ಫೇಸ್​​ಬುಕ್​​ ಗೆಳೆಯನ ವಂಚನೆ ಜಾಲಕ್ಕೆ ಸಿಲುಕಿ 1.7 ಕೋಟಿ ರೂಪಾಯಿ ಕಳೆದುಕೊಂಡ ವಿಚ್ಛೇದಿತ ಮಹಿಳೆ

ಬೆಂಗಳೂರು, ಜುಲೈ 28: ಸೈಬರ್​​ ವಂಚನೆ (Cyber Fraud) ದಿನಕ್ಕೊಂದು ರೂಪ ಪಡೆಯುತ್ತಿರುವ ನಡುವೆ ವಿಚ್ಚೇದಿತ ಮಹಿಳೆಯರನ್ನ ಟಾರ್ಗೆಟ್ ಮಾಡಿ ದೋಖಾ ಎಸಗುತ್ತಿರುವ ಘಟನೆ ಬೆಂಗಳೂರಿನಲ್ಲಿ (Bengaluru) ಬೆಳಕಿಗೆ ಬಂದಿದೆ. ಫೇಸ್‌ಬುಕ್ ಸ್ನೇಹಿತನ ಬಲೆಗೆ‌ಬಿದ್ದು ಯಶವಂತಪುರದ ಮಹಿಳೆಯೋರ್ವರು 1.7 ಕೋಟಿ ರೂಪಾಯಿ ಕಳೆದುಕೊಂಡಿದ್ದು, ಮೋಸ ಹೋಗಿರೋದು ಅರಿವಾಗುತ್ತಿದ್ದಂತೆ ಈ ಸಂಬಂಧ ಉತ್ತರ ವಿಭಾಗ ಸೈಬರ್ ಠಾಣೆಗೆ ಪೊಲೀಸ್​​ ಠಾಣೆಗೆ ದೂರು ನೀಡಿದ್ದಾರೆ.

ಗಿಫ್ಟ್​​ಗಳ ಫೋಟೋ ಹಂಚಿಕೊಂಡಿದ್ದ ಆರೋಪಿ

ಗಂಡನಿಂದ ದೂರುವಾಗಿದ್ದ ಯಶವಂತಪುರದ ಮಹಿಳೆಗೆ ಫೇಸ್​​ಬುಕ್​​ನಲ್ಲಿ ಪರಿಚಯವಾಗಿದ್ದ ವ್ಯಕ್ತಿಯೋರ್ವ ತಾನು ಯುಕೆ ಉದ್ಯೋಗಿ ಎಂದು ಪರಿಚಯಿಸಿಕೊಂಡಿದ್ದ. ಬಳಿಕ ಇಬ್ಬರ ನಡುವೆ ಸ್ನೇಹ ಬೆಳೆದು ಪರಸ್ಪರ ಮೊಬೈಲ್​​ ನಂಬರ್​​ ಬದಲಾಯಿಸಿಕೊಂಡಿದ್ದರು. ಇದು ವಾಟ್ಸ್ಯಾಪ್​​ ಚಾಟ್​​ ಹಂತಕ್ಕೂ ಹೋಗಿತ್ತು. ಈ ನಡುವೆ ಯುಕೆಯಿಂದ ಚಿನ್ನ, ಡೈಮಂಡ್​​ ಸೀರೆ ಮತ್ತು ಗಿಫ್ಟ್​​ಗಳನ್ನು ಮಹಿಳೆಗೆ ಕಳುಹಿಸೋದಾಗಿ ಆರೋಪಿ ಆಸೆ ಹುಟ್ಟಿಸಿದ್ದ. ಉಡುಗೊರೆಗಳ ಫೋಟೋಗಳನ್ನು ಕೂಡ ಆಕೆಯ ಜೊತೆ ಹಂಚಿಕೊಂಡಿದ್ದ. ತನ್ನ ಮಾತಿನ ಬಗ್ಗೆ ಆಕೆಗೆ ನಂಬಿಕೆ ಬರುವಂತೆ ಮಾಡಲು ನಕಲಿ ಕೊರಿಯರ್​​ ರಸೀದಿಗಳನ್ನೂ ಕಳುಹಿಸಿದ್ದ ಎನ್ನಲಾಗಿದೆ.

ಇದನ್ನೂ ಓದಿ: ಆನ್​​ಲೈನ್​​ ವಂಚನೆ; ಮೊಬೈಲ್, ಸಿಮ್​​ ಬದಲಿಸಿಯೂ 48.5 ಲಕ್ಷ ಕಳೆದುಕೊಂಡ ಖಾಸಗಿ ಸಂಸ್ಥೆಯ ಉದ್ಯೋಗಿ

ದೆಹಲಿಯಲ್ಲಿ ಕಸ್ಟಮ್ಸ್​​ನಲ್ಲಿ ಗಿಫ್ಟ್ ಗಳಿದ್ದು, ಅವುಗಳನ್ನು ರಿಲೀಸ್ ಮಾಡಲು ಹಣಪಾವತಿ ಮಾಡಬೇಕು. ಆದರೆ ತನ್ನ ಬಳಿ ಇಂಡಿಯನ್‌ ಕರೆನ್ಸಿ ಇಲ್ಲ. ಹೀಗಾಗಿ ಭಾರತಕ್ಕೆ ಬಂದ ಮೇಲೆ ಹಣ ನೀಡುತ್ತೇನೆ ಎಂದು ಮಹಿಳೆಗೆ ಆರೋಪಿ ತಿಳಿಸಿದ್ದ. ಆ ಬಳಿಕ ಕಸ್ಟಮ್ಸ್ ಅಧಿಕಾರಿ ಹೆಸರಿನಲ್ಲಿ ಮಹಿಳೆಗೆ ದೂರವಾಣಿ ಕರೆ ಬಂದಿದ್ದು, ಆ ಸಂದರ್ಭ 40 ಲಕ್ಷ ರೂಪಾಯಿ ಹಣವನ್ನು RTGS ಮೂಲಕ ಮಹಿಳೆ ಪಾವತಿಸಿದ್ದಳು. ಬ್ಯಾಂಕ್ ವರ್ಗಾವಣೆ ಮಾತ್ರವಲ್ಲದೆ, ಖುದ್ದಾಗಿ ಬಂದು ವಂಚಕರು ನಗದು ಸಂಗ್ರಹಿಸಿದ್ದರು. ಪದೇ ಪದ ಈ ರೀತಿಯಲ್ಲಿ ಸೈಬರ್ ವಂಚಕರು ಹಣ ಸಂಗ್ರಹ ಮಾಡಲು ಆರಂಭಿಸಿದಾಗ ಅನುಮಾನಗೊಂಡು ಮಹಿಳೆ ಯುಕೆ ವ್ಯಕ್ತಿಗೆ ಕರೆ ಮಾಡಿದ್ದಾಳೆ. ಆ ವೇಳೆ ಆತನ ನಂಬರ್​​ ಸ್ವಿಚ್ ಆಫ್ ಬಂದಿದೆ. ತಾನು ಮೋಸ ಹೋಗಿದ್ದು ಅರಿವಾಗುತ್ತಿದ್ದಂತೆ ಈ ಸಂಬಂಧ ಮಹಿಳೆ ಪೊಲೀಸ್​​ ಠಾಣೆ ಮೆಟ್ಟಿಲೇರಿದ್ದಾಳೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.

Published On - 11:43 am, Tue, 28 July 26