ಬೆಂಗಳೂರಿನಲ್ಲಿ 3 ದಿನ ಡ್ರೈ ಡೇ ಘೋಷಣೆ: ಜಿಲ್ಲಾಧಿಕಾರಿ ಆದೇಶಕ್ಕೆ ಬಾರ್, ಹೋಟೆಲ್ ಉದ್ಯವಿಗಳು ಆಕ್ಷೇಪ

ಬೆಂಗಳೂರು, ಅಕ್ಟೋಬರ್​​ 16: ಬೆಂಗಳೂರಿನಲ್ಲಿ ಶಿಕ್ಷಕರ ಹಾಗೂ ಆಗ್ನೇಯ ಪದವೀಧರ ಕ್ಷೇತ್ರ ಚುನಾವಣೆಯ ಕಾವು ಜೋರಾಗಿದೆ. ಹೀಗಿರುವಾಗ ಬಾರ್, ಹೋಟೆಲ್, ರೆಸ್ಟೋರೆಂಟ್​​​ ಉದ್ಯಮಕ್ಕೆ ಇದೀಗ ಚುನಾವಣೆಯ ಎಫೆಕ್ಟ್ ತಟ್ಟಿದೆ.​​ ಬೆಂಗಳೂರು ನಗರ ಜಿಲ್ಲಾಧಿಕಾರಿ ಅಕ್ಟೋಬರ್​​​ 21, 23 ಮತ್ತು 27ರಂದು ಡ್ರೈ ಡೇ ಎಂದು ಘೋಷಿಸಿದ್ದು, ಎಣ್ಣೆ ಪ್ರಿಯರಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.

ಡ್ರೈ ಡೇ ಘೋಷಣೆ

ಬೆಂಗಳೂರು ಶಿಕ್ಷಕರ ಕ್ಷೇತ್ರ ಮತ್ತು ಆಗ್ನೇಯ ಪದವೀಧರ ಕ್ಷೇತ್ರದ ವಿಧಾನ ಪರಿಷತ್ ಚುನಾವಣೆ ಹಿನ್ನೆಲೆಯಲ್ಲಿ ಬೆಂಗಳೂರು ನಗರ ಜಿಲ್ಲಾಧಿಕಾರಿ ಡ್ರೈ ಡೇ ಘೋಷಿಸಿ ಆದೇಶ ಹೊರಡಿಸಿದ್ದಾರೆ. ಆದೇಶದ ಪ್ರಕಾರ ಅಕ್ಟೋಬರ್ 21ರ ಸಂಜೆ 4 ಗಂಟೆಯಿಂದ ಅಕ್ಟೋಬರ್ 23ರ ಸಂಜೆ 4 ಗಂಟೆಯವರೆಗೆ ಹಾಗೂ ಮತ ಎಣಿಕೆ ಪ್ರಯುಕ್ತ ಅಕ್ಟೋಬರ್ 27 ರಂದು ಬೆಳಗ್ಗೆ 6 ಗಂಟೆಯಿಂದ ಮಧ್ಯರಾತ್ರಿ 12 ಗಂಟೆಯವರೆಗೆ ಮದ್ಯ ಮಾರಾಟ ನಿಷೇಧಿಸಲಾಗಿದೆ. ಈ ಆದೇಶ ಬೆಂಗಳೂರು ನಗರ ಜಿಲ್ಲೆಯಾದ್ಯಂತ ಅನ್ವಯವಾಗಲಿದ್ದು, ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಯನ್ನು ಇದರಿಂದ ಹೊರಗಿಡಲಾಗಿದೆ.

500 ಕೋಟಿ ರೂ.ವರೆಗೆ ನಷ್ಟ?

ಜಿಲ್ಲಾಧಿಕಾರಿಗಳ ಈ ಆದೇಶ ವಿರುದ್ಧ ಬಾರ್, ಹೋಟೆಲ್ ಮತ್ತು ರೆಸ್ಟೋರೆಂಟ್ ವಲಯ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ. ಚುನಾವಣೆ ಅವಧಿಯಲ್ಲಿ ಸುಮಾರು 3-4 ದಿನಗಳ ಕಾಲ ಮದ್ಯ ಮಾರಾಟ ನಿಷೇಧದಿಂದಾಗಿ ಉದ್ಯಮ ಹಾಗೂ ಅಬಕಾರಿ ಇಲಾಖೆಗೆ ಸುಮಾರು 500 ಕೋಟಿ ರೂ.ವರೆಗೆ ನಷ್ಟಯುಂಟಾಗುವ ಆತಂಕವನ್ನು ಉದ್ಯಮಿಗಳು ವ್ಯಕ್ತಪಡಿಸಿದ್ದಾರೆ.

ಮದ್ಯಪ್ರಿಯರು ಬೇಸರ 

‘ಕೇವಲ 20 ಸಾವಿರ ಸೀಮಿತ ಮತದಾರರಿರುವ ಶಿಕ್ಷಕರು ಮತ್ತು ಪದವೀಧರರ ಕ್ಷೇತ್ರದ ಚುನಾವಣೆಗೆ ಇಷ್ಟು ದೊಡ್ಡ ಮಟ್ಟದಲ್ಲಿ ಡ್ರೈ ಡೇ ಘೋಷಣೆ ಮಾಡುವ ಅಗತ್ಯವಿಲ್ಲ’ ಎನ್ನುವುದು ಹೋಟೆಲ್ ಉದ್ಯಮದವರ ವಾದ. ಇನ್ನು ಮದ್ಯಪ್ರಿಯರು ಕೂಡ ಎಣ್ಣೆ ಅಲಭ್ಯತೆಗೆ ಬೇಸರ ಹೊರಹಾಕಿದ್ದಾರೆ.

ಇದನ್ನೂ ಓದಿ: ಪುಟ್ಟಣ್ಣ ಪರ ಸರ್ಕಾರಿ ಅಧಿಕಾರಿಗಳಿಂದ ಪ್ರಚಾರ ಆರೋಪ: ಚುನಾವಣಾಧಿಕಾರಿಗೆ ದೂರು; ಅಧಿಕಾರಿಗಳ ಅಮಾನತಿಗೆ ಛಲವಾದಿ ಆಗ್ರಹ

ಒಟ್ಟಿನಲ್ಲಿ ಜಿಲ್ಲಾಧಿಕಾರಿಗಳ ಆದೇಶವನ್ನು ಮರುಪರಿಶೀಲನೆ ಮಾಡುವಂತೆ ಹೋಟೆಲ್ ಮತ್ತು ರೆಸ್ಟೋರೆಂಟ್ ಉದ್ಯಮ ಆಗ್ರಹಿಸಿದೆ. ಈ ಸಂಬಂಧ ಅಬಕಾರಿ ಸಚಿವರು, ಡಿಜಿ ಮತ್ತು ಐಜಿಪಿ ಹಾಗೂ ಬೆಂಗಳೂರು ನಗರ ಪೊಲೀಸ್ ಕಮಿಷನರ್ ಡಾ. ಎಂ. ಎ. ಸಲೀಂ ಅವರಿಗೆ ಪತ್ರದ ಮೂಲಕ ಮನವಿ ಸಲ್ಲಿಸಲಾಗಿದೆ. ‘ಸೀಮಿತ ಮತದಾರರಿರುವ ಚುನಾವಣೆಗೆ ವ್ಯಾಪಕ ನಿಷೇಧ ಹೇರುವುದರಿಂದ ವ್ಯಾಪಾರ ವಹಿವಾಟಿಗೆ ಹೊಡೆತ ಬೀಳಲಿದ್ದು, ಆದೇಶವನ್ನು ಹಿಂಪಡೆಯಬೇಕು ಅಥವಾ ಸಡಿಲಗೊಳಿಸಬೇಕು ಎಂದು ಉದ್ಯಮದವರು ಒತ್ತಾಯಿಸಿದ್ದಾರೆ.’ ಸರ್ಕಾರ ಏನು ನಿರ್ಧಾರ ಕೈಗೊಳ್ಳುತ್ತೆ ಅನ್ನೋದನ್ನ ಕಾದುನೋಡಬೇಕಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.