VR Vanitha: 31ನೇ ವಯಸ್ಸಿಗೆ ನಿವೃತ್ತಿ ಘೋಷಿಸಿದ ಟೀಮ್ ಇಂಡಿಯಾ ಆಟಗಾರ್ತಿ
India womens team: ಜನವರಿ 2014 ರಲ್ಲಿ ಶ್ರೀಲಂಕಾ ವಿರುದ್ಧ ತಮ್ಮ ಚೊಚ್ಚಲ ಏಕದಿನ ಪಂದ್ಯವನ್ನಾಡುವ ಮೂಲಕ ಅಂತರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದ ವನಿತಾ ಆ ಬಳಿಕ ಕೆಲ ಸಮಯದವರೆಗೆ ತಂಡದ ಖಾಯಂ ಸದಸ್ಯರಾಗಿದ್ದರು.
Updated on: Feb 21, 2022 | 8:02 PM
ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಬ್ಯಾಟರ್ ವಿಆರ್ ವನಿತಾ ಅವರು 31 ನೇ ವಯಸ್ಸಿನಲ್ಲಿ ಅಂತರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ್ದಾರೆ. ಟ್ವಿಟರ್ ಮೂಲಕ ನಿವೃತ್ತಿ ಮಾಹಿತಿ ನೀಡಿದ್ದಾರೆ. ಇನ್ನು ತಮ್ಮ ವಿದಾಯ ಪತ್ರದಲ್ಲಿ ಭಾರತದ ಇಬ್ಬರು ದಿಗ್ಗಜ ಆಟಗಾರ್ತಿಯರಾದ ಜೂಲನ್ ಗೋಸ್ವಾಮಿ ಮತ್ತು ಮಿಥಾಲಿ ರಾಜ್ ಅವರಿಗೆ ಧನ್ಯವಾದ ಅರ್ಪಿಸಿದ್ದಾರೆ. ವನಿತಾ 2014 ರಿಂದ 2016 ರವರೆಗೆ ಭಾರತ ತಂಡದ ಪರ ಆರು ODI ಮತ್ತು 16 T20 ಪಂದ್ಯಗಳನ್ನು ಆಡಿದ್ದಾರೆ.
ಜನವರಿ 2014 ರಲ್ಲಿ ಶ್ರೀಲಂಕಾ ವಿರುದ್ಧ ತಮ್ಮ ಚೊಚ್ಚಲ ಏಕದಿನ ಪಂದ್ಯವನ್ನಾಡುವ ಮೂಲಕ ಅಂತರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದ ವನಿತಾ ಆ ಬಳಿಕ ಕೆಲ ಸಮಯದವರೆಗೆ ತಂಡದ ಖಾಯಂ ಸದಸ್ಯರಾಗಿದ್ದರು. ಇದೇ ಜೊತೆಗಿದ್ದ ಆಟಗಾರ್ತಿಯರಾದ ಮಿಥಾಲಿ ಮತ್ತು ಜೂಲನ್ ಅವರಿಗೆ ಮತ್ತು ತಂಡದ ಸಹ ಆಟಗಾರರಿಗೆ ಧನ್ಯವಾದ ಹೇಳಿದ್ದಾರೆ. ಇದಲ್ಲದೇ ಕರ್ನಾಟಕ ಮತ್ತು ಬಂಗಾಳ ಕ್ರಿಕೆಟ್ ಸಂಸ್ಥೆಗಳಿಗೂ ಧನ್ಯವಾದ ತಿಳಿಸಿದ್ದಾರೆ.
“ನಾನು 19 ವರ್ಷಗಳ ಹಿಂದೆ ಆಡಲು ಪ್ರಾರಂಭಿಸಿದಾಗ, ನಾನು ಕ್ರೀಡೆಯನ್ನು ಪ್ರೀತಿಸುವ ಚಿಕ್ಕ ಹುಡುಗಿ. ಇಂದಿಗೂ ನನ್ನ ಕ್ರಿಕೆಟ್ ಪ್ರೀತಿ ಹಾಗೇ ಉಳಿದಿದೆ. ಆದರೆ ಅದರ ದಿಕ್ಕು ಬದಲಾಗಿದೆ. ನನ್ನ ಮನಸ್ಸು ಆಟವಾಡಲು ಹೇಳುತ್ತದೆ. ಆದರೆ ನನ್ನ ದೇಹವು ಆಟವನ್ನು ನಿಲ್ಲಿಸಲು ಹೇಳುತ್ತದೆ. ಅದಕ್ಕಾಗಿಯೇ ನಾನು ಎಲ್ಲಾ ಮಾದರಿಯ ಕ್ರಿಕೆಟ್‌ನಿಂದ ನಿವೃತ್ತಿ ಘೋಷಿಸುತ್ತೇನೆ. ಇದು ಹೋರಾಟ, ಕಲಿಕೆ ಮತ್ತು ವೈಯಕ್ತಿಕ ಸಾಧನೆಗಳ ಸಮಯವಾಗಿದೆ. ನನಗೆ ಕೆಲವು ವಿಷಾದವಿದ್ದರೂ, ವಿಶೇಷವಾಗಿ ಭಾರತವನ್ನು ಪ್ರತಿನಿಧಿಸುವ ಅವಕಾಶಕ್ಕಾಗಿ ನಾನು ಕೃತಜ್ಞನಾಗಿದ್ದೇನೆ. ಇದು ಹೊಸ ಸವಾಲಿನ ಆರಂಭವೇ ಹೊರತು ಅಂತ್ಯವಲ್ಲ ಎಂದು ವಿಆರ್ ವನಿತಾ ಟ್ವಿಟರ್ನಲ್ಲಿ ಬರೆದುಕೊಂಡಿದ್ದಾರೆ.
ವನಿತಾ ತಮ್ಮ ಆರು ಏಕದಿನ ಪಂದ್ಯಗಳಲ್ಲಿ 85 ರನ್ ಕಲೆಹಾಕಿದ್ದಾರೆ. ಇದಲ್ಲದೇ 16 ಟಿ20 ಪಂದ್ಯಗಳಲ್ಲಿ 216 ರನ್ ಗಳಿಸಿದ್ದಾರೆ. 2021-22ರ ದೇಶೀಯ ಸೀಸನ್ನಲ್ಲಿ ವನಿತಾ ಬೆಂಗಾಲ್ ಮಹಿಳಾ ಸೀನಿಯರ್ ಏಕದಿನ ಟ್ರೋಫಿಯ ಸೆಮಿಫೈನಲ್ ಆಡಿದ್ದರು. ಆ ಸೀಸನ್ನಲ್ಲಿ ಅವರು ಒಟ್ಟು 225 ರನ್ ಗಳಿಸಿ ಮಿಂಚಿದ್ದರು.
ಇದನ್ನೂ ಓದಿ: AB de Villiers: ಸಿಡಿಲಬ್ಬರದ ಸಿಡಿಲಮರಿ ABDಯ ಈ 3 ದಾಖಲೆ ಮುರಿಯುವವರು ಯಾರು?
ಇದನ್ನೂ ಓದಿ: Rohit Sharma: ಬಾಬರ್ ದಾಖಲೆ ಮುರಿದು ಹೊಸ ಇತಿಹಾಸ ನಿರ್ಮಿಸಿದ ರೋಹಿತ್ ಶರ್ಮಾ
ಇದನ್ನೂ ಓದಿ: Sunil narine: ಸಿಡಿಲಬ್ಬರದ ಅರ್ಧಶತಕ ಸಿಡಿಸಿ ದಾಖಲೆ ಬರೆದ ಸುನಿಲ್ ನರೈನ್
