ಬಂಡವಾಳ ಆಕರ್ಷಿಸಲು ಬ್ಯಾಂಕುಗಳಿಗೆ ಹೆಡ್ಡಿಂಗ್ ಸಪೋರ್ಟ್ನಿಂದ ಹಿಡಿದು ಎನ್ಆರ್ಐ ಹೂಡಿಕೆ ಮಿತಿ ಹೆಚ್ಚಳದವರೆಗೆ ಆರ್ಬಿಐನಿಂದ 5 ಕ್ರಮಗಳು
RBI Unveils 5 Measures To Boost Capital Inflows: ಭಾರತಕ್ಕೆ ಬಹಳ ಅಗತ್ಯ ಇರುವ ವಿದೇಶಿ ಬಂಡವಾಳವನ್ನು ಆಕರ್ಷಿಸಲು ಭಾರತೀಯ ರಿಸರ್ವ್ ಬ್ಯಾಂಕ್ ಕೆಲ ಪ್ರಮುಖ ಕ್ರಮಗಳನ್ನು ಕೈಗೊಂಡಿದೆ. ಷೇರು ಮಾರುಕಟ್ಟೆಯಲ್ಲಿ ಎನ್ಆರ್ಐಗಳಿಗೆ ಇರುವ ಹೂಡಿಕೆ ಮಿತಿಯನ್ನು ಹೆಚ್ಚಿಸಲಾಗಿದೆ. ಬ್ಯಾಂಕುಗಳಿಗೆ ಹೆಡ್ಜಿಂಗ್ ಸಪೋರ್ಟ್ ನೀಡಲಾಗಿದೆ. ರಫ್ತು ಆದಾಯ ತರುವ ಅವಧಿ 9 ತಿಂಗಳಿಗೆ ಕಡಿತಗೊಳಿಸಲಾಗಿದೆ.
Updated on: Jun 05, 2026 | 2:16 PM
ನವದೆಹಲಿ, ಜೂನ್ 5: ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷದ ಹಿನ್ನೆಲೆಯಲ್ಲಿ ಭಾರತದ ವಿದೇಶಿ ವಿನಿಮಯ ಮೀಸಲು (Forex Reserve) ಮೇಲಿನ ಒತ್ತಡವನ್ನು ಕಡಿಮೆ ಮಾಡಲು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಪ್ರಯತ್ನ ಮುಂದುವರಿಸಿದೆ. ಈ ನಿಟ್ಟಿನಲ್ಲಿ ದೇಶಕ್ಕೆ ವಿದೇಶಿ ಬಂಡವಾಳದ ಒಳಹರಿವನ್ನು ಹೆಚ್ಚಿಸಲು 5 ಪ್ರಮುಖ ಕ್ರಮಗಳನ್ನು ಪ್ರಕಟಿಸಿದೆ. ಆರ್ಬಿಐ ಗವರ್ನರ್ ಸಂಜಯ್ ಮಲ್ಹೋತ್ರಾ ಅವರು ಹಣಕಾಸು ನೀತಿ ಸಮಿತಿ (MPC) ಸಭೆಯ ನಂತರ ಈ ಪ್ರಮುಖ ನಿರ್ಧಾರಗಳನ್ನು ಪ್ರಕಟಿಸಿದ್ದಾರೆ. ಆರ್ಬಿಐ ಪ್ರಕಟಿಸಿದ ಆ 5 ಪ್ರಮುಖ ಕ್ರಮಗಳ ವಿವರ ಮುಂದಿದೆ.
ಷೇರು ಮಾರುಕಟ್ಟೆಯಲ್ಲಿ ಎನ್ಆರ್ಐ/ಒಸಿಐ ಹೂಡಿಕೆ ಮಿತಿ ಹೆಚ್ಚಳ
ಅನಿವಾಸಿ ಭಾರತೀಯರು (NRI) ಮತ್ತು ಸಾಗರೋತ್ತರ ಭಾರತೀಯ ನಾಗರಿಕರು (OCI) ಸೆಬಿ (SEBI) ನೋಂದಣಿ ಇಲ್ಲದೆಯೇ ಭಾರತದ ಲಿಸ್ಟೆಡ್ ಷೇರುಗಳಲ್ಲಿ ಹೂಡಿಕೆ ಮಾಡಲು ಇರುವ ಮಿತಿಯನ್ನು ಆರ್ಬಿಐ ಹೆಚ್ಚಿಸಿದೆ. ಈ ಸೌಲಭ್ಯವನ್ನು ವಿದೇಶದಲ್ಲಿರುವ ಎಲ್ಲಾ ಭಾರತೀಯ ನಿವಾಸಿಗಳಿಗೂ ವಿಸ್ತರಿಸಲಾಗಿದೆ.
ಬ್ಯಾಂಕುಗಳಿಗೆ ಹೆಡ್ಜಿಂಗ್ ವೆಚ್ಚದ ಬೆಂಬಲ (Hedging Support)
ವಿದೇಶಿ ಕರೆನ್ಸಿ ಅನಿವಾಸಿ (FCNR-B) ಠೇವಣಿಗಳನ್ನು 3 ರಿಂದ 5 ವರ್ಷಗಳ ಅವಧಿಗೆ ಕ್ರೋಢೀಕರಿಸುವ ಬ್ಯಾಂಕುಗಳಿಗೆ, ಆರ್ಬಿಐ ಸೆಪ್ಟೆಂಬರ್ 30 ರವರೆಗೆ ಸಂಪೂರ್ಣ ಹೆಡ್ಜಿಂಗ್-ವೆಚ್ಚದ ಬೆಂಬಲವನ್ನು (ವಿದೇಶಿ ವಿನಿಮಯ ದರ ಏರಿಳಿತದ ನಷ್ಟದಿಂದ ರಕ್ಷಣೆ) ಮುಂದುವರಿಸಲು ನಿರ್ಧರಿಸಿದೆ.
ಇದನ್ನೂ ಓದಿ: ಭಾರತೀಯ ಷೇರು ಮಾರುಕಟ್ಟೆಯಲ್ಲಿ ಸೆಬಿ ನೊಂದಣಿ ಇಲ್ಲದೇ ಎನ್ಆರ್ಐಗಳಿಗೆ ಹೂಡಿಕೆ ಮಿತಿ ಹೆಚ್ಚಳ
ರಫ್ತು ಆದಾಯ ತರುವ ಅವಧಿ 9 ತಿಂಗಳಿಗೆ ಕಡಿತ
ಜಾಗತಿಕ ಆರ್ಥಿಕ ಅನಿಶ್ಚಿತತೆಯ ಸಮಯದಲ್ಲಿ ರಫ್ತುದಾರರಿಗೆ ನೆರವಾಗಲು ಈ ಹಿಂದೆ ರಫ್ತು ಆದಾಯವನ್ನು ಭಾರತಕ್ಕೆ ತರಲು 15 ತಿಂಗಳ ಕಾಲಾವಕಾಶ ನೀಡಲಾಗಿತ್ತು. ಈಗ ಜಾಗತಿಕ ಪರಿಸ್ಥಿತಿ ಸುಧಾರಿಸುತ್ತಿರುವುದರಿಂದ, ರಫ್ತುದಾರರು ತಮ್ಮ ಸರಕುಗಳನ್ನು ಕಳುಹಿಸಿದ (Shipment) ದಿನಾಂಕದಿಂದ 9 ತಿಂಗಳ ಒಳಗಾಗಿ ಆ ಹಣವನ್ನು ಭಾರತಕ್ಕೆ ತರುವುದನ್ನು ಆರ್ಬಿಐ ಕಡ್ಡಾಯಗೊಳಿಸಿದೆ.
ಸಾರ್ವಜನಿಕ ವಲಯದ ಇಸಿಬಿಗಳಿಗೆ ರಿಯಾಯಿತಿ ದರದ ಸ್ವಾಪ್ ವಿಂಡೋ ವಿಸ್ತರಣೆ
ಸಾರ್ವಜನಿಕ ವಲಯದ ಉದ್ಯಮಗಳು (PSU) ವಿದೇಶದಿಂದ ಪಡೆಯುವ ಬಾಹ್ಯ ವಾಣಿಜ್ಯ ಸಾಲಗಳಿಗಾಗಿ (ECB) ನೀಡಲಾಗುವ ರಿಯಾಯಿತಿ ದರದ ಫಾರೆಕ್ಸ್ ಸ್ವಾಪ್ ವಿಂಡೋ (Concessional Forex Swap Window) ಸೌಲಭ್ಯವನ್ನು ಸೆಪ್ಟೆಂಬರ್ 30, 2026 ರವರೆಗೆ ಆರ್ಬಿಐ ವಿಸ್ತರಿಸಿದೆ. ಇದರಿಂದ ಸರ್ಕಾರಿ ಸ್ವಾಮ್ಯದ ಸಂಸ್ಥೆಗಳು ಕಡಿಮೆ ವೆಚ್ಚದಲ್ಲಿ ವಿದೇಶಿ ಸಾಲ ಪಡೆಯಲು ಮತ್ತು ರಿಸ್ಕ್ ನಿರ್ವಹಿಸಲು ಸಾಧ್ಯವಾಗುತ್ತದೆ.
ದೀರ್ಘಾವಧಿ ಸರ್ಕಾರಿ ಬಾಂಡ್ಗಳಿಗೂ ‘ಫಾರ್’ (FAR) ಮುಕ್ತ ಅವಕಾಶ
ವಿದೇಶಿ ಹೂಡಿಕೆದಾರರು ಭಾರತದ ಸಾರ್ವಜನಿಕ ಸಾಲ ಮಾರುಕಟ್ಟೆಯಲ್ಲಿ ಸುಲಭವಾಗಿ ಭಾಗವಹಿಸಲು ಅನುವಾಗುವಂತೆ, ಹೊಸದಾಗಿ ಬಿಡುಗಡೆ ಮಾಡಲಾದ 15-ವರ್ಷ, 30-ವರ್ಷ ಮತ್ತು 40-ವರ್ಷಗಳ ಸರ್ಕಾರಿ ಭದ್ರತಾ ಪತ್ರಗಳನ್ನು (G-Secs) ಆರ್ಬಿಐ ‘ಫುಲ್ಲಿ ಅಕ್ಸೆಸಿಬಲ್ ರೂಟ್’ (Fully Accessible Route – FAR) ಅಡಿಯಲ್ಲಿ ಸೇರಿಸಿದೆ. ಇದರಿಂದ ವಿದೇಶಿ ಹೂಡಿಕೆದಾರರು ಯಾವುದೇ ನಿರ್ಬಂಧವಿಲ್ಲದೆ ದೀರ್ಘಾವಧಿ ಬಾಂಡ್ಗಳಲ್ಲಿ ಹೂಡಿಕೆ ಮಾಡಬಹುದು.
ಇದನ್ನೂ ಓದಿ: ಬಾಂಡ್ ಮಾರುಕಟ್ಟೆಯಲ್ಲಿ ವಿದೇಶೀ ಹೂಡಿಕೆದಾರರಿಗೆ ಕ್ಯಾಪಿಟಲ್ ಗೇನ್ಸ್ ಟ್ಯಾಕ್ಸ್ ಹೊರೆ ಇಲ್ಲ
ಜಾಗತಿಕವಾಗಿ ಇರಾನ್-ಅಮೆರಿಕ ಯುದ್ಧದ ಆತಂಕದಿಂದಾಗಿ ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿಯದಂತೆ ತಡೆಯಲು ಮತ್ತು ಭಾರತದ ಫಾರೆಕ್ಸ್ ಮಾರುಕಟ್ಟೆಯಲ್ಲಿ ಲಿಕ್ವಿಡಿಟಿ (ಹಣದ ಹರಿವು) ಕಾಯ್ದುಕೊಳ್ಳಲು ಆರ್ಬಿಐ ಈ ರಕ್ಷಣಾತ್ಮಕ ಮತ್ತು ಆಕ್ರಮಣಕಾರಿ ಆರ್ಥಿಕ ಕ್ರಮಗಳನ್ನು ಕೈಗೊಂಡಿದೆ. ಅಲ್ಲದೆ, ಪ್ರಸ್ತುತ ರೆಪೊ ದರವನ್ನು (Repo Rate) ಯಾವುದೇ ಬದಲಾವಣೆಯಿಲ್ಲದೆ 5.25% ರಷ್ಟೇ ಮುಂದುವರಿಸಲಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
