ಯುವ ನಟರೊಟ್ಟಿಗೆ ಅದೃಷ್ಟ ಪರೀಕ್ಷೆಗಿಳಿದ ಆಮಿರ್ ಖಾನ್

ಆಮಿರ್ ಖಾನ್ (Aamir Khan), ಇತರೆ ಇಬ್ಬರು ಸ್ಟಾರ್ ಖಾನ್​​ಗಳ ರೀತಿ ಗೆಲುವಿಗಾಗಿ ಮಾಸ್, ಕಮರ್ಶಿಯಲ್ ಸಿನಿಮಾಗಳನ್ನು ಮಾಡುವವರಲ್ಲ. ಆದರೆ ಆಗೊಮ್ಮೆ-ಈಗೊಮ್ಮೆ ಕಮರ್ಶಿಯಲ್ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುತ್ತಾರೆ. ‘ಗಜಿನಿ’, ‘ಧೂಮ್ 4’ ಇನ್ನೂ ಕೆಲವು ಸಿನಿಮಾಗಳಲ್ಲಿ ಆಮಿರ್ ನಟಿಸಿದ್ದಿದೆ. ಭಾರಿ ನಿರೀಕ್ಷೆ ಇರಿಸಿದ್ದ ‘ಲಾಲ್ ಸಿಂಗ್ ಛಡ್ಡಾ’ ಹೀನಾಯ ಸೋಲು ಕಂಡಿತ್ತು. ಅದಾದ ಬಳಿಕ ನಟಿಸಿದ ಸಣ್ಣ ಬಜೆಟ್​​ನ ಸಿನಿಮಾ ‘ಸಿತಾರೆ ಜಮೀನ ಪರ್’ ಹಿಟ್ ಎನಿಸಿಕೊಂಡಿತು. ಇದೀಗ ಮತ್ತೊಮ್ಮೆ ಕಮರ್ಶಿಯಲ್ ಸಿನಿಮಾನಲ್ಲಿ ನಟಿಸಲು ಸಜ್ಜಾಗಿದ್ದಾರೆ. ಅದೂ ಯುವ ನಟರ ಜೊತೆಗೆ.

ಹಿಂದಿಯ ಹಿಟ್ ಫ್ರಾಂಚೈಸ್​​ಗಳಲ್ಲಿ ‘ರೇಸ್’ ಸಹ ಒಂದು. ‘ರೇಸ್’ ಸರಣಿಯ ಮೂರು ಸಿನಿಮಾಗಳು ಈಗಾಗಲೇ ಬಿಡುಗಡೆ ಆಗಿವೆ. 2008 ರಲ್ಲಿ ಬಿಡುಗಡೆ ಆಗಿದ್ದ ‘ರೇಸ್’ ಸಿನಿಮಾ ಭಾರಿ ದೊಡ್ಡ ಹಿಟ್ ಆಗಿತ್ತು. ಅದಾದ ಬಳಿಕ ಎರಡು ಸಿನಿಮಾಗಳು ರಿಲೀಸ್ ಆಗಿದ್ದು, ಎರಡೂ ಸಹ ದೊಡ್ಡ ಯಶಸ್ಸನ್ನೇನೂ ಕಂಡಿಲ್ಲ. ಮೊದಲ ಹಾಗೂ ಎರಡನೇ ‘ರೇಸ್’ ಸಿನಿಮಾಗಳಲ್ಲಿ ಸೈಫ್ ಅಲಿ ಖಾನ್ ನಾಯಕನಾಗಿದ್ದರೆ ಮೂರನೇ ‘ರೇಸ್’ನಲ್ಲಿ ಸಲ್ಮಾನ್ ಖಾನ್ ನಾಯಕ ಆಗಿದ್ದರು. ಇದೀಗ ‘ರೇಸ್ 4’ನಲ್ಲಿ ಆಮಿರ್ ಖಾನ್ ನಟಿಸಲಿದ್ದಾರೆ.

ಇದನ್ನೂ ಓದಿ:ವಿದ್ಯಾರ್ಥಿ ಪ್ರತಿಭಟನೆ: ಮೌನ ವಹಿಸಿದ್ದಕ್ಕೆ ಕಾರಣ ತಿಳಿಸಿದ ಆಮಿರ್ ಖಾನ್ ಪುತ್ರಿ ಇರಾ ಖಾನ್

ನಿರ್ಮಾಪಕ ರಮೇಶ್ ತೌರಾನಿ ‘ರೇಸ್ 4’ ನಿರ್ಮಾಣ ಮಾಡುತ್ತಿದ್ದು, ಈ ಸಿನಿಮಾನಲ್ಲಿ ಆಮಿರ್ ಖಾನ್ ನಟಿಸುವುದು ಬಹುತೇಕ ಖಾತ್ರಿ ಆಗಿದೆ. ಅಲ್ಲದೆ ಇದೇ ಸಿನಿಮಾನಲ್ಲಿ ಆಮಿರ್ ಖಾನ್ ಜೊತೆಗೆ ಬಾಲಿವುಡ್​ನ ಇಬ್ಬರು ಯುವನಟರು ನಟಿಸಲಿದ್ದಾರೆ. ಅದುವೇ ಟೈಗರ್ ಶ್ರಾಫ್ ಮತ್ತು ಸಿದ್ಧಾರ್ಥ್ ಮಲ್ಹೋತ್ರಾ. ಮೂವರೂ ನಟರುಗಳಿಗೆ ಚಿತ್ರಕತೆ ಹೇಳಲಾಗಿದ್ದು, ಮೂರೂ ನಟರು ಸಿನಿಮಾನಲ್ಲಿ ನಟಿಸಲು ಒಪ್ಪಿಕೊಂಡಿದ್ದಾರೆ ಎನ್ನಲಾಗುತ್ತಿದೆ. ‘ರೇಸ್ 4’ ಸಿನಿಮಾವನ್ನು ವಿಜಯ್ ಕೃಷ್ಣ ಆಚಾರ್ಯ ನಿರ್ದೇಶನ ಮಾಡಲಿದ್ದಾರೆ. ಆಮಿರ್ ಖಾನ್ ಅವರು ಖುದ್ದು ಸಿನಿಮಾದ ಚಿತ್ರಕತೆಯಲ್ಲಿ ಕೆಲ ಬದಲಾವಣೆಗಳನ್ನು ಮಾಡಿಸಿದ್ದಾರೆ ಎನ್ನಲಾಗುತ್ತಿದೆ.

ಆಮಿರ್ ಖಾನ್ ಕೈಯಲ್ಲಿ ಕೆಲವು ಆಸಕ್ತಿಕರ ಸಿನಿಮಾಗಳು ಇವೆ. ಅವರ ನಿರ್ಮಾಣದ ‘ಬಟ್ವಾರಾ’ ಸಿನಿಮಾ ಇತ್ತೀಚೆಗಷ್ಟೆ ಬಿಡುಗಡೆ ಆಗಿದ್ದು, ಸಿನಿಮಾ ಅಷ್ಟೇನೂ ಯಶಸ್ವಿ ಆಗಲಿಲ್ಲ. ಅದಕ್ಕೆ ಮುಂಚೆ ತಮ್ಮ ಮಗನ ಸಿನಿಮಾ ನಿರ್ಮಾಣ ಮಾಡಿದ್ದರು. ಅದೂ ಸಹ ಫ್ಲಾಪ್ ಆಯ್ತು. ಇದೀಗ ‘ಲಲ್ಕಾರಾ’ ಹೆಸರಿನ ಸಿನಿಮಾನಲ್ಲಿ ನಟಿಸುತ್ತಿದ್ದಾರೆ. ಹೊಸ ಸಿನಿಮಾ ಒಂದರ ನಿರ್ಮಾಣವನ್ನೂ ಸಹ ಮಾಡುತ್ತಿದ್ದಾರೆ. ಇವುಗಳ ಜೊತೆಗೆ ‘ರೇಸ್ 4’ ಸಿನಿಮಾನಲ್ಲೂ ನಟಿಸಲು ಸಜ್ಜಾಗಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 12:40 pm, Tue, 1 September 26