Bairagee Movie: ಶಿವಣ್ಣ, ಶರಣ್ ಕಂಠದಲ್ಲಿ ‘ರಿದಂ ಆಫ್ ಶಿವಪ್ಪ’ ಹಾಡು; ಹೊಸ ಸಾಂಗ್ ಮೂಲಕ ಹೈಪ್ ಹೆಚ್ಚಿಸಿದ ‘ಬೈರಾಗಿ’
Rhythm of Shivappa: ‘ರಿದಂ ಆಫ್ ಶಿವಪ್ಪ..’ ಹಾಡು ಸದ್ದು ಮಾಡುತ್ತಿದೆ. ಹಾಡಿನ ಮೂಲಕ ‘ಬೈರಾಗಿ’ ಸಿನಿಮಾ ಮೇಲಿನ ಕ್ರೇಜ್ ಹೆಚ್ಚಾಗಿದೆ.
Updated on:Jun 02, 2022 | 12:17 PM
‘ಹ್ಯಾಟ್ರಿಕ್ ಹೀರೋ’ ಶಿವರಾಜ್ಕುಮಾರ್ (Shivarajkumar) ಅವರು ಹಲವು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಆ ಪೈಕಿ ‘ಬೈರಾಗಿ’ ಸಿನಿಮಾ ಕೂಡ ವಿಶೇಷವಾಗಿದೆ. ಈ ಚಿತ್ರದಲ್ಲಿ ಶಿವಣ್ಣ ಎಂದಿನಂತೆ ಎನರ್ಜಿಟಿಕ್ ಆಗಿ ಹಾಡಿ-ಕುಣಿದಿದ್ದಾರೆ. ‘ಬೈರಾಗಿ’ (Bairagee Movie) ಚಿತ್ರದ ಹೊಸ ಹಾಡು ಈಗ ಬಿಡುಗಡೆ ಆಗಿದೆ. ‘ರಿದಂ ಆಫ್ ಶಿವಪ್ಪ..’ ಎಂಬ ಈ ಗೀತೆಗೆ ಸ್ವತಃ ಅವರು ಧ್ವನಿ ನೀಡಿದ್ದಾರೆ. ಅವರ ಜೊತೆಗೆ ಶರಣ್ ಕೂಡ ಸಾಥ್ ನೀಡಿದ್ದಾರೆ. ನಟನೆ ಜೊತೆಗೆ ಗಾಯನದಲ್ಲೂ ಶರಣ್ ಗುರುತಿಸಿಕೊಂಡಿದ್ದಾರೆ. ಅವರ ಕಂಠದಲ್ಲಿ ಮೂಡಿಬಂದಿರುವ ಈ ಹಾಡು ಅಭಿಮಾನಿಗಳಿಗೆ ಇಷ್ಟ ಆಗುತ್ತಿದೆ. ಈ ಗೀತೆಯ ಲಿರಿಕಲ್ ವಿಡಿಯೋ ಜೊತೆಗೆ ಒಂದಷ್ಟು ಮೇಕಿಂಗ್ ತುಣುಕುಗಳನ್ನು ಕೂಡ ‘ಬೈರಾಗಿ’ ತಂಡ ಹಂಚಿಕೊಂಡಿದೆ. ಸದ್ಯ ಯೂಟ್ಯೂಬ್ನಲ್ಲಿ ‘ರಿದಂ ಆಫ್ ಶಿವಪ್ಪ..’ (Rhythm of Shivappa) ಹಾಡು ಸದ್ದು ಮಾಡುತ್ತಿದೆ. ಹಾಡಿನ ಮೂಲಕ ಸಿನಿಮಾ ಮೇಲಿನ ಕ್ರೇಜ್ ಹೆಚ್ಚಾಗಿದೆ. ಅನೂಪ್ ಸಿಳೀನ್ ಅವರು ಈ ಚಿತ್ರಕ್ಕೆ ಸಂಗೀತ ನಿರ್ದೇಶನ ಮಾಡಿದ್ದಾರೆ.
‘ಬೈರಾಗಿ’ ಸಿನಿಮಾದಲ್ಲಿ ಶಿವರಾಜ್ಕುಮಾರ್ ಜೊತೆ ಡಾಲಿ ಧನಂಜಯ ನಟಿಸಿದ್ದಾರೆ. ‘ಟಗರು’ ಬಳಿಕ ಅವರಿಬ್ಬರು ಮತ್ತೊಮ್ಮೆ ತೆರೆ ಹಂಚಿಕೊಳ್ಳುತ್ತಿರುವುದು ವಿಶೇಷ. ಈ ಚಿತ್ರಕ್ಕೆ ವಿಜಯ್ ಮಿಲ್ಟನ್ ಅವರು ನಿರ್ದೇಶನ ಮಾಡುತ್ತಿದ್ದಾರೆ. ‘ದಿಯಾ’ ಖ್ಯಾತಿಯ ಪೃಥ್ವಿ ಅಂಬರ್ ಕೂಡ ನಟಿಸಿದ್ದಾರೆ. ಕೃಷ್ಣ ಸಾರ್ಥಕ್ ಈ ಚಿತ್ರದ ನಿರ್ಮಾಪಕರು.
ಕೆಲವೇ ದಿನಗಳ ಹಿಂದೆ ಇದೇ ಸಿನಿಮಾದ ‘ನಕರನಖ..’ ಹಾಡಿನ ಲಿರಿಕಲ್ ವಿಡಿಯೋ ರಿಲೀಸ್ ಆಗಿತ್ತು. ಆ ಗೀತೆ 57 ಲಕ್ಷಕ್ಕೂ ಅಧಿಕ ಬಾರಿ ವೀಕ್ಷಣೆ ಕಂಡಿದೆ. ಇದರ ಬೆನ್ನಲ್ಲೇ ಈಗ ‘ರಿದಂ ಆಫ್ ಶಿವಪ್ಪ..’ ಸಾಂಗ್ ಬಿಡುಗಡೆ ಆಗಿದೆ. ಈ ಸಿನಿಮಾದಲ್ಲಿ ಶಿವರಾಜ್ಕುಮಾರ್ ಅವರು ವಿಶೇಷ ಗೆಟಪ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಹುಲಿ ವೇಷ ಧರಿಸಿ ಅವರು ಕಾಣಿಸಿಕೊಂಡ ಪೋಸ್ಟರ್ ಮತ್ತು ಟೀಸರ್ ಈಗಾಗಲೇ ವೈರಲ್ ಆಗಿದೆ. ಆದಷ್ಟು ಬೇಗ ಈ ಚಿತ್ರವನ್ನು ನೋಡಬೇಕು ಎಂದು ‘ಹ್ಯಾಟ್ರಿಕ್ ಹೀರೋ’ ಅಭಿಮಾನಿಗಳು ಕಾದಿದ್ದಾರೆ.
ಶಿವರಾಜ್ಕುಮಾರ್ ನಟಿಸುತ್ತಿರುವ 123ನೇ ಸಿನಿಮಾ ಇದು. ಅಂಜಲಿ, ಯಶ ಶಿವಕುಮಾರ್, ಶಶಿಕುಮಾರ್ ಕೂಡ ಈ ಚಿತ್ರದಲ್ಲಿ ಅಭಿನಯಿಸಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 12:17 pm, Thu, 2 June 22
