Nitya Bhavishya: ಈ ರಾಶಿಯವರಿಗೆ ಉದ್ಯೋಗದಲ್ಲಿ ಬಡ್ತಿ ಹೊಂದುವ ಅವಕಾಶವಿದೆ

ಕೈ ಉಜ್ಜಿಕೊಂಡು ಬೆಳಗ್ಗೆ ಏಳುವಾಗಲಿಂದ ಮತ್ತೆ ಹಾಸಿಗೆಗೆ ಹೋಗುವವರೆಗೂ ದಿನ ಚನ್ನಾಗಿರಬೇಕೆಂದರೆ ನಮ್ಮ ರಾಶಿ ಭವಿಷ್ಯ (Horoscope Today) ಚೆನ್ನಾಗಿರಬೇಕು. ಚಂದ್ರ, ಸೂರ್ಯನ ಸಂಚಾರ ಚನ್ನಾಗಿರಬೇಕು. ಹಾಗಾದ್ರೆ 2023 ಫೆಬ್ರವರಿ 17 ಶುಕ್ರವಾರ ನಿಮ್ಮ ರಾಶಿ ಫಲ (Nitya Bhavishya) ಹೇಗಿದೆ? ಇಂದು ಯಾವ ರಾಶಿಯವರಿಗೆ ಶುಭ? ನಿಮ್ಮ ರಾಶಿಗೆ ಏನು ಫಲವಿದೆ? ಎಂಬ ನಿಮ್ಮ ಎಲ್ಲಾ ಪ್ರಶ್ನೆಗಳಿಗೆ ಉತ್ತರ ತಿಳಿದುಕೊಳ್ಳಿ.

ನಿತ್ಯ ಪಂಚಾಂಗ: ಶಾಲಿವಾಹನ ಶಕೆ 1945, ಶುಭಕೃತ್ ಸಂವತ್ಸರ, ಉತ್ತರಾಯಣ, ಶಿಶಿರ ಋತು, ಮಕರಮಾಸ, ಮಹಾನಕ್ಷತ್ರ : ಧನಿಷ್ಠಾ, ಮಾಸ : ಮಾಘ, ಪಕ್ಷ : ಕೃಷ್ಣ, ವಾರ :ಶುಕ್ರ, ತಿಥಿ : ದ್ವಾದಶೀ, ನಿತ್ಯನಕ್ಷತ್ರ : ಪೂರ್ವಾಷಾಢ, ಯೋಗ : ಸಿದ್ಧಿ, ಕರಣ : ಕೌಲವ, ಸೂರ್ಯೋದಯ ಬೆಳಗ್ಗೆ 07 ಗಂಟೆ, ಸೂರ್ಯಾಸ್ತ ಸಂಜೆ 06 ಗಂಟೆ 36 ನಿಮಿಷಕ್ಕೆ. ರಾಹು ಕಾಲ 11: 19 – 12:47, ಯಮಘಂಡ ಕಾಲ 03:41 ರಿಂದ 05 :09, ಗುಳಿಕ ಕಾಲ 08:25 ರಿಂದ 09:52.

ಮೇಷ: ಪತ್ನಿಯಿಂದ ಆರ್ಥಿಕವಾಗಿ ಸಹಾಯ ಸಿಗಬಹುದಾಗಿದೆ. ಉದ್ಯೋಗದಲ್ಲಿ ಅನುಕೂಲಕರವಾದ ವಾತವರಣವಿದ್ದು ಹಲವು ರೀತಿಯ ಲಾಭವನ್ನು ಪಡೆಯುವಿರಿ. ಉದ್ಯೋಗದಲ್ಲಿ ಬಡ್ತಿ ಸಿಗಬಹುದು. ಮನಸ್ಸು ಶಾಂತವಾದ ಬಳಿಕ ನಿಮ್ಮ ಕಾರ್ಯಗಳನ್ನು ಆರಂಭಿಸಿ.‌ ವೇಗವಾಗಿ ಅದು ಮುಕ್ತಾಯಗೊಳ್ಳುವುದು. ಅಪಮಾನದ ಘಟನೆಗಳು ನಡೆಯಬಹುದು. ಅದಕ್ಕೆ ಉತ್ತರಿಸಲು ಹೋಗಿ ಇನ್ನೊಂದಿಷ್ಟು ಕೆಸರಿನ್ನು ಮೈಗೆ ಹಚ್ಚಿಕೊಳ್ಳುವ ಕೆಲಸವಾದೀತು. ಆರ್ಥಿಕ ಸಂಕಷ್ಟಕ್ಕೆ ನಿಮ್ಮ ಉಪಾಯಗಳನ್ನು ಆರಂಭಿಸುವಿರಿ. ಆಸ್ತಿ ವ್ಯವಹಾರದಲ್ಲಿ ಸ್ವಲ್ಪಮಟ್ಟಿಗೆ ಕಲಹಾದಿಗಳು ಆಗಿ ಬಗೆ ಹರಿಯುವುದು. ಷಷ್ಠಸ್ಥಾನಾಧಿಪತಿಯಾದ ಬುಧು ದಶಮದಲ್ಲಿ ಉದ್ಯೋಗ ಸ್ವಲ್ಪ ಕಿರಿಕಿರಿಯನ್ನು ಮಾಡುವನು. ಬುಧನ ಸ್ತೋತ್ರ ಓದಿ.

ವೃಷಭ: ನಿಮ್ಮ ವಾದ-ವಿವಾದಗಳು ನ್ಯಾಯಾಲಯದ ಮೆಟ್ಟಿಲೇರಬಹುದು. ಜಾಗರೂಕರಾಗಿರಿ. ಮನೆಯ ಪೂರ್ವಾರ್ಜಿತ ಆಸ್ತಿಗಳು ನಷ್ಟವಾಗಬಹುದು. ಉದ್ಯೋಗದಲ್ಲಿ ಹೆಚ್ಚು ಬದಲಾವಣೆಯಾಗುವ ಸಾಧ್ಯತೆ ಇದೆ. ಸ್ನೇಹಿತರೊಂದಿಗೆ ಇದ್ದು ಅವರಿಗೆ ಮೃಷ್ಟಾನ್ನ ಭೋಜನವನ್ನು ಕೊಟ್ಟು ಆನಂದಿಸುವಿರಿ. ಇಚ್ಛೆಗೆ ಅನುಸಾರವಾಗಿ ಕುಟುಂಬದಲ್ಲಿ ನಡೆದುಕೊಳ್ಳುವರು. ನಿಮ್ಮ ಸಹಾಯವನ್ನು ಪಡೆದವರು ನಿಮ್ಮನ್ನು ಭೇಟಿಯಾಗಿ ಕೃತಜ್ಞತೆಯ ಭಾವವನ್ನು ಅರ್ಪಿಸುವರು.‌ ಕಷ್ಟಕರವಾಗಿದ್ದರೂ ಪ್ರಯಾಣವನ್ನು ಮಾಡಲೇ ಬೇಕಾಗಿದೆ. ಏಕಾದಶದಲ್ಲಿ ಉಂಟಾದ ಗುರು ಹಾಗೂ ಶುಕ್ರರ ಸಂಯೋಗ ಸಂಪತ್ತು, ಅಧಿಕಾರ ಮೊದಲಾದವುಗಳು ಸಿಗಬಹುದು.

ಮಿಥುನ: ದಾಂಪತ್ಯದಲ್ಲಿ ಕಲಹವೇರ್ಪಡಬಹುದು. ಮಾತು ಬೆಳೆದಾಗ ಅದನ್ನು ನಿಲ್ಲಿಸಿ. ಸ್ವಾರ್ಥವನ್ನು ಆಲೋಚಿಸುತ್ತಿರುವಿರಿ. ಅನಾರೋಗ್ಯವು ನಿಮ್ಮ ಮಾನಸಿಕ ನೆಮ್ಮದಿಯನ್ನು ಹಾಳುಮಾಡಬಹುದು. ಶತ್ರುಗಳು ನಿಮ್ಮ ಏಳ್ಗೆಯನ್ನು ಸಹಿಲಾಗದೆ ತೊಂದರೆ ಕೊಟ್ಟಾರು. ಕಲಾವಿದರು ಪ್ರಶಂಸೆಗೆ ಪಾತ್ರರಾಗುವರು. ಹಿರಿಯ ಕಲಾವಿದರ ಭೇಟಿಯಾಗಬಹುದು. ನಿಮ್ಮೊಳಗೆ ಅಳಿಯದೇ ಉಳಿವ ಘಟನೆಯೊಂದು ನಡೆಯಲಿದೆ. ವೃತ್ತಿಯಲ್ಲಿ ಸಮಾಧಾನ ತರುವ ಸಂಗತಿಗಳು ಇರಲಿದೆ. ಸಂಗಾತಿಯೊಂದಿಗೆ ಹರಟಯಲ್ಲಿ ಕಾಲವನ್ನು ಕಳೆಯುವಿರಿ. ದ್ವಾದಶದ ಕುಜನು ನಿಮಗೆ ಯಂತ್ರೋಪಕರಣಗಳಿಂದ, ವಾಹನಗಳಿಂದ ನಷ್ಟ ಮಾಡಿಸುವನು. ಸುಬ್ರಹ್ಮಣ್ಯನ ಆರಾಧನೆ ಮಾಡಿ.

ಕರ್ಕ: ಆಸ್ತಿಯ ವಿಚಾರದಲ್ಲಿ ನಿಮಗೆ ಸರ್ಕಾರದಿಂದ ಸಮಸ್ಯೆಯಾಗಬಹುದು. ಹೆಸರು ಗಳಿಸುವ ಹಂಬಲವನ್ನು ಹೊಂದಿದ್ದೀರಿ. ಯಾರನ್ನೂ ಅಪಮಾನ ಮಾಡಲು ಹೋಗಬೇಡಿ. ಅದು ನಿಮಗೆ ಮುಳುವಾದೀತು. ನಿರ್ಲಕ್ಷ್ಯವನ್ನು ಮಾಡದೇ ಕೆಲಸಗಳನ್ನು ಮಾಡಿ ಮುಗಿಸಿ. ಹಣವನ್ನು ಹೂಡಿಕೆ ಮಾಡಲು ಮುಂದಾಲೋಚನೆಯನ್ನು ಇಟ್ಟುಕೊಂಡು ಮಾಡಿ. ಮಕ್ಕಳಿಂದ‌ ಸಂತೋಷವನ್ನು ಪಡೆಯುವಿರಿ. ಶುಭ ಸುದ್ದಿಯು ನಿಮ್ಮ ಕೆಲಸಕ್ಕೆ ಉತ್ತೇಜನವನ್ನು ನೀಡುತ್ತದೆ. ನಿಮ್ಮ ಬಗ್ಗೆ ಇಲ್ಲ ಪ್ರಚಾರಗಳನ್ನು ಮಾಡಲು ನಿಮ್ಮನ್ನು ಕೆರಳಿಸುವ ಪ್ರಯತ್ನಗಳು ನಡೆಯಬಹುದು. ಹಳೆಯ ರೋಗವು ಇಂದು ಮತ್ತೆ ಕಾಣಿಸಿಕೊಳ್ಳಬಹುದು. ಅಷ್ಟಮದ ಶನಿಯು ದೈಹಿಕವಾಗಿ ನಿಮಗೆ ಬಹಳ ನೋವನ್ನು ಕೊಡುವನು. ಶಿವನ ಸ್ತೋತ್ರವನ್ನು ಪಠಣ ಮಾಡಿ.

ಸಿಂಹ: ವಾಹನ ಖರೀದಿಯ ಕುರಿತು ಆಲೋಚನೆ ಮಾಡುವಿರಿ. ಮನಸ್ಸು ಹಾಗೂ ದೇಹವು ವಿಶ್ರಾಂತಿಯನ್ನು ಬಯಸಲಿದೆ. ನಂಬಿಕೆಯನ್ನು ಇಡುವಾಗ ಮುನ್ನೆಚ್ಚರವಿರಲಿ. ಪ್ರಣಯಪ್ರಸಂಗದಲ್ಲಿ ಆಕಸ್ಮಿಕ ತಿರುವುಗಳು ಇರಬಹುದು. ದುಃಖವನ್ನು ಅನುಭವಿಸುವ ಸಂದರ್ಭ ಬರಬಹುದು. ಮನಸ್ಸು, ಬುದ್ಧಿಗಳನ್ನು ನಿಶ್ಚಲಗೊಳಿಸಿ. ಮನಸ್ಸನ್ನು ಅನ್ಯ ಕಾರ್ಯದಲ್ಲಿ ಯೋಜಿಸಿ. ಅಪಮಾನದ ಮಾತುಗಳು ಬಂಧುಗಳಿಂದ ಬರಬಹುದು. ಅಷ್ಟಮದಲ್ಲಿರುವ ಶುಕ್ರನು ಸ್ತ್ರೀಯರಿಂದ ಅಪಮಾನಮಾಡಿಸುವನು. ದೇವಿಯ ಆರಾಧನೆಯನ್ನು ಮಾಡಿ. ದೇವಿಯ ಸ್ತೋತ್ರವನ್ನು ಜಪಿಸಿ.

ಕನ್ಯಾ: ಕುಟುಂಬದಲ್ಲಿ ಕಲಹವೇರ್ಪಡಬಹುದು. ಬಹಳ ಸೂಕ್ಷ್ಮವಾಗಿ ನಿಭಾಯಿಸಿ. ಇಲ್ಲವಾದರೆ ನ್ಯಾಯಾಲಯದವರೆಗೂ ಹೋಗಬಹುದು. ದುಃಖಿಸುವ ಅಗತ್ಯವಿಲ್ಲ. ಅನೇಕ ದಿನಗಳಿಂದ‌ ಇದ್ದ ಜಾಡ್ಯವು ದೂರವಾಗಲಿದೆ. ವ್ಯಾಪಾರದಲ್ಲಿ ಚೇತರಿಕೆ ಇರಬಹುದು. ಜನರೊಡನೆ ಬಾಂಧವ್ಯವನ್ನು ಚೆನ್ನಾಗಿಸಿಕೊಳ್ಳಿ. ಆತುರಪಟ್ಟು ಅವಗಢಕ್ಕೆ ಸಿಲುಕಬೇಡಿ. ಹಿರಿಯರ ಸೇವೆಯನ್ನು ಕೆಲಸವೆಂದು ಮಾಡದೇ ಕರ್ತವ್ಯವೆಂದು ಮಾಡಿ. ನಿಮ್ಮ ಗುರಿಯ ಬಗ್ಗೆ ಅಸ್ಪಷ್ಟತೆ ಇರಲಿ. ಮಕ್ಕಳಿಂದ ಸಂತೋಷವು ಸಿಗಲಿದೆ. ಗುರುಗಳನ್ನು ಭೇಟಿಯಾಗಲಿದ್ದೀರಿ. ನಿಮ್ಮ ವಿರುದ್ಧ ಯಾವುದಾದರೂ ಆರೋಪಗಳು ಬರಬಹುದು. ಉದ್ಯೋಗದ ನಿಮಿತ್ತ ದೂರದ ಊರಿಗೆ ಹೋಗುವಿರಿ. ಅಷ್ಟಮದ ರಾಹುವು ನಿಮಗೆ ಕೆಲವು ಮಾನಸಿಕ ಕಿರುಕುಳವನ್ನು ನೀಡಿಯಾನು. ಹನುಮಾನ್ ಚಾಲೀಸ್ ಪಠಣ ಮಾಡಿ.

ತುಲಾ: ಇಂದು ನಿಮ್ಮ ಸರ್ಕಾರಿ ಕೆಲಸಗಳು ಶೀಘ್ರವಾಗಿ ಆಗುವುದು. ಅನಿವಾರ್ಯವಾಗಿ ಹಣ ಬೇಕಾಗಿದ್ದು ಮಿತ್ರನಂದ ಹಣವನ್ನು ಪಡೆಯುವಿರಿ. ಈಗಲೇ ನಿಮ್ಮ ರೋಗಗಳನ್ನು ಸರಿಮಾಡಿಕೊಳ್ಳಿ. ಇಲ್ಲವಾದರೆ ಅದಕ್ಕೆ ಅಧಿಕವಾದ ಹಣವು ವ್ಯಯವಾದೀತು. ನಿಮಗಿರುವ ಕಾಳಜಿಗೆ ಪ್ರಶಂಸೆಗಳು ಬರಬಹುದು. ಉತ್ತಮ ಯೋಜನೆ ನಿಮ್ಮ ಉನ್ನತಾಧಿಕಾರಕ್ಕೆ ಪೂರಕವಾಗಬಹುದು. ಸರ್ಕಾರಿ ಉದ್ಯೋಗಿಗಳಿಗೆ ಶುಭವಾರ್ತೆಯು ಇರಲಿದೆ. ಅಪರಿಚಿತ ವ್ಯಕ್ತಿಯೊಡನೆ ಜಗಳಗಳು ಆಗಬಹುದು. ಮಾತಿನ ಮೇಲೆ ಹಿಡಿತವಿರಲಿ. ಇನ್ನೊಬ್ಬರ ಮಾತಿಗೆ ಕಿವಿಗೊಡಬೇಡಿ. ನಿಮ್ಮ ವಹಿವಾಟು ಚೆನ್ನಾಗಿರಲಿದೆ. ಅಷ್ಟಮದ ಕುಜನು ವಾಹನದಿಂದ ಅಪಾಯವನ್ನು ತರಿಸುವನು. ಎಚ್ಚರವಹಿಸುವುದು ಉತ್ತಮ.

ವೃಶ್ಚಿಕ: ಉದ್ಯೋಗದಲ್ಲಿ ಅಸಮಧಾನ ಆಗಲಿದೆ. ಉದ್ವೇಗಕ್ಕೆ ಒಳಗಾಗದೇ ಇರಲು ಕೆಲವು ಕ್ರಮಗಳನ್ನು ರೂಢಿಸಿಕೊಳ್ಳುವಿರಿ. ತಂದೆ ಹಾಗು ತಾಯಿಯರ ಜೊತೆ ಜಗಳಗಳು ಆಗಬಹದು. ಕಾರ್ಯದ ಒತ್ತಡ ನಿಮ್ಮನ್ನು ಒತ್ತಡಕ್ಕೆ, ಉದ್ವೇಗಕ್ಕೆ ತಳ್ಳುತ್ತದೆ. ಇಂತಹ ಸಂದರ್ಭಗಳಲ್ಲಿ ಸುಮ್ಮನೆ ಸ್ವಲ್ಪ ಹೊತ್ತು ಮಾಡುವ ಕೆಲಸಗಳತ್ತ ಗಮನಹರಿಸಿ. ನೀವು ಮಾಡಲಿರುವ ಕೆಲಸಗಳು ಪರ್ವತದಷ್ಟು ಇರಲಿದೆ. ನಿಮ್ಮ ಸಾಮರ್ಥ್ಯವು ಇತರರಿಗೆ ತಿಳಿಯಬಹುದು. ಅವಕಾಶಗಳನ್ನು ಬಿಟ್ಟುಕೊಡುವುದು ಔದಾರ್ಯವಲ್ಲ. ಆಲಸ್ಯವಾಗುತ್ತದೆ. ಹಳೆಯ ಸಾಲದ ಚಿಂತೆ ಇರಲಿದೆ. ವ್ಯಯದ ಕೇತುವು ನಿಮಗೆ ಬಾಧೆ ತರುವನು. ಗಣಪತಿಯ ದೇಗುಲಕ್ಕೆ ಹೋಗಿ ಸುತ್ತುವರಿದು ನಮಸ್ಕರಿಸಿ.

ಧನುಸ್ಸು: ಒತ್ತಡದ ಮನಃಸ್ಥಿತಿಯನ್ನು ಯಾರಿಗೂ ತೋರಿಸಬೇಡಿ. ಮಾತಿನ ಬಗ್ಗೆ ನಿಗಾ ಇರಲಿ. ನೀವಂದುಕೊಂಡಷ್ಟು ಸಂತೋಷವು ನಿಮಗೆ ಲಭ್ಯವಾಗದು. ಅನಗತ್ಯ ತಿರುಗಾಟ, ಖರ್ಚುಗಳು ನಿಮ್ಮ ಆಲೋಚನೆಯ ದಿಕ್ಕನ್ನು ಬದಲಿಸಬಹುದು. ಉತ್ಸಾಹವು ಕಡಿಮೆಯಾಗ ಸಂಗೀತವನ್ನು ಕೇಳಿ, ಅದನ್ನು ಹೆಚ್ಚುಗೊಳಿಸಿ. ಹರಟೆಯು ನಿಮ್ಮ ಮನಸ್ಸಿಗೆ ಖುಷಿಯನ್ನು ಕೊಟ್ಟೀತು. ಚಿತ್ರಗಾರರಿಗೆ ಇಂದು ಪ್ರಶಂಸೆಯನ್ನು ಹೊಂದಬಹುದು. ಯಾರೋ ಆಡಿದ ಮಾತಿನಿಂದ ನಿಮಗೆ ನೋವಾಗಬಹುದು. ಷಷ್ಠದಲ್ಲಿರುವ ಕುಜನು ಶತ್ರುಗಳನ್ನು ಇಲ್ಲವಾಗಿಸುವನು. ಕಾರ್ತಿಕೇಯನ ಸ್ತೋತ್ರ ಮಾಡಿ.

ಮಕರ: ಮಕ್ಕಳಿಂದ ಅಪಕೀರ್ತಿ ಲಭಿಸಬಹುದು. ಧನನಷ್ಟವಾಗಬುದು. ನಿಮ್ಮವರೊಂದಿಗೆ ಇಂದು ಬಿಡುವಿಲ್ಲದಿದ್ದರೂ ಸಮಯವನ್ನು ಕೊಡಲು ಇಚ್ಛಿಸುವಿರಿ. ಅಗತ್ಯದ ಹಣವನ್ನು ಪೂರೈಸಲು ಶ್ರಮಪಡುವಿರಿ. ನಾಳಿನ ಬಗ್ಗೆ ಚಿಂತೆ ನಿಮಗಿರಲಿದೆ. ಪಾಪಪ್ರಜ್ಞೆಯು ನಿಮ್ಮನ್ನು ಕಾಡಿ ಮನಸ್ಸು ದುರ್ಬಲವಾಗಬಹುದು. ಹೊಸ ಮನೆಯನ್ನು ಖರೀದಿಸುವ ಯೋಚನೆ ಮಾಡುವಿರಿ. ನಿಮಗೆ ವಿರುದ್ಧವಾದ ಅಭಿಪ್ರಾಯಗಳು ಬರಬಹುದು. ಉತ್ತಮವಾದ ಸಂಜೆಯನ್ನು ನೀವು ಕಳೆಯುವಿರಿ. ಶೇರು ಮಾರುಕಟ್ಟೆಯಲ್ಲಿ ಲಾಭ ಸಿಗಲಿದೆ. ದ್ವಿತೀಯದಲ್ಲಿರುವ ಶನಿಯು ತಂದೆ ಮತ್ತು ಮಕ್ಕಳ ನಡುವೆ ಕಲಹವನ್ನು ತರಿಸುವನು. ಶಿವನಿಗೆ ರುದ್ರಾಭಿಷೇಕ ಮಾಡಿ.

ಕುಂಭ: ಕೆಟ್ಟ ವರ್ತನೆಗಳಿಂದ ನಿಮ್ಮ ಗೌರವವು ಕಡಿಮೆಯಾಗುವುದು. ಕೆಲಸದಲ್ಲಿ ಸಂಯಮ ಅಗತ್ಯ. ಮನೋರಂಜನೆಯ ಕಾರಣಕ್ಕೆ ಹಣವನ್ನು ಕಳೆಯುವಿರಿ. ದುಶ್ಚಟಗಳು ನಿಮ್ಮ ವ್ಯಕ್ತಿತ್ವವನ್ನು ಘಾಸಿಗೊಳಿಸಲಿವೆ. ಹಣದ ಆಮಿಷವನ್ನು ತೋರಿಸಿ ನಿಮ್ಮನ್ನು ವಂಚಿಸಬಹುದಾಗಿದೆ. ಸಂಗಾತಿಯ ಮನಃಸ್ಥಿತಿಯನ್ನು ಅರಿತು ಇಂದು ಅವರೊಡನೆ ವ್ಯವಹರಿಸುವುದು ಉತ್ತಮ. ನಿಮ್ಮ ಮಾತುಗಳು ದುರುದ್ದೇಶದಿಂದ ಕೂಡಿದೆ ಎಂದು ನಿಮಗಾಗದವರು ಗುಲ್ಲೆಬ್ಬಿಸಬಹುದು. ಉದ್ಯೋಗಿಗಳು ಪರಿಶ್ರಮದಿಂದ ಲಾಭವನ್ನು ಪಡೆಯಬಹುದಾಗಿದೆ. ನಿಮ್ಮ ಕಾರ್ಯಗಳಿಗೆ ಪ್ರಶಂಸೆಗಳು ಸಿಗಲಿವೆ. ವ್ಯಯದಲ್ಲಿರುವ ಬುಧನು ಮಾತಿನಿಂದ ಕಂಟಕವನ್ನು ತಂದಾನು. ಗಣಪತಿಯ ಸ್ತೋತ್ರ ಪಠಿಸಿ.

ಮೀನ: ಇನ್ನೊಬ್ಬರ ಪಿತೂರಿಗೆ ನೀವು ಬಲಿಯಾಗುವಿರಿ. ಸಾಮಾಜಿಕ ವ್ಯಕ್ತಿತ್ವದಿಂದ ನೀವು ಪ್ರಸಿದ್ಧರು. ಧಾರ್ಮಿಕವಾದ ಶ್ರದ್ಧೆಯು ನಿಮಗೆ ಅನೇಕ ಅನುಕೂಲಗಳನ್ನು ಮಾಡಿಕೊಡುವುದು. ಯಾರನ್ನೋ ಮೆಚ್ಚಿಸಲು ನೀವು ನಿಮ್ಮ ಸಮಯವನ್ನು ವ್ಯಯಿಸುವಿರಿ. ಅದರಿಂದ ಯಾವ ಲಾಭವೂ ಆಗದು. ಭೂವ್ಯವಹಾರದಲ್ಲಿ ಅನುಕೂಲಕರವಾದ ಸನ್ನಿವೇಶಗಳು ಬರಬಹುದು. ಹಳೆಯದರ ನೆನಪಿನ ಜೊತೆ ದಿನವನ್ನು ಕಳೆಯಬೇಡಿ. ನಿಮ್ಮ ಕಾರ್ಯಗಳನ್ನು ಸಹೋದ್ಯೋಗಿಗಳು ಮೆಚ್ಚಬಹುದು. ನಿಮ್ಮ ಮಾತು ಖುಷಿಯನ್ನು ನೀಡುತ್ತದೆ. ವಿಶ್ವಾಸವನ್ನು ಉಳಿಸಿಕೊಳ್ಳುವ ಪ್ರಯತ್ನ ಮಾಡಿ. ಸ್ತ್ರೀಯರಿಂದ ಲಾಭವಿದೆ.

ಲೋಹಿತಶರ್ಮಾ, ಇಡುವಾಣಿ