ಫಲಿಸದ ಇಸ್ರೋ ವಿಜ್ಞಾನಿಗಳ ಪ್ರಯತ್ನ; ಚಂದ್ರಯಾನ 2 ಯೋಜನೆ ವಿಫಲ?

ಭಾರತದ ಬಹುನಿರೀಕ್ಷಿತ ಚಂದ್ರಯಾನ 2 ಯೋಜನೆ ವಿಫಲವಾಗಿದೆ. ಕಳೆದ 14 ದಿನಗಳಿಂದಲೂ ಇಸ್ರೋ ವಿಜ್ಞಾನಿಗಳು ನಿರಂತರವಾಗಿ ವಿಕ್ರಮ್ ಲ್ಯಾಂಡರ್​ ಸಂಪರ್ಕಕ್ಕೆ ಪ್ರಯತ್ನಿಸುತ್ತಿದ್ರು,  ಕೊನೆ ಕ್ಷಣದವರೆಗೂ ಲ್ಯಾಂಡರ್​ ಸಂಪರ್ಕಕ್ಕೆ ಸಿಗಲಿಲ್ಲ. ಅಲ್ಲದೆ ವಿಕ್ರಮ್ ಆಯುಷ್ಯ ಇಂದಿಗೆ ಅಂತ್ಯ ಹಿನ್ನೆಲೆಯಲ್ಲಿ ಲ್ಯಾಂಡರ್​ ಸಂಪರ್ಕದ ಆಸೆಯನ್ನು ಇಸ್ರೋ ವಿಜ್ಞಾನಿಗಳು ಕೈಬಿಟ್ಟಿದ್ದಾರೆ.

ಸೆ.17ರಂದು ಚಂದ್ರನ ಕಕ್ಷೆಯಲ್ಲಿ ಸುತ್ತುತ್ತಿರುವ ನಾಸಾದ ಲೂನಾರ್, ವಿಕ್ರಮ್ ಲ್ಯಾಂಡರ್​ ಚಂದ್ರನ ಮೇಲ್ಮೈನಲ್ಲಿ ಇಳಿಯಬೇಕಿದ್ದ ಸ್ಥಳದ ಚಿತ್ರಗಳನ್ನು ಸೆರೆಹಿಡಿದಿದೆ. ನಾಸಾದ ಲೂನಾರ್ ರಿಕನೈಸನ್ಸ್​ ಆರ್ಬಿಟರ್​(ಎಲ್​ಆರ್​ಒ) ಚಿತ್ರಗಳನ್ನ ಸದ್ಯದಲ್ಲೇ ಹಂಚಿಕೊಳ್ಳಲಿದೆ. ಆದ್ರೆ ಕೆಲವು ವರದಿಗಳ ಪ್ರಕಾರ ವಿಕ್ರಮ್ ಲ್ಯಾಂಡರ್​ ಇರುವಿಕೆ ಬಗ್ಗೆ ನಾಸಾ ಖಚಿತಪಡಿಸಿಲ್ಲ ಎನ್ನಲಾಗಿದೆ. ಚಂದ್ರನ ದಕ್ಷಿಣ ಧ್ರುವದಲ್ಲಿ ನಾಸಾದ ಲೂನಾರ್ ಪ್ರದಕ್ಷಿಣೆ ವೇಳೆ ಅಲ್ಲಿ ಮುಸ್ಸಂಜೆಯಾಗಿತ್ತು. ಬೆಳಕಿನ ಪ್ರಮಾಣ ಕಡಿಮೆಯಾಗಿ ರಾತ್ರಿಗೆ ಹೊರಳುವ ಹೊತ್ತಿನಲ್ಲಿ ಚಿತ್ರಗಳನ್ನು ಎಲ್​ಆರ್​ಒ ಸೆರೆಹಿಡಿದಿತ್ತು.

ಜುಲೈ22ರಂದು ಆಂಧ್ರದ ಶ್ರೀಹರಿಕೋಟಾದ ಸತೀಶ್ ಬಾಹ್ಯಾಕಾಶ ಕೇಂದ್ರದಿಂದ ಚಂದ್ರಯಾನ 2 ನಭಕ್ಕೆ ಜಿಗಿದಿತ್ತು. ಸುಮಾರು 47 ದಿನಗಳ ಕಾಲ ಬಾಹ್ಯಾಕಾಶದಲ್ಲಿ ಚಂದ್ರನ ಕಡೆ ಹೊರಟಿದ್ದ ವಿಕ್ರಮ್, ಸೆಪ್ಟಂಬರ್ 7ರಂದು ಚಂದ್ರನ ಮೇಲೆ​ ಇಳಿಯಬೇಕಿತ್ತು. ಆದ್ರೆ ಕೊನೆಯ ಕ್ಷಣದಲ್ಲಿ ವಿಕ್ರಮ್ ಲ್ಯಾಂಡರ್​ ವಿಜ್ಞಾನಿಗಳ ಸಂಪರ್ಕಕ್ಕೆ ಸಿಗಲಿಲ್ಲ. ಅಂದಿನಿಂದ 14 ದಿನಗಳ ಕಾಲ ವಿಕ್ರಮ್ ಸಂಪರ್ಕಕ್ಕೆ ಯತ್ನಿಸಿದ ವಿಜ್ಞಾನಿಗಳ ಶ್ರಮ ವಿಫಲವಾಗಿದೆ.