Virat Kohli: ವಿರಾಟ್ ಕೊಹ್ಲಿ ಪಾಲಿನ ಮಹತ್ವದ ಪಂದ್ಯ ಮತ್ತು RCBಯ ಎರಡು ಹೀನಾಯ ಸೋಲುಗಳು

ವಿರಾಟ್ ಕೊಹ್ಲಿಯ (Virat Kohli) 200ನೇ ಐಪಿಎಲ್ (IPL 2021) ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB)  9 ವಿಕೆಟ್ ಗಳಿಂದ ಹೀನಾಯ ಸೋಲು ಅನುಭವಿಸಿದೆ. ಅಬುಧಾಬಿಯ ಶೇಖ್ ಝಾಯೆದ್ ಕ್ರೀಡಾಂಗಣದಲ್ಲಿ ನಡೆದ ಕೊಲ್ಕತ್ತಾ ನೈಟ್ ರೈಡರ್ಸ್ (KKR)​ ವಿರುದ್ದದ ಪಂದ್ಯದಲ್ಲಿ ಕೊಹ್ಲಿ ಪಡೆ ಕೇವಲ 92 ರನ್​ಗಳಿಗೆ ಆಲೌಟ್ ಆಯಿತು. ಇತ್ತ ಸುಲಭ ಗುರಿ ಪಡೆದ ಕೆಕೆಆರ್ ಕೇವಲ 10 ಓವರ್‌ಗಳಲ್ಲಿ ಗುರಿ ಮುಟ್ಟುವ ಮೂಲಕ ಭರ್ಜರಿ ಗೆಲುವು ದಾಖಲಿಸಿತು. ಕಾಕತಾಳೀಯ ಎಂಬಂತೆ ಆರ್​ಸಿಬಿ (RCB) ತಂಡದ ಈ ಸೋಲು 13 ವರ್ಷಗಳ ಹಳೆಯ ಹೀನಾಯ ಸೋಲನ್ನು ನೆನಪಿಸುವಂತಿದೆ. ಏಕೆಂದರೆ ಆರ್​ಸಿಬಿ ತಂಡದ ಎರಡು ಅತ್ಯಂತ ಹೀನಾಯ ಸೋಲು ಕಂಡು ಬಂದಿದ್ದು ಕೆಕೆಆರ್​ ವಿರುದ್ದ. ಆ ಎರಡು ಪಂದ್ಯಗಳು ಕೂಡ ಕೊಹ್ಲಿ ಪಾಲಿಗೆ ಮಹತ್ವದ್ದಾಗಿತ್ತು ಎಂಬುದು ಇಲ್ಲಿ ವಿಶೇಷ.

ಹೌದು, 2008 ರಲ್ಲಿ ಚೊಚ್ಚಲ ಐಪಿಎಲ್​ನ ಮೊದಲ ಪಂದ್ಯದಲ್ಲಿ ಆರ್​ಸಿಬಿ ಹಾಗೂ ಕೆಕೆಆರ್ ಮುಖಾಮುಖಿಯಾಗಿತ್ತು. ಆ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಆರ್​ಸಿಬಿ ಪರ ಪದಾರ್ಪಣೆ ಮಾಡಿದ್ದರು. ಮೊದಲು ಬ್ಯಾಟಿಂಗ್ ಮಾಡಿದ್ದ ಕೆಕೆಆರ್ ಬ್ರೆಂಡನ್ ಮೆಕಲಂ ಅವರ ಅಜೇಯ 158 ರನ್​ಗಳ ಶತಕದೊಂದಿಗೆ 222 ರನ್​ ಬಾರಿಸಿತ್ತು. ಈ ಬೃಹತ್ ಮೊತ್ತವನ್ನು ಬೆನ್ನತ್ತಿದ ಆರ್​ಸಿಬಿ ಕೇವಲ 82 ರನ್​ಗಳಿಗೆ ಆಲೌಟ್ ಆಗಿ ಹೀನಾಯ ಸೋಲನುಭವಿಸಿತು. ಅಂದರೆ ಅಂದು ಆರ್​ಸಿಬಿ ಸೋತಿದ್ದು 140 ರನ್​ಗಳ ಬೃಹತ್ ಅಂತರದಿಂದ. ಇದು ರನ್​ಗಳ ಅಂತರದ ಆರ್​ಸಿಬಿ ತಂಡದ ಹೀನಾಯ ಸೋಲು ಎಂಬ ದಾಖಲೆ ಉಳಿಸಿಕೊಂಡಿದೆ. ಇನ್ನು ಐಪಿಎಲ್​ನ ಚೊಚ್ಚಲ ಪಂದ್ಯದಲ್ಲಿ ವಿರಾಟ್​ ಕೊಹ್ಲಿ ಗಳಿಸಿದ್ದು ಕೇವಲ 1 ರನ್​ ಮಾತ್ರ.

ಇದೀಗ ಕೆಕೆಆರ್ ವಿರುದ್ದ ಕಣಕ್ಕಿಳಿಯುವ ಮೂಲಕ ವಿರಾಟ್ ಕೊಹ್ಲಿ​ 200 ಪಂದ್ಯಗಳನ್ನು ಪೂರೈಸಿದ್ದಾರೆ. ತಮ್ಮ ಮಹತ್ವದ ಪಂದ್ಯದಲ್ಲಿ ಕೇವಲ 5 ರನ್​ಗೆ ವಿಕೆಟ್ ಒಪ್ಪಿಸಿದ್ದಾರೆ. ಇನ್ನು 92 ರನ್​ಗಳಿಗೆ ಆರ್​ಸಿಬಿಯನ್ನು ಆಲೌಟ್ ಮಾಡಿ ಕೆಕೆಆರ್​ 10 ಓವರ್​ನಲ್ಲಿ 1 ವಿಕೆಟ್ ನಷ್ಟಕ್ಕೆ ಗುರಿಮುಟ್ಟಿದೆ. ಈ ಮೂಲಕ 9 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ. ಅಷ್ಟೇ ಅಲ್ಲದೆ 60 ಎಸೆತಗಳು ಬಾಕಿಯಿರುವಾಗಲೇ ಆರ್​ಸಿಬಿ ತಂಡವನ್ನು ಬಗ್ಗು ಬಡಿಯುವ ಮೂಲಕ ಕೆಕೆಆರ್​ ಗೆಲುವು ದಾಖಲಿಸಿರುವುದು ವಿಶೇಷ. ಏಕೆಂದರೆ ಬಾಲ್​ಗಳ ಅಂತರದಲ್ಲಿ ಇದು ಆರ್​ಸಿಬಿ ಪಾಲಿನ ಅತ್ಯಂತ ಹೀನಾಯ ಸೋಲು. ಅಂದರೆ ಕಾಕತಾಳೀಯ ಎಂಬಂತೆ ಕೊಹ್ಲಿಯ ಪಾಲಿನ ಮಹತ್ವದ ಎರಡು ಪಂದ್ಯಗಳಲ್ಲೇ ಆರ್​ಸಿಬಿ ಐಪಿಎಲ್​ನ ಅತ್ಯಂತ ಹೀನಾಯ ಸೋಲನ್ನು ಅನುಭವಿಸಿರುವುದು ಇಲ್ಲಿ ವಿಶೇಷ.

ಇದನ್ನೂ ಓದಿ: Virat Kohli: ನಮಗೆ ಸೋಲುಣಿಸಿದ ಆತನೇ ನಮ್ಮ ಪ್ರಮುಖ ಅಸ್ತ್ರ..!

ಇದನ್ನೂ ಓದಿ: Virat Kohli: ಐಪಿಎಲ್ ಇತಿಹಾಸದಲ್ಲೇ ಹೊಸ ದಾಖಲೆ ಬರೆದ ವಿರಾಟ್ ಕೊಹ್ಲಿ

ಇದನ್ನೂ ಓದಿ: 90 ಕಿ.ಮೀ ಮೈಲೇಜ್ ನೀಡುವ ಕಡಿಮೆ ಬೆಲೆಯ ಬೈಕ್​ಗಳ ಪಟ್ಟಿ ಇಲ್ಲಿದೆ

ಇದನ್ನೂ ಓದಿ: IPL 2021: ಪ್ಲೇ ಆಫ್​ ಪ್ರವೇಶಿಸುವ 4 ತಂಡಗಳನ್ನು ಹೆಸರಿಸಿದ ಗೌತಮ್ ಗಂಭೀರ್

(Virat Kohli IPL debut KKR biggest win and Kohli 200 match RCB biggest defeat)