ಸಿಎಸ್​ಕೆ ಕೋಚ್ ಹುದ್ದೆ ಆಫರ್​: 20 ಕೋಟಿ ರೂ.ಗೆ ಬೇಡಿಕೆ!

ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್​-20 ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಮುಖ್ಯ ಕೋಚ್ ಯಾರಾಗಲಿದ್ದಾರೆ? ಈ ಪ್ರಶ್ನೆಗೆ ಸದ್ಯ ಕೇಳಿ ಬರುತ್ತಿರುವ ಉತ್ತರ ಇಯಾನ್ ಮೋರ್ಗನ್. ಇಂಗ್ಲೆಂಡ್ ತಂಡದ ಮಾಜಿ ನಾಯಕನನ್ನು ಸಿಎಸ್​ಕೆ ತಂಡದ ಮುಖ್ಯ ಕೋಚ್ ಆಗಿಸಲು ತೆರೆಮರೆಯ ಪ್ರಯತ್ನ ನಡೆಯುತ್ತಿದೆ ಎಂದು ವರದಿಯಾಗಿದೆ.

ಇಂಗ್ಲೆಂಡ್ ತಂಡಕ್ಕೆ 2019 ರ ಏಕದಿನ ವಿಶ್ವಕಪ್ ಗೆದ್ದುಕೊಟ್ಟ ಈ ಯಶಸ್ವಿ ನಾಯಕ ಇಯಾನ್ ಮೋರ್ಗನ್ ಅವರನ್ನು ಸಿಎಸ್​ಕೆ ಫ್ರಾಂಚೈಸಿ ಸಂಪರ್ಕಿಸಿದ್ದು, ಈ ವೇಳೆ ಅವರು ₹20 ಕೋಟಿ ಸಂಭಾವನೆ ಬೇಡಿಕೆ ಇಟ್ಟಿದ್ದಾರೆ ಎಂಬ ಸುದ್ದಿಗಳು ಹರಿದಾಡುತ್ತಿವೆ.

₹20 ಕೋಟಿ ಬೇಡಿಕೆ!

ಬರೋಬ್ಬರಿ 20 ಕೋಟಿ ರೂ… ಒಬ್ಬ ಕೋಚ್‌ಗೆ ಇಷ್ಟೊಂದು ದೊಡ್ಡ ಮೊತ್ತವೇ? ಎಂದು ಹಲವರು ಆಶ್ಚರ್ಯಪಡುತ್ತಿದ್ದಾರೆ. ಆದರೆ ಇನ್​ಸೈಡ್ ಮಾಹಿತಿ ಪ್ರಕಾರ, ಇಯಾನ್ ಮೋರ್ಗನ್ ಕೇಳುತ್ತಿರುವುದು ಕೇವಲ ತಮ್ಮ ವೈಯಕ್ತಿಕ ವೇತನವಲ್ಲ. ಬದಲಾಗಿ ತಮ್ಮ ಕೋಚಿಂಗ್ ತಂಡಕ್ಕಾಗಿ. ಅಂದರೆ ಮೋರ್ಗನ್ ತಮ್ಮೊಂದಿಗೆ ಕೋಚಿಂಗ್ ತಂಡವನ್ನೂ ಕೂಡ ಕರೆತರಲಿದ್ದಾರೆ. ಅವರೆಲ್ಲರ ವೇತನವನ್ನು ಸೇರಿಸಿ 20 ಕೋಟಿ ರೂ. ಬೇಡಿಕೆಯಿಟ್ಟಿದ್ದಾರೆ ಎನ್ನಲಾಗಿದೆ.

• ಇಯಾನ್ ಮೋರ್ಗನ್ ತಮ್ಮದೇ ಆದ ಹೈ-ಪರ್ಫಾರ್ಮೆನ್ಸ್ ಕೋಚಿಂಗ್ ತಂಡ ಮತ್ತು ವಿಶ್ವವಿಖ್ಯಾತ ಡೇಟಾ ಅನಾಲಿಟಿಕ್ಸ್ ತಜ್ಞ ನಾಥನ್ ಲೀಮನ್ ಅವರನ್ನೊಳಗೊಂಡ ಸಂಪೂರ್ಣ ವ್ಯವಸ್ಥೆಯನ್ನೇ ಸಿಎಸ್‌ಕೆಗೆ ತರಲು ಬಯಸಿದ್ದಾರೆ.
• ಸಿಎಸ್‌ಕೆ ತಂಡದ ಹಳೆಯ ಶೈಲಿಯನ್ನು ಬದಲಾಯಿಸಿ, ಸಂಪೂರ್ಣವಾಗಿ ಡೇಟಾ ಮತ್ತು ತಂತ್ರಜ್ಞಾನ ಆಧಾರಿತ ಹೊಸ ಕ್ರಿಕೆಟ್ ಮಾದರಿಯನ್ನು ರೂಪಿಸಲು ಪ್ಲ್ಯಾನ್ ರೂಪಿಸಿದ್ದಾರೆ.

ಇದಕ್ಕಾಗಿಯೇ ಇಯಾನ್ ಮೋರ್ಗನ್ ಇಷ್ಟು ಬೃಹತ್ ಮೊತ್ತದ ಸಂಭಾವನೆಗೆ ಬೇಡಿಕೆಯಿಟ್ಟಿದ್ದಾರೆ ಎನ್ನಲಾಗಿದೆ. ಒಂದು ವೇಳೆ ಈ ಮಾತುಕತೆ ಯಶಸ್ವಿಯಾದರೆ, ಚೆನ್ನೈ ಸೂಪರ್ ಕಿಂಗ್ಸ್  ತಂಡದ ನೂತನ ಮುಖ್ಯ ಕೋಚ್ ಆಗಿ ಇಂಗ್ಲೆಂಡ್‌ನ ಈ ಮಾಜಿ ನಾಯಕ ಕಾಣಿಸಿಕೊಳ್ಳುವುದು ಖಚಿತವಾಗಲಿದೆ.

ಇದನ್ನೂ ಓದಿ: ಫಿಟ್​ನೆಸ್ ಟೆಸ್ಟ್​ನಲ್ಲಿ ಫೇಲ್: ಟೀಮ್ ಇಂಡಿಯಾದಿಂದ ಯುವ ವೇಗಿ ಔಟ್!

ಅಶ್ವಿನ್ ಮೊದಲ ಸುಳಿವು:

ಭಾರತದ ಮಾಜಿ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಈ ಬಗ್ಗೆ ಮೊದಲ ಬಾರಿಗೆ ಮಾತನಾಡಿದ್ದರು. ಇಯಾನ್ ಮೋರ್ಗನ್ ಅವರ ತಾಂತ್ರಿಕ ಜ್ಞಾನ ಮತ್ತು ನಾಯಕತ್ವದ ಶೈಲಿ ಸಿಎಸ್‌ಕೆ ತಂಡಕ್ಕೆ ಹೇಗೆ ಹೊಸ ಶಕ್ತಿ ತುಂಬಬಲ್ಲದು ಎಂಬುದನ್ನು ಅವರು ವಿವರಿಸಿದ್ದರು. ಪ್ರಸ್ತುತ ಚೆನ್ನೈ ಸೂಪರ್ ಕಿಂಗ್ಸ್ ಮ್ಯಾನೇಜ್‌ಮೆಂಟ್ ಅಥವಾ ಇಯಾನ್ ಮಾರ್ಗನ್ ಕಡೆಯಿಂದ ಅಧಿಕೃತ ಮುದ್ರೆ ಬೀಳಬೇಕಾಗಿದೆಯಾದರೂ, ಈ ಸುದ್ದಿ ಐಪಿಎಲ್ 2027 ರ ಮೆಗಾ ಹರಾಜಿಗೂ ಮುನ್ನ ಅಭಿಮಾನಿಗಳಲ್ಲಿ ಭಾರೀ ಕುತೂಹಲ ಮೂಡಿಸಿರುವುದಂತೂ ನಿಜ.