ಆಸ್ಕರ್​ ವಿಜೇತ ನಿರ್ಮಾಣ ಸಂಸ್ಥೆ ‘ಕಿಲ್ಜಾಯ್ ಫಿಲ್ಮ್ಸ್​’ ಜತೆ ಕೈ ಜೋಡಿಸಿದ ಕನ್ನಡದ ‘ಕೆಂಡ’ ಸಿನಿಮಾ

ಕನ್ನಡ ಚಿತ್ರರಂಗದಲ್ಲಿ ರೂಪಾ ರಾವ್ (Roopa Rao) ಅವರು ಭರವಸೆಯ ನಿರ್ದೇಶಕಿಯಾಗಿ ಗುರುತಿಸಿಕೊಂಡಿದ್ದಾರೆ. ಈಗ ಅವರು ‘ಕೆಂಡ’ ಸಿನಿಮಾ (Kenda Movie) ಮೂಲಕ ನಿರ್ಮಾಪಕಿಯೂ ಆಗಿರುವುದು ತಿಳಿದಿದೆ. ಸಿನಿಮಾಟೋಗ್ರಾಫರ್​ ಸಹದೇವ್ ಕೆಲವಡಿ ಅವರು ಈ ಚಿತ್ರಕ್ಕೆ ನಿರ್ದೇಶನ ಮಾಡುತ್ತಿದ್ದಾರೆ. ಈ ಚಿತ್ರತಂಡದಿಂದ ಒಂದೊಂದೇ ವಿಶೇಷ ಸುದ್ದಿಗಳು ಹೊರಬರುತ್ತಿವೆ. ಪೋಸ್ಟರ್​ಗಳ ಮೂಲಕ ಗಮನ ಸೆಳೆದ ‘ಕೆಂಡ’ ಸಿನಿಮಾದ ಜೊತೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ಹೊಂದಿದ ‘ಕಿಲ್ಜಾಯ್ ಫಿಲ್ಮ್ಸ್​’ ನಿರ್ಮಾಣ ಸಂಸ್ಥೆಯು ಕೈ ಜೋಡಿಸುತ್ತಿದೆ. ಇದರಿಂದಾಗಿ ‘ಕೆಂಡ’ ಸಿನಿಮಾದ ಬಲ ಹೆಚ್ಚಿದಂತಾಗಿದೆ.

‘ಕಿಲ್ಜಾಯ್ ಫಿಲ್ಮ್ಸ್​’ ಸಂಸ್ಥೆ ಜಾಗತಿಕ ಮಟ್ಟದಲ್ಲಿ ಮನ್ನಣೆ ಹೊಂದಿದೆ. ನ್ಯೂಯಾರ್ಕ್ ಮತ್ತು ಬರ್ಲಿನ್ ಮೂಲದ ಈ ಸಂಸ್ಥೆಯು ಆಸ್ಕರ್ ನಂತಹ ಪ್ರತಿಷ್ಠಿತ ಪ್ರಶಸ್ತಿಗಳನ್ನು ಪಡೆದುಕೊಂಡ ಹಲವು ಸಿನಿಮಾಗಳನ್ನು ನಿರ್ಮಾಣ ಮಾಡಿದೆ. ಈ ಸಂಸ್ಥೆಯಿಂದ ಅನೇಕ ಪ್ರತಿಭಾನ್ವಿತ ನಿರ್ದೇಶಕರು ಪರಿಚಯಗೊಂಡಿದ್ದಾರೆ. ಈಗ ಈ ಸಂಸ್ಥೆಯು ಕನ್ನಡದ ‘ಕೆಂಡ’ ಸಿನಿಮಾ ವಿತರಣಾ ಹಕ್ಕುಗಳನ್ನು ಪಡೆದುಕೊಂಡಿದೆ. ಆ ವಿಷಯವನ್ನು ಹೆಮ್ಮೆಯಿಂದ ಘೋಷಿಸಿದೆ.

ಕನ್ನಡ ಸಿನಿಮಾಗಳು ಭಾಷೆ, ರಾಜ್ಯ, ದೇಶಗಳ ಗಡಿ ದಾಟಿ ಬೆಳೆಯುತ್ತಿವೆ. ಈ ಸಂದರ್ಭದಲ್ಲಿ ‘ಕೆಂಡ’ ಚಿತ್ರವು ‘ಕಿಲ್ಜಾಯ್ ಫಿಲ್ಮ್ಸ್​’ ಸಂಸ್ಥೆ ಜೊತೆ ಕೈ ಜೋಡಿಸಿರುವುದು ವಿಶೇಷ. ಈ ಸಂಸ್ಥೆಯ ವ್ಯಾವಹಾರಿಕ ಮಾನದಂಡಗಳು ಕಟ್ಟುನಿಟ್ಟಾಗಿವೆ. ಆ ಮಾನದಂಡಗಳಲ್ಲಿ ನಿರ್ದೇಶಕ ಸಹದೇವ್ ಕೆಲವಡಿ ಅವರು ಪಾಸ್ ಆಗಿದ್ದಾರೆ. ಅವರು ಈ ಸಿನಿಮಾವನ್ನು ಕಟ್ಟಿಕೊಟ್ಟಿರುವ ರೀತಿಯು ‘ಕಿಲ್ಜಾಯ್ ಫಿಲ್ಮ್ಸ್​’ ಸಂಸ್ಥೆಯವರಿಗೆ ಇಷ್ಟ ಆಗಿದೆ. ಹಾಗಾಗಿ ಚಿತ್ರತಂಡದ ಜೊತೆ ಕೈ ಜೋಡಿಸಿದ್ದಾರೆ.

ಇದನ್ನೂ ಓದಿ: ಗ್ಯಾಂಗ್​ಸ್ಟರ್​ ಕಥೆಯ ‘ಕೆಂಡ’ ಚಿತ್ರಕ್ಕೆ ಬಂಡವಾಳ ಹೂಡಿದ ‘ಗಂಟುಮೂಟೆ’ ನಿರ್ದೇಶಕಿ ರೂಪಾ ರಾವ್​

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಕ್ರಿಯವಾಗಿರುವ ಸಂಸ್ಥೆಯ ಸಹಯೋಗದಿಂದ ‘ಕೆಂಡ’ ಸಿನಿಮಾದ ಹುರುಪು ಹೆಚ್ಚಾಗಿದೆ. ‘ಕಿಲ್ಜಾಯ್ ಫಿಲ್ಮ್ಸ್​’ ಸಂಸ್ಥೆಯಿಂದಾಗಿ ಈ ಚಿತ್ರವು ವಿಶ್ವ ಮಟ್ಟದಲ್ಲಿ ಪ್ರೇಕ್ಷಕರ ಗಮನ ಸೆಳೆಯಲು ಸಹಕಾರಿ ಆಗಲಿದೆ. ರೂಪಾ ರಾವ್ ಮತ್ತು ಸಹದೇವ್ ಕೆಲವಡಿ ಅವರು ‘ಅಮೇಯುಕ್ತಿ ಸ್ಟುಡಿಯೋಸ್’ ಮೂಲಕ ಈ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿದ್ದಾರೆ. ಪ್ರತಿಭಾನ್ವಿತ ಕಲಾವಿದರ ಬಳಗ ಈ ಚಿತ್ರದಲ್ಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ

Published On - 12:21 pm, Sun, 7 January 24