ಅಫ್ಘಾನಿಸ್ತಾನದ ಮೇಲೆ ಪಾಕಿಸ್ತಾನ ವಾಯುಸೇನೆ ಏರ್‌ಸ್ಟ್ರೈಕ್: ಕುನಾರ್, ಪಕ್ತಿಕಾದಲ್ಲಿ ಬಾಂಬ್ ದಾಳಿಗೆ ಮೂವರು ಸಾವು, ಹಲವರಿಗೆ ಗಾಯ

ಕಾಬೂಲ್, ಸೆಪ್ಟೆಂಬರ್ 21: ಗಡಿಯಾಚೆಗಿನ ಉಗ್ರರ ಉಪಟಳದ ಆರೋಪದ ಹಿನ್ನೆಲೆಯಲ್ಲಿ ಪಾಕಿಸ್ತಾನ ಮತ್ತು ಅಫ್ಘಾನಿಸ್ತಾನದ ತಾಲಿಬಾನ್ ಆಡಳಿತದ ನಡುವೆ ಉದ್ವಿಗ್ನತೆ ತಾರಕಕ್ಕೇರಿದೆ. ಸೋಮವಾರ ಮುಂಜಾನೆ ಅಫ್ಘಾನಿಸ್ತಾನದ ಕುನಾರ್ ಮತ್ತು ಪಕ್ತಿಕಾ ಪ್ರಾಂತ್ಯಗಳ ಮೇಲೆ ಪಾಕಿಸ್ತಾನ ವಾಯುಪಡೆ ಯುದ್ಧ ವಿಮಾನಗಳಿಂದ ಭೀಕರ ವೈಮಾನಿಕ ದಾಳಿ ನಡೆಸಿದೆ. ಕುನಾರ್‌ನಲ್ಲಿ ನಡೆದ ದಾಳಿಯಲ್ಲಿ ಕನಿಷ್ಠ ಮೂವರು ಸಾವನ್ನಪ್ಪಿದ್ದು, ಹಲವರು ಗಾಯಗೊಂಡಿದ್ದಾರೆ. ಈ ದಾಳಿಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ತಾಲಿಬಾನ್, ತನ್ನ ಸಾರ್ವಭೌಮತ್ವಕ್ಕೆ ಧಕ್ಕೆ ತಂದರೆ ಭೀಕರ ಪರಿಣಾಮ ಎದುರಿಸಬೇಕಾಗುತ್ತದೆ ಎಂದು ಇಸ್ಲಾಮಾಬಾದ್‌ಗೆ ನೇರ ಎಚ್ಚರಿಕೆ ನೀಡಿದೆ.

ಕುನಾರ್ ಮತ್ತು ಪಕ್ತಿಕಾದಲ್ಲಿ ಬಾಂಬ್ ದಾಳಿ: ಸೋಮವಾರ ಮುಂಜಾನೆ ಪಾಕಿಸ್ತಾನದ ಯುದ್ಧ ವಿಮಾನಗಳು ಅಫ್ಘಾನ್ ಗಡಿಯೊಳಗೆ ನುಗ್ಗಿ ಬಾಂಬ್ ಸುರಿಸಿವೆ. ಪಕ್ತಿಕಾ ಪ್ರಾಂತ್ಯದ ಬರ್ಮಲ್ ಜಿಲ್ಲೆಯ ರಖಾ ಮತ್ತು ತೋರ್ಕಂಡಿ ಪ್ರದೇಶಗಳಲ್ಲಿ ಖಾಲಿ ಮನೆ ಮತ್ತು ಅಂಗಡಿಯೊಂದರ ಮೇಲೆ ದಾಳಿ ನಡೆದಿದ್ದು, ಯಾವುದೇ ಸಾವುನೋವು ಸಂಭವಿಸಿಲ್ಲ. ಆದರೆ ಕುನಾರ್ ಪ್ರಾಂತ್ಯದಲ್ಲಿ ನಡೆದ ವಾಯುದಾಳಿಯಲ್ಲಿ ಮೂವರು ಮೃತಪಟ್ಟಿದ್ದು, ಹಲವರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಪಾಕಿಸ್ತಾನದ ಸಮರ್ಥನೆ: ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನ್ (ಟಿಟಿಪಿ) ಸೇರಿದಂತೆ ವಿವಿಧ ಉಗ್ರ ಸಂಘಟನೆಗಳು ಪಾಕ್ ನೆಲದಲ್ಲಿ ರಕ್ತಪಾತ ನಡೆಸಲು ಅಫ್ಘಾನಿಸ್ತಾನದ ನೆಲವನ್ನು ತರಬೇತಿ ಮತ್ತು ಶಸ್ತ್ರಾಸ್ತ್ರ ಪೂರೈಕೆಗೆ ಬಳಸಿಕೊಳ್ಳುತ್ತಿವೆ; ತಮ್ಮ ದೇಶದ ಭದ್ರತಾ ಹಿತದೃಷ್ಟಿಯಿಂದ ಈ ಕ್ರಮ ಅನಿವಾರ್ಯ ಎಂದು ಪಾಕಿಸ್ತಾನ ಸೇನೆ ಸಮರ್ಥಿಸಿಕೊಂಡಿದೆ.

ತಾಲಿಬಾನ್ ವಕ್ತಾರನ ಎಚ್ಚರಿಕೆ: ಪಾಕಿಸ್ತಾನದ ಆರೋಪಗಳನ್ನು ಸಾರಾಸಾಗಟಾಗಿ ತಳ್ಳಿಹಾಕಿರುವ ತಾಲಿಬಾನ್ ವಕ್ತಾರ ಜಬಿಹುಲ್ಲಾ ಮುಜಾಹಿದ್, “ವಿಶ್ವಸಂಸ್ಥೆಯ ಚಾರ್ಟರ್‌ನ ಆರ್ಟಿಕಲ್ ೫೧ (ಆತ್ಮರಕ್ಷಣೆಯ ಹಕ್ಕು) ನೆಪವೊಡ್ಡಿ ಪಾಕಿಸ್ತಾನ ನಮ್ಮ ದೇಶದ ಗಡಿ ಮತ್ತು ಸಾರ್ವಭೌಮತ್ವವನ್ನು ಉಲ್ಲಂಘಿಸಿದರೆ, ತನ್ನ ರಕ್ಷಣೆ ಮಾಡಿಕೊಳ್ಳುವ ಸಂಪೂರ್ಣ ಹಕ್ಕು ಅಫ್ಘಾನಿಸ್ತಾನಕ್ಕಿದೆ ಮತ್ತು ನಾವು ತಕ್ಕ ಪ್ರತ್ಯುತ್ತರ ನೀಡಲಿದ್ದೇವೆ” ಎಂದು ಗುಡುಗಿದ್ದಾರೆ.

ಅಫ್ಘಾನಿಸ್ತಾನದಲ್ಲಿರುವ ವಿಶ್ವಸಂಸ್ಥೆಯ ಮಿಷನ್ (UNAMA) ಪ್ರಕಾರ, ಗಡಿಯಾಚೆಗಿನ ಪಾಕ್ ಮಿಲಿಟರಿ ದಾಳಿಗಳಿಂದ ಅಮಾಯಕ ಜನಸಾಮಾನ್ಯರು ಜೀವ ಕಳೆದುಕೊಳ್ಳುತ್ತಿದ್ದಾರೆ. 2026ರ ಏಪ್ರಿಲ್‌ನಿಂದ ಜೂನ್‌ವರೆಗಿನ ಮೂರು ತಿಂಗಳಲ್ಲಿ ಪಾಕ್ ಪಡೆಗಳ ದಾಳಿಯಿಂದಾಗಿ 57 ಸಾವುಗಳು ಮತ್ತು 352 ಗಾಯಗಳು ಸೇರಿದಂತೆ ಒಟ್ಟು 399 ನಾಗರಿಕ ಸಾವುನೋವುಗಳು ಸಂಭವಿಸಿವೆ. ಇದರಲ್ಲಿ 26 ಮಕ್ಕಳು ಮತ್ತು ೬ ಮಹಿಳೆಯರು ಮೃತಪಟ್ಟಿದ್ದಾರೆ.

ಮತ್ತಷ್ಟು ಓದಿ:ಸರ್ವನಾಶವೋ, ಆರ್ಥಿಕ ದಿವಾಳಿತನವೋ ಅಥವಾ ಡೀಲೋ?: ಇರಾನ್​ ಎದುರು ಟ್ರಂಪ್ ಇಟ್ಟ 3 ಆಯ್ಕೆಗಳು, ಹಾರ್ಮುಜ್‌ನಲ್ಲಿ ಹೈ ಅಲರ್ಟ್

ಬ್ರಿಟಿಷರ ಕಾಲದಲ್ಲಿ ಎಳೆಯಲಾದ 2,640 ಕಿ.ಮೀ. ಉದ್ದದ ‘ಡುರಾಂಡ್ ಲೈನ್’ ಗಡಿಯನ್ನು ಅಫ್ಘಾನಿಸ್ತಾನವು ಎಂದಿಗೂ ಅಧಿಕೃತ ಅಂತಾರಾಷ್ಟ್ರೀಯ ಗಡಿಯೆಂದು ಸಂಪೂರ್ಣವಾಗಿ ಒಪ್ಪಿಕೊಂಡಿಲ್ಲ. ಪಾಕಿಸ್ತಾನ ಈ ಗಡಿಯಲ್ಲಿ ತಂತಿಬೇಲಿ ಅಳವಡಿಸಲು ಆರಂಭಿಸಿದಾಗಿನಿಂದ ಉಭಯ ದೇಶಗಳ ನಡುವೆ ಸಶಸ್ತ್ರ ಘರ್ಷಣೆಗಳು ನಿರಂತರವಾಗಿ ನಡೆಯುತ್ತಿವೆ.

ವಿಡಿಯೋ

Pakistani army bombs Afghanistan

Afghan media: Pakistani military carried out airstrikes on the Islamic Emirate of Afghanistan, targeting civilian areas in Nurgal district of Kunar and Barmal district of Paktika early this morning, Monday

Local officials in Kunar said 3… pic.twitter.com/emBBOD4Wxr

— Warfare Analysis (@warfareanalysis) September 21, 2026

ಟಿಟಿಪಿ (TTP) ತಂದಿಟ್ಟ ವೈಷಮ್ಯ: ಕಾಬೂಲ್‌ನಲ್ಲಿ ತಾಲಿಬಾನ್ ಅಧಿಕಾರಕ್ಕೆ ಬಂದ ನಂತರ ಪಾಕಿಸ್ತಾನದಲ್ಲಿ ತೆಹ್ರೀಕ್-ಎ-ತಾಲಿಬಾನ್ ಪಾಕಿಸ್ತಾನ್ ಉಗ್ರರ ಉಪಟಳ ತೀವ್ರಗೊಂಡಿದೆ. ತಾಲಿಬಾನ್ ಸರ್ಕಾರವು ಟಿಟಿಪಿಗೆ ಆಶ್ರಯ ನೀಡುತ್ತಿದೆ ಎಂದು ಪಾಕಿಸ್ತಾನ ಆರೋಪಿಸುತ್ತಿದ್ದರೆ, ತನ್ನ ಆಂತರಿಕ ಭದ್ರತಾ ವೈಫಲ್ಯವನ್ನು ಮುಚ್ಚಿಕೊಳ್ಳಲು ಪಾಕಿಸ್ತಾನ ನಮ್ಮ ಮೇಲೆ ಗೂಬೆ ಕೂರಿಸುತ್ತಿದೆ ಎಂದು ತಾಲಿಬಾನ್ ಪ್ರತ್ಯಾರೋಪ ಮಾಡುತ್ತಿದೆ.

ಮಾನವೀಯ ಬಿಕ್ಕಟ್ಟು: ಗಡಿ ಪ್ರಾಂತ್ಯಗಳಾದ ಕುನಾರ್, ಪಕ್ತಿಕಾ ಮತ್ತು ಪಕ್ತ್ಯಾಗಳಲ್ಲಿ ನಿರಂತರ ನಡೆಯುತ್ತಿರುವ ಶೆಲ್ ದಾಳಿ ಮತ್ತು ವಾಯುದಾಳಿಗಳಿಂದಾಗಿ ಸಾವಿರಾರು ಗಡಿ ನಿವಾಸಿ ಕುಟುಂಬಗಳು ಮನೆಗಳನ್ನು ತೊರೆದು ಆಂತರಿಕವಾಗಿ ಸ್ಥಳಾಂತರಗೊಳ್ಳುತ್ತಿದ್ದು, ಆ ಭಾಗದಲ್ಲಿ ತೀವ್ರ ಮಾನವೀಯ ಬಿಕ್ಕಟ್ಟು ಸೃಷ್ಟಿಯಾಗಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 12:24 pm, Mon, 21 September 26