರ್ಡರ್ ತಂದಿದ್ದಕ್ಕೆ ಕಾರಣ ತಿಳಿಸಿದ ದಿನಕರ್
ಇನ್ನು, ‘ನಮ್ಮ ಸಿನಿಮಾಗೆ ಆ ಹೀರೋ ಅಭಿಮಾನಿಗಳು ನಗೆಟಿವ್ ವಿಮರ್ಶೆ ಕೊಟ್ಟರು, ಈ ಹೀರೋಗಳು ನೆಗೆಟಿವ್ ವಿಮರ್ಶೆ ಕೊಟ್ಟರು’ ಎಂಬ ದೂರು ಬರೋದಿಲ್ಲ. ಹೀಗಾಗಿ, ಈ ಕ್ರಮದಿಂದ ದೊಡ್ಡ ಮಟ್ಟದಲ್ಲಿ ಫ್ಯಾನ್ಸ್ ವಾರ ಕೂಡ ನಿಂತಿದೆ. ಮುಂದಿನ ದಿನಗಳಲ್ಲಿ ಹಲವು ಸಂಸ್ಥೆಗಳು ಇದೇ ತಂತ್ರ ಬಳಸಬಹುದು. ಅಲ್ಲದೆ, ಮಲಯಾಳಂ, ತಮಿಳು ಹಾಗೂ ಹಿಂದಿ ಚಿತ್ರರಂಗದವರೂ ಇದೇ ಮಾದರಿಯನ್ನು ಜಾರಿಗೆ ತರಲು ಹೆಚ್ಚು ಉತ್ಸುಕರಾಗಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
