ಹೈದರಾಬಾದ್‌ನಲ್ಲಿ ಬರೋಬ್ಬರಿ 1.01 ಕೋಟಿ ರೂ.ಗೆ ಹರಾಜಾಯ್ತು ಗಣೇಶನ ಲಡ್ಡು ಪ್ರಸಾದ; ಏನಿದರ ವಿಶೇಷತೆ ಗೊತ್ತಾ?

ಹೈದರಾಬಾದ್‌ನ ಬಂಡ್ಲಗುಡ ಜಾಗೀರ್‌ನಲ್ಲಿರುವ ಪ್ರಸಿದ್ಧ ‘ಕೀರ್ತಿ ರಿಚ್‌ಮಂಡ್ ವಿಲ್ಲಾಸ್’ನಲ್ಲಿ ಗಣೇಶ ಚತುರ್ಥಿ ಆಚರಣೆಯ ಅಂಗವಾಗಿ ನಡೆದ ಲಡ್ಡು ಹರಾಜು ಹೊಸ ಇತಿಹಾಸವನ್ನೇ ಸೃಷ್ಟಿಸಿದೆ. ಗಣೇಶ ವಿಸರ್ಜನೆಗೂ ಮುನ್ನ ನಡೆದ ಈ ರೋಚಕ ಹರಾಜಿನಲ್ಲಿ ಭಕ್ತರ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟು, ಅಂತಿಮವಾಗಿ ಪ್ರಸಾದದ ಲಡ್ಡು ಕೋಟಿ ಬೆಲೆಗೆ ಹರಾಜಾಗುವ ಮೂಲಕ ಎಲ್ಲರನ್ನೂ ಅಚ್ಚರಿಗೊಳಿಸಿದೆ.

ಕ್ಷಣಕ್ಷಣಕ್ಕೂ ಹೆಚ್ಚಿದ ಪೈಪೋಟಿ: ಶಕ್ತಿಮಾನ್ ತಂಡಕ್ಕೆ ಒಲಿದ ಪ್ರಸಾದ:

ರಿಚ್‌ಮಂಡ್ ವಿಲ್ಲಾಸ್ ಆವರಣದಲ್ಲಿ ವಿಲ್ಲಾ ನಿವಾಸಿಗಳು ಅತ್ಯಂತ ಉತ್ಸಾಹ ಮತ್ತು ಭಕ್ತಿಯಿಂದ ಈ ಹರಾಜಿನಲ್ಲಿ ಭಾಗವಹಿಸಿದ್ದರು. ಹರಾಜಿನಲ್ಲಿ ಗೆಲ್ಲಲು ನಿವಾಸಿಗಳು ವಿವಿಧ ಗುಂಪುಗಳನ್ನು ರಚಿಸಿಕೊಂಡು ಸ್ಪರ್ಧೆಗಿಳಿದಿದ್ದರು. ಕ್ಷಣಕ್ಷಣಕ್ಕೂ ಬಿಡ್ಡಿಂಗ್ ಬೆಲೆ ಏರುತ್ತಾ ಸಾಗಿ, ಅಂತಿಮವಾಗಿ ‘ಶಕ್ತಿಮಾನ್’ ಎಂಬ ತಂಡವು ಬರೋಬ್ಬರಿ 1.01 ಕೋಟಿ ರೂ.ಗೆ ಈ ಪವಿತ್ರ ಲಡ್ಡುವನ್ನು ತನ್ನದಾಗಿಸಿಕೊಂಡಿತು. ಆದರೆ, ಕಳೆದ ಮೂರು ವರ್ಷಗಳ ದಾಖಲೆಗೆ ಹೋಲಿಸಿದರೆ ಈ ಬಾರಿ ಲಡ್ಡುವಿನ ಬೆಲೆಯಲ್ಲಿ ಕೊಂಚ ಇಳಿತ ಕಂಡುಬಂದಿದೆ. ಈ ಹಿಂದೆ 2024 ರಲ್ಲಿ 1.87 ಕೋಟಿ ಹಾಗೂ 2025 ರಲ್ಲಿ 2.31 ಕೋಟಿ ಭಾರಿ ಮೊತ್ತಕ್ಕೆ ಈ ಲಡ್ಡು ಹರಾಜಾಗಿತ್ತು.

ಕೋಟ್ಯಂತರ ರೂಪಾಯಿ ನಿಧಿ ಬಡವರ ಕಲ್ಯಾಣಕ್ಕೆ ಬಳಕೆ:

ಹರಾಜಿನಿಂದ ಸಂಗ್ರಹವಾದ ಕೋಟ್ಯಂತರ ರೂಪಾಯಿಗಳನ್ನು ಸಂಘಟಕರು ‘ಆರ್‌ಪಿ ದಿಯಾ ಚಾರಿಟೇಬಲ್ ಟ್ರಸ್ಟ್’ ಮೂಲಕ ಉದಾತ್ತ ಸಾಮಾಜಿಕ ಸೇವಾ ಕಾರ್ಯಕ್ರಮಗಳಿಗೆ ಬಳಸುತ್ತಿದ್ದಾರೆ. ವಿಲ್ಲಾಗಳಲ್ಲಿ ಕೆಲಸ ಮಾಡುವ ಬಡ ಚಾಲಕರು, ಕೆಲಸದವರ ಮತ್ತು ಸ್ಥಳೀಯ ಕಾರ್ಮಿಕರ ಮಕ್ಕಳ ಶಾಲಾ ಶುಲ್ಕವನ್ನು ಈ ನಿಧಿಯಿಂದ ಪಾವತಿಸಲಾಗುತ್ತದೆ. ಇದಲ್ಲದೇ ಗಂಭೀರ ಕಾಯಿಲೆಗಳಿಂದ ಬಳಲುತ್ತಿರುವ ಬಡ ರೋಗಿಗಳಿಗೆ ಅಗತ್ಯ ಉಚಿತ ವೈದ್ಯಕೀಯ ಚಿಕಿತ್ಸೆ ನೀಡಲಾಗುತ್ತದೆ. ವೃದ್ಧಾಶ್ರಮಗಳು, ಅನಾಥಾಶ್ರಮಗಳು ಮತ್ತು ವಿವಿಧ ದತ್ತಿ ಸಂಸ್ಥೆಗಳಿಗೆ ನೇರ ಆರ್ಥಿಕ ನೆರವು ಒದಗಿಸಲಾಗುತ್ತದೆ.

ಇದನ್ನೂ ಓದಿ: ಮನೆಯಲ್ಲಿ ಬೆಳ್ಳಿಯ ಗಣೇಶ ಮೂರ್ತಿ ಇಡುವುದು ಶುಭವೇ? ವಾಸ್ತು ಶಾಸ್ತ್ರ ಹೇಳುವುದೇನು?

25 ಸಾವಿರದಿಂದ ಕೋಟಿ ರೂಪಾಯಿವರೆಗಿನ ಅದ್ಭುತ ಪಯಣ:

2018 ರಲ್ಲಿ ಕೇವಲ 25,000 ರಿಂದ ಪ್ರಾರಂಭವಾದ ರಿಚ್‌ಮಂಡ್ ವಿಲ್ಲಾಸ್‌ನ ಈ ಲಡ್ಡು ಹರಾಜು, ಇಂದು ವರ್ಷದಿಂದ ವರ್ಷಕ್ಕೆ ಅಭೂತಪೂರ್ವ ಜನಪ್ರಿಯತೆ ಗಳಿಸುತ್ತಿದೆ. ಕೇವಲ ಹಬ್ಬದ ಆಚರಣೆಗೆ ಸೀಮಿತವಾಗದೆ, ಸಂಗ್ರಹವಾದ ಹಣವನ್ನು ಸಮುದಾಯದ ಕಲ್ಯಾಣಕ್ಕೆ ಬಳಸುವ ಮೂಲಕ ಕೀರ್ತಿ ರಿಚ್‌ಮಂಡ್ ವಿಲ್ಲಾಸ್ ನಿವಾಸಿಗಳು ಸಮಾಜಕ್ಕೆ ಮಾದರಿಯಾಗಿದ್ದಾರೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ