ಸೆಮಿಕಂಡಕ್ಟರ್ ಭವಿಷ್ಯ ನಿರ್ಮಿಸಲು ಹೊರಟ ಭಾರತ; 1.27 ಲಕ್ಷ ಕೋಟಿ ರೂ ವೆಚ್ಚದ ಸೆಮಿಕಾನ್ 2.0 ಚಾಲನೆ

ನವದೆಹಲಿ, ಸೆಪ್ಟೆಂಬರ್ 17: ಭಾರತವನ್ನು ಜಾಗತಿಕ ಸೆಮಿಕಂಡಕ್ಟರ್ ಉದ್ಯಮದ ಪ್ರಮುಖ ಕೇಂದ್ರವನ್ನಾಗಿ ಮಾಡಲು ಕೇಂದ್ರ ಸರ್ಕಾರವು ‘ಸೆಮಿಕಾನ್ 2.0’ (Semicon 2.0) ಯೋಜನೆಗೆ ಚಾಲನೆ ನೀಡಿದೆ. ‘ಸೆಮಿಕಾನ್ 1.0’ ಯಶಸ್ಸಿನ ನಂತರ, 2026ರ ಜುಲೈನಲ್ಲಿ ₹1,75,500 ಕೋಟಿ ಆಯವ್ಯಯದೊಂದಿಗೆ ಈ ನೂತನ ಹಂತವನ್ನು ಅನುಮೋದಿಸಲಾಗಿದೆ. ನವದೆಹಲಿಯ ಯಶೋಭೂಮಿ ಕನ್ವೆನ್ಷನ್ ಹಾಲ್​ನಲ್ಲಿ ನಡೆಯುತ್ತಿರುವ ‘ಸೆಮಿಕಾನ್ ಇಂಡಿಯಾ 2026’ ಸಮಾವೇಶದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಈ ಪ್ರಕ್ರಿಯೆಗೆ ಮತ್ತಷ್ಟು ವೇಗ ನೀಡಿದ್ದಾರೆ.

₹1,75,500 ಕೋಟಿ ವೆಚ್ಚದ ಈ ಯೋಜನೆಯು ಕೇವಲ ಚಿಪ್ ತಯಾರಿಕೆಯಷ್ಟೇ ಅಲ್ಲದೆ, ಸಂಶೋಧನೆ (R&D), ಚಿಪ್ ವಿನ್ಯಾಸ, ಯಂತ್ರೋಪಕರಣಗಳು ಮತ್ತು ಕಚ್ಚಾವಸ್ತುಗಳು, ಫ್ಯಾಬ್‌ಗಳ ಸ್ಥಾಪನೆ, ನುರಿತ ಮಾನವಸಂಪನ್ಮೂಲ ಹಾಗೂ ಸುಧಾರಿತ ಪ್ಯಾಕೇಜಿಂಗ್ ಎಂಬ 6 ಪ್ರಮುಖ ಸ್ತಂಭಗಳ ಮೇಲೆ ಗಮನಹರಿಸಲಿದೆ.

ಇದನ್ನೂ ಓದಿ: ಸೆಮಿಕಂಡಕ್ಟರ್ ಕ್ಷೇತ್ರದಲ್ಲಿ ಭಾರತದ ದಾಪುಗಾಲು; ಒಂದು ದಶಕದಲ್ಲಿ ಸಾಧ್ಯವಾಗುವಂಥದ್ದನ್ನು ನಾಲ್ಕೇ ವರ್ಷದಲ್ಲಿ ಸಾಧಿಸಿದೆ ಭಾರತ: ಗರ್ವ ಪಟ್ಟ ಮೋದಿ

ಆಮದು ಅವಲಂಬನೆ ತಗ್ಗಿಸುವುದು: 2017ರಿಂದ 2025ರ ಅವಧಿಯಲ್ಲಿ ಭಾರತವು 150 ಬಿಲಿಯನ್ ಡಾಲರ್ ಮೌಲ್ಯದ ಸೆಮಿಕಂಡಕ್ಟರ್ ಉತ್ಪನ್ನಗಳನ್ನು ಆಮದು ಮಾಡಿಕೊಂಡಿದೆ. ದೇಶೀಯ ಬೇಡಿಕೆಯು 2030ರ ವೇಳೆಗೆ 110 ಬಿಲಿಯನ್ ಡಾಲರ್ ಹಾಗೂ 2035ರ ವೇಳೆಗೆ 200 ಬಿಲಿಯನ್ ಡಾಲರ್ ದಾಟುವ ಅಂದಾಜಿದ್ದು, ಆಮದು ಕಡಿಮೆ ಮಾಡುವುದು ರಾಷ್ಟ್ರೀಯ ಆದ್ಯತೆಯಾಗಿದೆ.

ಸೆಮಿಕಾನ್ 1.0 ಸಾಧನೆಗಳು: ಸೆಮಿಕಾನ್ ಯೋಜನೆಯ ಮೊದಲ ಹಂತದಲ್ಲಿ ₹1.64 ಲಕ್ಷ ಕೋಟಿಗೂ ಅಧಿಕ ಹೂಡಿಕೆಯ 12 ತಯಾರಿಕಾ ಘಟಕಗಳಿಗೆ ಅನುಮೋದನೆ ನೀಡಲಾಗಿದ್ದು, ಈಗಾಗಲೇ 5 ಘಟಕಗಳು ವಾಣಿಜ್ಯ ಉತ್ಪಾದನೆ ಪ್ರಾರಂಭಿಸಿವೆ. ಜೊತೆಗೆ 24 ಚಿಪ್ ಡಿಸೈನ್ ಯೋಜನೆಗಳಿಗೆ ಉತ್ತೇಜನ ನೀಡಲಾಗಿದೆ.

ಬ್ರ್ಯಾಂಡ್ ‘ಆತ್ಮನಿರ್ಭರ ಭಾರತ’: ಚಂದ್ರಯಾನ-3 ಹಾಗೂ ಆದಿತ್ಯ-ಎಲ್1 ನೌಕೆಗಳಲ್ಲಿ ಪಂಜಾಬ್‌ನ ಮೊಹಾಲಿಯಲ್ಲಿರುವ ‘ಸೆಮಿಕಂಡಕ್ಟರ್ ಲ್ಯಾಬೊರೇಟರಿ’ (SCL) ತಯಾರಿಸಿದ ಸ್ವದೇಶಿ ಚಿಪ್‌ಗಳನ್ನು ಯಶಸ್ವಿಯಾಗಿ ಬಳಸಲಾಗಿತ್ತು.

ಇದನ್ನೂ ಓದಿ: ಪ್ರಧಾನಿ ನರೇಂದ್ರ ಮೋದಿ ಅವರಿಂದ ಸೆಮಿಕಾನ್ ಇಂಡಿಯಾ 2026 ಕಾರ್ಯಕ್ರಮ ಉದ್ಘಾಟನೆ; ಸೆಮಿಕಂಡಕ್ಟರ್ ಕ್ಷೇತ್ರದ ಉದ್ಯಮಿಗಳ ಸಮಾಗಮ

ಜಾಗತಿಕ ಪಾಲುದಾರಿಕೆ: ಭಾರತವು ಅಮೆರಿಕ, ಜಪಾನ್, ಯುರೋಪಿಯನ್ ಯೂನಿಯನ್, ಸಿಂಗಾಪುರ ಮತ್ತು ಜರ್ಮನಿಯೊಂದಿಗೆ ಸೆಮಿಕಂಡಕ್ಟರ್ ತಂತ್ರಜ್ಞಾನ ವಿನಿಮಯಕ್ಕಾಗಿ ಸಹಯೋಗ ಹೊಂದಿದೆ. ಜಾಗತಿಕ ಚಿಪ್ ವಿನ್ಯಾಸಪಟುಗಳ ಪೈಕಿ ಶೇ. 20 ರಷ್ಟು ನುರಿತ ಇಂಜಿನಿಯರ್‌ಗಳು ಭಾರತದಲ್ಲಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ