ಎದೆಹಾಲುಣಿಸುವುದರಿಂದ ತಾಯಂದಿರಲ್ಲಿ ಖಿನ್ನತೆ ಉಂಟಾಗುತ್ತಾ?; ಇಲ್ಲಿದೆ ಮಾಹಿತಿ
ಹಾಲುಣಿಸುವ ತಾಯಂದಿರು ಸಮತೋಲಿತ ಜೀವನಶೈಲಿಯನ್ನು ನಿರ್ವಹಿಸಲು ಸಾಧ್ಯವಾಗುವುದಿಲ್ಲ. ಅನಾರೋಗ್ಯಕರ ಆಹಾರ, ಮಗುವಿನ ಒತ್ತಡ ಮತ್ತು ನಿದ್ರೆಯ ಕೊರತೆಯಂತಹ ಅಂಶಗಳು ಅವರ ಖಿನ್ನತೆಗೆ ಕಾರಣವಾಗಬಹುದು.
![ಎದೆಹಾಲುಣಿಸುವುದರಿಂದ ತಾಯಂದಿರಲ್ಲಿ ಖಿನ್ನತೆ ಉಂಟಾಗುತ್ತಾ?; ಇಲ್ಲಿದೆ ಮಾಹಿತಿ](https://images.tv9kannada.com/wp-content/uploads/2023/09/breastfeeding.jpg?w=1280)
ಮಗುವಿಗೆ ಆರೇಳು ತಿಂಗಳವರೆಗೆ ತಾಯಿಯ ಎದೆ ಹಾಲೊಂದೇ (Breast Milk) ಆಹಾರ. ಮಗುವಿನ ಸರ್ವತೋಮುಖ ಬೆಳವಣಿಗೆಯಲ್ಲಿ ಎದೆ ಹಾಲು ಪ್ರಮುಖ ಪಾತ್ರ ವಹಿಸುವುದರಿಂದ ಇದನ್ನು ಮಕ್ಕಳ ಪಾಲಿನ ಅಮೃತವೆಂದೇ ಹೇಳಬಹುದು. ಆದರೆ, ಎದೆ ಹಾಲುಣಿಸುವ ತಾಯಿಯರಲ್ಲಿ ಕೆಲವರಲ್ಲಿ ಖಿನ್ನತೆ (Depression) ಉಂಟಾಗುತ್ತದೆ. ಈ ಖಿನ್ನತೆ ಅವರ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅಧ್ಯಯನವೊಂದು ತಿಳಿಸಿದೆ. ಸ್ತನ್ಯಪಾನ (Breastfeeding) ತಾಯಂದಿರ ಕರ್ತವ್ಯವಾದರೂ ಅದು ಕೆಲವು ಮಹಿಳೆಯರ ಮನಸಿನ ಮೇಲೆ ನೆಗೆಟಿವ್ ಪರಿಣಾಮ ಬೀರುತ್ತದೆ ಎನ್ನಲಾಗಿದೆ.
ಸ್ತನ್ಯಪಾನ ಮಾಡುವಾಗ ನೀವು ಖಿನ್ನತೆಯನ್ನು ಅನುಭವಿಸುತ್ತಿದ್ದರೆ ಅಥವಾ ಅಗಾಧವಾದ ದುಃಖ ಅನುಭವಿಸುತ್ತಿದ್ದರೆ, ನೀವು D-MER ಅಥವಾ ಡೈಸ್ಫೋರಿಕ್ ಮಿಲ್ಕ್ ಎಜೆಕ್ಷನ್ ರಿಫ್ಲೆಕ್ಸ್ ಎಂದು ಕರೆಯಲ್ಪಡುವ ಸಮಸ್ಯೆಯನ್ನು ಎದುರಿಸುತ್ತಿರಬಹುದು. ಈ ರೀತಿ ಸ್ತನ್ಯಪಾನಕ್ಕೆ ಸಂಬಂಧಿಸಿದ ಸಮಸ್ಯೆಗಳನ್ನು ಹೊಂದಿರುವ ಅನೇಕ ಮಹಿಳೆಯರು ಇದ್ದಾರೆ. ಹೊಸ ತಾಯಂದಿರು ಕೆಲವೊಮ್ಮೆ ತನಗೆ ಮಗುವಿಗೆ ಸರಿಯಾಗಿ ಹಾಲುಣಿಸಲು ಸಾಧ್ಯವಾಗುತ್ತಿಲ್ಲ ಎಂಬ ಪಾಪಪ್ರಜ್ಞೆಯಿಂದ ಖಿನ್ನತೆಗೆ ಒಳಗಾಗಬಹುದು. ಇನ್ನು ಕೆಲವರು ದಿನಕ್ಕೆ 10-12 ಬಾರಿ ಹಾಲುಣಿಸಿ ಅದರಿಂದಲೇ ಖಿನ್ನತೆ ಅನುಭವಿಸಬಹುದು.
ಇದನ್ನೂ ಓದಿ: ಸ್ತನ್ಯಪಾನ, ವ್ಯಾಯಾಮ, ಎದೆಹಾಲಿನ ದಾನ: ಬಾಳಂತಿಯರು ತಿಳಿದುಕೊಳ್ಳಲೇಬೇಕಾದ ಸಂಗತಿಗಳು
ಸ್ತನ್ಯಪಾನ ತಾಯಿ ಮತ್ತು ಮಗುವಿನ ನಡುವಿನ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸುವ ಕ್ರಿಯೆ. ಆದರೆ, ಇದು ತಾಯಿಯ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರುವ ಸಾಧ್ಯತೆಯೂ ಇದೆ. ಹಾಲುಣಿಸುವ ಸಮಯದಲ್ಲಿ ಹಾರ್ಮೋನುಗಳ ಬದಲಾವಣೆಗಳು ಖಿನ್ನತೆಯ ಲಕ್ಷಣಗಳನ್ನು ಪ್ರಚೋದಿಸುವ ಅಥವಾ ಉಲ್ಬಣಗೊಳಿಸುವಲ್ಲಿ ಪಾತ್ರವನ್ನು ವಹಿಸುತ್ತವೆ ಎಂದು ನಂಬಲಾಗಿದೆ. ಆದ್ದರಿಂದ, ಹಾಲುಣಿಸುವ ತೊಂದರೆಗಳನ್ನು ಅನುಭವಿಸಿದ ಮಹಿಳೆಯರು ಪ್ರಸವಾನಂತರದ ಖಿನ್ನತೆಯ ಲಕ್ಷಣಗಳನ್ನು ಹೊಂದುವ ಸಾಧ್ಯತೆಯಿದೆ.
ಹಾಲುಣಿಸುವ ತಾಯಂದಿರು ಸಮತೋಲಿತ ಜೀವನಶೈಲಿಯನ್ನು ನಿರ್ವಹಿಸಲು ಸಾಧ್ಯವಾಗುವುದಿಲ್ಲ. ಅನಾರೋಗ್ಯಕರ ಆಹಾರ, ಮಗುವಿನ ಒತ್ತಡ ಮತ್ತು ನಿದ್ರೆಯ ಕೊರತೆಯಂತಹ ಅಂಶಗಳು ಅವರ ಖಿನ್ನತೆಗೆ ಕಾರಣವಾಗಬಹುದು. ಹೀಗಾಗಿ, ಹಾಲುಣಿಸುವ ಮಹಿಳೆಯರಿಗೆ ಅವರ ಗಂಡನ ಕಾಳಜಿ ಬಹಳ ಮುಖ್ಯ.
ಅನೇಕ ಮಹಿಳೆಯರು ತಮ್ಮ ಶಿಶುಗಳಿಗೆ ಹಾಲುಣಿಸಲು ಅಪಾರ ಒತ್ತಡವನ್ನು ಅನುಭವಿಸುತ್ತಾರೆ. ಹೀಗಾಗಿ, ಎದೆಹಾಲಿನ ಬದಲು ಫಾರ್ಮುಲಾ ಹಾಲನ್ನು ಕೂಡ ನೀಡುವ ಪದ್ಧತಿ ಈಗೀಗ ಹೆಚ್ಚಾಗುತ್ತಿದೆ. ಇನ್ನು ಕೆಲವು ಮಹಿಳೆಯರಿಗೆ ಎದೆ ಹಾಲುಣಿಸುವುದರಿಂದ ತಮ್ಮ ಆರೋಗ್ಯ ಹದಗೆಡುತ್ತಿದೆ ಎಂಬ ಯೋಚನೆಯೇ ಖಿನ್ನತೆಗೆ ಕಾರಣವಾಗಬಹುದು.
ಇದನ್ನೂ ಓದಿ: Breast feeding: ಮಗುವಿಗೆ ಎಷ್ಟು ಸಮಯಗಳವರೆಗೆ ಎದೆಹಾಲು ಉಣಿಸಬೇಕು? ತಾಯಿ ದೇಹದಲ್ಲಿರುವ ಗಾಯ ಮಾಯವಾಗಲು ಸ್ತನ್ಯಪಾನ ಉತ್ತಮ
ನಮ್ಮ ಜೀವನದಲ್ಲಿ ಬೇಸರವಾಗುವ ಘಟನೆಗಳು ನಡೆದಾಗ ನಮಗೆ ದುಃಖವಾಗುವುದು ಸಹಜ. ಆದರೆ ಈ ಭಾವನೆ ತುಂಬಾ ದಿನಗಳವರೆಗೆ ಇದ್ದರೆ ಅಥವಾ ಮತ್ತೆ ಮತ್ತೆ ಕಾಣಿಸಿಕೊಂಡರೆ ಎಚ್ಚರ ವಹಿಸುವುದು ಅಗತ್ಯ. ಖಿನ್ನತೆ ಉಂಟಾದರೆ ದಿನನಿತ್ಯದ ಚಟುವಟಿಕೆಗಳಲ್ಲಿ ಆಲೋಚಿಸುವ, ನಾವು ತೊಡಗಿಸಿಕೊಳ್ಳುವ ರೀತಿಯು ಬದಲಾಗುತ್ತದೆ. ಖಿನ್ನತೆಯು ವೃತ್ತಿ, ಶಿಕ್ಷಣ, ಊಟ, ನಿದ್ರೆ, ಭಾವನೆಗಳು, ವರ್ತನೆ, ಸಂಬಂಧಗಳ ಮೇಲೆ ಪರಿಣಾಮ ಬೀರುತ್ತದೆ. ತೀವ್ರವಾದ ಖಿನ್ನತೆ ಇರುವ ವ್ಯಕ್ತಿ ಆತ್ಮಹತ್ಯೆಯ ಪ್ರಯತ್ನ ಕೂಡ ಮಾಡಬಹುದು. ಖಿನ್ನತೆ ಕೂಡ ಒಂದು ರೋಗ. ಇದನ್ನು ನಮ್ಮ ಮನಸನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳುವ ಮೂಲಕ ಬಗೆಹರಿಸಿಕೊಳ್ಳಬಹುದು.