ಡೋರ್, ಗ್ಯಾಸ್‌ ಮತ್ತೆ ಮತ್ತೆ ಪರಿಶೀಲಿಸುತ್ತೀರಾ?: ನಿಮಗೂ ಒಸಿಡಿ ಇದ್ದರೆ ಇಲ್ಲಿ ಒಮ್ಮೆ ಗಮನಿಸಿ

ಮನೆಯಿಂದ ಹೊರಗೆ ಹೋಗುವಾಗ ಬಾಗಿಲು ಲಾಕ್‌ ಮಾಡಿದ್ದೀರಾ ಎಂದು ಒಮ್ಮೆ ಪರಿಶೀಲಿಸುವುದು, ಗ್ಯಾಸ್‌ (Gas) ಒಲೆಯನ್ನು ಆರಿಸಿದ್ದೀರಾ ಎಂದು ನೋಡುವುದು ಸಾಮಾನ್ಯ ಅಭ್ಯಾಸ. ಸುರಕ್ಷತೆಗಾಗಿ ಇಂತಹ ಪರಿಶೀಲನೆ ಅಗತ್ಯವೂ ಹೌದು. ಆದರೆ ಬಾಗಿಲು ಲಾಕ್‌ ಮಾಡಿರುವುದು ಖಚಿತವಾಗಿದ್ದರೂ ಮತ್ತೆ ಮತ್ತೆ ಪರಿಶೀಲಿಸಬೇಕು ಎನ್ನುವ ಅನುಮಾನ ಕಾಡುತ್ತಿದ್ದರೆ, ಅದನ್ನು ಕೇವಲ ಸಾಮಾನ್ಯ ಅಭ್ಯಾಸ ಎಂದು ನಿರ್ಲಕ್ಷಿಸುವಂತಿಲ್ಲ. ಇಂತಹ ಮರುಕಳಿಸುವ ಪರಿಶೀಲನೆ ಕೆಲವೊಮ್ಮೆ ಒತ್ತಡ ಮತ್ತು ಆತಂಕಕ್ಕೆ ಸಂಬಂಧಿಸಿದ ಸಮಸ್ಯೆಯ ಲಕ್ಷಣವಾಗಿರಬಹುದು.

ಸಾಮಾನ್ಯ ಪರಿಶೀಲನೆಗೂ, ಅತಿಯಾದ ಪರಿಶೀಲನೆಗೂ ವ್ಯತ್ಯಾಸವೇನು?

ಒಮ್ಮೆ ಬಾಗಿಲಿನ ಬೀಗವನ್ನು ಪರಿಶೀಲಿಸಿ, ಅದು ಸರಿಯಾಗಿ ಲಾಕ್‌ ಆಗಿರುವುದು ಖಚಿತವಾದ ಬಳಿಕ ಮುಂದಿನ ಕೆಲಸಕ್ಕೆ ಹೋಗುವುದು ಸಾಮಾನ್ಯ ವರ್ತನೆ. ಆದರೆ ಪರಿಶೀಲಿಸಿದ ಕೆಲವೇ ನಿಮಿಷಗಳಲ್ಲಿ ಮತ್ತೆ ಅನುಮಾನ ಶುರುವಾಗಿ, ಮತ್ತೊಮ್ಮೆ ಬಾಗಿಲಿನ ಬಳಿ ಹೋಗಿ ನೋಡುವುದು ಸಮಸ್ಯೆಯ ಸೂಚನೆಯಾಗಬಹುದು.

ಒಸಿಡಿ (OCD) ಕುರಿತು ತಜ್ಞರಾಗಿರುವ ಥೆರಪಿಸ್ಟ್‌ ಮತ್ತು ಪುನರ್ವಸತಿ ಮನೋವಿಜ್ಞಾನಿ ಶ್ಯಾಮ್‌ ಗುಪ್ತಾ ಅವರ ಪ್ರಕಾರ, ಸಾಮಾನ್ಯ ಪರಿಶೀಲನೆ ಒಂದು ಪ್ರಶ್ನೆಗೆ ಉತ್ತರ ಕಂಡುಕೊಂಡ ಬಳಿಕ ಮುಗಿಯುತ್ತದೆ. ಆದರೆ ಒತ್ತಾಯಪೂರ್ವಕ ಪರಿಶೀಲನೆಯಲ್ಲಿ ಉತ್ತರ ಸಿಕ್ಕಿದ್ದರೂ ಅನುಮಾನ ಮತ್ತೆ ಮತ್ತೆ ಮೂಡುತ್ತದೆ. ಆಗ ವ್ಯಕ್ತಿ ನಿಜಾಂಶವನ್ನು ಖಚಿತಪಡಿಸಿಕೊಳ್ಳುವುದಕ್ಕಿಂತ, ಏನಾದರೂ ಕೆಟ್ಟದ್ದು ಸಂಭವಿಸಬಹುದು ಎಂಬ ಭಯವನ್ನು ಕಡಿಮೆ ಮಾಡಿಕೊಳ್ಳಲು ಪರಿಶೀಲಿಸುತ್ತಿರುತ್ತಾನೆ.

ಭಾರತದಲ್ಲೂ ಕಂಡುಬರುವ ಸಮಸ್ಯೆ

ಬಾಗಿಲು, ಗ್ಯಾಸ್‌ ಅಥವಾ ಇತರ ವಸ್ತುಗಳನ್ನು ಪದೇಪದೇ ಪರಿಶೀಲಿಸುವುದು ಒಸಿಡಿಯ ಸಾಮಾನ್ಯ ರೂಪಗಳಲ್ಲಿ ಒಂದಾಗಿದೆ ಎಂದು ತಜ್ಞರು ಹೇಳುತ್ತಾರೆ. ಸುರಕ್ಷತೆ ಮತ್ತು ಜವಾಬ್ದಾರಿಯ ಭಾಗವೆಂದು ಕಾಣಿಸುವುದರಿಂದ ಇಂತಹ ವರ್ತನೆಯನ್ನು ಗುರುತಿಸುವುದು ಕೆಲವೊಮ್ಮೆ ಕಷ್ಟವಾಗಬಹುದು. ಆದರೆ ಪ್ರತಿ ಬಾರಿ ಪರಿಶೀಲಿಸಿದಾಗ ಸ್ವಲ್ಪ ಸಮಯಕ್ಕೆ ಮಾತ್ರ ನೆಮ್ಮದಿ ಸಿಗುತ್ತದೆ; ನಂತರ ಮತ್ತೆ ಅದೇ ಅನುಮಾನ ಕಾಡುತ್ತದೆ. ಹೀಗೆ ಪರಿಶೀಲನೆಯ ಒಂದು ಚಕ್ರವೇ ರೂಪುಗೊಳ್ಳಬಹುದು.

ಈ ಲಕ್ಷಣಗಳಿದ್ದರೆ ಗಮನಿಸಿ

ದಿನದ ಹೆಚ್ಚಿನ ಸಮಯ ಇದಕ್ಕೇ ಹೋಗುವುದು: ಪರಿಶೀಲಿಸುವುದು, ಮತ್ತೆ ಪರಿಶೀಲಿಸುವುದು ಅಥವಾ ಮನಸ್ಸಿನಲ್ಲೇ ಅದೇ ವಿಷಯವನ್ನು ಪುನಃ ಪುನಃ ನೆನಪಿಸಿಕೊಳ್ಳುವುದು ದಿನಕ್ಕೆ ಒಂದು ಗಂಟೆಗೂ ಹೆಚ್ಚು ಸಮಯ ತೆಗೆದುಕೊಳ್ಳುತ್ತಿದ್ದರೆ ಗಮನಿಸಬೇಕು.

ಪದೇಪದೇ ಹಿಂದಿರುಗುವುದು: ಮನೆಯಿಂದ ಹೊರಟ ಬಳಿಕ ಮತ್ತೆ ಬಾಗಿಲು ಪರಿಶೀಲಿಸಲು ಹಿಂದಿರುಗುವುದು ಅಥವಾ ರಾತ್ರಿ ಹಾಸಿಗೆಯಿಂದ ಎದ್ದು ಈಗಾಗಲೇ ಪರಿಶೀಲಿಸಿರುವ ವಸ್ತುವನ್ನು ಮತ್ತೆ ನೋಡುವುದು.

ಹಣಕಾಸಿನ ಸಮಸ್ಯೆಯಿಂದ ಪಾರಾಗಲು ಸಂಬಳವಾದ ತಕ್ಷಣವೇ ಈ ಕೆಲಸಗಳನ್ನು ಮಾಡಬೇಕು

 ಪರಿಶೀಲಿಸಿದರೂ ಮತ್ತೆ ಅನುಮಾನ: ಬಾಗಿಲು ಸರಿಯಾಗಿ ಲಾಕ್‌ ಆಗಿರುವುದನ್ನು ಕಣ್ಣಾರೆ ನೋಡಿದರೂ ಅಥವಾ ಕೈಯಿಂದ ಮುಟ್ಟಿ ಖಚಿತಪಡಿಸಿಕೊಂಡರೂ ಮನಸ್ಸಿನಲ್ಲಿ ಅನುಮಾನ ಮುಂದುವರಿಯುವುದು.

ತನ್ನ ಮೇಲೆಯೇ ಹೆಚ್ಚಿನ ಜವಾಬ್ದಾರಿ ಹಾಕಿಕೊಳ್ಳುವುದು: ಒಮ್ಮೆ ಪರಿಶೀಲಿಸದೆ ಬಿಟ್ಟರೆ ಏನಾದರೂ ದೊಡ್ಡ ಅನಾಹುತ ಸಂಭವಿಸುತ್ತದೆ ಮತ್ತು ಅದಕ್ಕೆ ತಾನೇ ಕಾರಣನಾಗುತ್ತೇನೆ ಎಂಬ ಭಯ.

ಇತರರಿಂದ ಪದೇಪದೇ ಖಚಿತಪಡಿಸಿಕೊಳ್ಳುವುದು: ‘ಬಾಗಿಲು ಲಾಕ್‌ ಆಗಿದೆಯೇ?’ ಎಂದು ಕುಟುಂಬದವರನ್ನು ಮತ್ತೆ ಮತ್ತೆ ಕೇಳುವುದು ಅಥವಾ ತಮಗೆ ಬದಲಾಗಿ ಮತ್ತೊಬ್ಬರಿಂದ ಪರಿಶೀಲಿಸುವಂತೆ ಹೇಳುವುದು.

ನಿಲ್ಲಿಸಲು ಪ್ರಯತ್ನಿಸಿದಾಗ ತೀವ್ರ ಆತಂಕ: ಈ ವರ್ತನೆಯಿಂದ ತಮಗೆ ಬೇಸರ ಅಥವಾ ಮುಜುಗರವಾಗುತ್ತಿದ್ದರೂ ಅದನ್ನು ನಿಲ್ಲಿಸಲು ಪ್ರಯತ್ನಿಸಿದಾಗ ಆತಂಕ ಮತ್ತಷ್ಟು ಹೆಚ್ಚಾಗುವುದು.

ಸಮಸ್ಯೆ ಇದ್ದರೆ ಏನು ಮಾಡಬೇಕು?

ಒಸಿಡಿಗೆ ಚಿಕಿತ್ಸೆ ನೀಡುವಲ್ಲಿ ಎಕ್ಸ್‌ಪೋಸರ್‌ ಆ್ಯಂಡ್‌ ರೆಸ್ಪಾನ್ಸ್‌ ಪ್ರಿವೆನ್ಷನ್‌ (ERP) ಎಂಬ ವಿಧಾನವನ್ನು ಒಳಗೊಂಡ ಅರಿವಿನ ವರ್ತನಾ ಚಿಕಿತ್ಸೆಯನ್ನು ಬಳಸಲಾಗುತ್ತದೆ. ಉದಾಹರಣೆಗೆ, ಬಾಗಿಲನ್ನು ಒಮ್ಮೆ ಲಾಕ್‌ ಮಾಡಿದ ಬಳಿಕ ಅದನ್ನು ಗಮನವಿಟ್ಟು ಖಚಿತಪಡಿಸಿಕೊಂಡು ಹೊರಗೆ ಹೋಗುವುದು ಮತ್ತು ಮತ್ತೆ ಹಿಂದಿರುಗಿ ಪರಿಶೀಲಿಸದಿರುವುದು ಚಿಕಿತ್ಸೆಯ ಒಂದು ಭಾಗವಾಗಿರಬಹುದು. ಆರಂಭದಲ್ಲಿ ಆತಂಕ ಹೆಚ್ಚಾಗಬಹುದು. ಆದರೆ ಕ್ರಮೇಣ ಆ ಆತಂಕ ಕಡಿಮೆಯಾಗುವುದನ್ನು ಕಲಿಯಲು ಇದು ಸಹಾಯ ಮಾಡಬಹುದು.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ