Retail Inflation: 2021ರ ನವೆಂಬರ್ ಚಿಲ್ಲರೆ ಹಣದುಬ್ಬರ ದರ ಶೇ 4.91ಕ್ಕೆ ಏರಿಕೆ

ಸಾಂಖ್ಯಿಕ ಹಾಗೂ ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯ (MoSPI) ಡಿಸೆಂಬರ್ 13ರ ಸೋಮವಾರ ಬಿಡುಗಡೆ ಮಾಡಿದ ಅಂಕಿಅಂಶಗಳ ಪ್ರಕಾರ, ಗ್ರಾಹಕ ಬೆಲೆ ಸೂಚ್ಯಂಕದಿಂದ (CPI) ಅಳೆಯುವ ದೇಶದ ಚಿಲ್ಲರೆ ಹಣದುಬ್ಬರ ದರವು 2021ರ ನವೆಂಬರ್​ನಲ್ಲಿ ಶೇಕಡಾ 4.91ಕ್ಕೆ ಏರಿಕೆ ಆಗಿದೆ. 2021ರ ಅಕ್ಟೋಬರ್‌ನಲ್ಲಿ ಶೇ 4.48ರಷ್ಟು ದಾಖಲಾದ ಹಣದುಬ್ಬರವು ಅನುಕ್ರಮವಾಗಿ ಹೆಚ್ಚಿದೆ. ಆದರೆ ವರ್ಷದಿಂದ ವರ್ಷಕ್ಕೆ, ಅಂದರೆ 2020ರ ನವೆಂಬರ್​ನಲ್ಲಿ ಇದ್ದ ಹಣದುಬ್ಬರದ ದರ ಶೇ 6.93ಕ್ಕೆ ಹೋಲಿಸಿದಲ್ಲಿ ಕುಸಿತವನ್ನು ದಾಖಲಿಸಿದೆ. ಅನುಕ್ರಮದ ಆಧಾರದಲ್ಲಿ ಈ ಏರಿಕೆಗೆ ಆಹಾರದ ಬೆಲೆಗಳಲ್ಲಿ, ಅದರಲ್ಲೂ ವಿಶೇಷವಾಗಿ ತರಕಾರಿಗಳ ಬೆಲೆ ಹೆಚ್ಚಳವು ಇದಕ್ಕೆ ಕಾರಣವಾಯಿತು ಎಂದು ಸರ್ಕಾರದ ಅಂಕಿ-ಅಂಶಗಳು ತೋರಿಸಿವೆ. ಒಟ್ಟಾರೆ ಗ್ರಾಹಕ ಆಹಾರ ಬೆಲೆ ಸೂಚ್ಯಂಕವು (CFPI) ಹಿಂದಿನ ತಿಂಗಳಲ್ಲಿ ಶೇ 0.85ಕ್ಕೆ ಹೋಲಿಸಿದರೆ ಶೇ 1.87ಕ್ಕೆ ಏರಿದೆ.

ನವೆಂಬರ್‌ನಲ್ಲಿ CFPI ಮತ್ತು CPI-ಆಧಾರಿತ ಹಣದುಬ್ಬರ ಎರಡೂ ಗ್ರಾಮೀಣ ಪ್ರದೇಶಕ್ಕೆ ಹೋಲಿಸಿದರೆ ದೇಶದ ನಗರ ಭಾಗಗಳಲ್ಲಿ ಹೆಚ್ಚಾಗಿದೆ. ರೀಟೇಲ್ ಚಿಲ್ಲರೆ ಹಣದುಬ್ಬರವು ನಗರ ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಕ್ರಮವಾಗಿ ಶೇ 5.54 ಮತ್ತು ಶೇ 4.29ರಷ್ಟು ಏರಿಕೆಯಾಗಿದೆ. ಆದರೆ ಆಹಾರ ಹಣದುಬ್ಬರವು ನಗರ ಪ್ರದೇಶಗಳಲ್ಲಿ ಶೇ 3.33 ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ ಶೇ 1.09ರಷ್ಟು ಏರಿಕೆಯಾಗಿದೆ. ಸತತ ಐದನೇ ತಿಂಗಳು ಚಿಲ್ಲರೆ ಹಣದುಬ್ಬರವು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ(RBI) ಗುರಿಯಾದ ಶೇ 6ಕ್ಕಿಂತ ಕೆಳಗಿದೆ. 2026ರ ಮಾರ್ಚ್​ವರೆಗೆ ಚಿಲ್ಲರೆ ಹಣದುಬ್ಬರ ದರವು ಶೇ 4ರ ಮೇಲಿನ ಹಾಗೂ ಕೆಳಗಿನ ಸ್ತರದಲ್ಲಿ ಶೇ 2 (+ ಅಥವಾ -)ರಲ್ಲೇ ನಿರ್ವಹಣೆ ಮಾಡುವಂತೆ ಕೇಂದ್ರದಿಂದ ನಿರ್ದೇಶಿಸಲಾಗಿದೆ.

ಆರ್​ಬಿಐ ದ್ವೈಮಾಸಿಕ ಹಣಕಾಸು ನೀತಿಯನ್ನು ಸಿದ್ಧಪಡಿಸುವಾಗ ಡಿಸೆಂಬರ್ 8ರಂದು ಕೇಂದ್ರ ಬ್ಯಾಂಕ್‌ನ ಹಣಕಾಸು ನೀತಿ ಸಮಿತಿಯು (MPC) ಸತತ ಒಂಬತ್ತನೇ ಬಾರಿಗೆ ರೆಪೊ ದರವನ್ನು ಶೇಕಡಾ 4ರಲ್ಲಿ ಯಥಾಸ್ಥಿತಿಯಲ್ಲಿ ಇಡಲು ನಿರ್ಧರಿಸಿತು. ಗಮನಿಸಬೇಕಾದ ಅಂಶವೇನೆಂದರೆ, ಆರ್‌ಬಿಐ 2021-22ರ ಹಣಕಾಸು ವರ್ಷದಲ್ಲಿ ಸಿಪಿಐ ಹಣದುಬ್ಬರವನ್ನು ಶೇಕಡಾ 5.3 ಎಂದು ಅಂದಾಜು ಮಾಡಿದೆ. ಇದು ಎರಡನೇ ತ್ರೈಮಾಸಿಕದಲ್ಲಿ ಶೇ 5.1, ಮೂರನೆಯದರಲ್ಲಿ ಶೇ 4.5, ಆರ್ಥಿಕ ವರ್ಷದ ಕೊನೆಯ ತ್ರೈಮಾಸಿಕದಲ್ಲಿ ಶೇ 5.8 ಎಂದು ಅಂದಾಜು ಮಾಡಿದೆ. 2022-23ರ ಏಪ್ರಿಲ್-ಜೂನ್ ಅವಧಿಯಲ್ಲಿ ಚಿಲ್ಲರೆ ಹಣದುಬ್ಬರವು ಶೇ 5.2 ಎಂದು ಅಂದಾಜಿಸಲಾಗಿದೆ.

ಇದನ್ನೂ ಓದಿ: Retail Inflation: ಅಕ್ಟೋಬರ್ ಚಿಲ್ಲರೆ ಹಣದುಬ್ಬರ ದರ ಶೇ 4.48ಕ್ಕೆ ಏರಿಕೆ

Published On - 8:13 pm, Mon, 13 December 21