ಯುದ್ಧದ ನಡುವೆಯೇ ಪುಟಿನ್‌ಗೆ ಜನಾಶೀರ್ವಾದ: ರಷ್ಯಾದ ಡುಮಾದಲ್ಲಿ 355 ಸೀಟುಗಳೊಂದಿಗೆ ‘ಯುನೈಟೆಡ್ ರಷ್ಯಾ’ಗೆ ದಾಖಲೆಯ ಸೂಪರ್-ಮೆಜಾರಿಟಿ

ಮಾಸ್ಕೋ, ಸೆಪ್ಟೆಂಬರ್ 22: ಉಕ್ರೇನ್ ವಿರುದ್ಧದ ಯುದ್ಧ ಆರಂಭವಾದ ಬಳಿಕ ರಷ್ಯಾದಲ್ಲಿ ನಡೆದ ಮೊದಲ ರಾಷ್ಟ್ರೀಯ ಸಂಸತ್ ಚುನಾವಣೆಯಲ್ಲಿ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ‘ಯುನೈಟೆಡ್ ರಷ್ಯಾ’ ಪಕ್ಷ ಭರ್ಜರಿ ಜಯ ಸಾಧಿಸಿದೆ. ಸಂಸತ್ತಿನ ಕೆಳಮನೆಯಾದ ‘ಡುಮಾ’ದ ಒಟ್ಟು 450 ಸ್ಥಾನಗಳಲ್ಲಿ ಬರೋಬ್ಬರಿ 355 ಸ್ಥಾನಗಳನ್ನು ಗೆಲ್ಲುವ ಮೂಲಕ ಅಗತ್ಯವಿದ್ದರೆ ಸಂವಿಧಾನವನ್ನೇ ಬದಲಿಸಬಲ್ಲ ಪ್ರಚಂಡ ಸೂಪರ್-ಮೆಜಾರಿಟಿಯೊಂದಿಗೆ ಪುಟಿನ್ ತಮ್ಮ ಹಿಡಿತವನ್ನು ಮತ್ತಷ್ಟು ಬಲಪಡಿಸಿಕೊಂಡಿದ್ದಾರೆ.

ಉಕ್ರೇನ್‌ನಿಂದ ರಾಜಧಾನಿ ಮಾಸ್ಕೋ ಮೇಲೆ ಸರಣಿ ಡ್ರೋನ್ ದಾಳಿಗಳು ನಡೆಯುತ್ತಿದ್ದ ಹೊತ್ತಿನಲ್ಲೇ ಮುಕ್ತಾಯಗೊಂಡ ರಷ್ಯಾ ಸಂಸತ್ ಚುನಾವಣೆಯಲ್ಲಿ ಪುಟಿನ್ ಬೆಂಬಲಿತ ಆಡಳಿತಾರೂಢ ಪಡೆ ಅಪ್ರತಿಮ ಗೆಲುವು ಕಂಡಿದೆ. ಶೇ.59 ಕ್ಕೂ ಹೆಚ್ಚು ಮತದಾನದೊಂದಿಗೆ ನಡೆದ ಈ ಸಮರದಲ್ಲಿ 355 ಸೀಟುಗಳನ್ನು ಬಾಚಿಕೊಂಡ ಯುನೈಟೆಡ್ ರಷ್ಯಾ ಪಕ್ಷ, ಯುದ್ಧದ ಸಂಕಷ್ಟಗಳ ನಡುವೆಯೂ ಜನಾದೇಶ ತನ್ನ ಪರವಾಗಿಯೇ ಇದೆ ಎಂಬುದನ್ನು ಜಗತ್ತಿಗೆ ಸಾರಿದೆ.

ಸಂವಿಧಾನ ಬದಲಿಸುವ ಅಧಿಕಾರ: ಡುಮಾದಲ್ಲಿ ಸಂವಿಧಾನ ತಿದ್ದುಪಡಿ ಮಾಡಲು ಕನಿಷ್ಠ 301 ಸ್ಥಾನಗಳ ‘ಸಾಂವಿಧಾನಿಕ ಬಹುಮತ’ ಬೇಕು. ಪುಟಿನ್ ಪಕ್ಷ 355 ಸ್ಥಾನಗಳನ್ನು ಗೆದ್ದಿರುವುದರಿಂದ, ಪುಟಿನ್ ಯಾವುದೇ ಅಡೆತಡೆಗಳಿಲ್ಲದೆ ಹೊಸ ಕಾನೂನುಗಳನ್ನು ಜಾರಿಗೊಳಿಸಲು, ಬಜೆಟ್ ಅನುಮೋದಿಸಲು ಹಾಗೂ ಸಂವಿಧಾನಕ್ಕೆ ತಿದ್ದುಪಡಿ ತರಲು ಪೂರ್ಣ ಸ್ವಾತಂತ್ರ್ಯ ಹೊಂದಿದ್ದಾರೆ

ಸಂಸತ್ತಿನಲ್ಲಿಯೋಧರು: ಈ ಬಾರಿಯ ಹೊಸ ಸಂಸತ್ತಿನಲ್ಲಿ ಉಕ್ರೇನ್ ಯುದ್ಧದಲ್ಲಿ (ವಿಶೇಷ ಮಿಲಿಟರಿ ಕಾರ್ಯಾಚರಣೆ) ಮುಂಚೂಣಿಯಲ್ಲಿ ಭಾಗವಹಿಸಿದ ಸುಮಾರು 49 ಯೋಧರು/ವೆಟರನ್‌ಗಳು ಸಂಸದರಾಗಿ ಆಯ್ಕೆಯಾಗಿದ್ದು, ದೇಶದಲ್ಲಿ ಯುದ್ಧ ಪರ ಭಾವನೆಯನ್ನು ಬಲಪಡಿಸಲು ಕ್ರೆಮ್ಲಿನ್ ಈ ತಂತ್ರ ರೂಪಿಸಿದೆ.

ಮತ್ತಷ್ಟು ಓದಿ: ಬ್ರಿಕ್ಸ್ ಶೃಂಗಸಭೆ 2026: ನರೇಂದ್ರ ಮೋದಿ, ವ್ಲಾಡಿಮಿರ್ ಪುಟಿನ್ ದ್ವಿಪಕ್ಷೀಯ ಮಾತುಕತೆಯಲ್ಲಿ ಚರ್ಚೆಯಾಗುವ ವಿಷಯಗಳು

ರಷ್ಯಾ ವಶಪಡಿಸಿಕೊಂಡಿರುವ ಉಕ್ರೇನ್‌ನ ನಾಲ್ಕು ಪ್ರಾಂತ್ಯಗಳಲ್ಲೂ ಮತದಾನ ನಡೆಸಿದ್ದಕ್ಕೆ ಯುರೋಪಿಯನ್ ಯೂನಿಯನ್ (EU) ಮತ್ತು ಪಾಶ್ಚಿಮಾತ್ಯ ದೇಶಗಳು ತೀವ್ರ ವಿರೋಧ ವ್ಯಕ್ತಪಡಿಸಿದ್ದು, ಈ ಚುನಾವಣೆಯನ್ನು ‘ಪ್ರಜಾಪ್ರಭುತ್ವ ವಿರೋಧಿ’ ಎಂದು ಕರೆದಿವೆ. ಯುದ್ಧವನ್ನು ವಿರೋಧಿಸುವ ಪ್ರಮುಖ ಲಿಬರಲ್ ಪಕ್ಷವಾದ ‘ಯಾಬ್ಲೋಕೊ’ (Yabloko) ಸ್ಪರ್ಧೆಗೆ ಕೋರ್ಟ್ ನಿರ್ಬಂಧ ಹೇರಿದ್ದರಿಂದ ವಿರೋಧ ಪಕ್ಷಗಳೇ ಇಲ್ಲದಂತೆ ಚುನಾವಣೆ ನಡೆಸಲಾಗಿದೆ ಎಂಬ ಆರೋಪಗಳೂ ಕೇಳಿಬಂದಿವೆ

ಮೂರು ದಿನಗಳ ಕಾಲ ನಡೆದ ಮತದಾನದಲ್ಲಿ ಶೇ. 95 ಕ್ಕೂ ಹೆಚ್ಚು ಮತಗಳ ಎಣಿಕೆ ಪೂರ್ಣಗೊಂಡಿದ್ದು, ಯುನೈಟೆಡ್ ರಷ್ಯಾ ಪಕ್ಷ ಶೇ. 57.83 ರಷ್ಟು ಮತಗಳನ್ನು ಪಡೆದುಕೊಂಡಿದೆ. ಇದು 2021 ರಲ್ಲಿ ಪಡೆದಿದ್ದ ಶೇ. 49.8 ಕ್ಕಿಂತ ಗಮನಾರ್ಹ ಹೆಚ್ಚಳವಾಗಿದ್ದು, ಈ ಹಿಂದೆ 2016 ರಲ್ಲಿ ಗೆದ್ದಿದ್ದ 343 ಸೀಟುಗಳ ಸಾರ್ವಕಾಲಿಕ ದಾಖಲೆಯನ್ನು ಮುರಿದಿದೆ

ರಷ್ಯಾದ ಕಮ್ಯುನಿಸ್ಟ್ ಪಕ್ಷ (CPRF) ಶೇ. 13.8 ಮತಗಳೊಂದಿಗೆ 40 ಸ್ಥಾನಗಳನ್ನು ಗೆದ್ದು ಎರಡನೇ ಸ್ಥಾನ ಪಡೆದರೆ, ರಾಷ್ಟ್ರೀಯತಾವಾದಿ ಎಲ್‌ಡಿಪಿಆರ್ (LDPR) 25 ಸ್ಥಾನಗಳನ್ನು ಹಾಗೂ ‘ನ್ಯೂ ಪೀಪಲ್’ ಪಕ್ಷ 20 ಸ್ಥಾನಗಳನ್ನು ಗೆದ್ದುಕೊಂಡಿವೆ.

ರಷ್ಯಾದಲ್ಲಿ ಸಂವಿಧಾನ ಜಾರಿಗೆ ಬಂದಿದ್ದು ಯಾವಾಗ?

ಪ್ರಸ್ತುತ ಜಾರಿಯಲ್ಲಿರುವ ರಷ್ಯಾದ ಒಕ್ಕೂಟದ ಸಂವಿಧಾನವು 1993 ರ ಡಿಸೆಂಬರ್ 12 ರಂದು ದೇಶವ್ಯಾಪಿ ನಡೆದ ಸಾರ್ವಜನಿಕ ಜನಾಭಿಪ್ರಾಯ ಸಂಗ್ರಹದ ಮೂಲಕ ಅಂಗೀಕರಿಸಲ್ಪಟ್ಟಿತು. ಇದು ಅಧಿಕೃತವಾಗಿ 1993 ರ ಡಿಸೆಂಬರ್ 25 ರಂದು ಜಾರಿಗೆ ಬಂದಿತು.

ಸೋವಿಯತ್ ಒಕ್ಕೂಟವು (USSR) 1991ರ ಡಿಸೆಂಬರ್‌ನಲ್ಲಿ ಪತನಗೊಂಡ ನಂತರ, ನೂತನ ಸ್ವತಂತ್ರ ರಷ್ಯಾಕ್ಕಾಗಿ ಅಧ್ಯಕ್ಷ ಬೋರಿಸ್ ಯೆಲ್ಟ್ಸಿನ್ ಅವರ ನೇತೃತ್ವದಲ್ಲಿ ಈ ಹೊಸ ಪ್ರಜಾಸತ್ತಾತ್ಮಕ ಸಂವಿಧಾನವನ್ನು ಸಿದ್ಧಪಡಿಸಲಾಯಿತು. ಇದಕ್ಕೂ ಮೊದಲು ಸೋವಿಯತ್ ಕಾಲದ (1978ರ ಸೋವಿಯತ್ ರಷ್ಯಾದ ಸಂವಿಧಾನ) ನಿಯಮಾವಳಿಗಳು ಚಾಲ್ತಿಯಲ್ಲಿದ್ದವು. ನಂತರ 2020 ರ ಜುಲೈನಲ್ಲಿ ದೇಶವ್ಯಾಪಿ ಮತದಾನದ ಮೂಲಕ ಈ ಸಂವಿಧಾನಕ್ಕೆ ಪ್ರಮುಖ ತಿದ್ದುಪಡಿಗಳನ್ನು ತರಲಾಯಿತು, ಇದು ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ಅಧಿಕಾರದ ಅವಧಿಯನ್ನು ವಿಸ್ತರಿಸಲು ಹಾಗೂ ಅಧ್ಯಕ್ಷೀಯ ಅಧಿಕಾರವನ್ನು ಮತ್ತಷ್ಟು ಬಲಪಡಿಸಲು ಅನುವು ಮಾಡಿಕೊಟ್ಟಿತು.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 7:54 am, Tue, 22 September 26