FPI Investments: 2023ರಲ್ಲಿ ಭಾರತದ ಬಂಡವಾಳ ಮಾರುಕಟ್ಟೆಗೆ ಹರಿದುಬಂದಿದೆ ಭರಪೂರ ಎಫ್ಪಿಐ ಹಣ; 2.4 ಲಕ್ಷ ಕೋಟಿ ರೂ ಹೂಡಿಕೆ
Indian Equity and Debt Market: 2023ರಲ್ಲಿ ಭಾರತದ ಷೇರು ಮಾರುಕಟ್ಟೆಗೆ 1.71 ಲಕ್ಷ ಕೋಟಿ ರೂ ಮೊತ್ತದ ವಿದೇಶೀ ಪೋರ್ಟ್ಫೋಲಿಯೋ ಹೂಡಿಕೆಗಳು ಹರಿದುಬಂದಿವೆ. ಡಿಸೆಂಬರ್ ತಿಂಗಳಲ್ಲೇ 66,134 ಕೋಟಿ ರೂ ಹೂಡಿಕೆ ಬಂದಿದೆ. ಗವರ್ನ್ಮೆಂಟ್ ಬಾಂಡ್ ಇತ್ಯಾದಿ ಡೆಟ್ ಮಾರುಕಟ್ಟೆಗೆ 2023ರಲ್ಲಿ 68,663 ಕೋಟಿ ರೂ ಮೊತ್ತದ ಎಫ್ಪಿಐ ಹೂಡಿಕೆಗಳು ಬಂದಿವೆ. ಅಮೆರಿಕದಲ್ಲಿ ಬಡ್ಡಿದರ ಕಡಿಮೆ ಆಗುವ ಸಾಧ್ಯತೆ ಇರುವುದರಿಂದ ಅಲ್ಲಿಂದ ಹೂಡಿಕೆದಾರರು ತಮ್ಮ ಹಣವನ್ನು ಭಾರತದ ಮಾರುಕಟ್ಟೆಗಳಿಗೆ ವರ್ಗಾಯಿಸುತ್ತಿದ್ದಾರೆ.
Updated on: Jan 01, 2024 | 10:29 AM
ನವದೆಹಲಿ, ಜನವರಿ 1: ಹಿಂಡನ್ಬರ್ಗ್ ವರದಿ, ಜಾಗತಿಕ ಆರ್ಥಿಕ ಹಿನ್ನಡೆಯ ಮಧ್ಯೆಯೂ 2023ರ ವರ್ಷದಲ್ಲಿ ಭಾರತದ ಈಕ್ವಿಟಿ ಮಾರುಕಟ್ಟೆ (Share Market) ಸಖತ್ತಾಗಿ ಬೆಳೆದಿದೆ. ಈ ಒಂದು ವರ್ಷ ಬರೋಬ್ಬರಿ 1.7 ಲಕ್ಷ ಕೋಟಿ ರೂ ಮೊತ್ತದ ವಿದೇಶೀ ಪೋರ್ಟ್ಫೋಲಿಯೋ ಹೂಡಿಕೆಗಳು (FPI- Foreign Portfolio Investment) ಭಾರತದ ಷೇರು ಮಾರುಕಟ್ಟೆಗಳಿಗೆ ಹರಿದುಬಂದಿವೆ. ಅದರಲ್ಲೂ ಡಿಸೆಂಬರ್ನ ಒಂದೇ ತಿಂಗಳಲ್ಲಿ 66,134 ಕೋಟಿ ರೂ ಮೊತ್ತದಷ್ಟು ಎಫ್ಪಿಐಗಳು ಬಂದಿರುವುದು ಗಮನಾರ್ಹ. ಎಫ್ಪಿಐಗಳು ಒಟ್ಟಾರೆ 2.4 ಲಕ್ಷ ಕೋಟಿ ರೂ ನಷ್ಟು ಬಂಡವಾಳವನ್ನು ಷೇರುಮಾರುಕಟ್ಟೆ ಮತ್ತು ಡೆಟ್ ಮಾರುಕಟ್ಟೆಗೆ ಹಾಕಿವೆ.
2023ರಲ್ಲಿ ಎಫ್ಪಿಐಗಳು 1.71 ಲಕ್ಷ ಕೋಟಿ ರೂ ಹೂಡಿಕೆಯನ್ನು ಈಕ್ವಿಟಿಗಳ ಮೇಲೆ ಹಾಕಿದರೆ, 68,663 ಕೋಟಿ ರೂ ಹೂಡಿಕೆಯನ್ನು ಡೆಟ್ ಮಾರುಕಟ್ಟೆಗಳಲ್ಲಿ (Debt market) ತೊಡಗಿಸಿವೆ. ಡೆಟ್ ಮಾರುಕಟ್ಟೆ ಎಂದರೆ ಸಾಲಪತ್ರಗಳ (ಸರ್ಕಾರಿ ಬಾಂಡ್, ಕಾರ್ಪೊರೇಟ್ ಬಾಂಡ್ ಇತ್ಯಾದಿ) ಮಾರುಕಟ್ಟೆ.ಇದರೊಂದಿಗೆ ಭಾರತದ ಬಂಡವಾಳ ಮಾರುಕಟ್ಟೆಗೆ ಎಫ್ಪಿಐಗಳು ಮಾಡಿದ ಒಟ್ಟಾರೆ ಹೂಡಿಕೆ 2.4 ಲಕ್ಷ ಕೋಟಿ ರೂ ಆಗಿದೆ.
ಇದನ್ನೂ ಓದಿ: IPOs: 2023ರಲ್ಲಿ ಅತಿಹೆಚ್ಚು ಐಪಿಒಗಳ ಬಿಡುಗಡೆ; 2024ರಲ್ಲಿ ಈ ಸಂಖ್ಯೆ ಇನ್ನೂ ಹೆಚ್ಚುವ ಸಾಧ್ಯತೆ
ಎಫ್ಪಿಐಗಳಿಗೆ 2023ರಲ್ಲಿ ಭಾರತದ ಷೇರು ಮಾರುಕಟ್ಟೆ ಆಕರ್ಷಕವಾಗಿದ್ದು ಯಾಕೆ?
2022ರಲ್ಲಿ ಭಾರತದ ಬಂಡವಾಳ ಮಾರುಕಟ್ಟೆಯಿಂದ 1.21 ಲಕ್ಷ ಕೋಟಿ ರೂ ಮೊತ್ತದ ಎಫ್ಪಿಐ ಹೂಡಿಕೆಗಳು ಹಿಂತೆಯಲ್ಪಟ್ಟಿದ್ದವು. ಆದರೆ, 2023ರಲ್ಲಿ, ಅದರಲ್ಲೂ ವರ್ಷಾಂತ್ಯದಲ್ಲಿ ಎಫ್ಪಿಐಗಳು ಮತ್ತೆ ಭಾರತದತ್ತ ಮುಖ ಮಾಡಲು ಪ್ರಮುಖ ಕಾರಣ ಅಮೆರಿಕದ ಬಡ್ಡಿದರ ವಿಚಾರ. ಅಮೆರಿಕದಲ್ಲಿ ಬಡ್ಡಿದರ ಮತ್ತೆ ಹೆಚ್ಚುವುದಿಲ್ಲ. ಮುಂದಿನ ದಿನಗಳಲ್ಲಿ ಮೂರು ಬಾರಿ ಬಡ್ಡಿ ದರ ಇಳಿಕೆ ಮಾಡಬಹುದು ಎಂಬ ಸಾಧ್ಯತೆ ಇರುವುದರಿಂದ ವಿದೇಶಗಳಿಂದ ಹೂಡಿಕೆದಾರರ ಆಸಕ್ತಿ ಭಾರತದ ಷೇರು ಮಾರುಕಟ್ಟೆ ಮತ್ತು ಡೆಟ್ ಮಾರುಕಟ್ಟೆಯ ಮೇಲೆ ನೆಟ್ಟಿದೆ.
2022ರಲ್ಲಿ ಎಫ್ಪಿಐಗಳು ಭಾರತದಿಂದ ಕಾಲ್ತೆಗೆಯಲು ಕೂಡ ಇದೇ ಅಮೆರಿಕಾ ಬಡ್ಡಿದರವೇ ಕಾರಣ. ಹಣದುಬ್ಬರ ನಿಯಂತ್ರಿಸಲು ಅಮೆರಿಕದಲ್ಲಿ ಸತತವಾಗಿ ಬಡ್ಡಿದರ ಏರಿಕೆ ಮಾಡಿದ್ದರಿಂದ ಭಾರತದಿಂದ ವಿದೇಶಿಗರ ಹೂಡಿಕೆಗಳು ಅಮೆರಿಕದ ಡೆಟ್ ಮಾರುಕಟ್ಟೆಗೆ ಕಡೆಗೆ ಹರಿದುಹೋಗಿದ್ದವು. ಈಗ ಬಡ್ಡಿದರ ಇಳಿಕೆ ಆಗುವ ಸಾಧ್ಯತೆ ಇರುವುದರಿಂದ ಭಾರತದತ್ತ ಇವು ಮತ್ತೆ ಮುಖ ಮಾಡಿವೆ. 2024ರಲ್ಲಿ ಇನ್ನೂ ಹೆಚ್ಚಿನ ಎಫ್ಪಿಐಗಳು ಭಾರತಕ್ಕೆ ಹರಿದುಬರುವ ಸಾಧ್ಯತೆ ಇದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
