ಮಕ್ಕಳಿಗೆ ಶಿಫ್ಟ್ ಮಾದರಿಯಲ್ಲಿ ಪಾಠ: ರಾಯಚೂರಿನ ಸರ್ಕಾರಿ ಶಾಲೆಗೆ ಇದೆಂಥಾ ಸ್ಥಿತಿ ನೋಡಿ

ರಾಯಚೂರು, ಸೆಪ್ಟೆಂಬರ್​​ 23: ಖಾಸಗಿ ಕಂಪನಿಗಳಲ್ಲಿ ಉದ್ಯೋಗಿಗಳಿಗೆ ಶಿಫ್ಟ್ ಆಧಾರದ ಮೇಲೆ ಕೆಲಸ ಇರುವುದನ್ನು ಕಂಡಿದ್ದೇವೆ. ಆದರೆ, ರಾಯಚೂರಿನ ಸರ್ಕಾರಿ ಶಾಲೆಯೊಂದರಲ್ಲಿ ಕಟ್ಟಡದ ಕೊರತೆಯಿಂದಾಗಿ ವಿದ್ಯಾರ್ಥಿಗಳಿಗೆ ಶಿಫ್ಟ್ ಮಾದರಿಯಲ್ಲಿ ತರಗತಿಗಳನ್ನು ನಡೆಸಲಾಗುತ್ತಿದೆ. ಇದೀಗ ಕೊಠಡಿಗಳ ಕೊರತೆಯ ನೆಪವೊಡ್ಡಿ ಅಲ್ಲಿನ ವಿದ್ಯಾರ್ಥಿಗಳನ್ನು ಬೇರೆ ಶಾಲೆಗೆ ಸ್ಥಳಾಂತರಿಸಲು ಶಿಕ್ಷಣ ಇಲಾಖೆ ಮುಂದಾಗಿದ್ದು, ಪೋಷಕರು ಮತ್ತು ಗ್ರಾಮಸ್ಥರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.

ವರ್ಷಗಳೇ ಕಳೆದರೂ ಆರಂಭವಾಗದ ಹೊಸ ಶಾಲಾ ಕಟ್ಟಡ

ರಾಯಚೂರು ನಗರದ ಅಸ್ಕಿಹಾಳ ವಾರ್ಡ್​​ನಲ್ಲಿ ಕಳೆದ ದಶಕಗಳಿಂದ ಪ್ರಾಥಮಿಕ ಹಾಗೂ ಪ್ರೌಢ ಸರ್ಕಾರಿ ಶಾಲೆ ಇದೆ. ಕಳೆದ ಒಂದುವರೆ ವರ್ಷದ ಹಿಂದೆ ಅಸ್ಕಿಹಾಳದ ಪ್ರಾಥಮಿಕ ಶಾಲಾ ಕಟ್ಟಡ ಹಾಳಾಗಿತ್ತು. ಹೀಗಾಗಿ ಆ ಕಟ್ಟಡವನ್ನ ನೆಲಸಮ ಮಾಡಿ, ಹೊಸ ಕಟ್ಟಡ ಕಟ್ಟಿಸುವುದಾಗಿ ಶಿಕ್ಷಣ ಇಲಾಖೆ ಅಧಿಕಾರಿಗಳು ಹೇಳಿದ್ದರು.  ಆದರೆ ಒಂದುವರೆ ವರ್ಷ ಕಳೆದರೂ ಹೊಸ ಕಟ್ಟಡದ ಕಾಮಗಾರಿಯೇ ಆರಂಭವಾಗಿಲ್ಲ.

ಶಿಫ್ಟ್ ಮಾದರಿಯಲ್ಲಿ ತರಗತಿಗಳು 

ಶಾಲಾ ಕೋಣೆಗಳ ಸಮಸ್ಯೆ ಇರುವುದರಿಂದ ಬೆಳಿಗ್ಗೆ 7.45 ರಿಂದ ಮಧ್ಯಾಹ್ನ 12-45ರವರೆಗೆ ಪ್ರೌಢ ಶಾಲೆ ಮಕ್ಕಳಿಗೆ ಪಾಠ ಮಾಡಲಾಗುತ್ತಿದೆ. ಆ ಬಳಿಕ 12.45 ರಿಂದ ಸಂಜೆ 5 ವರೆಗೆ ಪ್ರಾಥಮಿಕ ಶಾಲಾ ಮಕ್ಕಳಿಗೆ ಪಾಠ ಮಾಡಲಾಗುತ್ತಿದೆ. ಒಂದುವರೆ ವರ್ಷದಿಂದ ಶಿಕ್ಷಣ ಇಲಾಖೆ, ಜಿಲ್ಲಾಡಳಿತ ನಿರ್ಲಕ್ಷ ವಹಿಸಿದ್ದಕ್ಕಾಗಿ ಇಲ್ಲಿನ ಮಕ್ಕಳು ಪರದಾಡುವ ಸ್ಥಿತಿಬಂದಿದೆ.

ಇದನ್ನೂ ಓದಿ: ಕಲ್ಯಾಣ ಕರ್ನಾಟಕದಲ್ಲಿ ಅಪೌಷ್ಟಿಕತೆ: 5 ವರ್ಷದೊಳಗಿನ ಶೇ 40ಕ್ಕೂ ಹೆಚ್ಚು ಮಕ್ಕಳ ತೂಕ ಕಡಿಮೆ

ಇದೀಗ ಮತ್ತೊಂದು ಹೆಜ್ಜೆ ಮುಂದೆ ಹೋಗಿರುವ ಶಿಕ್ಷಣ ಇಲಾಖೆ ಅಧಿಕಾರಿಗಳು ಏಕಾಏಕಿ ಪ್ರೌಢ ಶಾಲೆ ವಿದ್ಯಾರ್ಥಿಗಳನ್ನ ನಗರದ ಮತ್ತೊಂದು ಸರ್ಕಾರಿ ಶಾಲೆಗೆ ಶಿಫ್ಟ್ ಮಾಡಲು ಮುಂದಾಗಿದ್ದರು. ಇದು ಅಸ್ಕಿಹಾಳ ಗ್ರಾಮಸ್ಥರು, ಶಿಕ್ಷಣ ಪ್ರೇಮಿಗಳು ಮತ್ತು ಪೋಷಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಶಾಲೆ ಮುಚ್ಚುವ ಹುನ್ನಾರ ಎಂದ ಪೋಷಕರು

ಎಸ್​ಡಿಎಂಸಿ ಕಮಿಟಿ ಸಭೆ ನಡೆಸದೇ ಏಕಾಏಕಿ ಬಿಇಓ, ಡಿಡಿಪಿಐ ಇಲ್ಲಿನ ಮಕ್ಕಳನ್ನ ಬೇರೆ ಸರ್ಕಾರಿ ಶಾಲೆಗೆ ಸ್ಥಳಾಂತರಕ್ಕೆ ಮುಂದಾಗಿರುವುದಕ್ಕೆ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಇದು ತಾತ್ಕಾಲಿಕವಾಗಿ ಶಿಫ್ಟಿಂಗ್ ಕೆಲಸ ಅಲ್ಲ, ಶಾಶ್ವತವಾಗಿ ಅಸ್ಕಿಹಾಳ ಪ್ರೌಢ ಶಾಲೆ ಮುಚ್ಚುವ ಹುನ್ನಾರ ಎನ್ನುವುದು ಪೋಷಕರ ಆರೋಪ.

ಶಾಶ್ವತವಾಗಿ ಶಿಫ್ಟ್ ಮಾಡುತ್ತಿಲ್ಲ ಎಂದ ಡಿಡಿಪಿಐ 

‘ರಾಜ್ಯದಲ್ಲಿ ಶಿಕ್ಷಕರ ಕೊರತೆ ಇದೆ. ಇತ್ತ ರಾಯಚೂರಿನಲ್ಲೂ ಶಿಕ್ಷಕರ ಕೊರತೆ ಇದೆ. ಆದರೆ ಶಿಕ್ಷಕರ ಕೊರತೆ ಹಾಗೂ ಕಟ್ಟಡದ ಸಮಸ್ಯೆ ನೆಪದಲ್ಲಿ ಶಾಶ್ವತವಾಗಿ ಇಲ್ಲಿನ ಪ್ರೌಢ ಶಾಲೆ ಮಕ್ಕಳನ್ನ ಬೇರೆಡೆ ಶಿಫ್ಟ್ ಮಾಡಲಾಗುತ್ತಿದೆ. ಆ ಮೂಲಕ ಈ ಪ್ರೌಢ ಶಾಲೆಯನ್ನ ಶಾಶ್ವತವಾಗಿ ಮುಚ್ಚಲಾಗತ್ತೆ. ಇದು ಶಿಕ್ಷಕರ ಕೊರತೆ, ಕಟ್ಟಡಗಳ ಕೊರತೆ ಸಮಸ್ಯೆಗಳನ್ನ ಮರೆಮಾಚಲು ನಡೆಸುತ್ತಿರುವ ತಂತ್ರ. ಹೊಸ ಕಟ್ಟಡಕ್ಕೆ ಒಂದು ಕೋಟಿ ರೂ ಅನುದಾನ ಬಂದಿದೆ ಎಂದಿದ್ದಾರೆ. ಹೀಗಿರುವಾಗ ಮತ್ತೆ ಏಕೆ ಮಕ್ಕಳನ್ನ ಶಿಫ್ಟ್ ಮಾಡುತ್ತಿದ್ದೀರಿ’ ಎನ್ನುವುದು ಪೋಷಕರ ವಾದ. ‘ಆದರೆ ಇದು ತಾತ್ಕಾಲಿಕ ಶಿಫ್ಟಿಂಗ್, ಶಾಶ್ವತವಾಗಿ ಶಿಫ್ಟ್ ಮಾಡುತ್ತಿಲ್ಲ’ ಎಂದು ಡಿಡಿಪಿಐ ಮಲ್ಲಿಕಾರ್ಜುನ್ ಸ್ಪಷ್ಟನೆ ನೀಡಿದ್ದಾರೆ.

ಇದನ್ನೂ ಓದಿ: ರಾಯಚೂರು: 350 ವಿದ್ಯಾರ್ಥಿಗಳಿಗೆ ಒಬ್ಬರೇ ಕಾಯಂ ಶಿಕ್ಷಕ!

ಸದ್ಯ ಅಸ್ಕಿಹಾಳ ಶಾಲಾ ಮಕ್ಕಳನ್ನ ಬೇರೆಡೆ ಶಿಫ್ಟ್ ಮಾಡುತ್ತಿರುವುದು ವಿವಾದಕ್ಕೆ ಕಾರಣವಾಗಿದ್ದು, ಗ್ರಾಮಸ್ಥರು, ಪೋಷಕರು ಸಲಹೆ ನೀಡಿದಂತೆ ಹೊಸ ಕಟ್ಟಡವಾಗುವವರೆಗೆ ತಾತ್ಕಾಲಿಕ ಶೆಡ್ ನಿರ್ಮಿಸಬೇಕಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.

Published On - 6:16 pm, Wed, 23 September 26