ತೆಲಂಗಾಣಕ್ಕೆ ಕೃಷ್ಣಾ ನದಿಯಿಂದ ನೀರು: ರೈತರ ಸಂಕಷ್ಟಕ್ಕೆ ಸ್ಪಂದಿಸಿದ ಕರ್ನಾಟಕ ಸರ್ಕಾರ!

ಬೆಂಗಳೂರು, ಸೆಪ್ಟೆಂಬರ್ 23: ತಮಿಳುನಾಡಿಗೆ ಕಾವೇರಿ ನೀರು ಹರಿಸುವ ವಿಚಾರವಾಗಿ ಕರ್ನಾಟಕ ಸಂಕಷ್ಟಕ್ಕೆ ಸಿಲುಕಿದೆ. ಈ ನಡುವೆ ತೆಲಂಗಾಣಕ್ಕೆ ಕೃಷ್ಣಾ ನದಿಯಿಂದ ನೀರು ಹರಿಸುವುದಾಗಿ ಸಿಎಂ ಡಿಕೆ ಶಿವಕುಮಾರ್ ಭರವಸೆ ನೀಡಿದ್ದಾರೆ. ತೆಲಂಗಾಣದ ರಾಯಚೂರು ಗಡಿ ಭಾಗದ ಜುರಾಲಾ ಯೋಜನೆಗೆ ಕೃಷ್ಣಾ ನದಿಯಿಂದ ಅಗತ್ಯ ನೀರು ಹರಿಸುವುದಾಗಿ ಕರ್ನಾಟಕ ಸರ್ಕಾರ ಭರವಸೆ ನೀಡಿದ ಬೆನ್ನಲ್ಲೇ, ತೆಲಂಗಾಣದ ನೀರಾವರಿ ಇಲಾಖೆ ಅಧಿಕಾರಿಗಳು ಜುರಾಲಾ ಯೋಜನೆಯ ಗೇಟ್‌ಗಳನ್ನು ತೆರೆದು ರೈತರ ಬೆಳೆಗೆ ನೀರು ಹರಿಸಲು ಕ್ರಮ ಕೈಗೊಂಡಿದ್ದಾರೆ ಎಂದು ದಿ ನ್ಯೂ ಇಂಡಿಯನ್ ಎಕ್ಸ್​ಪ್ರೆಸ್ ವರದಿ ಮಾಡಿದೆ.

ತೆಲಂಗಾಣ ನಿಯೋಗದ ಮನವಿಗೆ ಕರ್ನಾಟಕ ಧನಾತ್ಮಕ ಸ್ಪಂದನೆ

ಉಮ್ಮಡು ಮಹಬೂಬ್‌ನಗರ ಜಿಲ್ಲೆಯ ರೈತರ ಬೆಳೆಗಳು ಒಣಗುತ್ತಿರುವ ಹಿನ್ನೆಲೆಯಲ್ಲಿ ಹಾಗೂ ಕುಡಿಯುವ ನೀರಿನ ತೊಂದರೆ ನೀಗಿಸಲು 5 ಟಿ.ಎಂ.ಸಿ ನೀರನ್ನು ಹಂತ-ಹಂತವಾಗಿ ಹರಿಸುವಂತೆ ತೆಲಂಗಾಣ ಮುಖ್ಯಮಂತ್ರಿ ಎ. ರೇವಂತ್ ರೆಡ್ಡಿ ಅವರು ಕರ್ನಾಟಕ ಸಿಎಂ ಡಿ.ಕೆ. ಶಿವಕುಮಾರ್ ಅವರಲ್ಲಿ ದೂರವಾಣಿ ಮೂಲಕ ಮನವಿ ಮಾಡಿದ್ದರು.

ಅಲ್ಲದೆ, ತೆಲಂಗಾಣ ಸಚಿವರಾದ ಜೂಪಲ್ಲಿ ಕೃಷ್ಣಾರಾವ್, ವಾಕಿಟಿ ಶ್ರೀಹರಿ ಮತ್ತು ಶಾಸಕರನ್ನೊಳಗೊಂಡ ನಿಯೋಗ ಬೆಂಗಳೂರಿಗೆ ಆಗಮಿಸಿ ಡಿ.ಕೆ. ಶಿವಕುಮಾರ್ ಅವರನ್ನು ಭೇಟಿಯಾಗಿ ಮನವಿ ಪತ್ರ ಸಲ್ಲಿಸಿತ್ತು. ತೆಲಂಗಾಣದ ಸಂಕಷ್ಟ ಹಾಗೂ ರೈತರ ಹಿತದೃಷ್ಟಿಯನ್ನು ಪರಿಗಣಿಸಿದ ಕರ್ನಾಟಕ ಸರ್ಕಾರ, ನಾರಾಯಣಪುರ ಜಲಾಶಯದಿಂದ ನೀರನ್ನು ಜುರಾಲಾಯೋಜನೆಗೆ ಹಂತ-ಹಂತವಾಗಿ ಬಿಡುಗಡೆ ಮಾಡಲು ಸ್ಪಂದಿಸಿದೆ.

ಕೃಷಿ ಚಟುವಟಿಕೆಗೆ ಚಾಲನೆ

ಕರ್ನಾಟಕದಿಂದ ನೀರು ಹರಿಯುವ ಖಾತರಿ ಸಿಗುತ್ತಿದ್ದಂತೆಯೇ, ತೆಲಂಗಾಣದ ಜುರಾಲಾ ಯೋಜನೆಯಿಂದ ಬಲದಂಡೆ ನಾಲೆ ಹಾಗೂ ಕಾಲುವೆಗಳಿಗೆ ನೀರು ಹರಿಸಲು ಸ್ಥಳೀಯ ಅಧಿಕಾರಿಗಳು ಚಾಲನೆ ನೀಡಿದ್ದಾರೆ. ಈ ನೀರು ಬಿಡುಗಡೆಯಿಂದ ಕೇವಲ ಕೃಷಿ ಬೆಳೆಗಳಿಗೆ ಮಾತ್ರವಲ್ಲದೆ, ಪಾಲಮೂರು ಮತ್ತು ಸೀಮೆ ಭಾಗದ ಗ್ರಾಮಗಳಿಗೆ ಕುಡಿಯುವ ನೀರಿನ ಪೂರೈಕೆಗೂ ಆಸರೆಯಾಗಲಿದೆ. ಕಳೆದ ಕೆಲವು ದಿನಗಳಿಂದ ಬೆಳೆಗಳು ಒಣಗುತ್ತವೆ ಎಂಬ ಆತಂಕದಲ್ಲಿದ್ದ ತೆಲಂಗಾಣದ ಗಡಿ ಭಾಗದ ರೈತರಿಗೆ ಎರಡೂ ರಾಜ್ಯಗಳ ಈ ಜಂಟಿ ನಿರ್ಧಾರದಿಂದ ಭಾರಿ ನಿರಾಳತೆ ಮೂಡಿದೆ.

ಜುರಾಲಾ ಯೋಜನೆ ಏನು?

ಜುರಾಲಾ ಯೋಜನೆಯು (ಪ್ರಿಯದರ್ಶಿನಿ ಜುರಾಲಾ ಯೋಜನೆ) ತೆಲಂಗಾಣದ ಮಹಬೂಬ್‌ನಗರ ಜಿಲ್ಲೆಯ ಕುರುಕುಂಡ ಗ್ರಾಮದ ಬಳಿ ಕೃಷ್ಣಾ ನದಿಗೆ ಅಡ್ಡಲಾಗಿ ನಿರ್ಮಿಸಲಾಗಿರುವ ಪ್ರಮುಖ ನೀರಾವರಿ ಆಣೆಕಟ್ಟು ಯೋಜನೆಯಾಗಿದೆ. ಕರ್ನಾಟಕದ ಗಡಿಯಿಂದ ತೆಲಂಗಾಣಕ್ಕೆ ಪ್ರವೇಶಿಸುವ ಕೃಷ್ಣಾ ನದಿಯ ಮೇಲೆ ನಿರ್ಮಿಸಲಾದ ಮೊದಲ ಪ್ರಮುಖ ಜಲಾಶಯ ಇದಾಗಿದೆ.

ಈ ಯೋಜನೆಯು ಕೃಷಿಗೆ ನೀರಾವರಿ ಸೌಲಭ್ಯ ಕಲ್ಪಿಸುವುದಲ್ಲದೆ, ಕೃಷ್ಣಾ ನದಿ ನೀರನ್ನು ಬಳಸಿಕೊಂಡು ಜಲವಿದ್ಯುತ್ ಉತ್ಪಾದನೆ ಮತ್ತು ಸುತ್ತಮುತ್ತಲಿನ ಒಣ ಭೂಮಿ ಪ್ರದೇಶಗಳಿಗೆ ಕುಡಿಯುವ ನೀರು ಪೂರೈಸುವ ಪ್ರಮುಖ ಉದ್ದೇಶವನ್ನು ಹೊಂದಿದೆ. ನಾರಾಯಣಪುರ ಜಲಾಶಯದಿಂದ ಬಿಡುಗಡೆಯಾಗುವ ನೀರು ಜುರಾಲಾ ಯೋಜನೆಗೆ ಹರಿದುಬಂದು, ತೆಲಂಗಾಣದ ಪಾಲಮೂರು ಮತ್ತು ಗಡಿ ಭಾಗದ ಸಾವಿರಾರು ಎಕರೆ ಕೃಷಿ ಭೂಮಿಗೆ ಹಾಗೂ ಗ್ರಾಮಗಳಿಗೆ ಜಲಸಂಪನ್ಮೂಲವಾಗಿ ನೆರವಾಗುತ್ತದೆ.

ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ