Meena: ಮೀನಾ ಪತಿ ನಿಧನರಾಗಿ 5 ತಿಂಗಳು ಕಳೆಯುವುದರಲ್ಲಿ 2ನೇ ಮದುವೆಗೆ ಒತ್ತಾಯ?
Meena 2nd Marriage: ನಟಿ ಮೀನಾ ಅವರ 2ನೇ ಮದುವೆಯ ತಯಾರಿ ಕುರಿತು ಗುಸುಗುಸು ಹಬ್ಬಿದೆ. ವಿವಾಹಕ್ಕೆ ಪೋಷಕರಿಂದಲೇ ಒತ್ತಾಯ ಹೇರಲಾಗುತ್ತಿದೆ ಎಂದು ಕೆಲ ಮಾಧ್ಯಮಗಳು ವರದಿ ಮಾಡಿವೆ.
Updated on:Nov 29, 2022 | 8:03 PM
ಬಹುಭಾಷಾ ನಟಿ ಮೀನಾ (Meena) ಅವರ ಬದುಕಿನಲ್ಲಿ ಅಂಥ ಒಂದು ಕರಾಳ ದಿನ ಬರುತ್ತದೆ ಎಂದು ಯಾರೂ ಊಹಿಸಿರಲಿಲ್ಲ. 2022ರ ಜೂನ್ 28ರಂದು ಅವರ ಪತಿ ವಿದ್ಯಾಸಾಗರ್ (Vidyasagar) ಅನಾರೋಗ್ಯದಿಂದ ನಿಧನರಾಗಿದ್ದು ನೋವಿನ ಸಂಗತಿ. ಅವರು ಇಹಲೋಕ ತ್ಯಜಿಸಿ 5 ತಿಂಗಳು ಕಳೆಯುವುದರೊಳಗೆ ಮೀನಾ ಅವರ 2ನೇ ಮದುವೆ (Meena Second Marriage) ಬಗ್ಗೆ ಸುದ್ದಿ ಹರಿದಾಡಲು ಶುರುವಾಗಿದೆ. ಈ ವಿಚಾರದ ಕುರಿತಂತೆ ಅವರ ಕಡೆಯಿಂದ ಇನ್ನಷ್ಟೇ ಸ್ಪಷ್ಟನೆ ಸಿಗಬೇಕಿದೆ. ಭವಿಷ್ಯದ ದೃಷ್ಟಿಯಿಂದ ಇನ್ನೊಂದು ಮದುವೆ ಆಗುವಂತೆ ಸ್ವತಃ ಮೀನಾ ಪೋಷಕರೇ ಒತ್ತಾಯ ಹೇರುತ್ತಿದ್ದಾರೆ ಎಂದು ಕೆಲವು ಮಾಧ್ಯಮಗಳು ವರದಿ ಮಾಡಿವೆ.
ಚಿತ್ರರಂಗದಲ್ಲಿ ಮೀನಾ ಅವರಿಗೆ ಸಖತ್ ಬೇಡಿಕೆ ಇದೆ. ಬಹುಭಾಷೆಯಲ್ಲಿ ಅವರಿಗೆ ಅಭಿಮಾನಿಗಳು ಇದ್ದಾರೆ. ಪತಿಯ ನಿಧನದ ನಂತರ ಮೀನಾ ಮಂಕಾಗಿದ್ದರು. ಆದರೆ ಕುಟುಂಬದವರು ಮತ್ತು ಆಪ್ತರು ಧೈರ್ಯ ತುಂಬಿದ ಬಳಿಕ ಮತ್ತೆ ಸಹಜ ಜೀವನಕ್ಕೆ ಮರಳಲು ಅವರು ಪ್ರಯತ್ನಿಸುತ್ತಾ ಇದ್ದಾರೆ. ನಿಧಾನವಾಗಿ ಸೋಶಿಯಲ್ ಮೀಡಿಯಾದಲ್ಲೂ ಆ್ಯಕ್ಟೀವ್ ಆಗಲು ಪ್ರಯತ್ನಿಸುತ್ತಿದ್ದಾರೆ. ಅಷ್ಟರಲ್ಲಾಗಲೇ ಅವರ ಬಗ್ಗೆ ಈ ಹೊಸ ಗಾಸಿಪ್ ಕೇಳಿಬರಲು ಆರಂಭಿಸಿದೆ.
ಮೀನಾ ಅವರಿಗೆ 11 ವರ್ಷದ ಪುತ್ರಿ ಇದ್ದಾಳೆ. ಆಕೆಯ ಭವಿಷ್ಯಕ್ಕಾಗಿ ಮೀನಾ ಅವರು ಇನ್ನೊಂದು ಮದುವೆ ಆಗುವುದು ಸೂಕ್ತ ಎಂದು ಪೋಷಕರು ಆಲೋಚಿಸಿದ್ದಾರೆ ಹಾಗೂ 2ನೇ ಮದುವೆಗೆ ಒತ್ತಾಯ ಕೂಡ ಹೇರುತ್ತಿದ್ದಾರೆ ಎಂದು ವರದಿ ಪ್ರಕಟ ಆಗಿದೆ. ಅಷ್ಟೇ ಅಲ್ಲದೇ, ಮೀನಾ ಕುಟುಂಬಕ್ಕೆ ಆಪ್ತವಾಗಿರುವ ವ್ಯಕ್ತಿಯೊಬ್ಬರ ಜೊತೆ ಮದುವೆ ನೆರವೇರಿಸಲು ಆಲೋಚನೆ ಮಾಡಲಾಗಿದ್ದು, ಅದಕ್ಕೆ ಮೀನಾ ಅವರ ಒಪ್ಪಿಗೆಯೂ ಇದೆ ಎಂದೆಲ್ಲ ಸುದ್ದಿ ಹಬ್ಬಿದೆ.
ಇಷ್ಟೆಲ್ಲ ಅಂತೆ-ಕಂತೆಗಳು ಹರಿದಾಡಿರುವುದು ಅಭಿಮಾನಿಗಳಲ್ಲಿ ಅಚ್ಚರಿ ಮೂಡಿಸಿದೆ. ಮೀನಾ ಅಥವಾ ಅವರ ಕುಟುಂಬದವರಿಂದ ಅಧಿಕೃತ ಮಾಹಿತಿ ಹೊರಬೀಳಲಿ ಎಂದು ಫ್ಯಾನ್ಸ್ ಕಾಯುತ್ತಿದ್ದಾರೆ. ಸದ್ಯ ಮೀನಾ ಅವರು ಹೊಸ ಸಿನಿಮಾ ಒಪ್ಪಿಕೊಂಡು, ಅದರ ಶೂಟಿಂಗ್ನಲ್ಲಿ ಬ್ಯುಸಿ ಆಗಿದ್ದಾರೆ. ಕೆಲವು ಸಮಾರಂಭಗಳಿಗೂ ಅವರು ಹಾಜರಿ ಹಾಕುತ್ತಿದ್ದಾರೆ. ಆ ಮೂಲಕ ಪತಿಯ ಅಗಲಿಕೆಯ ನೋವನ್ನು ಮರೆಯಲು ಅವರು ಪ್ರಯತ್ನಿಸುತ್ತಿದ್ದಾರೆ.
2009ರಲ್ಲಿ ಬೆಂಗಳೂರು ಮೂಲದ ಉದ್ಯಮಿ ವಿದ್ಯಾಸಾಗರ್ ಜೊತೆ ಮೀನಾ ವಿವಾಹ ನೆರವೇರಿತ್ತು. 2011ರಲ್ಲಿ ಈ ಜೋಡಿಗೆ ಹೆಣ್ಣುಮಗು ಜನಿಸಿತು. 2022ರಲ್ಲಿ ವಿದ್ಯಾಸಾಗರ್ ಅವರು ಶ್ವಾಸಕೋಶದ ಸೋಂಕಿಗೆ ಒಳಗಾದರು. ಚೆನ್ನೈನ ಆಸ್ಪತ್ರೆಗೆ ಅವರನ್ನು ದಾಖಲಿಸಲಾಗಿತ್ತು. ಆದರೂ ಚಿಕಿತ್ಸೆ ಫಲಕಾರಿ ಆಗದೇ ಅವರು ಇಹಲೋಕ ತ್ಯಜಿಸಿದರು. ಆ ಘಟನೆ ನಡೆದು 5 ತಿಂಗಳು ಕಳೆಯುವುದರಲ್ಲೇ ಮೀನಾ ಅವರ 2ನೇ ಮದುವೆಯ ತಯಾರಿ ಕುರಿತು ಗುಸುಗುಸು ಹಬ್ಬಿದೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 8:03 pm, Tue, 29 November 22
