‘ದಾದಾ ಸಾಹೇಬ್ ಫಾಲ್ಕೆ ಸುದ್ದಿ ಕೇಳಿ ಅನಂತ್ ನಾಗ್ ನಕ್ಕಿ ಮಲಗಿದ್ರು’; ಗಾಯತ್ರಿ ಅನಂತ್ ನಾಗ್

ಖ್ಯಾತ ಹಿರಿಯ ನಟ ಅನಂತ್ ನಾಗ್ ಅವರಿಗೆ ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ ಸಂದಿದೆ. ಅವರಿಗೆ ಎಲ್ಲ ಕಡೆಗಳಿಂದ ಶುಭಾಶಯ ಹರಿದು ಬರುತ್ತಿದೆ. ಈ ಬಗ್ಗೆ ಅವರ ಪತ್ನಿ ಗಾಯತ್ರಿ ಅನಂತ್ ನಾಗ್ ಅವರು ತಮ್ಮ ಮೊದಲ ಅನಿಸಿಕೆ ಹಾಗೂ ಖುಷಿಯನ್ನು ಹಂಚಿಕೊಂಡಿದ್ದಾರೆ. ಟಿವಿ9 ಕನ್ನಡ ಜೊತೆ ಮಾತನಾಡಿದ ಗಾಯತ್ರಿ ಅವರು, ಈ ವಿಚಾರ ತಮಗೆ ತಿಳಿದ ತಕ್ಷಣ ಮನೆಯಲ್ಲಿದ್ದ ಕ್ಷಣಗಳನ್ನು ಸ್ವಾರಸ್ಯಕರವಾಗಿ ವಿವರಿಸಿದ್ದಾರೆ.

ಸುದ್ದಿ ಕೇಳಿ ಮತ್ತೆ ಮಲಗಿಬಿಟ್ಟಿದ್ದರು

‘ಸುಮಾರು ಅರ್ಧ ಗಂಟೆಯಷ್ಟೇ ಮುಂಚೆ ನನಗೊಬ್ಬರು ಜರ್ನಲಿಸ್ಟ್ ಫೋನ್ ಮಾಡಿ ಈ ಸುದ್ದಿ ತಿಳಿಸಿದರು. ನನಗೆ ತಕ್ಷಣಕ್ಕೆ ಅದು ಸತ್ಯವೇ ಎಂದು ನಂಬಲು ಸಾಧ್ಯವಾಗಲಿಲ್ಲ. ಅನಂತ್ ಅವರು ಮನೆಯಲ್ಲೇ ಇದ್ದರು, ಅವರಿಗೆ ವಿಷಯ ತಿಳಿಸಿದೆ. ಆದರೆ ಅವರು ‘ಇದೇನೋ ಸುಳ್ಳು ಸುದ್ದಿ ಇರಬೇಕು’ ಎಂದು ಹೇಳಿ ಮತ್ತೆ ಮಲಗಲು ಹೊರಟುಬಿಟ್ಟರು’ ಎಂದು ನಗುತ್ತಾ ನೆನಪಿಸಿಕೊಂಡರು.

‘ಆ ನಂತರ ವಾಟ್ಸಾಪ್‌ನಲ್ಲಿ ಅಧಿಕೃತ ಮಾಹಿತಿ ಮತ್ತು ಪತ್ರಿಕಾ ಪ್ರಕಟಣೆ ಹರಿದಾಡಲು ಶುರುವಾದಾಗ, ಅದನ್ನು ನೋಡಿ ಅನಂತ್ ನಾಗ್ ಅವರು ಎದ್ದು ಓದಿದರು. ತದನಂತರ ಶುಭಾಶಯಗಳ ಫೋನ್‌ ಕರೆಗಳ ಮಹಾಪೂರವೇ ಹರಿಯಲು ಶುರುವಾಯಿತು’ ಎಂದು ಅವರು ತಿಳಿಸಿದರು.

ನನಗೆ ಅನಂತ್ ಅವರ ನಟನೆ ಬಗ್ಗೆ ಅಪಾರ ಹೆಮ್ಮೆ ಇದೆ

ತಮ್ಮ ಪತಿಯ ನಟನಾ ಪಯಣದ ಬಗ್ಗೆ ಮಾತನಾಡಿದ ಗಾಯತ್ರಿ ಅನಂತ್ ನಾಗ್, ‘ಒಬ್ಬ ನಟನಾಗಿ ಅನಂತ್ ನಾಗ್ ಅವರ ಸಾಧನೆ ಬಗ್ಗೆ ನನಗೆ ಅತ್ಯಂತ ಹೆಮ್ಮೆ ಇದೆ. ಅವರು ಎಂದಿಗೂ ಬೇರೆಯವರ ಹಾದಿಯಲ್ಲಿ ನಡೆದವರಲ್ಲ . ತಮ್ಮದೇ ಆದ ವಿಶಿಷ್ಟ ಹಾದಿಯನ್ನು ರೂಪಿಸಿಕೊಂಡು ಬಂದವರು. ಅವರು ಬೇರೆ ಹಾದಿ ತುಳಿದರೂ ಸಹ ಕರ್ನಾಟಕದ ಜನತೆ ಅವರನ್ನು ಅಪಾರವಾಗಿ ಪ್ರೀತಿಸಿದ್ದಾರೆ’ ಎಂದು ಹರ್ಷ ವ್ಯಕ್ತಪಡಿಸಿದರು.

ಇದನ್ನೂ ಓದಿ: ಅನಂತ್​ ನಾಗ್​: ಪದೇ ಪದೇ ಸೆಳೆಯುವ ಒಗಟು

ಅವರ ಮೌನವೇ ನನಗೆ ಅತ್ಯಂತ ಇಷ್ಟ

ಅನಂತ್ ನಾಗ್ ಅವರ ವ್ಯಕ್ತಿತ್ವ ಹಾಗೂ ಸ್ವಭಾವದ ಕುರಿತು ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ಅವರು, ‘ನನಗೆ ಯಾವುದೇ ಹೀರೋಗಳ ಕಲ್ಪನೆ ಇಲ್ಲ. ಆದರೆ ಅನಂತ್ ಅವರ ಮೌನ ಎಂದರೆ ನನಗೆ ತುಂಬಾ ಇಷ್ಟ. ಯಾವುದೇ ವಿಷಯಕ್ಕೂ ತಕ್ಷಣಕ್ಕೆ ಪ್ರತಿಕ್ರಿಯೆ ನೀಡದೆ, ಅನಗತ್ಯ ಗಡಿಬಿಡಿ ಇಲ್ಲದೆ, ತಮಗೆ ಏನು ಸರಿ ಅನಿಸುತ್ತದೋ ಅದನ್ನು ಶಾಂತವಾಗಿ ಮಾಡಿಕೊಂಡು ಹೋಗುವುದು ಅನಂತ್ ನಾಗ್ ಅವರ ನೈಜ ಸ್ವಭಾವ’ ಎಂದು ಪತಿಯ ಸರಳ ಹಾಗೂ ಗಂಭೀರ ವ್ಯಕ್ತಿತ್ವವನ್ನು ಶ್ಲಾಘಿಸಿದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.