Mutual Fund: ಫೋಕಸ್ಡ್​ ಮ್ಯೂಚುವಲ್​ ಫಂಡ್​ಗಳ ಬಗ್ಗೆ ಕುದುರುತ್ತಿದೆ ಹೂಡಿಕೆದಾರರ ಆಸಕ್ತಿ

ಹೂಡಿಕೆಯ ಬಗ್ಗೆ ಯಾರನ್ನೇ ಸಲಹೆ ಕೇಳಿದರೂ ಹೇಳುವ ಮೊದಲ ಮಾತು, ‘ವೈವಿಧ್ಯತೆ ಇರಲಿ. ಎಲ್ಲ ಹಣವನ್ನೂ ಒಂದೇ ಕಡೆ ಹಾಕಬೇಡಿ’. ಮ್ಯೂಚುವಲ್​ ಫಂಡ್​ಗಳ ವಿಚಾರದಲ್ಲಿಯೂ ಅಷ್ಟೇ. ನಿಮ್ಮ ಗುರಿಗೆ ತಕ್ಕಂತೆ ಈಕ್ವಿಟಿ, ಡೆಟ್, ಗೋಲ್ಡ್​- ಹೀಗೆ ವೈವಿಧ್ಯಮಯ ಆಯ್ಕೆಗಳ ಹದವರಿತ ಮಿಶ್ರಣದ ಪೋರ್ಟ್​ಫೋಲಿಯೊ ರೂಪಿಸಿಕೊಳ್ಳಿ ಎಂದು ಎಲ್ಲರೂ ಹೇಳುತ್ತಾರೆ.

ವೈವಿಧ್ಯತೆಯು ಅತಿಯಾದರೆ ಅದೂ ಒಂದು ಮಿತಿಯೂ ಆಗಿಬಿಡುತ್ತದೆ. ಇದೇ ಕಾರಣಕ್ಕೆ ಕೆಲವರು ಮ್ಯೂಚುವಲ್​ ಫಂಡ್​ಗಳಿಂದ ದೂರ ಉಳಿದು, ಸ್ವತಃ ಷೇರುಪೇಟೆಯಲ್ಲಿ ಹೂಡಿಕೆ ಮಾಡಲು ಮುಂದಾಗುತ್ತಾರೆ. ಹಲವು ಸೆಕ್ಟರ್​ಗಳ ನೂರಾರು ಕಂಪನಿಗಳ ಷೇರುಗಳಲ್ಲಿ ಹೂಡಿಕೆ ಮಾಡುವ ಡೈವರ್ಸಿಫೈಡ್​ ಫಂಡ್​ಗಳು ನಿರೀಕ್ಷಿತ ಗ್ರೋತ್ ಕೊಡಲಾರವು ಎಂಬುದು ಇಂಥವರ ಆಕ್ಷೇಪ. ಸ್ವತಃ ಷೇರುಗಳ ಖರೀದಿ-ಮಾರಾಟ ನಿರ್ವಹಿಸಲು ಮುಂದಾಗುವ ಇಂಥವರು, ಸಮಯ ಕೊರತೆಯೂ ಸೇರಿದಂತೆ ಹತ್ತಾರು ಕಾರಣಗಳಿಂದ ಹಲವು ಬಾರಿ ನಷ್ಟ ಅನುಭವಿಸುತ್ತಾರೆ.

ಅತಿವೈವಿಧ್ಯದ ಮಿತಿಯನ್ನು ಮೀರುವ ಉದ್ದೇಶದಿಂದಲೇ ರೂಪುಗೊಂಡಿದ್ದು ಫೋಕಸ್ಡ್​ ಮ್ಯೂಚುವಲ್​ ಫಂಡ್. ಇಂಥ ಫಂಡ್​ಗಳು ಸಾಮಾನ್ಯವಾಗಿ 20ರಿಂದ 30 ಕಂಪನಿಗಳಿಗಷ್ಟೇ ಹೂಡಿಕೆಯನ್ನು ಮಿತಗೊಳಿಸುತ್ತವೆ. ಹೆಚ್ಚು ಕಂಪನಿಗಳಲ್ಲಿ ಹೂಡಿಕೆ ಮಾಡಬಾರದು ಎಂಬ ಷರತ್ತಿಗೆ ಅನುಗುಣವಾಗಿಯೇ ಫಂಡ್​ ಮ್ಯಾನೇಜರ್​ ಮತ್ತು ಫಂಡ್​ಹೌಸ್​ನ ಸಂಶೋಧನಾ ತಂಡ ಕಾರ್ಯನಿರ್ವಹಿಸುವುದರಿಂದ ಹೂಡಿಕೆದಾರರಿಗೆ ಸಾಮಾನ್ಯವಾಗಿ ಷೇರುಪೇಟೆಯ ಸೂಚ್ಯಂಕಕ್ಕಿಂತಲೂ ಹೆಚ್ಚಿನ ಪ್ರಮಾಣದ ಲಾಭ ಗಳಿಕೆಯ ಸಾಧ್ಯತೆಗಳು ಇರುತ್ತವೆ.

ಆದರೆ ಇದರಲ್ಲಿಯೂ ಅಪಾಯ ಇಲ್ಲ ಎಂದಲ್ಲ. ಇಂಥ ಫಂಡ್​ಗಳಲ್ಲಿ ಮಾರುಕಟ್ಟೆ ಪರಿಸ್ಥಿತಿಯ ಜೊತೆಗೆ ಫಂಡ್​ ಮ್ಯಾನೇಜರ್ ನಿರ್ಧಾರದ ಮೇಲೆ ಹೂಡಿಕೆಯ ಪ್ರತಿಫಲ ಅವಲಂಬಿತವಾಗಿರುತ್ತದೆ. ಎಲ್ಲವೂ ಚೆನ್ನಾಗಿದ್ದರೆ ಸರಿ, ಆದರೆ ಆರ್ಥಿಕತೆ ಕುಸಿತ ಮುನ್ನೋಟ ಅಥವಾ ಬೇರೆ ಕಾರಣಗಳಿಂದ ಷೇರುಪೇಟೆ ಕುಸಿಯಲು ಆರಂಭಿಸಿದರೆ ಇಂಥ ಫಂಡ್​ಗಳು ಅಗ್ನಿಪರೀಕ್ಷೆಯನ್ನೇ ಎದುರಿಸುತ್ತವೆ.

ಏಕೆಂದರೆ ಡೈವರ್ಸಿಫೈಡ್​ ಫಂಡ್​ಗಳಲ್ಲಿ ನೂರಾರು ಕಂಪನಿಗಳಲ್ಲಿ ಹೂಡಿಕೆ ಹಂಚಿಹೋಗಿರುತ್ತದೆ. ಹೀಗಾಗಿ ಮಾರುಕಟ್ಟೆಯ ಲಾಭ ಅಥವಾ ನಷ್ಟವು ಅಲ್ಲಿ ಪ್ರತಿಫಲಿತವಾಗುತ್ತದೆ. ಆದರೆ ಫೋಕಸ್ಡ್​ ಫಂಡ್​ಗಳಲ್ಲಿ ಕೆಲವೇ ಕಂಪನಿಗಳಲ್ಲಿ ಹೂಡಿಕೆ ನಡೆಯುವುದರಿಂದ ಬೇರೆಯದೇ ಲೆಕ್ಕಾಚಾರ ಚಾಲ್ತಿಯಲ್ಲಿರುತ್ತದೆ. ನಷ್ಟದ ಪ್ರಮಾಣವೂ ಹೆಚ್ಚಾಗಬಹುದಾ ಅಪಾಯ ಇರುತ್ತದೆ.

ಹೀಗಾಗಿಯೇ ಕನಿಷ್ಠ ಒಂದು ಆರ್ಥಿಕ ಆವರ್ತದಷ್ಟು (5 ವರ್ಷ) ಹೂಡಿಕೆ ಅವಧಿಯಿದ್ದರೆ ಮಾತ್ರ ಫೋಕಸ್ಡ್​ ಫಂಡ್​ಗಳಲ್ಲಿ ಹೂಡಿಕೆ ಮಾಡಿ ಎಂದು ವೈಯಕ್ತಿಕ ಹಣಕಾಸು ಸಲಹೆಗಾರರು ಸಲಹೆ ಮಾಡುತ್ತಾರೆ. 30 ವರ್ಷಕ್ಕೂ ಒಳಗಿರುವವರು ಮತ್ತು ಹೂಡಿಕೆ ಮಾಡಿ ಪ್ರತಿಫಲಕ್ಕಾಗಿ ಕಾಯುತ್ತೇವೆ ಎಂಬ ಮನಸ್ಥಿತಿ ಹೊಂದಿರುವವರಿಗೆ ಇದು ಹೇಳಿ ಮಾಡಿಸಿದ್ದು.

1ರಿಂದ 3 ವರ್ಷದ ಅವಧಿಯಲ್ಲಿ ಅತ್ಯುತ್ತಮ ಫೋಕಸ್ಡ್​ ಫಂಡ್​ಗಳ ಪಟ್ಟಿಯಲ್ಲಿ ಐಐಎಫ್​ಎಲ್ ಫೋಕಸ್ಡ್​ ಈಕ್ವಿಟಿ, ಎಸ್​ಬಿಐ ಫೋಕಸ್ಡ್​ ಈಕ್ವಿಟಿ, ಕ್ವಾಂಟ್ ಫೋಕಸ್ಡ್​, ಆ್ಯಕ್ಸಿಸ್ ಫೋಕಸ್ಡ್​ ಫಂಡ್​ಗಳು ಮುಂಚೂಣಿಯಲ್ಲಿವೆ ಎಂದು ‘ಗ್ರೂ’ ಜಾಲತಾಣ ತಿಳಿಸುತ್ತದೆ.

(ಗಮನಿಸಿ: ಮ್ಯೂಚುವಲ್ ಫಂಡ್​ಗಳ ಹೂಡಿಕೆ ಷೇರುಪೇಟೆ ಏರಿಳಿತಗಳ ಪ್ರಭಾವಕ್ಕೆ ಒಳಪಡುತ್ತವೆ. ಫಂಡ್​ ಸಂಬಂಧಿಸಿದ ಎಲ್ಲ ಮಾಹಿತಿ ತಿಳಿದುಕೊಂಡೇ ಹೂಡಿಕೆ ನಿರ್ಧಾರ ಮಾಡಿ. ಈ ಲೇಖನದ ಮೂಲಕ ಯಾವುದೇ ಫಂಡ್​ನಲ್ಲಿ ಹೂಡಿಕೆ ಮಾಡಬೇಕು ಎಂದು ಟಿವಿ9 ಕನ್ನಡ ಡಿಜಿಟಲ್ ಶಿಫಾರಸು ಮಾಡುತ್ತಿಲ್ಲ)

(Consumers showing interest for investments in focused mutual funds)

ಇದನ್ನೂ ಓದಿ: Mutual Fund: ಮ್ಯೂಚುವಲ್ ಫಂಡ್​ ಎನ್​ಎಫ್​ಒಗಳಲ್ಲಿ ಹೂಡಿಕೆ ಮಾಡಿದರೆ ಲಾಭವಾಗುತ್ತಾ?

ಇದನ್ನೂ ಓದಿ: How To: ಉಳಿತಾಯಕ್ಕೆ ಅತ್ಯುತ್ತಮ ಮಾರ್ಗ, ಮ್ಯೂಚುವಲ್​ ಫಂಡ್ ಹೂಡಿಕೆಗೆ ಇಲ್ಲಿದೆ ಐದು ಸರಳ ಟಿಪ್ಸ್​