ಶುಕ್ರವಾರ ಬಿಳಿ ವಸ್ತುಗಳನ್ನು ದಾನ ಮಾಡುವುದು ಏಕೆ ಶುಭ? ಇಲ್ಲಿದೆ ಕಾರಣ!

ಹಿಂದೂ ಸಂಪ್ರದಾಯದಲ್ಲಿ ವಾರದ ಪ್ರತಿ ದಿನವೂ ವಿಶಿಷ್ಟ ಆಧ್ಯಾತ್ಮಿಕ ಮಹತ್ವವನ್ನು ಹೊಂದಿದೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ವಾರದ ಪ್ರತಿಯೊಂದು ದಿನವೂ ಒಂಬತ್ತು ಗ್ರಹಗಳಲ್ಲಿ ಒಂದು ಗ್ರಹ ಮತ್ತು ನಿರ್ದಿಷ್ಟ ದೇವತೆಗೆ ಮೀಸಲಾಗಿರುತ್ತದೆ. ಈ ಪೈಕಿ ಶುಕ್ರವಾರವನ್ನು ಧನ-ಧಾನ್ಯಗಳ ಅಧಿದೇವತೆಯಾದ ಮಹಾಲಕ್ಷ್ಮಿ ಮತ್ತು ಜ್ಯೋತಿಷ್ಯದ ಸೌಂದರ್ಯ ಕಾರಕ ಗ್ರಹವಾದ ಶುಕ್ರನಿಗೆ ಅರ್ಪಿಸಲಾಗಿದೆ. ಲಕ್ಷ್ಮಿ ದೇವಿಯು ಸಂಪತ್ತು, ಶಾಂತಿ ಮತ್ತು ಸಮೃದ್ಧಿಯನ್ನು ಕರುಣಿಸಿದರೆ, ಶುಕ್ರ ಗ್ರಹವು ಭೌತಿಕ ಸುಖ, ಕಲೆ, ಪ್ರೀತಿ ಮತ್ತು ವೈಭವವನ್ನು ನೀಡುತ್ತದೆ. ಅದಕ್ಕಾಗಿಯೇ ಶುಕ್ರವಾರ ಪೂಜೆ-ಉಪವಾಸಗಳ ಜೊತೆಗೆ ದಾನ ಮಾಡುವುದಕ್ಕೂ ವಿಶೇಷ ಆದ್ಯತೆ ನೀಡಲಾಗುತ್ತದೆ.

ಶುಕ್ರವಾರಕ್ಕೂ ಬಿಳಿ ವಸ್ತುಗಳ ದಾನಕ್ಕೂ ಏನು ಸಂಬಂಧ?

ಜ್ಯೋತಿಷ್ಯದಲ್ಲಿ ಶುಕ್ರ ಗ್ರಹವನ್ನು ಬಿಳಿ ಬಣ್ಣಕ್ಕೆ ಸಂಕೇತವಾಗಿ ನೋಡಲಾಗುತ್ತದೆ. ಹೀಗಾಗಿ ಶುಕ್ರವಾರದಂದು ಶುಕ್ರ ಗ್ರಹ ಮತ್ತು ಲಕ್ಷ್ಮಿ ದೇವಿಯ ಕೃಪೆ ಪಡೆಯಲು ಬಿಳಿ ಬಣ್ಣದ ವಸ್ತುಗಳನ್ನು ದಾನ ಮಾಡುವುದು ಅತ್ಯಂತ ಶ್ರೇಷ್ಠ ಎಂಬ ನಂಬಿಕೆಯಿದೆ. ಅಗತ್ಯವಿರುವವರಿಗೆ ಹಾಲು, ಮೊಸರು, ಅಕ್ಕಿ, ಸಕ್ಕರೆ, ಬಿಳಿ ಬಟ್ಟೆಗಳು ಹಾಗೂ ಬಿಳಿ ಸಿಹಿತಿಂಡಿಗಳನ್ನು ದಾನ ಮಾಡುವುದರಿಂದ ಜೀವನದಲ್ಲಿ ಶಾಂತಿ, ಸಂತೋಷ, ನೆಮ್ಮದಿ ಮತ್ತು ಐಶ್ವರ್ಯ ಹೆಚ್ಚಾಗುತ್ತದೆ ಎಂದು ನಂಬಲಾಗಿದೆ.

ಇದನ್ನೂ ಓದಿ: ಹನುಮಾನ್ ಚಾಲೀಸಾ ಉಗಮದ ರೋಚಕ ಕಥೆ: ಬಂದೀಖಾನೆಯಲ್ಲಿ ತುಳಸಿದಾಸರು ರಚಿಸಿದ ದಿವ್ಯ ಸ್ತೋತ್ರದ ಇತಿಹಾಸ

ಹಾಲು ಮತ್ತು ಮೊಸರು ದಾನ ಮಾಡುವುದರ ಪೌರಾಣಿಕ ಹಾಗೂ ಜ್ಯೋತಿಷ್ಯ ಮಹತ್ವ:

ಹಿಂದೂ ಸಂಪ್ರದಾಯದಲ್ಲಿ ಹಾಲನ್ನು ಪರಮ ಪವಿತ್ರ ಹಾಗೂ ಶುದ್ಧತೆಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ದೇವತಾ ವಿಗ್ರಹಗಳಿಗೆ ಅಭಿಷೇಕ ಮಾಡಲು ಹಾಗೂ ಪೂಜಾ ಕೈಂಕರ್ಯಗಳಲ್ಲಿ ಹಾಲಿಗೆ ಅತ್ಯುನ್ನತ ಸ್ಥಾನವಿದೆ. ಅದೇ ರೀತಿ, ಮೊಸರನ್ನು ಶುಭ ಕಾರ್ಯದ ಸಂಕೇತವೆಂದು ಭಾವಿಸಲಾಗುತ್ತದೆ. ಶುಕ್ರವಾರದಂದು ಹಾಲು ಅಥವಾ ಮೊಸರನ್ನು ದಾನ ಮಾಡುವುದರಿಂದ ಶುಕ್ರ ಗ್ರಹದ ಶಕ್ತಿ ಪ್ರಬಲಗೊಂಡು, ವ್ಯಕ್ತಿಯ ಜಾತಕದಲ್ಲಿರುವ ಶುಕ್ರ ದೋಷಗಳು ನಿವಾರಣೆಯಾಗುತ್ತವೆ ಹಾಗೂ ಹಸಿವಿನಿಂದಿರುವವರಿಗೆ ಆಹಾರ ನೀಡಿದ ಪುಣ್ಯ ಫಲ ದೊರೆಯುತ್ತದೆ.

ಬಿಳಿ ಬಣ್ಣ ಮತ್ತು ಶುಕ್ರ ಗ್ರಹದ ನಡುವಿನ ಆಳವಾದ ನಂಟು:

ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಬಿಳಿ ಬಣ್ಣವು ಶುದ್ಧತೆ, ಶಾಂತಿ ಮತ್ತು ಸಾತ್ವಿಕತೆಯ ಸಂಕೇತವಾಗಿದೆ. ಶುಕ್ರ ಗ್ರಹವು ಐಷಾರಾಮಿ ಜೀವನ ಮತ್ತು ಸೌಂದರ್ಯವನ್ನು ಪ್ರತಿನಿಧಿಸುವುದರಿಂದ, ಆ ಗ್ರಹವನ್ನು ಪ್ರಸನ್ನಗೊಳಿಸಲು ಬಿಳಿ ವಸ್ತುಗಳ ಬಳಕೆಯನ್ನು ಧರ್ಮಗ್ರಂಥಗಳಲ್ಲಿ ಸೂಚಿಸಲಾಗಿದೆ. ಶುಕ್ರವಾರದಂದು ಬಿಳಿ ಬಟ್ಟೆಗಳನ್ನು ಧರಿಸುವುದು, ಶ್ರೀ ಮಹಾಲಕ್ಷ್ಮಿ ದೇವಿಯನ್ನು ಶ್ರದ್ಧಾ-ಭಕ್ತಿಯಿಂದ ಪೂಜಿಸುವುದು ಮತ್ತು ಬಿಳಿ ವಸ್ತುಗಳನ್ನು ದಾನ ಮಾಡುವುದರಿಂದ ಶುಕ್ರ ಗ್ರಹದ ಶುಭ ದೃಷ್ಟಿ ಮನೆ ಹಾಗೂ ಮನದ ಮೇಲೆ ಸದಾ ಇರುತ್ತದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ