ಸೌರವ್ ಗಂಗೂಲಿ ರಿಯಾಲಿಟಿ ಶೋ, ಒಂದು ಎಪಿಸೋಡ್​ಗೆ ಪಡೆವ ಸಂಭಾವನೆ ಎಷ್ಟು?

ಮಾಜಿ ಕ್ರಿಕೆಟಿಗ, ಬಿಸಿಸಿಐ ಅಧ್ಯಕ್ಷರೂ ಆಗಿದ್ದ ಸೌರವ್ ಗಂಗೂಲಿ ಈಗ ಆಗಾಗ್ಗೆ ಕ್ರಿಕೆಟ್ ವೀಕ್ಷಣ ವಿವರಣೆ ನೀಡುತ್ತಿರುತ್ತಾರೆ. ಇದರ ಜೊತೆಗೆ ಬೆಂಗಾಲಿ ಟಿವಿ ಚಾನೆಲ್​ನಲ್ಲಿ ಒಂದು ರಿಯಾಲಿಟಿ ಶೋ ಸಹ ನಡೆಸಿಕೊಡುತ್ತಾರೆ. 2009 ರಿಂದಲೂ ಸೌರವ್ ಗಂಗೂಲಿ ಈ ರಿಯಾಲಿಟಿ ಶೋ ನಡೆಸಿಕೊಂಡು ಬರುತ್ತಿದ್ದು, ಇದೀಗ ರಿಯಾಲಿಟಿ ಶೋನ ಹತ್ತನೇ ಸೀಸನ್ ನಡೆಸಿಕೊಡುತ್ತಿದ್ದಾರೆ. ಬಂಗಾಳದಲ್ಲಿ ಸಿನಿಮಾ ನಟರಿಗಿಂತಲೂ ಜನಪ್ರಿಯವಾಗಿರುವ ಗಂಗೂಲಿ ಅವರ ರಿಯಾಲಿಟಿ ಶೋಗೆ ಸಹಜವಾಗಿಯೇ ಟಿಆರ್​ಪಿ ಹೆಚ್ಚಿಗಿದ್ದು, ಅದಕ್ಕೆ ತಕ್ಕಂತೆ ಭಾರಿ ಸಂಭಾವನೆಯನ್ನೇ ಗಂಗೂಲಿ ಅವರು ಶೋ ನಡೆಸಿಕೊಡಲು ಪಡೆಯುತ್ತಾರೆ. ಈ ಶೋ ಹೆಸರು ‘ದಾದಾಗಿರಿ’.

2009 ರಿಂದಲೂ ‘ದಾದಾಗಿರಿ’ ರಿಯಾಲಿಟಿ ಶೋ ಅನ್ನು ಸೌರವ್ ಗಂಗೂಲಿ ನಿರೂಪಣೆ ಮಾಡುತ್ತಿದ್ದಾರೆ. ಇದೊಂದು ಕ್ವಿಜ್ ಶೋ ಆಗಿದ್ದು, ಪಶ್ಚಿಮ ಬಂಗಾಳದ ವಿವಿಧ ಜಿಲ್ಲೆಗಳಿಂದ ಸ್ಪರ್ಧೆಗಳನ್ನು ಆಯ್ಕೆ ಮಾಡಲಾಗಿರುತ್ತದೆ. ಈ ಕ್ವಿಜ್ ಶೋಗೆ ತಮಾಷೆಯ ಆಂಗಲ್ ಅನ್ನು ಸಹ ನೀಡಲಾಗಿದ್ದು, ‘ಕೌನ್ ಬನೇಗಾ ಕರೋಡ್​ಪತಿ’ ರೀತಿ ಗಂಭೀರವಾಗಿ ಅಲ್ಲದೆ ಗಂಭೀರ ಮತ್ತು ಹಾಸ್ಯ ಎರಡರ ಮಿಶ್ರಣದ ಮಾದರಿಯಲ್ಲಿ ಶೋ ಅನ್ನು ನಡೆಸಿಕೊಡಲಾಗುತ್ತದೆ. ಹಲವು ಸುತ್ತುಗಳಿರುವ ಈ ಶೋನಲ್ಲಿ ಬಹುಮಾನದ ಮೊತ್ತವೂ ದೊಡ್ಡದಾಗಿಯೇ ಇದೆ. ಆದರೆ ಶೋನಲ್ಲಿ ಭಾಗವಹಿಸುವ ಎಲ್ಲರಿಗಿಂತಲೂ ಹೆಚ್ಚು ಗಳಿಸುವುದು ಸೌರವ್ ಗಂಗೂಲಿ.

ಹತ್ತನೇ ಸೀಸನ್​ಗೆ ಸೌರವ್ ಗಂಗೂಲಿ ಭಾರಿ ದೊಡ್ಡ ಮೊತ್ತವನ್ನೇ ಈ ಶೋನಿಂದ ಗಳಿಸುತ್ತಿದ್ದಾರೆ. ಗಂಗೂಲಿ ಪ್ರತಿ ಎಪಿಸೋಡ್ ನಡೆಸಿಕೊಡಲು 50 ಲಕ್ಷ ರೂಪಾಯಿ ಸಂಭಾವನೆ ಪಡೆಯುತ್ತಾರೆ. ಅಲ್ಲಿಗೆ ಒಂದು ತಿಂಗಳಿಗೆ ಸುಮಾರು ನಾಲ್ಕು ಕೋಟಿ ರೂಪಾಯಿ ಸಂಭಾವನೆಯನ್ನು ಸೌರವ್ ಗಂಗೂಲಿ ಈ ಶೋನಿಂದಾಗಿ ಜೇಬಿಗೆ ಇಳಿಸುತ್ತಾರೆ. ಬಂಗಾಳದ ಅತಿ ಜನಪ್ರಿಯ ಶೋ ಇದಾಗಿದ್ದು, ವಾರದಲ್ಲಿ ಎರಡು ದಿನ ಮಾತ್ರವೇ ಪ್ರಸಾರವಾಗುತ್ತದೆಯಂತೆ.

ಇದನ್ನೂ ಓದಿ:Happy Birthday Sourav Ganguly: 52ನೇ ವಸಂತಕ್ಕೆ ಕಾಲಿರಿಸಿದ ಸೌರವ್ ಗಂಗೂಲಿ ಎಷ್ಟು ಕೋಟಿಯ ಒಡೆಯ ಗೊತ್ತಾ?

2009 ರಿಂದಲೂ ಸೌರವ್ ಗಂಗೂಲಿ ಈ ಶೋ ನಿರೂಪಣೆ ಮಾಡುತ್ತಿದ್ದಾರಾದರೂ ಮೂರನೇ ಸೀಸನ್​ನಲ್ಲಿ ಗಂಗೂಲಿಯ ಬದಲಾಗಿ ಬೆಂಗಾಲದವರೇ ಆದ ಬಾಲಿವುಡ್ ಸ್ಟಾರ್ ನಟ ಮಿಥುನ್ ಚಕ್ರವರ್ತಿ ಅವರಿಗೆ ಜವಾಬ್ದಾರಿ ನೀಡಲಾಗಿತ್ತು. ಆದರೆ ಒಂದೇ ಸೀಸನ್​ಗೆ ಅವರನ್ನು ತೆಗೆದು ಮತ್ತೆ ಗಂಗೂಲಿನಲ್ಲಿ ಹಾಕಿಕೊಳ್ಳಲಾಯ್ತು. ಗಂಗೂಲಿ, ತುಸು ಗಂಭೀರ ಸ್ವರೂಪದವರಾದರೂ ಸಹ ಸ್ಪರ್ಧಿಗಳೊಂದಿಗೆ ಲಘು ಹಾಸ್ಯ ಮಾಡುತ್ತಾ, ಅವರು ಕೇಳು ಪ್ರಶ್ನೆಗಳಿಗೆ ಉತ್ತರಿಸುತ್ತಾ, ತಾವೂ ಸಹ ಪ್ರಶ್ನೆ ಕೇಳುತ್ತಾ ಅದ್ಭುತವಾಗಿ ಶೋ ನಡೆಸಿಕೊಡುತ್ತಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ