ರಫೇಲ್ ಅವ್ಯವಹಾರ ಶಂಕೆಗೆ ಮತ್ತೆ ಪುಷ್ಟಿ: ಖರೀದಿ ಒಪ್ಪಂದ ನಂತರ ಭಾರತೀಯ ಮಧ್ಯವರ್ತಿಗೆ 10 ಲಕ್ಷ ಯೂರೋ ಮೌಲ್ಯದ ಗಿಫ್ಟ್​?

ಪ್ಯಾರೀಸ್: ರಫೇಲ್ ಯುದ್ಧವಿಮಾನಗಳ ತಯಾರಕರಾದ ಡಸ್ಸಾ (Dassault) ಕಂಪನಿಯು 2016ರಲ್ಲಿ ವಿಮಾನ ಖರೀದಿ ಒಪ್ಪಂದದ ನಂತರ ಭಾರತೀಯ ಮಧ್ಯವರ್ತಿಗಳಿಗೆ 10 ಲಕ್ಷ ಯೂರೋ ಪಾವತಿಗೆ ಒಪ್ಪಿಕೊಂಡಿತ್ತು ಎಂಬ ಸಂಗತಿಯನ್ನು ಫ್ರೆಂಚ್​ ಮಾಧ್ಯಮ ಸಂಸ್ಥೆ ಮೀಡಿಯಾಪಾರ್ಟ್​ ಬಹಿರಂಗಪಡಿಸಿದೆ. 2017ರ ಡಸ್ಸಾ ಸಮೂಹದ ಲೆಕ್ಕಪತ್ರಗಳನ್ನು ಪರಿಶೀಲಿಸಿದಾಗ 5,08,925 ಯೂರೋ ಮೊತ್ತದಷ್ಟು ಹಣವನ್ನು ‘ಗ್ರಾಹಕರಿಗೆ ಗಿಫ್ಟ್​’ ಲೆಕ್ಕಶೀರ್ಷಿಕೆಯಡಿ ವ್ಯಯಿಸಿರುವುದು ಪತ್ತೆಯಾಗಿದೆ. ಫ್ರಾನ್ಸ್​ ದೇಶದ ಭ್ರಷ್ಟಾಚಾರ ನಿಗ್ರಹ ದಳವಾದ ಏಜೆನ್ಸ್​ ಫ್ರಾನ್ಸೈಸ್ ಆ್ಯಂಟಿಕರಪ್ಷನ್ (ಎಎಫ್​ಎ) ಡಸ್ಸಾ ಸಂಸ್ಥೆಯ ಲೆಕ್ಕಪತ್ರ ತಪಾಸಣೆ ನಡೆಸಿದ ವೇಳೆ ಈ ಅಂಶವು ಪತ್ತೆಯಾಗಿದೆ.

‘ರಫೇಲ್ ಯುದ್ಧ ವಿಮಾನಗಳ 50 ಬೃಹತ್ ಪ್ರತಿರೂಪಗಳನ್ನು ತಯಾರಿಸಲು ಈ ಹಣ ಬಳಕೆಯಾಗಿದೆ’ ಎಂದು ಡಸ್ಸಾ ಸಮೂಹವು ಹೇಳಿದೆ. ಆದರೆ ಇಂಥ ಪ್ರತಿರೂಪಗಳನ್ನು ತಯಾರಿಸಲಾಗಿತ್ತು ಎಂದು ಸಾಬೀತುಪಡಿಸುವ ಯಾವುದೇ ಸಾಕ್ಷ್ಯವನ್ನು ತನಿಖಾಧಿಕಾರಿಗಳಿಗೆ ನೀಡಿಲ್ಲ’ ಎಂಬ ಸಂಗತಿ ಗೌಪ್ಯವರದಿಯಲ್ಲಿದೆ ಎಂದು ಮೀಡಿಯಾಪಾರ್ಟ್​ ತಿಳಿಸಿದೆ.

ಕಂಪನಿಯ ಇತರ ಲೆಕ್ಕಪತ್ರಗಳನ್ನು ಗಮನಿಸಿದಾಗ ಈ ಮೊತ್ತದ ವೆಚ್ಚಕ್ಕೆ ನೀಡಿರುವ ಆಧಾರಗಳು ಸಮರ್ಪಕವಾಗಿಲ್ಲ ಎನಿಸುತ್ತದೆ. ಆದರೆ ಫ್ರಾನ್ಸ್​ ಭ್ರಷ್ಟಾಚಾರ ನಿಗ್ರಹ ದಳವು (ಎಎಫ್​ಎ) ಈವರೆಗೆ ಈ ವ್ಯವಹಾರದಲ್ಲಿ ಅಕ್ರಮ ನಡೆದಿರಬಹುದು ಎಂದು ಸರ್ಕಾರದ ಗಮನಕ್ಕೆ ಅಧಿಕೃತವಾಗಿ ತಂದಿಲ್ಲ. ಇದರಿಂದಾಗಿ ಫ್ರಾನ್ಸ್​ನ ನ್ಯಾಯಾಂಗ ಮತ್ತು ರಾಜಕೀಯ ಅಧಿಕಾರ ಸ್ಥಾನಗಳ ಬಗ್ಗೆ ಹಲವು ಪ್ರಶ್ನೆಗಳು ಉದ್ಭವಿಸಿವೆ ಎಂದು ಫ್ರೆಂಚ್​ ಮಾಧ್ಯಮಸಂಸ್ಥೆ ಮೀಡಿಯಾಪಾರ್ಟ್​ ಹೇಳಿದೆ.

ರಫೇಲ್ ವ್ಯವಹಾರದಲ್ಲಿ ಅಕ್ರಮ ನಡೆದಿರಬಹುದು ಎಂಬ ಆರೋಪದ ಬಗ್ಗೆ ಸುಳಿವೊಂದನ್ನು ಫ್ರಾನ್ಸ್​ನ ಹಣಕಾಸು ಅಪರಾಧಗಳ ವಿಭಾಗದ ಪಬ್ಲಿಕ್ ಪ್ರಾಸಿಕ್ಯೂಷನ್ ಸರ್ವೀಸ್ ಅಕ್ಟೋಬರ್ 2018ರಲ್ಲಿ ಪಡೆದುಕೊಂಡಿತ್ತು. ಮೀಡಿಯಾಪಾರ್ಟ್​ಗೆ ಸಿಕ್ಕಿರುವ ಎಎಫ್​ಎ ವರದಿಯು ಡಸ್ಸಾ ಕಂಪನಿಯು ಈ ‘ಸಾಮಾನ್ಯಕ್ಕಿಂತಲೂ ದೊಡ್ಡದಾದ ಗಿಫ್ಟ್​’ ನೀಡಿರುವುದನ್ನು ಡೆಫ್ಸಿಸ್​ ಸಲ್ಯೂಷನ್ಸ್​ ಎಂಬ ಭಾರತೀಯ ಕಂಪನಿಯಿಂದ ಪಡೆದುಕೊಂಡ ಇನ್​ವಾಯ್ಸ್ (ರಸೀದಿ)​ ಮೂಲಕ ಸಮರ್ಥಿಸಿಕೊಳ್ಳಲು ಯತ್ನಿಸುತ್ತಿದೆ.

ಮಾರ್ಚ್​ 30, 2017ರ ದಿನಾಂಕದ ಈ ಇನ್​ವಾಯ್ಸ್ ಪ್ರಕಾರ ರಫೇಲ್​ ಜೆಟ್​ಗಳ 50 ಡಮ್ಮಿ ಮಾದರಿಗಳನ್ನು ಸಿದ್ಧಪಡಿಸಲು ಡೆಫ್ಸಿಸ್​ ಸಲ್ಯೂಷನ್ಸ್​ಗೆ 10,17,850 ಯೂರೊ ನೀಡಲಾಗಿದೆ. ಪ್ರತಿ ಮಾದರಿಗೂ 20,357 ಯೂರೊಗಳಷ್ಟು ದೊಡ್ಡ ಮೊತ್ತವನ್ನು ನಿಗದಿಪಡಿಸಲಾಗಿದೆ ಎಂದು ಎಎಫ್​ಎ ವರದಿ ತಿಳಿಸಿದೆ. ಈ ರೀತಿಯ ಮಾದರಿಗಳು ಅಸ್ತಿತ್ವದಲ್ಲಿರುವ ಬಗ್ಗೆ ಎಎಫ್​ಎ ಇನ್​ಸ್ಪೆಕ್ಟರ್​ಗಳು ಈ ಸಂಬಂಧ ಕೇಳಿದ ಯಾವುದೇ ದಾಖಲೆಗಳನ್ನು ಒದಗಿಸಲು ಡಸ್ಸಾ ಗ್ರೂಪ್​ಗೆ ಸಾಧ್ಯವಾಗಿಲ್ಲ. ಈ ವೆಚ್ಚವನ್ನು ಗ್ರಾಹಕರಿಗೆ ನೀಡಿದ ಕೊಡುಗೆಗಳು ವಿಭಾಗದಡಿ ಏಕೆ ಪಟ್ಟಿಮಾಡಲಾಯಿತು ಎಂಬ ಪ್ರಶ್ನೆಗೂ ಡಸ್ಸಾ ಉತ್ತರಿಸಿಲ್ಲ.

ವಿವಾದಾತ್ಮಕ ವ್ಯಾಪಾರಿ ಸುಶೇನ್ ಗುಪ್ತ ಅವರು ಮುಖ್ಯಸ್ಥಾನದಲ್ಲಿರುವ ಡೆಫ್ಸಿಸ್​ ಸಲ್ಯೂಷನ್ಸ್​ ಭಾರತದಲ್ಲಿ ಡಸ್ಸಾ ಕಂಪನಿಯ ಮುಖ್ಯ ಉಪಗುತ್ತಿಗೆದಾರ ಸಂಸ್ಥೆಯಾಗಿದೆ. ಅಗಸ್ಟಾ ವೆಸ್ಟ್​ಲ್ಯಾಂಡ್​ ಹೆಲಿಕಾಪ್ಟರ್​ ಹಗರಣದಲ್ಲಿ ಈ ಹಿಂದೆ ಸುಶೇನ್ ಗುಪ್ತ ಅವರನ್ನು ಬಂಧಿಸಲಾಗಿತ್ತು. ಅತಿಗಣ್ಯವ್ಯಕ್ತಿಗಳ ಹಾರಾಟಕ್ಕೆಂದು ಅಗಸ್ಟಾ ವೆಸ್ಟ್​ಲೆಂಡ್ ಕಂಪನಿಯಿಂದ ಹೆಲಿಕಾಪ್ಟರ್​ಗಳ ಖರೀದಿವೇಳೆ ಕೆಲವರಿಗೆ ಕಮಿಷನ್ ನೀಡಲೆಂದು ಸುಶೇನ್ ಗುಪ್ತ ಅಕ್ರಮ ಹಣ ವರ್ಗಾವಣೆ ಯೋಜನೆಯೊಂದನ್ನು ರೂಪಿಸಿದ್ದ ಬಗ್ಗೆ ಜಾರಿ ನಿರ್ದೇಶನಾಲಯ ಆರೋಪ ಮಾಡಿತ್ತು. ಇದೀಗ ಬೆಳಕಿಗೆ ಬಂದಿರುವ ರಫೇಲ್ ಖರೀದಿ ಅವ್ಯವಹಾರದ ಬಗ್ಗೆಯೂ ಡಸ್ಸಾ ಮತ್ತು ಡೆಫ್ಸಿಸ್​ ಈವರೆಗೆ ಯಾವುದೇ ಹೇಳಿಕೆ ಬಿಡುಗಡೆ ಮಾಡಿಲ್ಲ.

ಡಸ್ಸಾ ಸಂಸ್ಥೆಯ ಅವ್ಯವಹಾರವನ್ನು ಬಯಲಿಗೆಳೆದ ಮೀಡಿಯಾಪಾರ್ಟ್​ ವರದಿಗಾರ ಯಾನ್ ಫಿಲಿಪಿನ್ ಭಾರತೀಯ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿ, ಮೂರು ಕಂತುಗಳ ವರದಿಯ ಮೊದಲ ಕಂತು ಮಾತ್ರ ಇದೀಗ ಪ್ರಕಟವಾಗಿದೆ. ವರದಿಯ 3ನೇ ಕಂತಿನಲ್ಲಿ ಅತಿಮುಖ್ಯ ಮಾಹಿತಿಯಿದೆ ಎಂದು ಹೇಳಿದ್ದಾರೆ.

2016ರಲ್ಲಿ 36 ರಫೇಲ್ ಯುದ್ಧ ವಿಮಾನಗಳನ್ನು ಖರೀದಿಸಲು ಭಾರತ ಮತ್ತು ಫ್ರಾನ್ಸ್​ ಸರ್ಕಾರಗಳ ನಡುವೆ 7.8 ಶತಕೋಟಿ ಶಾಲರ್ ಮೊತ್ತದ ಒಪ್ಪಂದ ಆಗಿದೆ. ಅಂಬಾಲಾ ವಾಯುನೆಲೆಯಲ್ಲಿ ಭಾರತೀಯ ವಾಯುಪಡೆಯು ಈಗಾಗಲೇ ರಫೇಲ್​ ಜೆಟ್​ಗಳ ಮೊದಲ ಸ್ಕ್ವಾರ್ಡನ್ ಸ್ಥಾಪಿಸಿದೆ. ಪಶ್ಚಿಮ ಬಂಗಾಳದ ಹಾಸಿಮಾರಾದಲ್ಲಿ 2ನೇ ಸ್ಕ್ವಾರ್ಡನ್ ಸ್ಥಾಪಿಸಲು ಭಾರತೀಯ ವಾಯುಪಡೆ ಉದ್ದೇಶಿಸಿದೆ.

(Dassault paid 1 million euro as gift to Indian middleman in Rafale deal report mediapart citing France anti corruption bureau report)

ಇದನ್ನೂ ಓದಿ: ರೋಮಾಂಚಕಾರಿ ‘ವರ್ಟಿಕಲ್ ಚಾರ್ಲಿ’ ಹಾಗೂ ‘ಏಕಲವ್ಯ’ ಪ್ರದರ್ಶನ ತೋರಿದ ರಫೇಲ್ ಜೆಟ್ ವಿಮಾನ

ಇದನ್ನೂ ಓದಿ: ಭಾರತಕ್ಕೆ ಬಂದಿಳಿಯಿತು ಇನ್ನೂ 3 ರಫೇಲ್​ ಯುದ್ಧ ವಿಮಾನ

Published On - 3:03 pm, Mon, 5 April 21