501 ರನ್​, 204 ರನ್​: ಭಾರತ vs ವಿಂಡೀಸ್ ಪಂದ್ಯದಲ್ಲಿ ದಾಖಲಾದ 10 ದಾಖಲೆಗಳು

ರಾಂಚಿಯ ಜೆಎಸ್‌ಸಿಎ ಅಂತರರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಣ ಎರಡನೇ ಟಿ20 ಪಂದ್ಯದಲ್ಲಿ ರನ್‌ಗಳ ಸುರಿಮಳೆಯೇ ಹರಿದಿದೆ. ಉಭಯ ತಂಡಗಳ ಈ ಬ್ಯಾಟಿಂಗ್ ಅಬ್ಬರದಿಂದಾಗಿ ವಿಶ್ವ ಕ್ರಿಕೆಟ್‌ನಲ್ಲಿ ಹಲವು ಐತಿಹಾಸಿಕ ದಾಖಲೆಗಳು ನಿರ್ಮಾಣವಾಗಿವೆ. ಆ ಅಪರೂಪದ ದಾಖಲೆಗಳ ಸಂಪೂರ್ಣ ಪಟ್ಟಿ ಇಲ್ಲಿದೆ…

1. ಸಾರ್ವಕಾಲಿಕ ದಾಖಲೆಯ ರನ್ ಚೇಸ್: 250 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ವೆಸ್ಟ್ ಇಂಡೀಸ್ ತಂಡ, ತನ್ನ ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಂತ ಯಶಸ್ವಿ ಹಾಗೂ ಗರಿಷ್ಠ ರನ್ ಚೇಸ್ ಸಾಧಿಸಿದ ಐತಿಹಾಸಿಕ ದಾಖಲೆ ಬರೆಯಿತು.
2. ಭಾರತದ ವಿರುದ್ಧ ದಾಖಲೆಯ ಚೇಸಿಂಗ್: ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಭಾರತದ ವಿರುದ್ಧ ಯಾವುದೇ ತಂಡ ಯಶಸ್ವಿಯಾಗಿ ಬೆನ್ನಟ್ಟಿದ ಅತಿ ದೊಡ್ಡ ಮೊತ್ತ (250 ರನ್) ಇದಾಗಿದೆ.
3. ಎರಡನೇ ಅತ್ಯುತ್ತಮ ರನ್ ಚೇಸ್: ಅಂತರರಾಷ್ಟ್ರೀಯ ಪುರುಷರ ಟಿ20 ಕ್ರಿಕೆಟ್‌ನಲ್ಲಿ ಇದು ಎರಡನೇ ಅತ್ಯಧಿಕ ಯಶಸ್ವಿ ರನ್ ಚೇಸ್ ಆಗಿದೆ. ಮೊದಲ ಸ್ಥಾನದಲ್ಲಿ ಸೌತ್ ಆಫ್ರಿಕಾ ತಂಡ ಇದ್ದು, 2023ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಆಫ್ರಿಕಾ ಪಡೆ 259 ರನ್ ಚೇಸ್ ಮಾಡಿ ದಾಖಲೆ ಬರೆದಿತ್ತು
4. ಗರಿಷ್ಠ ಒಟ್ಟು ಸ್ಕೋರ್: ಈ ಪಂದ್ಯದಲ್ಲಿ ಉಭಯ ತಂಡಗಳಿಂದ ಒಟ್ಟು 501 ರನ್ ದಾಖಲಾಗಿದ್ದು, ಇದು ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಣ ಟಿ20ಐ ಸರಣಿಗಳಲ್ಲಿ ದಾಖಲಾದ ಅತಿ ಹೆಚ್ಚಿನ ಜಂಟಿ ಮೊತ್ತವಾಗಿದೆ.
5. ಬೌಂಡರಿಗಳ ಸುರಿಮಳೆ: ವೆಸ್ಟ್ ಇಂಡೀಸ್ ತಂಡ ಕೇವಲ ಬೌಂಡರಿ ಮತ್ತು ಸಿಕ್ಸರ್‌ಗಳ ಮೂಲಕವೇ 204 ರನ್‌ಗಳನ್ನು ಕಲೆಹಾಕಿದ್ದು, ಇದು ಟಿ20ಐ ಪಂದ್ಯವೊಂದರಲ್ಲಿ ಬೌಂಡರಿಗಳ ಮೂಲಕ ಆ ತಂಡ ಗಳಿಸಿದ ಅತಿ ದೊಡ್ಡ ಮೊತ್ತವಾಗಿದೆ.
6. ಅತಿ ಹೆಚ್ಚು ಬೌಂಡರಿಗಳ ದಾಖಲೆ: ಈ ಪಂದ್ಯದಲ್ಲಿ ಒಟ್ಟು 79 ಬೌಂಡರಿಗಳು (46 ಫೋರ್ ಹಾಗೂ 33 ಸಿಕ್ಸರ್) ದಾಖಲಾಗಿದ್ದು, ಪುರುಷರ ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಒಂದೇ ಪಂದ್ಯದಲ್ಲಿ ದಾಖಲಾದ 3ನೇ ಗರಿಷ್ಠ ಬೌಂಡರಿಗಳ ದಾಖಲೆಯಾಗಿದೆ.
7. ಹೋಪ್ ವೇಗದ ಶತಕ: ಕೇವಲ 45 ಎಸೆತಗಳಲ್ಲಿ ಶತಕ ಪೂರೈಸಿದ ವಿಂಡೀಸ್ ನಾಯಕ ಶಾಯ್ ಹೋಪ್, ಭಾರತದ ವಿರುದ್ಧ ಟಿ20 ಯಲ್ಲಿ ಜಂಟಿ ಅತ್ಯಂತ ವೇಗದ ಶತಕ ಬಾರಿಸಿದ ಆಟಗಾರ ಎನಿಸಿಕೊಂಡರು. ಅಲ್ಲದೆ ಇದು ವೆಸ್ಟ್ ಇಂಡೀಸ್ ಪರ ದಾಖಲಾದ 2ನೇ ಅತಿ ವೇಗದ ಶತಕವಾಗಿದೆ.
8. ಅಯ್ಯರ್ ಗೆಲುವಿನ ಓಟಕ್ಕೆ ಬ್ರೇಕ್: ಭಾರತ ತಂಡದ ನಾಯಕರಾಗಿ ಸತತ 10 ಪಂದ್ಯಗಳನ್ನು ಗೆದ್ದಿದ್ದ ಶ್ರೇಯಸ್ ಅಯ್ಯರ್ ಅವರ ಅದ್ಭುತ ಗೆಲುವಿನ ಓಟಕ್ಕೆ ಈ ಸೋಲಿನ ಮೂಲಕ ಬ್ರೇಕ್ ಬಿದ್ದಿತು.
9. ಬೌಲರ್‌ಗಳ ಜಂಟಿ ದುಬಾರಿ ದಾಖಲೆ: ಭಾರತದ ಪ್ರಮುಖ ಸ್ಪಿನ್ನರ್ ಕುಲ್ದೀಪ್ ಯಾದವ್ ತಮ್ಮ 4 ಓವರ್‌ಗಳಲ್ಲಿ 53 ರನ್ ಬಿಟ್ಟುಕೊಟ್ಟರೆ, ಅಕ್ಷರ್ ಪಟೇಲ್ 3 ಓವರ್‌ಗಳಲ್ಲೇ 51 ರನ್ ನೀಡಿದರು. ಟಿ20 ಪಂದ್ಯವೊಂದರಲ್ಲಿ ಇಬ್ಬರು ಭಾರತೀಯ ಬೌಲರ್‌ಗಳು 50 ಕ್ಕೂ ಹೆಚ್ಚು ರನ್ ಬಿಟ್ಟುಕೊಟ್ಟ ಅಪರೂಪದ ಹಾಗೂ ಕಳಪೆ ದಾಖಲೆ ಇದಾಗಿದೆ.
10. ಸಿಕ್ಸರ್‌ಗಳ ವಿಂಡೀಸ್ ದಾಖಲೆ: ವೆಸ್ಟ್ ಇಂಡೀಸ್ ಬ್ಯಾಟರ್‌ಗಳು ಭಾರತದ ಬೌಲರ್‌ಗಳ ವಿರುದ್ಧ ಇನಿಂಗ್ಸ್ ಒಂದರಲ್ಲೇ ಬರೋಬ್ಬರಿ 20 ಸಿಕ್ಸರ್‌ಗಳನ್ನು ಸಿಡಿಸಿದರು. ಇದು ಭಾರತದ ವಿರುದ್ಧ ಟಿ20ಐನಲ್ಲಿ ಎದುರಾಳಿ ತಂಡವೊಂದು ಬಾರಿಸಿದ ಜಂಟಿ ಗರಿಷ್ಠ ಸಿಕ್ಸರ್‌ಗಳ ದಾಖಲೆಯಾಗಿದೆ.