ಅಕ್ಟೋಬರ್​ನಲ್ಲಿ ಬೇರೆಲ್ಲಾ ಸೆಂಟ್ರಲ್ ಬ್ಯಾಂಕುಗಳಿಗಿಂತ ಆರ್​ಬಿಐನಿಂದಲೇ ಅತಿಹೆಚ್ಚು ಚಿನ್ನ ಖರೀದಿ

ನವದೆಹಲಿ, ಡಿಸೆಂಬರ್ 8: ಜಾಗತಿಕವಾಗಿ ವಿವಿಧ ದೇಶಗಳ ಸೆಂಟ್ರಲ್ ಬ್ಯಾಂಕುಗಳ ಚಿನ್ನ ಖರೀದಿ ಭರಾಟೆ ಮುಂದುವರಿದಿದೆ. ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ಸಂಸ್ಥೆ ಪ್ರಕಾರ ಅಕ್ಟೋಬರ್ ತಿಂಗಳಲ್ಲಿ ಸೆಂಟ್ರಲ್ ಬ್ಯಾಂಕುಗಳು 60 ಟನ್​ಗಳಷ್ಟು ಚಿನ್ನವನ್ನು ಖರೀದಿಸಿವೆ. ಇದರಲ್ಲಿ ಹೆಚ್ಚೂಕಡಿಮೆ ಅರ್ಧದಷ್ಟು ಪಾಲು ಆರ್​ಬಿಐನದ್ದು. ಭಾರತೀಯ ರಿಸರ್ವ್ ಬ್ಯಾಂಕ್ ಅಕ್ಟೋಬರ್​ನಲ್ಲಿ ಖರೀದಿಸಿದ ಚಿನ್ನ ಬರೋಬ್ಬರಿ 27 ಟನ್​ನಷ್ಟು. ಜನವರಿಯಿಂದ ಅಕ್ಟೋಬರ್​ವರೆಗೆ ಈ ವರ್ಷದ 10 ತಿಂಗಳಲ್ಲಿ ಆರ್​ಬಿಐ 77 ಟನ್ ಚಿನ್ನವನ್ನು ಖರೀದಿಸಿ ತನ್ನ ಫಾರೆಕ್ಸ್ ನಿಧಿಗೆ ಸಂದಾಯ ಮಾಡಿದೆ.

ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಆರ್​ಬಿಐ ಶೇಖರಿಸಿದ ಚಿನ್ನದ ಪ್ರಮಾಣ ಐದು ಪಟ್ಟು ಹೆಚ್ಚಾಗಿದೆ. ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) ಪ್ರಕಟಿಸುವ ಮಾಸಿಕ ದತ್ತಾಂಶದ ಆಧಾರದಲ್ಲಿ ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ಈ ಮಾಹಿತಿ ಹೊರಗೆಡವಿದೆ. ಭಾರತದಲ್ಲಿ ಈಗ ಒಟ್ಟಾರೆ ಚಿನ್ನದ ಮೀಸಲು ನಿಧಿ 882 ಟನ್​ಗಳಷ್ಟಿದೆ. ಇದರಲ್ಲಿ 510 ಟನ್​ಗಳು ಭಾರತದಲ್ಲೇ ಇವೆ. ಉಳಿದ 372 ಟನ್​ ಚಿನ್ನವನ್ನು ಬ್ಯಾಂಕ್ ಆಫ್ ಇಂಗ್ಲೆಂಡ್ ಹಾಗೂ ಇತರ ದೇಶಗಳಲ್ಲಿ ಇರಿಸಲಾಗಿದೆ.

ಇದನ್ನೂ ಓದಿ: ಶೇ. 3.2ಕ್ಕೆ ಇಳಿದ ನಿರುದ್ಯೋಗ ದರ; ಇ-ಶ್ರಮ್ ಪೋರ್ಟಲ್​ನಲ್ಲಿ ಅಸಂಘಟಿತ ವಲಯದ 30 ಕೋಟಿ ಕಾರ್ಮಿಕರ ನೊಂದಣಿ

ಈ ವರ್ಷ ಚಿನ್ನ ಶೇಖರಣೆಯಲ್ಲಿ ಭಾರತಕ್ಕೆ ಪೈಪೋಟಿ ನೀಡಿರುವುದು ಟರ್ಕಿ ಮತ್ತು ಪೋಲ್ಯಾಂಡ್ ದೇಶಗಳು. ಟರ್ಕಿ ದೇಶದ ಸೆಂಟ್ರಲ್ ಬ್ಯಾಂಂಕು 2024ರ ಜನವರಿಯಿಂದ ಅಕ್ಟೋಬರ್​ವರೆಗೆ 72 ಟನ್​ಗಳಷ್ಟು ಚಿನ್ನವನ್ನು ಖರೀದಿಸಿವೆ. ಪೋಲೆಂಡ್ ದೇಶದ ಸೆಂಟ್ರಲ್ ಬ್ಯಾಂಕು 69 ಟನ್ ಚಿನ್ನವನ್ನು ತೆಗೆದಿರಿಸಿದೆ. ಜಾಗತಿಕವಾಗಿ ಈ ವರ್ಷ ಸೆಂಟ್ರಲ್ ಬ್ಯಾಂಕುಗಳು ಖರೀದಿಸಿರುವ ಒಟ್ಟಾರೆ ಚಿನ್ನದಲ್ಲಿ ಶೇ. 60ರಷ್ಟು ಭಾಗವನ್ನು ಭಾರತ, ಟರ್ಕಿ ಮತ್ತು ಪೋಲ್ಯಾಂಡ್ ದೇಶಗಳ ಸೆಂಟ್ರಲ್ ಬ್ಯಾಂಕುಗಳೇ ಖರೀದಿಸಿವೆ.

ಅಕ್ಟೋಬರ್ ತಿಂಗಳಲ್ಲಿ ಆರ್​ಬಿಐ 27 ಟನ್ ಚಿನ್ನ ಖರೀದಿಸಿರುವುದು ಅತಿಹೆಚ್ಚು ಎನಿಸಿದೆ. ನಂತರದ ಸ್ಥಾನವು ಟರ್ಕಿಯ ಸೆಂಟ್ರಲ್ ಬ್ಯಾಂಕ್​ನದ್ದು. ಅದು 17 ಟನ್ ಚಿನ್ನ ಖರೀದಿಸಿದೆ. ಸತತ 17 ತಿಂಗಳು ಟರ್ಕಿಯ ಬ್ಯಾಂಕು ಚಿನ್ನ ಖರೀದಿಸಿರುವುದು ಗಮನಾರ್ಹ.

ಇದನ್ನೂ ಓದಿ: ಪಿಎಂ ಕಿಸಾನ್ ಯೋಜನೆ; ಅನಗತ್ಯ ಹಣ ಪೋಲು ತಪ್ಪಿಸಲು ಕ್ರಮ; ಅನರ್ಹ ಫಲಾನುಭವಿಗಳಿಂದ 335 ಕೋಟಿ ರೂ ವಾಪಸ್

ಪೋಲೆಂಡ್​ನ ಸೆಂಟ್ರಲ್ ಬ್ಯಾಂಕು ಅಕ್ಟೋಬರ್ ತಿಂಗಳಲ್ಲಿ 8 ಟನ್ ಚಿನ್ನ ಖರೀದಿಸಿದೆ. ತನ್ನ ಒಟ್ಟಾರೆ ಮೀಸಲು ಸಂಪತ್ತಿನಲ್ಲಿ ಚಿನ್ನದ ಪ್ರಮಾಣ ಶೇ. 20ರಷ್ಟಿರಬೇಕೆಂಬ ಗುರಿಯತ್ತ ಪೋಲೆಂಡ್ ಸಾಗುತ್ತಿದೆ. ಆ ನಿಟ್ಟಿನಲ್ಲಿ ಸತತ ಏಳೆಂಟು ತಿಂಗಳಿಂ ಚಿನ್ನದ ಖರೀದಿಯ ಭರಾಟೆಯಲ್ಲಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ