IND vs WI: 4ನೇ ದಿನದಾಟ ಮುಕ್ತಾಯ; ಭಾರತದ ಗೆಲುವಿಗೆ 58 ರನ್ ಅಗತ್ಯ
India vs West Indies 2nd Test: ಭಾರತ-ವೆಸ್ಟ್ ಇಂಡೀಸ್ ನಡುವಿನ 2ನೇ ಟೆಸ್ಟ್ನ 4ನೇ ದಿನದಾಟ ಅಂತ್ಯಗೊಂಡಿದೆ. ದೆಹಲಿಯಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಭಾರತಕ್ಕೆ ಗೆಲ್ಲಲು ಕೇವಲ 58 ರನ್ ಬೇಕಾಗಿದೆ. 121 ರನ್ಗಳ ಗುರಿ ಬೆನ್ನಟ್ಟಿದ ಟೀಂ ಇಂಡಿಯಾ, ದಿನದ ಅಂತ್ಯಕ್ಕೆ 63/1 ಗಳಿಸಿದೆ. ಸಾಯಿ ಸುದರ್ಶನ್ ಮತ್ತು ಕೆಎಲ್ ರಾಹುಲ್ ಅಜೇಯರಾಗಿ ಕ್ರೀಸ್ನಲ್ಲಿದ್ದು, ವೆಸ್ಟ್ ಇಂಡೀಸ್ ಹೋರಾಟ ನೀಡಿದರೂ, 5ನೇ ದಿನ ಭಾರತಕ್ಕೆ ಗೆಲುವು ನಿಶ್ಚಿ
Updated on:Oct 13, 2025 | 5:46 PM
ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದಿದ್ದ ಭಾರತ ಹಾಗೂ ವೆಸ್ಟ್ ಇಂಡೀಸ್ (India vs West Indies) ನಡುವಿನ ಮೊದಲ ಟೆಸ್ಟ್ ಪಂದ್ಯ ಕೇವಲ ಮೂರೇ ದಿನಕ್ಕೆ ಮುಕ್ತಾಯಗೊಂಡಿತ್ತು. ಈ ಪಂದ್ಯವನ್ನು ಟೀಂ ಇಂಡಿಯಾ ಏಕಪಕ್ಷೀಯವಾಗಿ ಗೆದ್ದುಕೊಂಡಿತ್ತು. ಹೀಗಾಗಿ ಎರಡನೇ ಟೆಸ್ಟ್ ಪಂದ್ಯವೂ ಹಾಗೆಯೇ ಕೊನೆಗೊಳ್ಳಲಿದೆ ಎಂಬುದು ಎಲ್ಲರ ಅಭಿಪ್ರಾಯವಾಗಿತ್ತು. ಆದರೆ ಎರಡನೇ ಟೆಸ್ಟ್ ಪಂದ್ಯ ಬಹುಬೇಗನೇ ಮುಗಿಯಲು ಅವಕಾಶ ಮಾಡಿಕೊಡದ ವಿಂಡೀಸ್ ಪಡೆ ಈ ಪಂದ್ಯವನ್ನು ಐದನೇ ದಿನಕ್ಕೂ ಕೊಂಡೊಯ್ದಿದೆ. ಆದರೆ ಈ ಪಂದ್ಯದಲ್ಲೂ ವಿಂಡೀಸ್ ತಂಡ ಗೆಲುವು ಸಾಧಿಸುವುದು ಕಷ್ಟ. ಉಭಯ ತಂಡಗಳ ನಡುವೆ ದೆಹಲಿಯಲ್ಲಿ ನಡೆಯುತ್ತಿರುವ 2ನೇ ಟೆಸ್ಟ್ ಪಂದ್ಯದ ನಾಲ್ಕನೇ ದಿನದ ಆಟ ಮುಗಿದಿದೆ. ಗೆಲುವಿಗೆ 121 ರನ್ಗಳ ಗುರಿ ಬೆನ್ನಟ್ಟಿರುವ ಭಾರತ ತನ್ನ ಎರಡನೇ ಇನ್ನಿಂಗ್ಸ್ನಲ್ಲಿ ಒಂದು ವಿಕೆಟ್ಗೆ 63 ರನ್ ಕಲೆಹಾಕಿದ್ದು ಗೆಲುವಿನಿಂದ 58 ರನ್ಗಳ ದೂರದಲ್ಲಿದೆ.
ಟೀಂ ಇಂಡಿಯಾ ಗೆಲುವಿಗೆ 121 ರನ್ ಗುರಿ
ನಾಲ್ಕನೇ ದಿನದಾಟದ ಕೊನೆಯ ಸೆಷನ್ನಲ್ಲಿ ವೆಸ್ಟ್ ಇಂಡೀಸ್ ತಂಡವನ್ನು 390 ರನ್ಗಳಿಗೆ ಆಲೌಟ್ ಮಾಡಿದ ಟೀಂ ಇಂಡಿಯಾ ಗೆಲುವಿಗೆ 121 ರನ್ ಗುರಿ ಹೊತ್ತು ಅಖಾಡಕ್ಕಿಳಿಯಿತು. ಆದರೆ ಈ ಅಲ್ಪ ರನ್ಗಳ ಗುರಿ ಬೆನ್ನಟ್ಟಿದ ಭಾರತಕ್ಕೆ ಆರಂಭದಲ್ಲೇ ಆಘಾತ ಎದುರಾಯಿತು. ಮೊದಲ ಇನ್ನಿಂಗ್ಸ್ನಲ್ಲಿ 175 ರನ್ಗಳ ಇನ್ನಿಂಗ್ಸ್ ಆಡಿದ್ದ ಆರಂಭಿಕ ಯಶಸ್ವಿ ಜೈಸ್ವಾಲ್, ಎರಡನೇ ಇನ್ನಿಂಗ್ಸ್ನಲ್ಲಿ ಬಹುಬೇಗನೇ ಪಂದ್ಯ ಮುಗಿಸಲು ಕೈಹಾಕಿದರು. ಅದರಂತೆ 2 ಬೌಂಡರಿ ಮೂಲಕ 8 ರನ್ ಕೂಡ ಕಲೆಹಾಕಿದರು. ಆದರೆ ಸಿಕ್ಸರ್ ಬಾರಿಸುವ ಯತ್ನದಲ್ಲಿ ಕ್ಯಾಚಿತ್ತು ಔಟಾದರು. ಆ ಬಳಿಕ ಜೊತೆಯಾದ ರಾಹುಲ್ ಹಾಗೂ ಸುದರ್ಶನ್ ಅಜೇಯ ಅರ್ಧಶತಕದ ಜೊತೆಯಾಟವನ್ನಾಡಿದ್ದು, ಐದನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. ಸಾಯಿ ಸುದರ್ಶನ್ ಪ್ರಸ್ತುತ 30 ರನ್ ಮತ್ತು ಕೆಎಲ್ ರಾಹುಲ್ 25 ರನ್ ಗಳಿಸಿ ಅಜೇಯರಾಗಿದ್ದಾರೆ.
IND vs WI: ದೆಹಲಿ ಟೆಸ್ಟ್ ಗೆಲ್ಲಲು ಭಾರತಕ್ಕೆ 121 ರನ್ ಟಾರ್ಗೆಟ್ ನೀಡಿದ ವಿಂಡೀಸ್
390 ರನ್ ಗಳಿಸಿದ ವೆಸ್ಟ್ ಇಂಡೀಸ್
ಭಾರತ ತನ್ನ ಮೊದಲ ಇನ್ನಿಂಗ್ಸ್ ಅನ್ನು ಐದು ವಿಕೆಟ್ಗೆ 518 ರನ್ಗಳಿಸಿ ಡಿಕ್ಲೇರ್ ಮಾಡಿತ್ತು. ಇದಕ್ಕೆ ಉತ್ತರವಾಗಿ, ವೆಸ್ಟ್ ಇಂಡೀಸ್ನ ಮೊದಲ ಇನ್ನಿಂಗ್ಸ್ 248 ರನ್ಗಳಿಗೆ ಅಂತ್ಯವಾಯಿತು. ಹೀಗಾಗಿ 270 ರನ್ಗಳ ಮುನ್ನಡೆ ಸಾಧಿಸಿ ಭಾರತ ಫಾಲೋ-ಆನ್ ಹೇರಿತು. ಪ್ರತಿಕ್ರಿಯೆಯಾಗಿ, ವೆಸ್ಟ್ ಇಂಡೀಸ್ ತನ್ನ ಎರಡನೇ ಇನ್ನಿಂಗ್ಸ್ನಲ್ಲಿ 390 ರನ್ ಗಳಿಸಿತು. ವಿಂಡೀಸ್ ಪರ ಜಾನ್ ಕ್ಯಾಂಪ್ಬೆಲ್ ಮತ್ತು ಶೈ ಹೋಪ್ ಶತಕ ಗಳಿಸಿದರು. ಕ್ಯಾಂಪ್ಬೆಲ್ 115 ಮತ್ತು ಹೋಪ್ 103 ರನ್ ಬಾರಿಸಿದರು. ನಾಯಕ ರೋಸ್ಟನ್ ಚೇಸ್ 40 ರನ್ ಗಳಿಸಿದರೆ ಜಸ್ಟಿನ್ ಗ್ರೀವ್ಸ್ ಅಜೇಯ 50 ರನ್ ಗಳಿಸಿದರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 5:41 pm, Mon, 13 October 25
