ಬೆಂಗಳೂರು ಏರ್‌ಪೋರ್ಟ್‌ನಲ್ಲಿ ಇಂಡಿಗೋ ವಿಮಾನಕ್ಕೆ ಟೇಲ್ ಸ್ಟ್ರೈಕ್, ಲ್ಯಾಂಡಿಂಗ್ ವೇಳೆ ರನ್‌ವೇಗೆ ತಾಗಿದ ಹಿಂಭಾಗ

ಬೆಂಗಳೂರು, ಸೆಪ್ಟೆಂಬರ್ 27: ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಗುವಾಹಟಿಯಿಂದ ಬಂದ ಇಂಡಿಗೋ ವಿಮಾನ ಲ್ಯಾಂಡಿಂಗ್ ವೇಳೆ ಟೇಲ್ ಸ್ಟ್ರೈಕ್​ಗೆ ಒಳಗಾಗಿದೆ. ಭಾನುವಾರ ಸಂಜೆ ಬಲವಾದ ಗಾಳಿಯ ನಡುವೆಯೇ ವಿಮಾನ ಇಳಿಯುವಾಗ ಅದರ ಹಿಂಭಾಗ (ಟೇಲ್) ರನ್‌ವೇಗೆ ಸ್ಪರ್ಶಿಸಿರುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇಂಡಿಗೋ ಸಂಸ್ಥೆಯ ಮಾಹಿತಿ ಪ್ರಕಾರ, 6E6542 ವಿಮಾನವು ಅಸ್ಸಾಂನ ಗುವಾಹಟಿಯಿಂದ ಬೆಂಗಳೂರಿಗೆ ಆಗಮಿಸಿತ್ತು. ಮೊದಲ ಪ್ರಯತ್ನದಲ್ಲಿ ಲ್ಯಾಂಡಿಂಗ್ ಸಾಧ್ಯವಾಗದೆ, ಎರಡನೇ ಪ್ರಯತ್ನದಲ್ಲಿ ವಿಮಾನ ಸುರಕ್ಷಿತವಾಗಿ ರನ್‌ವೇ ಮೇಲೆ ಇಳಿಯಿತು.

ಪ್ರಯಾಣಿಕರೆಲ್ಲ ಸುರಕ್ಷಿತ

ಘಟನೆಯಲ್ಲಿ ಯಾವುದೇ ಪ್ರಯಾಣಿಕರು ಅಥವಾ ಸಿಬ್ಬಂದಿಗೆ ಗಾಯಗಳಾಗಿಲ್ಲ. ವಿಮಾನ ನಿಲ್ದಾಣಕ್ಕೆ ಬಂದ ನಂತರ ಎಲ್ಲ ಪ್ರಯಾಣಿಕರನ್ನು ಸುರಕ್ಷಿತವಾಗಿ ಕೆಳಗಿಳಿಸಲಾಯಿತು. ಮುನ್ನೆಚ್ಚರಿಕೆ ಕ್ರಮವಾಗಿ ವಿಮಾನವನ್ನು ತಾತ್ಕಾಲಿಕವಾಗಿ ಸೇವೆಯಿಂದ ಹೊರಗಿಟ್ಟು ತಾಂತ್ರಿಕ ಪರಿಶೀಲನೆಗೆ ಒಳಪಡಿಸಲಾಗಿದೆ. ಇಂಡಿಗೋ ಹೇಳಿಕೆಯ ಪ್ರಕಾರ, ವಿಮಾನದಲ್ಲಿ ಅಸಹಜ ರನ್‌ವೇ ಸಂಪರ್ಕ ಉಂಟಾಗಿದೆ. ವಿಮಾನಯಾನ ನಿಯಮಾವಳಿಯಂತೆ ಸಂಬಂಧಿತ ಅಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದ್ದು, ಸಂಪೂರ್ಣ ನಿರ್ವಹಣಾ ಪರಿಶೀಲನೆ ನಡೆಯುತ್ತಿದೆ.

ಟೇಲ್ ಸ್ಟ್ರೈಕ್ ಎಂದರೇನು?

ಟೇಲ್ ಸ್ಟ್ರೈಕ್ ಎಂದರೆ ವಿಮಾನ ಟೇಕ್‌ಆಫ್ ಅಥವಾ ಲ್ಯಾಂಡಿಂಗ್ ವೇಳೆ ಅದರ ಹಿಂಭಾಗದ ಭಾಗವು ರನ್‌ವೇಗೆ ತಾಗುವ ಘಟನೆ. ಇದು ಹವಾಮಾನ, ಬಲವಾದ ಗಾಳಿ ಅಥವಾ ಲ್ಯಾಂಡಿಂಗ್ ಸಮಯದ ತಾಂತ್ರಿಕ ಪರಿಸ್ಥಿತಿಗಳಿಂದ ಸಂಭವಿಸಬಹುದು. ಇಂತಹ ಘಟನೆಗಳ ಬಳಿಕ ವಿಮಾನವನ್ನು ಸಂಪೂರ್ಣ ತಾಂತ್ರಿಕ ಪರೀಕ್ಷೆಗೆ ಒಳಪಡಿಸುವುದು ಕಡ್ಡಾಯ.

ಟೇಲ್ ಸ್ಟ್ರೈಕ್ ಹೇಗೆ ಸಂಭವಿಸಬಹುದು?

ಟೇಕ್‌ಆಫ್ ವೇಳೆ ಪೈಲಟ್ ವಿಮಾನದ ಮುಂಭಾಗವನ್ನು ಬೇಗ ಮೇಲಕ್ಕೆ ಎತ್ತಿದಾಗ, ಹಿಂಭಾಗ ಕೆಳಗೆ ತಾಗುವ ಸಾಧ್ಯತೆ ಇರುತ್ತದೆ. ಲ್ಯಾಂಡಿಂಗ್ ವೇಳೆ ವಿಮಾನ ಹೆಚ್ಚು ಹಿಂಭಾಗಕ್ಕೆ ವಾಲಿದಾಗಲೂ ಈ ಘಟನೆ ಸಂಭವಿಸಬಹುದು. ರನ್‌ವೇಯ ಏರು-ಇಳಿಜಾರು ಅಥವಾ ತಾಂತ್ರಿಕ ಕಾರಣಗಳಿಂದ, ಬಲವಾದ ಗಾಳಿ ಅಥವಾ ಹವಾಮಾನ ವೈಪರೀತ್ಯದಿಂದಲೂ ಹೀಗಾಗಬಹುದು.

ಮತ್ತಷ್ಟು ಓದಿ: ಅಮೃತಸರ ವಿಮಾನ ನಿಲ್ದಾಣದ ಬಳಿ ಅನುಮಾನಾಸ್ಪದ ಡ್ರೋನ್ ಸಂಚಾರ; ದೆಹಲಿಯತ್ತ ತಿರುಗಿದ 7 ವಿಮಾನಗಳು

ಡಿಜಿಸಿಎ ತನಿಖೆ ಸಾಧ್ಯತೆ

ಕೆಲವು ಮಾಧ್ಯಮ ವರದಿಗಳ ಪ್ರಕಾರ, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಈ ಘಟನೆಯ ಕುರಿತು ಮಾಹಿತಿ ಪಡೆದು ತನಿಖೆ ಆರಂಭಿಸುವ ಸಾಧ್ಯತೆ ಇದೆ. ತನಿಖೆ ಪೂರ್ಣಗೊಂಡ ಬಳಿಕ ಘಟನೆಯ ನಿಖರ ಕಾರಣ ತಿಳಿಯಲಿದೆ.

ಈ ತಿಂಗಳಲ್ಲೇ ಮತ್ತೊಂದು ಇಂಡಿಗೋ ಘಟನೆ

ಈ ತಿಂಗಳ ಆರಂಭದಲ್ಲಿ ಶ್ರೀನಗರ ವಿಮಾನ ನಿಲ್ದಾಣದಲ್ಲಿ ಇಂಡಿಗೋ ವಿಮಾನ ಪಾರ್ಕಿಂಗ್ ವೇಳೆ ವಿಷುಯಲ್ ಡಾಕಿಂಗ್ ಗೈಡೆನ್ಸ್ ಸಿಸ್ಟಮ್ (VDGS) ಕಂಬಕ್ಕೆ ಡಿಕ್ಕಿ ಹೊಡೆದ ಘಟನೆ ಕೂಡ ನಡೆದಿತ್ತು. ಆ ಸಂದರ್ಭದಲ್ಲೂ ಎಲ್ಲಾ ಪ್ರಯಾಣಿಕರು ಮತ್ತು ಸಿಬ್ಬಂದಿ ಸುರಕ್ಷಿತರಾಗಿದ್ದರು.

ಕರ್ನಾಟಕದ ಇತರೆ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 7:46 am, Mon, 28 September 26