TV9kannada Web Team | Edited By: Srinivas Mata
Mar 29, 2022 | 11:47 AM
ಹಣಕಾಸು ವರ್ಷ (FY) 2020-21ಕ್ಕೆ ಆದಾಯ ತೆರಿಗೆ ರಿಟರ್ನ್ (ITR) ಇನ್ನೂ ಫೈಲ್ ಮಾಡಿಲ್ಲವಾ? ಹಣಕಾಸು ವರ್ಷ 2020-21ಕ್ಕೆ ನಿಮ್ಮ ಟಿಡಿಎಸ್, ಟಿಸಿಎಸ್ 50 ಸಾವಿರ ರೂಪಾಯಿ ಅಥವಾ ಅದಕ್ಕಿಂತ ಹೆಚ್ಚಿಗೆ ಇದ್ದಲ್ಲಿ ಏಪ್ರಿಲ್ 1, 2022ರಿಂದ ಹೆಚ್ಚಿನ ಟಿಡಿಎಸ್, ಟಿಸಿಎಸ್ ಪಾವತಿಸಬೇಕಾಗುತ್ತದೆ. ಇದು ಏಕೆಂದರೆ, ಸರ್ಕಾರವು ಕಾನೂನಿಗೆ ತಿದ್ದುಪಡಿ ತಂದಿದೆ. ಅದರ ಪ್ರಕಾರ ಒಂದು ವರ್ಷ ಐಟಿಆರ್ ಫೈಲ್ ಮಾಡದಿದ್ದಲ್ಲಿ ಮತ್ತು ಹಿಂದಿನ ಹಣಕಾಸು ವರ್ಷದಲ್ಲಿ ಟಿಡಿಎಸ್ 50 ಸಾವಿರ ರೂಪಾಯಿ ದಾಟಿದ್ದಲ್ಲಿ ಮುಂದಿನ ಹಣಕಾಸು ವರ್ಷಕ್ಕೆ ಹೆಚ್ಚಿನ ದರದಲ್ಲಿ ಟಿಡಿಎಸ್, ಟಿಸಿಎಸ್ ಕಡಿತಕ್ಕೆ ಕಾರಣ ಆಗುತ್ತದೆ. ಈ ರೀತಿ ಹೆಚ್ಚಿನ ದರಗಳು ನಿರ್ದಿಷ್ಟ ಆದಾಯ ಮೂಲಗಳಾದ ಆರ್ಡಿ (ರೆಕರಿಂಗ್ ಡೆಪಾಸಿಟ್) ಮೇಲಿನ ಬಡ್ಡಿ, ಎಫ್ಡಿ (ಫಿಕ್ಸೆಡ್ ಡೆಪಾಸಿಟ್) ಮೇಲಿನ ಬಡ್ಡಿ, ಡಿವಿಡೆಂಡ್ ಆದಾಯ, ವರ್ಷಾಶನ (ಆನ್ಯುಯಿಟಿ) ಪಾವತಿ ಮುಂತಾದವುಗಳಿಗೆ ಅನ್ವಯ ಆಗುತ್ತದೆ.
ಹೆಚ್ಚಿನ ಟಿಡಿಎಸ್, ಟಿಸಿಎಸ್ಗೆ ಸಂಬಂಧಿಸಿದಂತೆ ಏನಿದು ಹೊಸ ನಿಯಮ? 2021ರ ಬಜೆಟ್ನಲ್ಲಿ ಹೆಚ್ಚಿನ ಟಿಡಿಎಸ್, ಟಿಸಿಎಸ್ಗೆ ಸಂಬಂಧಿಸಿದ ಕಾನೂನು ಘೋಷಣೆ ಮಾಡಲಾಯಿತು. 2021-22ರ ಹನಕಾಸು ವರ್ಷಕ್ಕೆ ಯಾರಾದರೂ ವೈಯಕ್ತಿಕವಾಗಿ ಹಣಕಾಸು ವರ್ಷ 2018-19 ಮತ್ತು 2019-20ಕ್ಕೆ ಐಟಿಆರ್ ಫೈಲ್ ಮಾಡದಿದ್ದಲ್ಲಿ ಹಾಗೂ ಪ್ರತಿ ವರ್ಷ ಟಿಡಿಎಸ್ ಮತ್ತು ಟಿಸಿಎಸ್ ಕಡಿತ ಮಾಡಬೇಕಾದದ್ದು 50 ಸಾವಿರ ರೂಪಾಯಿ ದಾಟಿದ್ದಲ್ಲಿ ಆಗ ತೆರಿಗೆದಾರರ ಬಡ್ಡಿ ಆದಾಯ, ಡಿವಿಡೆಂಡ್ ಆದಾಯ, ವರ್ಷಾಶನ ಪಾವತಿ ಮುಂತಾದವುಗಳಿಂದ ಹೆಚ್ಚಿನ ತೆರಿಗೆಯನ್ನು ಕಡಿತ ಮಾಡಲಾಗುತ್ತದೆ.
ಬಜೆಟ್ 2022ರಲ್ಲಿ ಈ ಮೇಲ್ಕಂಡ ಕಾನೂನನ್ನು ತಿದ್ದುಪಡಿ ಮಾಡಿದ್ದೇ ಹೆಚ್ಚು ಕಠಿಣ ಮಾಡುವ ಉದ್ದೇಶದಿಂದ. ತಿದ್ದುಪಡಿ ಆದ ಕಾನೂನಿನ ಪ್ರಕಾರ, ಹಣಕಾಸು ವರ್ಷ 2022-23ರಿಂದ ವೈಯಕ್ತಿಕವಾಗಿ 2019-20ರ ಹಣಕಾಸು ವರ್ಷಕ್ಕೆ ಐಟಿಆರ್ ಫೈಲ್ ಮಾಡಿ, 2020-21ರ ಸಾಲಿಗೆ ಮಾಡಿಲ್ಲ ಹಾಗೂ ಒಟ್ಟಾರೆಯಾಗಿ 2020-21ರ ಹಣಕಾಸು ವರ್ಷಕ್ಕೆ ಒಟ್ಟು ಟಿಡಿಎಸ್ 50 ಸಾವಿರ ರೂಪಾಯಿ ದಾಟಿದಲ್ಲಿ ಏಪ್ರಿಲ್ 1, 2022ರಿಂದ ಅಂಥವರಿಂದ ಹೆಚ್ಚಿನ ಟಿಡಿಎಸ್ಮ ಟಿಸಿಎಸ್ ಕಡಿತ ಮಾಡಲಾಗುವುದು.
ಈ ಬಗ್ಗೆ ವಿಷಯ ತಜ್ಞರು ವಿವರಿಸುವುದು ಹೀಗೆ, ಐಟಿಆರ್ ಫೈಲಿಂಗ್ ವೆಬ್ಸೈಟ್ ಹೇಳುವಂತೆ, ಸೆಕ್ಷನ್ 206-AB ಉದ್ದೇಶಕ್ಕಾಗಿ, ತಿದ್ದುಪಡಿಯಾದ ನಿಯಮಾವಳಿಯ ಪ್ರಕಾರ, ಹಣಕಾಸು ವರ್ಷ 2020-21ಕ್ಕೆ ಐಟಿಆರ್ ಫೈಲ್ ಮಾಡದಿದ್ದಲ್ಲಿ ಮತ್ತು ಆ ವರ್ಷಕ್ಕೆ ಟಿಡಿಎಸ್, ಟಿಸಿಎಸ್ 50 ಸಾವಿರ ರೂಪಾಯಿ ದಾಟಿದ್ದಲ್ಲಿ ಹಣಕಾಸು ವರ್ಷ 2022-23ಕ್ಕೆ ವಹಿವಾಟಿನ ಮೇಲೆ ಹೆಚ್ಚಿನ ದರದ ಟಿಡಿಎಸ್ ಅನ್ವಯ ಆಗುತ್ತದೆ. ಆದಾಯ ತೆರಿಗೆ ಇಲಾಖೆ ಸಹ ಇದನ್ನೇ ತಮ್ಮ ಅಧಿಕೃತ ಟ್ವಿಟರ್ ಹ್ಯಾಂಡಲ್ನಿಂದ ಟ್ವೀಟ್ ಮಾಡಿದೆ. ಅದರ ಪ್ರಕಾರ, ಐಟಿಆರ್ ಫೈಲಿಂಗ್ ಮಾಡಲಿಲ್ಲ ಅಂದರೆ ಅದರ ಪರಿಣಾಮವಾಗಿ ಹೆಚ್ಚಿನ ಟಿಡಿಎಸ್ ಮುಂದಿನ ವರ್ಷ ಆಗುತ್ತದೆ. ಅಸೆಸ್ಮೆಂಟ್ ವರ್ಷ 2021-22ಕ್ಕೆ ಐಟಿಆರ್ ಫೈಲ್ ಮಾಡುವುದಕ್ಕೆ ಮಾರ್ಚ್ 31, 2022 ಕೊನೆ ದಿನ. ಆ ದಿನದ ತನಕ ಕಾಯುವುದು ಬೇಡ.
ಅಸೆಸ್ಮೆಂಟ್ ವರ್ಷ 2021-22 ಅಂದರೆ, ಹಣಕಾಸು ವರ್ಷ 2020-21.
ಹೆಚ್ಚಿನ ಟಿಡಿಎಸ್/ಟಿಸಿಎಸ್ ದರ ಆದಾಯ ತೆರಿಗೆ ಕಾಯ್ದೆ, 1961, ಟಿಡಿಎಸ್, ಟಿಸಿಎಸ್ ಅನ್ನು ಈ ಕೆಳಗಿನವುಗಳಲ್ಲಿ ಯಾವುದು ಹೆಚ್ಚೋ ಆ ದರದಲ್ಲಿ ಕಡಿತ ಮಾಡಲಾಗುತ್ತದೆ. 1) ಸಂಬಂಧಪಟ್ಟ ಕಾಯ್ದೆಯಲ್ಲಿ ಇರುವ ನಿಯಮಾವಳಿಯಂತೆ ನಿರ್ದಿಷ್ಟವಾಗಿ ಹೇಳಿರುವ ದರದ ದುಪ್ಪಟ್ಟು ಅಥವಾ 2) ಈಗಾಗಲೇ ಇರುವ ದರದ ಅಥವಾ ದರಗಳ ದುಪ್ಪಟ್ಟು; ಅಥವಾ 3) ಶೇ 5ರ ದರ
ಹೆಚ್ಚಿನ ಟಿಡಿಎಸ್, ಟಿಸಿಎಸ್ ಹೇಗೆ ಕಡಿತ ಮಾಡಲಾಗುತ್ತದೆ? ಕೇಂದ್ರೀಯ ನೇರ ತೆರಿಗೆ ಮಂಡಳಿ (CBDT) ಸುತ್ತೋಲೆಯೊಂದನ್ನು 2021ರ ಜೂನ್ನಲ್ಲಿ ಬಿಡುಗಡೆ ಮಾಡಿದ್ದು, ಯಾವ ವ್ಯಕ್ತಿಗಳ ಮೇಲೆ ಹೆಚ್ಚಿನ ದರದ ಟಿಡಿಎಸ್, ಟಿಸಿಎಸ್ ಅನ್ವಯಿಸಬೇಕು ಎಂಬುದರ ನಿರ್ದಿಷ್ಟ ಕ್ರಮಗಳ ಬಗ್ಗೆ ಪಟ್ಟಿಯನ್ನು ನೀಡಲಾಗಿದೆ. ಹಣಕಾಸು ಸಂಸ್ಥೆಗಳಾದ ಬ್ಯಾಂಕ್ಗಳು, ಕಂಪೆನಿಗಳು ಹೀಗೆ ಟಿಡಿಎಸ್ ಕಡಿತ ಮಾಡಿಕೊಳ್ಳಬೇಕಾದಂಥವು ಆ ವ್ಯಕ್ತಿಯ PAN (ಪರ್ಮನೆಂಟ್ ಅಕೌಂಟ್ ನಂಬರ್) ಅನ್ನು ಆದಾಯ ತೆರಿಗೆ ಇ-ಫೈಲಿಂಗ್ ಪೋರ್ಟಲ್ನ ನಿರ್ದಿಷ್ಟ ಸ್ಥಳದಲ್ಲಿ ನಮೂದಿಸಬೇಕು. ಆಗ ಹೆಚ್ಚಿನ ಟಿಡಿಎಸ್, ಟಿಸಿಎಸ್ ಅನ್ವಯಿಸಬಹುದಾ ಎಂಬುದನ್ನು ಪರಿಶೀಲಿಸಬಹುದು.
ಆ ಸುತ್ತೋಲೆಯ ಪ್ರಕಾರ, ಒಬ್ಬ ವ್ಯಕ್ತಿಯು ಒಮ್ಮೆ ITR ಅನ್ನು ಫೈಲ್ ಮಾಡಿದರೆ ಆ ನಂತರ ಹೆಚ್ಚಿನ ಟಿಡಿಎಸ್, ಟಿಸಿಎಸ್ ಅನ್ವಯವಾಗುವ ವ್ಯಕ್ತಿಗಳ ಪಟ್ಟಿಯಿಂದ ಹೆಸರನ್ನು ತೆಗೆಯಲಾಗುತ್ತದೆ. ಹೀಗಾಗಿ, ಒಬ್ಬ ವ್ಯಕ್ತಿಯು ಹಣಕಾಸು ವರ್ಷ 2020-21ರ ಸಾಲಿಗೆ ಐಟಿಆರ್ ಫೈಲಿಂಗ್ ತಪ್ಪಿಸಿಕೊಂಡರೂ ಹಣಕಾಸು ವರ್ಷ 2021-22ಕ್ಕೆ ಐಟಿಆರ್ ಅನ್ನು ಸಲ್ಲಿಸಿದರೂ (ಕೊನೆಯ ದಿನಾಂಕ ಜುಲೈ 31 ಆಗಿದೆ, ಸರ್ಕಾರವು ವಿಸ್ತರಿಸದ ಹೊರತು), ಹೆಚ್ಚಿನ ಟಿಡಿಎಸ್, ಟಿಸಿಎಸ್ ಅನ್ವಯವಾಗುವ ವ್ಯಕ್ತಿಗಳ ಪಟ್ಟಿಯಿಂದ ಅಂಥ ವ್ಯಕ್ತಿಯ ಹೆಸರನ್ನು ತೆಗೆಯಲಾಗುತ್ತದೆ. ಆದರೆ ಐಟಿಆರ್ ಅನ್ನು ಸಲ್ಲಿಸುವ ಅಂತಿಮ ದಿನಾಂಕದ ಮುಕ್ತಾಯ ನಂತರ ಅಥವಾ ಐಟಿಆರ್ ಅನ್ನು ಸಲ್ಲಿಸಿ, ಪರಿಶೀಲಿಸಿದ ನಂತರ ಮಾತ್ರ ಹೆಸರನ್ನು ತೆಗೆಯಲಾಗುತ್ತದೆ.
ಪಟ್ಟಿಯಿಂದ ಒಬ್ಬರ ಹೆಸರನ್ನು ತೆಗೆಯುವವರೆಗೆ ಹೆಚ್ಚಿನ ಟಿಡಿಎಸ್, ಟಿಸಿಎಸ್ ವಿಧಿಸುವುದನ್ನು ಮುಂದುವರಿಸಲಾಗುತ್ತದೆ. ಆದ್ದರಿಂದ ಹಣಕಾಸು ವರ್ಷ 2022-23ರ ಆರಂಭದಿಂದ ಹೆಚ್ಚಿನ ಟಿಡಿಎಸ್, ಟಿಸಿಎಸ್ ಅನ್ನು ತಪ್ಪಿಸಲು ಹಣಕಾಸು ವರ್ಷ 2020-21ಕ್ಕೆ ಐಟಿಆರ್ ಅನ್ನು ಸಲ್ಲಿಸುವುದು ಉತ್ತಮ.
ಇದನ್ನೂ ಓದಿ: Budget 2022: ಬಜೆಟ್ನಲ್ಲಿ ಕ್ರಿಪ್ಟೋ ವಹಿವಾಟಿನ ಮೇಲೆ ಟಿಡಿಎಸ್/ಟಿಸಿಎಸ್ ವಿಧಿಸಲು ಸರ್ಕಾರ ಚಿಂತನೆ
